د جنوبي وزیرستان د مکین سیمې اوسېدونکي وايي، امنیتي ځواکونو په سیمه کې د موبایل ټېلېفون انټرنېټ تړلی دی چې له وجې یې رابطې پرې شوې دي او کاروباري تاوانونه وراوښتي دي.
د مکین د سوداګرانو ټولنې مشر ریاض مسید د جون پر لومړۍ نېټه مشال راډيو ته وویل، د موبایل ټېلېفون انټرنېټ (درې جي او څلور جي) له تړلو سره کاروباریان له تاوانونو سره مخامخ شوي او د زده کوونکو زدکړې اغېزمنې شوې دي. "په سوېلي وزیرستان کې له تېرو شپږو ورځو راهیسې انټرنېټ بند دی. د انټرنېټ په وسیله خو ټوله دنیا له یو، بل سره تړلې ده او د خلکو رابطې دي. نن سبا ټول کاروبار په انټرنېټ روان دی. په مکین کې خواوشا ۷۰ داسې لوی دوکانداران دي چې د وټس ایپ له لارې د کروړونو روپیو کاروبار کوي او چې انټرنېټ نه وي، نو کاروبار ته یې تاوان رسي."
د سیمې اوسېدونکي وايي، انټرنېټ تر ډېرې مودې تړلی وو خو د مې پر ۲۰مه بیا فعال شو. دوی وايي، امنیتي ځواکونو څلور ورځې وروسته انټرنېټ بند کړ.
دوی زیاتوي چې که مسله یې هواره نه شوه نو په احتجاج به لاس پورې کړي.
د جنوبي وزیرستان انتظامیه وايي، هڅه کوي چې انټرنېټ ژر بحال شي. د سیمې مرستیال کمېشنر فرحان خان مشال راډیو ته وویل، د ضلعې انتظامي مشر د مکین بازار له دوکاندارانو سره خبرې کړې دي او ورته یې ډاډ ورکړی چې د مسلې د هواري لپاره به له اړوندو چارواکو سره رابطه کوي او ستونزه به ژر هواره شي.
په جنوبي وزیرستان کې په تېرو کلونو کې د انټرنېټ تړل کېدو له وجې د سیمې اوسېدونکو یوشمېر مظاهرې او احتجاجي ناستې کړې دي.
امنیتي ځواکونه وايي، په قبایلي ضلعو کې د وسله والو د فعالیتونو مخنیوي لپاره موبایل ټېلېفون انټرنېټ تړل اړین دي. امنیتي ځواکونو په تېرو کلونو کې هم په سیمه کې انټرنېټ له همدې لامله تړلی دی.
