د یادې سیمې خلک وايي ، دوی د نجونو سکولونه نه لري او نجونو ته یې په لنډمهاله توګه د هلکانو په سکولونو کې زده کړې ورکول کېږي.
دوی وايي ، د دې له کبله هلکان له خپلو سکولونو دباندې تر شنه اسمان لاندې پر زده کړو ترلاسه کولو مجبور دي.
د مناتو دا سیمه له صدې ښاره شاوخوا پنځویشت کلومیټر لرې د منځنۍ کورمې په حدودو کې راځي چې د هلکانو دوه سکولونه ، یو مډل او بل پرایمري دي خو د نجونو لپاره یو سکول هم نشته.
د مناتو یو اوسېدونکي غزني ګل مغزور مشال راډیو ته وویل ، دا ستونزه داسې هوارېدای شي چې د نجونو لپاره بېل سکولونه جوړ شي.
د دې سیمې یو بل اوسېدونکی نوید خان وايي ، د پرایمري سکول هلکان زده کوونکي اوس په خېمو کې درسونه وايي د کوم له کبله چې هغوی له یو شمېر ستونزو سره مخامخ دي.
نوید خان وویل ، که حکومت په سیمه کې د نجونو لپاره بېل سکول جوړ کړي نو دا به د نجونو او هلکانو ټولې ستونزې هوارې کړي.
ځايي اوسېدونکي وايي ، په منځني کورمه کې د نارینه پرتله د نجونو د تعلیم حالت ډېر خراب دی.
دوی وايي ، د ټولې سیمه په کچه د هلکانو لپاره ۱۲۷ سکلونه دي خو د نجونو لپاره یوازې ۳۱ سکولونه موجود دي.
د دوی په وینا ، د کورمې په ټولو سرکاري سکولونو کې د زده کونکو شمېر۸۷۰۰۰ دې چې نژدې ۲۴ زره پکې نجونه دي.
