Owganystanyň milli parlamentinde deputat bolmaga dalaş edýän 25 ýaşly Perzana Bähmen saýlanan ýagdaýynda Owganystanda ilkinji zenan türkmen deputaty bolar. Ol 20-nji oktýabra bellenen saýlawlara garaşsyz kandidat hökmünde gatnaşar. Farýap welaýatynyň ýaşaýjysy Perzana Bähmeniň saýlaw programmasy sosial-ykdysady problemalary çözmek, aýal-gyzlaryň bilimli-ylymly bolmagy üçin mümkinçilikleri artdyrmak, welaýatyň suw üpjünçiligini kämilleşdirmek, neşe gaçakçylygyna garşy göreşmek we Türkmenistan bilen söwda-ykdysady gatnaşyklary ösdürmek meselelerini öz içine alýar.