Çeşmeler

Hindistanyň tanymal aktýorlaryndan 1970-1980-nji ýyllarda owalky sowet respublikalarynda hem meşhurlyk gazanan Şaşi Kapur 4-nji dekabrda 79 ýaşynda aradan çykdy.

"Diwar" ýaly meşhur kinofilmler bilen dünýäde uly şöhrat gazanan aktýor soňky wagtlarda böwrek näsazlygy sebäpli azap çekipdir we ahyrynda Mumbaýdaky keselhanalaryň birinde dünýäden ötüpdir.

Şaşi Kapur kakasy Pritwiraž Kapur ýaly onlarça ýyllap hindi kino sungatyna öňbaşçylyk eden gaty uly maşgalanyň mirasdüşeri bolupdy.

Şaşi Kapur 1940-1950-nji ýyllaryň arasynda çaga rollarynda oýnapdy.

Meşhur "Awara" kinofilminde bolsa Şaşi agasy Raj Kapuryň oýnan obrazynyň çagalyk döwrüni suratlandyrypdy.

Ol birnäçe gezek milli kino baýraklaryna mynasyp boldy we 2011-nji ýylda oňa Hindistanyň hökümeti tarapyndan Padma Buşan şöhrat nyşany gowşuryldy. Ol belli döwürde Britaniýanyň we ABŞ-ň kinofilmlerinde hem surata düşüpdi.

Şaşi Kapur tanymal iňlis aktrisasy Jennifer Kendal bilen maşgala gurupdyr. 1978-nji ýylda bolsa onuň bilen bilelikde Bombeýiň meşhur Pritwi teatrynyň düýbüni tutupdy. Britaniýaly aktrisa Felisity Kendal bolsa Şaşi Kapuryň baldyzydyr.

Şaşi Kapur aktýorlyk sungaty bilen çagalygynda meşgullanmaga başlapdy we 150-den gowrak kinofilmde surata düşüpdir.

Şaşi Kapur 2015-nji ýylda Hindistan kinosynyň iň abraýly baýragy bolan "Dada Saheb Palke" baýragyna mynasyp bolupdy.

Şaşi Kapur özüniň mylaýym ýylgyryşy bilen tomaşaçylaryň aňyna çuňňur ornaşypdy. Hindistanda il arasynda oňa "handsome" ýagny "görmegeý" diýen lakam berlipdi.

Bolliwud blokbasterlerinde ol ýygy-ýygydan başga kino ýyldyzy bolan Amitab Baççan bilen bilelikde görülýärdi. Olar 1970-1980-nji ýyllarda surata düşürilen dürli kinofilmlerde ýa dogan, ýa dost, ýa-da bolmasa duşman ýaly rollary ýerine ýetiripdir.

Hindistanda onuň suratlary ýol horjunlaryny, kofe gap-gaçlaryny we stol örtüklerini bezeýär.

Onuň aradan çykmagy sebäpli on müňlerçe janköýeri sosial mediada öz duýgudaşlygyny ýazypdyr. Olaryň arasynda ýurduň primýer ministri Narendra Modi hem bar.

Jenap Modi özüniň "Twitter" sosial ulgamyndaky sahypasynda: "Onuň beýik sungaty geljek nesiller tarapyndan ýatlanar. Aradan çykmagyna gaty gynandym. Maşgalasyna we janköýerlerine çuňňur duýgudaşlyk bildirýärin" diýip ýazypdyr.

"The Independent" neşriniň ýazmagyna görä, barlyşyksyzlaryň tarapdary hasaplanýan milletparaz hindi toparlaryndan biri Bolliwudyň surata düşüren täze kinofilmini tomaşaçylara görkezjek Britaniýanyň ähli kinoteatrlaryny ýakmak barasynda çagyryş edipdir.

Britaniýanyň kino baha berýän geňeşi (British Board of Film Classification - BBFC) tarapyndan "12A" reýtingi bilen halka hödürlenen taryhy temada surata düşürilen "Padmawati" atly kinofilmde 14-nji asyryň meşhur şazadasy Padmininiň durmuşy suratlandyrylýar. Ýöne ol kinofilmiň taryha bap gelip-gelmeýän taraplary uly jedellere sebäp bolýar.

Söweşiji Rajput taýpasyna degişli bolan Rajput Karni Sena topary bolsa, ol kinofilmiň esasyny goýanlaryň şazada bilen musulman basybaljynyň arasyndaky söýgini suratlandyrmak bilen taryhy hakykaty ýoýandygyny öňe sürýär. Ol topar şonuň ýaly-da aýdym aýdýan mahaly şazadanyň garnynyň we biliniň töwereginiň ýalaňaç ýagdaýda görkezilmegine hem närazylyk bildirýär.

Kino muşdaklarynyň eýýäm köp wagtdan bäri uly gyzyklanma bilen garaşýan ol kinofilminiň halka hödürlenmegi Hindistanyň hökümetdäki esasy partiýasyndan bolan bir syýasatçynyň baş roly oýnaýan Dipika Padukonen bilen režissýor Lila Bansaliniň kellesini getirene 1,5 million amerikan dollary sylag berjegini duýdurmagyndan soň yza süýşürilipdir.

Kinofilmde öňe sürülýän zatlaryň görkezilmeýändigi nygtalýanam bolsa, bu ony taýýarlanlara garşy atylýan haýbatlaryň öňüni almaga peýda bermändir.

Ahyrynda Rajput Karni Sena toparynyň baştutany Suhdew Singh ol kinofilme garşy Britaniýa şalygyna "çäre" görmegi barasynda çagyryş edipdir.

Ol "Republik" telekanalyna beren interwýusynda: "Men Birleşen şalykdaky ähli hindileri we ylaýta-da biziň jemgyýetimizden bolan doganlarymyzyň bu kinofilmiň görkezilmegine garşy güýçli närazylyk bildirmäge çagyrýaryn. Men olara bu kinofilmi görkezen kinoteatryň hökman ýakylmagyny aýtdym" diýipdir.

"The Independendt" gazeti Hindistanyň hökümet organlary Singhiň daşary ýurt pasportyny elinden alany üçin, idni onuň Britaniýa gidip bilmejekdigini ýazýar.

Başga bir hindi topary bolsa bu kinofilmi Hindistanda görkezjek ähli kinoteatrlary ýakjagyny aýdyp haýbat atypdyr. Ol topar şonuň ýaly-da özlerinde "gylyçdan tutup, tä "Kalaşnikow" kysymly tüpeňlere çenli" gerek bolan ähli ýaragyň barygyny duýdurypdyr.

"The Independendt" gazeti ol kinofilm surata düşürilýän wagtynda, yzygiderli hüjümlere duçar bolandygyny we hatda bir gezekde kino sahnasynyň dargadylyp, režissýor Bansaliniň ýenjilendigini ýazýar.

Golaýda Hindistanyň primýer ministri Narendra Modiniň ýolbaşçylygyndaky Baratiýa Janata milletparaz partiýanyň media guramaçysy bolan Surajpal Amu märekäniň jemlenen ýygnanyşygynda, Padukone we Bansaliniň kellesini getirene 10 million rupi (1,5 milliýon amerikan dollary) baýrak berjegini yglan edipdir.

Amu bu beýannamasyny şol bir wagtyň özünde "The Indian Ekspress" atly gazete hem beripdir.

Syýasatçy ol filimiň belli bölümleriniň kesilip aýrylmagy şerti bilen özüniň ylalaşmaýandygyny mälim edipdir.

Dogrusy, ondan soň hökümetdäki esasy partiýanyň resmileri Amunyň aýdanlaryny berk ýazgaryp, oňa garşy kanuny çäräniň görüljegi aýdylypdyr. Emma welin jenap Modiniň özi bu meselä hiç hili goşulmandyr.

"Başy belaly" kinofilmde baş rolda oýnaýan Padukone bolsa: "Bu durşy bilen masgaraçylykdyr. Biziň halkymyz, görüň-bakyň, nähili ýagdaýa düşüpdir..." diýipdir.

Ol soň sözleriniň üstüni şeýle ýetiripdir: "Biziň öňünde jogap bermeli adamlarymyz senzura geňeşinde oturanlardyr. Men olaryň bu kinofilmiň halka hödürlenmeginiň öňüni hiç hili alyp bilmejegine berk ynanýaryn".