د رپوټ په لیکنه، د ولسمشرۍ بلې نوماندې هیلري کلنټن ویلي چې امریکا باید د عامو خلکو د ژغورلو لپاره په ځینو سیمو کې د الوتکو پر پروازونو بندیز ولګوي.
ډونلډ ټرمپ ویلي چې که امریکا داسې وکړي نو ښايي دا د درېمې نړیوالې جګړې سبب وګرځي خو جېمز کلېپر ویلي، روس ښايي د امریکا الوتکې را وغورځوي.
جېمز کلېپر زیاته کړې که روس دا وګڼي چې امریکايي الوتکې پر مځکه د روسي عسکرو لپاره خطر جوړوي نو هغوی به یې را وغورځوي.
د هغه په وینا، روس چې خپل پرمخ تللی او وړتیا لرونکی دفاعي نظام په شام کې لګولی دی نو مانا یې دا ده چې استعمالوي به یې.
د اوسني ولسشمر باراک اوباما ادارې له روس سره د پوځي شخړې له امله په شام کې د نه الوت سیمو رامنځ ته کولو له ګامه ډډه کړې ده.
د مشال راډیو د خبر مرکزي څانګه لیکي چې دا وړاندیز یوازې هیلري کلنټن نه دي کړی بلکې د ډونلډ ټرمپ خپل مرستیال مایک پینس هم ورته نظر لري.
خو ډونلډ ټرمپ د اکتوبر پر پنځویشتمه رویټرز خبري اژانس ته ویلي که د هیلري کلنټن خبره ومنل شوه نو پایله به یې په درېمه نړیواله جګړه کې ښکېلېده وي.
د ډونلډ ټرمپ په وینا، اوس شام یوازې نه دی بلکې روس او ایران هم دي او روس داسې هېواد دی چې ایټمي وسلې هم لري.
د مشال راډیو خبرونو مرکزي څانګې رپوټ
