Дар чанд ҷумла
Покистон аз садҳо ҳазор паноҳҷӯи афғон хост, аз он кишвар бираванд
Ҳукумати Покистон ба даҳҳо ҳазор аз паноҳҷӯёни афғонистонӣ ва “тамоми хориҷиёни ғайриқонунӣ” хостааст, то якуми апрел қаламрави ин кишварро тарк кунанд, дар акси ҳол ба зӯр берун карда мешаванд.
Вазорати умури дохилии Покистон рӯзи 7-уми март дар як баёнияи расмӣ гуфт: “Барномаи бозгардони шаҳрвандони хориҷии ғайриқонунӣ аз рӯзи 1-уми ноябр иҷро мешавад. Барои идомаи иҷрои қарори ҳукумат ҷиҳати бозгардонидани тамоми хориҷиёни ғайриқонунӣ, раҳбарияти кишвар тасмим гирифт, ки афғонҳоеро ҳам баргардонад, ки ҳаққи иқомати муваққатӣ доранд.” Ҳазорон афғонистонӣ, ки аз тарси Толибон аз кишварашон ба Покистон гурехтаанд, аз он бим доранд, ки баъди бозгашт таъқибу саркӯб мешаванд.
Дар баёния омадааст, тамоми шаҳрвандони хориҷии ғайриқонунӣ ва афғонҳои дорои ҳаққи иқомати муваққатӣ бояд то рӯзи 31-уми марти соли 2025 кишварро тарк кунанд ва пас аз он ихроҷ аз рӯзи 1-уми апрел оғоз мешавад. Ҳукумати Покистон аксаран шаҳрвандони Афғонистонро ба ҷинояткорӣ ва ифротгароӣ дар қаламраваш муттаҳам мекунад, агарчӣ ҳукумати Толибон дар Афғонистон ин иддаоро рад кардааст.
Покистон даҳсолаҳо боз як паноҳгоҳи асосӣ барои паноҳҷӯёни афғон ба ҳисоб мерафт ва аз ҷумла дар замони ҳузури нерӯҳои ишғолгари шӯравӣ дар солҳои 1979-1989. Баъди он дар солҳои ҷанги дохилӣ ва ҳукумати Толибон дар солҳои 1996-2001 мардуми зиёде дар Покистон паноҳ бурданд. Баъди аз қудрат рондани Толибон дар соли 2001 ба раҳбарии Амрико, миллионҳо афғон ба ватани худ баргарштанд.
Пас аз бозгашти Толибон ба қудрат дар соли 2021 ва тарки нерӯҳои байналмилалӣ тақрибан 700 000 ҳазор афғони дигар аз бими таъқиб ва раҳоӣ аз азоби иқтисоди вайрону бӯҳрони башарӣ ба Покистон рафтанд. Бар асоси омори Созмони Милал ҳоло бештар аз 800 000 ҳазор нафар аз шаҳрвандони Афғонистон дар Покистон ҳаққи иқомати муваққатӣ доранд.
Мулоқоти намояндагони Амрико ва Украина дар Арабистони Саудӣ
Қарор аст, ҳафтаи оянда дар шаҳри Риёзи Арабистони Саудӣ мулоқоти мақомоти Амрико ва Украина баргузор шавад.
Дар ин бора президенти Украина Владимир Зеленский ва расонаҳои Fox News ва Axios хабар доданд.
Зеленский гуфт, "тимҳои Украина ва Амрико корро аз сар гирифтанд ва мо умед дорем, ки як суҳбати пурмӯҳтавое барпо мешавад."
"Мулоқот рӯзи 11-уми март баргузор хоҳад шуд," -- гуфтааст шабакаи Fox News.
Иштироки котиби давлатии Амрико Марко Рубио, мушовири Кохи Сафед дар умури амнияти миллӣ Майк Уолтс, фиристодаи вижаи президенти ИМА дар Ховари Миёна Стив Виткоф ва раҳбари дафтари президенти Украина Андрей Ермак дар назар аст.
Талошҳо барои дастёбӣ ба сулҳ ҳадафи асосии мулоқот гуфта мешавад.
Агар нишаст барпо шавад, аввалин вохӯрии намояндагони Вашингтон ва Киев баъд аз суҳбати доғи Владимир Зеленский ва Доналд Трамп дар Кохи Сафед хоҳад буд.
“Ин ҷо Маскав нест!” Ба сафири Русия дар Булғористон чӣ шуд?
Элеонора Митрофанова, сафири Русия дар Булғористон, зери нидои “Ин ҷо Маскав нест” ночор як намоишгоҳи наққоширо дар шаҳри София тарк кунад.
Бахши булғории Радиои Озодӣ навишт, ҳодиса шоми 6-уми март дар ифтитоҳи Намоишгоҳи гурӯҳи Guerrilla Girls (“Духтарони шӯришӣ”) рух дод.
Дар видео дида мешавад, ки як духтар хитоб ба дипломати рус мегӯяд: “Ин ҷо Маскав нест. Ин ҷо Аврупо аст”.
Митрофанова баъди ин гапҳо ба толори дигари намоишгоҳ мегузарад, вале духтар аз паси ӯ рафтан мегирад.
Сипас чанд нафари дигар ба ӯ ҳамроҳ шуда, бо як овоз мегӯянд, “Ин ҷо Маскав нест”. Ба мушоҳидаи хабарнигорони Радиои Озодӣ, духтар сафирро инчунин “қотил” номидааст. Сафир маҷбур намоишгоҳро тарк кард.
Guerrilla Girls як ҷомеаи занони рассом аст, ки ба табъйиз ва саркӯб дар ҷаҳони ҳунар таваҷҷӯҳ дорад. Ин ҷараён соли 1985 дар шаҳри Ню-Йорк пайдо шуд ва аъзои он одатан бе зикри номашон ҳунари худро ба намоиш мегузоранд.
"Бо корд таҳдид кард." Гаравгонгирӣ дар Фурудгоҳи шаҳри Алмато
Марде дар Фурудгоҳи шаҳри Алматои Қазоқистон як корманди фурудгоҳро гаравгон гирифт, вале баъд аз чанд дақиқа дастгир шуд. Ҳодиса рӯзи 7-уми март рух дод.
Бахши қазоқии Радиои Озодӣ навишт, шахси гаравгонгир, ки бояд аз санҷиши амниятӣ дар фурудгоҳ мегузашт, ба талаби кормандон вокуниши тунд кард.
Ӯ як маъмури занро аз мӯяш гирифта, дар даст корд таҳдид кард, ки мекушад. Инчунин ба атрофиён ҳушдор додааст, ки наздик нашаванд.
Дар дафтари матбуоти фурудгоҳи Алмато гуфтанд, "марди пархошгаре наздик омад. Кормандон аз ӯ хостанд, ки санадҳояшро нишон диҳад, аммо ӯ як кормандро аз мӯяш гирифта, бо корд таҳдид намуд. Баъди 7 дақиқа мардро дастгир карданд."
Сабаби ҳодиса маълум нест. Полиси нақлиёти фурудгоҳ парванда боз кардааст.
Дар наҷоти маъмури амнияти фурудгоҳ корнамоии Абдураҳим Мӯсои 52-соларо ситоиш мекунанд, ки ҳамон замон ба назди ҳамлагар наздик шуда, ба ӯ пешниҳод кард, занро озод кунад ва ӯро гаравгон бигирад.
Вай, ки барои гусели наздиконаш дар фурудгоҳ қарор доштааст, дар лаҳзаи муносиб кордро аз дасти гаравгонгир гирифт ва худи ӯро ба як тараф тела дод.
Президенти Қазоқистон Қосимҷомарт Тоқаев амр дод, ки ба Абдураҳим Мӯсо ҷоизаи давлатӣ дода шавад.
Ҳамла дар як шаҳри Сурия. Куштаҳо ва захмиҳо ҳастанд
Ҷонибдорони Башор Асад, раисҷумҳури сарнагуншудаи Сурия, ба маъмурони пулис дар шаҳри Лозақия ҳамла кардаанд.
Хабаргузогри “Associated Press” бо такя ба мақомоти маҳаллӣ навишт, ки камаш 13 низомӣ кушта шуд. Захмиҳо низ ҳастанд.
Дидбони Ҳуқуқи Башари Сурия, қароргоҳаш дар Лондон, дар бораи кушта шудани 16 низомӣ, 28 тарафдори Башор Асад ва се сокини осоишта хабар дод.
Раиси бахши амнияти Лозақия гуфтааст, ҷонибдорони Асад ба чанд гузаргоҳ ва посбонҳо ҳамла карданд. Ӯ бе ироаи ҷузъиёт гуфт, дар ин ҳамла “сарбозони зиёд” кушта ва захмӣ шуданд.
Ба иттилои хабаргузории давлатии Сурия, дар шаҳрҳои Лозақия ва Тартус “соати комендантӣ” эълон шуда, “пулис ба ҷустуҷӯи ҷангҷӯёни Башор Асад сар кардааст”.
Ҳукумати Башор Асад дар моҳи декабри соли 2024 суқут кард. Ҳоло гурӯҳи “Таҳрир аш-Шом” зимоми қудратро ба даст гирифтааст.
Киев ба музокирот дар Арабистони Саудӣ омода мешавад
Пас аз нишасти Брюссел, ки Владимир Зеленский, раисҷумҳури Украина ҳимояти қавии раҳбарони Аврупоро гирифт, Киев таваҷҷуҳи худро ба гуфтушуниди намояндагони Украина ва Амрико равона кардааст. Қарор аст, музокирот дар Арабистони Саудӣ гузарад.
Президент Зеленский рӯзи 6-уми март дар шабакаҳои иҷтимоӣ навишт, ӯ низ ба Арабистони Саудӣ меравад, вале шахсан дар музокирот ширкат намекунад.
Тими ӯ “барои ҳамкорӣ бо шарикони амрикоӣ дар Саудӣ хоҳад монд”. Ин кишвар пештар мизбони даври аввали музокироти Амрико ва Русия буд.
Фиристодаи вижаи Амрико Стив Виткофф тасдиқ кард, ки чунин мулоқот дар назар аст ва ҳадафи онро “таҳияи чаҳорчӯби созиши сулҳ” номид.
Вай гуфт, эҳтимол мулоқот дар Риёз ё Ҷидда баргузор шавад, “аммо фикр мекунам, баҳси бузургтар барои мо ... ба даст овардани созиши сулҳ аст.”
Владимир Зеленский гуфт, музокирот бо Иёлоти Муттаҳида баёнгари он аст, ки Украина барои расидан ба сулҳи “зуд ва пойдор” талош дорад ва изҳори умед кард, ки ин мулоқоти боарзише хоҳад буд.
Мухолифин дар Украина интихоботро дар замони ҷанг рад кардаанд
Петро Порошенко ва Юлия Тимошенко, раҳбарони мухолифин дар Украина, баргузории интихоботро дар ин кишвар, ки се сол боз зери ҳуҷуми Русия қарор дорад, рад кардаанд.
Гузориш дар ин бора баъд аз он нашр шуд, ки расонаҳои хабарӣ гуфтанд, мақомоти амрикоӣ гуё пиромуни ин мавзуъ бо онҳо суҳбат доштанд.
Петро Порошенко, раисҷумҳури пешин ва Юлия Тимошенко, сарвазири собиқ, мухолифони бонуфузтарин дар Украина ҳастанд.
Онҳо рӯзи 6-уми март гуфтанд, ки интихобот бояд танҳо пас аз истиқрори сулҳ баргузор шавад.
Дар як изҳороти хатӣ, ки дар шабакаҳои иҷтимоӣ нашр шуд, Порошенко тасдиқ кард, ки бо "шарикони амрикоӣ дар тамос буданд".
Вай афзуд, "тими мо ҳамеша мухолифи интихобот дар замони ҷанг буд ва ҳаст."
Юлия Тимошенко ҳам гуфтааст, тими ӯ "бо ҳамаи ҳампаймонҳо, ки метавонанд дар таъмини сулҳи одилона мадад кунанд, гуфтугӯ мекунад", вале афзуд, то расидан ба сулҳ "дар бораи интихобот ҳеч гапе нест".
Талаби Доналд Трамп аз кишварҳои узви НАТО
Раисҷумҳури Иёлоти Муттаҳида аз кишварҳои узви НАТО хост, ки харҷи низомии худро бештар кунанд, вагарна ба умеди ёрии Амрико набошанд.
Доналд Трамп рӯзи 6-уми март дар Кохи Сафед ба хабарнигорон гуфт, "агар пул надиҳанд, онҳоро дифоъ намекунем. Бояд пули бештар пардозанд."
Трамп дар даври аввали президентияш таъкид карда буд, ки аъзои НАТО харҷи низомии худро то 2 дарсади Маҷмӯи Маҳсулоти Дохилияшон афзоиш диҳанд.
Ҳадди ақал 24 кишвар ин талабро пазируфтанд. Аз он вақт Трамп пешниҳод дорад, ки харҷи низомии аъзои НАТО ҳадди ақал бояд то 5 дарсади ММД-и онҳо афзоиш ёбад.
Танҳо Лаҳистон (Полша) ба ин меъёр наздик мешавад. Эстония ва Литва низ ишора кардаанд, ки хароҷотро афзоиш хоҳанд дод. Бисёре аз кишварҳои узв бовар доранд, ки ин тасмим аз ҷиҳати иқтисодӣ фоидаовар нест.
Қариб 100 ҳазор низомии Амрико дар Аврупо, асосан дар Олмон, Итолиё ва Бритониё ҷойгиранд.
Додани манзил ба як хонаводаи дигари тоҷикро дар Русия таҳқиқ мекунанд
Кумитаи тафтишотии Тотористон тақдими хона ба як оилаи муҳоҷири тоҷик дар шаҳри Нижнекамскро таҳқиқ мекунад.
Хабари додани калиди манзил ба хонаводаи Муҳиддин Холзода аз тарафи шаҳрдори Нижнекамск Рамил Муллин рӯзи 3-юми март дар шабакаи "ВКонтакте" нашр шуд. Дар пайи ин хабар сокинони маҳаллӣ кори шаҳрдориро танқид ва таҳқиқи қазияро талаб карданд.
Яке аз корбарон навиштааст, ки "ба муҳоҷирон хона медиҳанду ба худиҳо на".
Корбари дигар бо ёдоварӣ аз ҳамла ба "Крокус", ки дар он асосан шаҳрванди Тоҷикистон гумонзад ҳастанд, хостори барканории онҳое шудааст, ки қарори додани манзилро имзо кардаанд.
Муҳиддин Холзода ва ҳамсараш Малика Тоирова шаҳрванди Русия буда, чаҳор фарзанд доранд. Маълум нест, сарнавишти ин хонавода бо чӣ меанҷомад.
Дар се моҳи охир дафъаи сеюм аст, ки тақдими хона ба зодаҳои Тоҷикистон дар Русия баҳсбарангез мешавад.
Аз ин пеш ба оилаи Акрам Масаидов, зодаи Тоҷикистон, ки чор фарзанд дорад, дар шаҳри Качканари вилояти Свердлов хона доданд. Гурӯҳҳои марбут ба миллатгароёни Русия дар Телеграм навиштанд, ки "дар Качканар ҳадди ақал 20 хонаводаи камбизоати рус дар навбат ҳастанд", вале "муҳоҷирони дирӯзӣ соҳиби хона мешаванд".
Дар нимаи моҳи январи имсол дар шаҳри Митиши, наздикии Маскав, ба зодаи Тоҷикистон – Таҳмина Самадова – манзили зист тақдим карданд. Дертар мақомоти Русия зери фишори ҷомеа манзилро аз ин оилаи серфарзанд гирифта, онҳоро ба тақаллуб муттаҳам карданд.
Як оилаи дармондаи тоҷик бо кӯмаки муҳоҷирон ба ватан баргашт
Басбӣ Ҳалимбек, зани 27-солаи тоҷик ҳамроҳи шавҳар ва писараш, ки дар шаҳри Остонаи Қазоқистон бе сарпаноҳ ва бе кору даромад монда буд, бо кумаки муҳоҷирони дигари тоҷик ба Душанбе фиристода шуд.
Дар ин бора худи ӯ ба тарҳи "Мигрант Медиа"-и Радиои Озодӣ хабар дода, гуфтааст, шаби 4 ба 5-уми март ба Душанбе расиданд.
"Мигрант Медиа" охири моҳи феврал дар бораи ин хонавода гузориш дода буд. Баъди нашри ин гузориш Басбӣ мегӯяд, муҳоҷирон ва шаҳрвандони дигари хайрхоҳ бо онҳо тамос гирифта, дасти кумак дароз карданд.
Басбӣ Ҳалимбек гуфт, аз соли 2018 дар шаҳри Остонаи Қазоқистон муҳоҷир буданд ва зимистони имсол, баъди он, ки пойи шавҳари Басбӣ лат хӯрд, онҳо бе кору даромад ва бесарпаноҳ монданд.
Ин зан афзуд, шавҳараш баъди табобат дар Тоҷикистон, пайи ҷустуҷӯи кор мешавад. Ба гуфтаи ӯ, онҳо дигар нияти ба муҳоҷират рафтанро надоранд.
Қазоқистон баъд аз Русия, дувумин кишварест, ки теъдоди зиёди муҳоҷирони меҳнатии Тоҷикистонро мепазирад. Тоҷикистониҳо дар Қазоқистон асосан таксиронӣ ва дар бозору сохтмон кор мекунанд.
Ҳукми шаллоқи овозхони эронӣ барои даъват ба тарки ҳиҷоб
Дар Эрон овозхоне, ки зидди ҳиҷоб тарона навишт, ҷазо гирифт.
Дар Эрон мақомот ҳукми 74 шаллоқи овозхон Меҳдӣ Яроҳиро иҷро карданд, ки дар таронае духтарону занонро даъват мекунад, ҳиҷобро аз сар бикашанд.
Вакили дифои ӯ Заҳро Минуӣ гуфт, ҳукми шаллоқи овозхон рӯзи 5 март иҷро шуд. Ярроҳӣ августи соли 2023, як сол баъди марги Маҳсо Аминӣ ва шурӯи эътирозҳои бо номи “Зан, зиндагӣ, озодӣ” бо таронааш “Розарито” маъруф шуд.
Январи соли 2024 ӯро барои ин тарона ба ду солу ҳашт моҳи зиндон ва 74 шаллоқ маҳкум карданд, вале дар изҳороти ахираш гуфт, ки ҳукми ӯ сабуктар шуд. Ба ҳимояти Яроҳӣ ва талаби озодии ӯ бисёриҳо дар дохил ва хориҷи Эрон садо баланд карданд.
UNAIDS аз боздошта шудани ёриҳо ба Тоҷикистон изҳори нигаронӣ кард
UNAIDS ё Барномаи мубориза бо СПИД-и СММ аз боздошта шудани кӯмакҳои Оҷонсии рушди байналмилалии ИМА (USAID) дар Тоҷикистон изҳори нигаронӣ намуд.
Дар изҳороте, ки 5 март дар саҳифаи ин созмон нашр шуд, омадааст, ки 61 дарсади барномаи миллии мубориза бо вируси заъфи масунияти бадан дар Тоҷикистон аз ҳисоби манбаъҳои хориҷӣ маблағгузорӣ мешавад.
Аз ин ҳисоб, сармояҳои ҳукумати ИМА тахминан 20% буда, дуюмин азимтарин сармоягузори барномаҳои ин созмон Бунёди глобалии мубориза бо СПИД, сил ва вараҷа (Global Fund to fight AIDS, Tuberculosis and Malaria) дониста мешавад.
Ин созмон, ба таъкиди UNAIDS, 40% тамоми тарҳҳоро маблағгузорӣ мекунад. Саҳми дигар ҷонибҳо ночиз аст, мегӯяд ин ниҳоди СММ.
Барномаи мубориза бо СПИД-и СММ менависад, ҳукумати ИМА шарики калидии барномаҳои ин созмон аст ва ёриҳои он, аз ҷумла, барои тақвияти кори озмоишгоҳҳо, огоҳонидани мардум аз василаҳои пешгирии олудашавӣ ба ин сироят, ҷамъоварии маълумот ва ҳам таъмини ҳамгироии гирифторони вируси заъфи масунияти бадан бо ҷомеа бисёр муҳим мебошад.
Ёриҳои ҳукумати ИМА, ба навиштаи UNAIDS, барои фаъолияти созмонҳои мадании машғули мубориза бо СПИД ҳам бисёр муҳим аст. Боздошта шудани сармояҳои USAID ба кори созмонҳои ҷамъиятӣ таъсири ҷиддӣ хоҳад гузошт.
USAID оҷонсии мустақили ҳукуматии Амрико аст, ки соли 1961 аз ҷониби Конгресс ташкил шуда, дар саросари ҷаҳон, аз ҷумла Тоҷикистон амал мекард. Дар давоми беш аз сӣ соли истиқлолияти ИМА тавассути ин созмон ба Тоҷикистон дар ҳаҷми беш аз 2 миллиард доллар кӯмак кардааст.
Мақомот дар Тоҷикистон гуфтанд, баъди боздошта шудани ироаи ёриҳои ин оҷонсӣ бояд дар фикри пайдо кардани сармояҳои нав шаванд.
Додгоҳи олии ИМА қарори масдуд кардани $2 млрд пулҳои USAID-ро бекор кард
Додгоҳи олии ИМА дархости маъмурияти президент Доналд Трампро дар бораи масдуд кардани 2 миллиард доллар маблағ барои пардохти пули тарҳҳои аллакай иҷрошудаи Оҷонсии ИМА оид ба рушди байналмилалӣ (USAID) рад кард.
Аз ин пеш додгоҳи федеролии Вашингтон ҳам қарор кард, ки дархости маъмурияти президент оид ба боздошта шудани ин маблағҳо қонеъ нашавад ва пулҳо бояд то 26 феврал фиристода шаванд.
Дафтари Трамп аз болои ин қарор ба Додгоҳи олӣ шикоят карда буд. Қарори додгоҳи федеролиро дар Додгоҳи олӣ панҷ додрас, аз ҷумла ду додраси ҷумҳурихоҳ ҳам дастгирӣ карданд.
Дар поёни моҳи феврал маъмурияти Доналд Трамп қарор кард, ки ироаи беш аз 90% кӯмакҳои хориҷии ИМА тавассути USAID боздошта шавад.
Ҳаҷми пулии ин ёриҳо 57 миллиард долларро ташкил медиҳад, гуфта шудааст дар санадҳои додгоҳӣ. USAID оҷонсии мустақили ҳукуматии Амрико аст, ки соли 1961 аз ҷониби Конгресс ташкил шуда, дар саросари ҷаҳон, аз ҷумла Тоҷикистон амал мекард.
Дар Брюссел 800 миллиард евро кӯмакҳои дифоии Аврупо баррасӣ мешавад
Рӯзи 6 март президенти Украина Владимир Зеленский дар ҷаласаи сарони кишварҳои Иттиҳоди Аврупо иштирок мекунад.
Ӯву раҳбарони кишварҳои Иттиҳоди Аврупо дар Брюссел нақшаи додани 800 миллиард евро маблағро барои тақвияти саноати дифоии Аврупо, беҳтар кардани иқтидори ҳарбӣ ва ироаи ёриҳои изтирории низомӣ ба Украина дар шароити боздошта шудани ёриҳои Амрико баррасӣ хоҳад кард.
Ҷаласаи имрӯза дар ҳоле барпо мешавад, ки садри аъзами ояндаи Олмон Фридрих Мертс ба боло бурдани иқтидори низомии кишвараш даъват карда президенти Фаронса Эмманэл Макрон ҳушдор дод, ки таҷовузи Русия бо хоки Украина тамом намешавад ва Париж хостори тавсеаи “чатри ҳастаиаш” ба кишварҳои дигари аврупоӣ мебошад. Макрон дар суханронии телевизиониаш дар остонаи нишаст гуфт, “мехоҳам умедвор шавам, ки ИМА дар канори мо хоҳад буд. Вале бояд омода бошем, ки метавонад чунин нашавад”.
Радиои Аврупои Озод/Радиои Озодӣ бо тарҳи ҳадафҳои нишаст шинос шуд ва дар он таъкид шудааст, ки ҳамоиш бо мақсади ҷудо кардани маблағҳои ҳадди аксар зиёд барои кишварҳои узви ИА бо мақсадҳои дифоӣ баргузор мешавад.
Даргузашти писари Лоиқ Шералӣ - АП
Имрӯз дар Душанбе, дар синни 54-солагӣ Ромиш Шералӣ - писари Лоиқ Шералӣ, шоири маъруфи тоҷик даргузашт. Дар ин бора хабаргузории "Азия Плюс" иттило дода навиштааст, ки хабари даргузашти ӯро бародараш Диловар Шералӣ тасдиқ кард.
Ӯ гуфтааст, ки Ромиш солҳои охир аз дарди дил азият мекашид ва дар шифохонаҳои Душанбе таҳти муроқибати табибон қарор дошт.
“Субҳи имрӯз хестанд, бо пайвандон суҳбат карда, гуфтанд, ки саломатиашон хуб нест. Гуфтанд, ки каме хоб мекунам. Пас аз чанд соат дар рахти хоб дар хона ҷон доданд”, - гуфтааст Диловар Шералӣ ба "Азия Плюс".
Ромиш писари дуюми Лоиқ Шералӣ буд ва дар нашриёти “Адиб” фаъолият кардааст.
Соли 2016 дар як мусоҳибаи ихтисосиаш бо Радиои Озодӣ ба муносибати зодрӯзи падар, Ромиш Шералӣ гуфта буд, ки дар сари таҳияи "Куллиёт"-и ашъори падар кор кардаву "то ҳадде, ки қувватам расид ва имкони таҳрир доштам, то андозае метавон гуфт, ҳамаи шеърҳояшро ворид кардам". Он замон ӯ аз идомаи кор дар самти ҷамъовариву нашри ашъори падар хабар дода буд.
Ба саволи ин ки оё бо падараш ифтихор мекунад, гуфта буд: "Албатта! Чаро ифтихор надошта бошам? Устод Лоиқ мояи ифтихори натанҳо ман, балки мояи ифтихори тамоми миллат аст."
