پاکستان انتخابات: د ووټونو شمېرلو عمل پیل

په صوابۍ کې ښځې هم نن په ګڼ شمېر کې راوتلې وې او په انتخاباتو کې یې برخه واخیسته.

دې ښځو نن د خپلې خوښې نوماندانو ته رایه ورکړه.

په دوی کې ځینو له مشال راډیو سره خبرې کړې دي. د دوی خبرې لاندې اورېدای شئ.

تازه خبر: د بلوچستان د زرغون اباد (نوي کلي) په پولېنګ سټېشن کې ډزې شوې دي.

دا د بلوچستان پي بي شپږم حلقه ده.

دلته دوو سیاسي ګوندونو (پښتونخوا ملي عوامي ګوند او عوامي نیشنل ګوند) تور پورې کړ چې د پاکستان تحریک انصاف ګوند کسان پولېنګ سټېشن ته ننوتي ول او هلته یې ښځې مجبورولې چې تحریک انصاف ته رایه ورکړي.

د دې په نتیجه کې هنګامه وشوه او بیا امنیتي سرتېرو ډزې وکړې.

په دې ډزو کې هیڅ کس نه دی ژوبل شوی.

دلته د تحریک انصاف غړو خبریالان هم پولېنګ سټېشن ته دننه نه دي پرېښي چې د پښتونخوا ملي عوامي او عوامي نیشنل ګوند د تور پلټنه وکړي.

تازه خبر: د پاکستان انتخاباتي کمېشن سېکرټر اشتیاق احمد ویلي دي چې په خیبر پښتونخوا او قبایلي سیمو کې په سوله ییزه توګه د ووټونو اچولو عمل شوی دی.

خبري غونډې ته د وینا پر وخت احمد وویل، نن دوی د خیبر پښتونخوا، قبایلي سیمو او بلوچستان د حالاتو په اړه اندېښمن ول خو د ((خوشالۍ خبره ده چې په ټول هیواد کې د ووټونو اچولو عمل په سوله ییزه توګه پای ته رسېدلی دی.))

اشتیاق احمد وویل، د خیبر پښتونخوا په ځینو ځایونو کې خو ۶۰ یا ۶۱ فیصده خلکو رایه ورکړه چې دا ((ډېر خوښوونکی کار)) دی.