تازه خبر: د عوامي نیشنل ګوند سېند څانګې مشر سینېټر شاهي سید تور پورې کړی دی چې په کراچۍ کې په انتخاباتو کې درغلي روانه ده.

نوموړي پر انتخاباتي کمېشن تور پورې کړ چې د پاکو او رڼو انتخاباتو په عملي کولو کې پاتې راغلی دی.

ده وویل، د دوی په سیمو کې خلک ووټ اچولو ته هم نه پرېښودل کېږي.

تر دې مخکې ایم کیو ایم، جماعت اسلامي او پیپلز ګوند هم په کراچۍ کې د انتخاباتو په اړه اندېښنې وښودې او جماعت اسلامي خو په کراچۍ او حیدر اباد کې له انتخاباتو پرېکون هم اعلان کړ.

د پاکستان چیف الېکشن کمېشنر (د انتخاباتي کمېشن مشر) پخواني قاضي فخر الدین جي ابراهیم هم له رسنیو سره د خبرو پر وخت په کراچۍ کې د ګډوډۍ په اړه اندېښنه وښوده.

تازه خبر: د شمالي وزیرستان خلک وايي، ټول امېدواران یوازې هغه کسان ووټ ورکولو ته پرېږدي چې دوی ته رایه ورکوي.

دا امېدواران خلک په زور له رایې ورکولو ګرځوي. ځايي خلکو مشال راډیو ته وویل، نوماندان د ټوپک په زور په خپلو خپلو سیمو کې پر خلکو فشار راولي.

تازه خبر: د پاکستان انتخاباتي کمېشن د ووټ اچولو وخت غځولی دی.

په پاکستان کې تر پینڅو بجو پورې انتخابات روان ول، خو الېکشن کمېشن اوس اعلان وکړ چې د ووټ اچولو عمل به تر شپږو بجو پورې وغځوي ځکه چې په مختلفو ځایونو کې ډېر کسان لا هم په کتار کې ولاړ دي.

په پاکستان کې لا هم په ډېرو ځایونو کې د رایې اچولو عمل روان دی.

د دې هیواد ځینې ټیلي ویژن چینلونو د نتیجو اعلان کول هم پیل کړي دي، خو د مشال راډیو له مالوماتو سره سم، لا په یو ځای کې هم د ووټونو شمېر پوره شوی نه دی او نه هم نتیجې راغلې دي.