Телевизиони "Садои Амрико" гузориш додааст, ки ҷанг дар ҷабҳаи шарқӣ барои Украина мушкил шудааст ва неруҳои ин кишвар маҷбур шуданд чанд шаҳраку деҳаро ба артиши Русия вогузор кунанд.

Владимир Зеленский, раиси ҷумҳури Украина аз муттаҳидони ғарбиаш даъват дорад, ки барои поён додан ба ин ҷанги сесола, аз тарҳи ба гуфтаи ӯ ғалаба пуштибонӣ намоянд.

Нақшаи Зеленский аз панҷ банди асосӣ иборат мебошанд, ки муҳимтарини онҳо узви НАТО шудани Украина ва додани иҷоза ба Киев барои истифода аз силоҳҳои дурпарвоз мебошад.

Herkul, хабаргузории наздик ба Фатҳулло Гулен навиштааст, ин рӯҳонии 83-сола рӯзи 20-уми октябр вафот кард. Хабари марги Гуленро яке аз пайвандони ӯ дар суҳбат бо шабакаи CNN Türk низ тасдиқ кардааст.

Ҷузъиёти бештар, аз ҷумла сабаби марги ин руҳонӣ маълум нест.

Фатҳуллоҳ Гулен аз солҳои 90 дар Амрико ба сар мебурд. Ӯ ибтидо аз ёрони раҳбари кунунии Туркия Раҷаб Эрдуғон ном бурда мешуд. Вале баъди табадуллоти нофарҷоми соли 2016 дар Туркия, ҳукумати ин кишвар тарафдорони Фатҳулло Гуленро ҳадаф қарор дод.

Дар муддати ҳафт соли ахир, садҳо нафар дар Туркия бо ҷурми пайравӣ аз Гулен боздошт шуданд. Аммо худи ӯ ҳаргуна даст доштан дар ин ҳодисаро рад карда буд.

Фатҳулло Гулен муассиси мактабҳои туркӣ дар чанд кишвар, аз ҷумла Тоҷикистон гуфта мешавад.

Футболбозони навраси тоҷик зери раҳбарии Марко Раҷини, мутахассиси итолиёӣ, дар марҳилаи интихобии Ҷоми Осиё-2025 дар гурӯҳи «J» бо тимҳои Гуам (23-юми октябр), Сингапур (25-уми октябр) ва Умон (27-уми октябр) рақобат мекунанд.

Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд. Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.

Ба иттилои Федератсияи футболи Тоҷикистон, дастаи мунтахаби наврасони Тоҷикистон (U-17) дар доираи омодагӣ ба марҳилаи интихобии Ҷоми Осиё-2025 бо ҳамсолони худ аз Малайзия ду бозии санҷишӣ анҷом дод. Бозии аввал бо пирӯзии футболбозони навраси тоҷик бо ҳисоби 2:1 анҷом ёфт. Ҳарду голи мунтахаби Тоҷикистонро Меҳрубон Одилзода ба самар расонд. Бозии дуюм бо ҳисоби мусовии 1:1 анҷом пазируфт. Голи дастаи Тоҷикистонро Умед Ҷафоев, нимҳимоятгари ССКА-и Русия, зад. Ӯ ягона легионер дар ҳайати дастаи Тоҷикистон аст.

Ширкат дар бозиҳои санҷишӣ бо дастаи Малайзия барои мунтахаби наврасони Тоҷикистон (U-17) як давраи омодагии даста ба марҳилаи интихобии Ҷоми Осиё-2025 маҳсуб мешуд.

Ҳайати дастаи мунтахаби наврасони Тоҷикистон (U-17) барои иштирок дар мусобиқоти интихобии Ҷоми Осиё-2025:

Дарвозабонҳо: Абубакр Раҳмонқулов («Сарҳадчӣ»), Анушервон Қурбонзода («Душанбе»), Саидҷон Шарифзода («Шодмон»);

Ҳимоятгарон: Мустафо Ҳасанбеков, Аҳмадҷон Шоев, Самиаллоҳ Давлатов, Мубориз Мискиншоев (ҳама аз «Истиқлол»), Садриддин Сатторов, Меҳроҷиддин Розиқов, Абдусамад Меликмуродов (ҳама аз «Душанбе»);

Нимҳимоятгарон: Умед Ҷафоев (ССКА, Русия), Парвиз Бобоназаров, Меҳрубон Одилзода, Рамазон Бахталиев (ҳама аз «Истиқлол»), Ҳайдаршо Худойдодов, Зариф Зарифзода, Баҳодур Назарзода, Абдулло Иброҳимзода (ҳама аз «Душанбе»), Давид Мақсудов («Моҳир»);

Ҳамлагарон: Муҳаммад Назриев («Истиқлол»), Муҳаммадҷон Мираҳмадов («Равшан»), Асадбек Махтумов, Назрулло Ашурализода (ҳарду аз «Душанбе»).

Сармураббӣ – Марко Раҷини (Сан-Марино).

Мусобиқоти интихобии Ҷоми Осиё-2025 байни дастаҳои мунтахаби наврасон (U-17):

Гурӯҳи «J»

Даври якум

23-юми октябр | чоршанбе

14:00 – Тоҷикистон - Гуам

17:00 – Умон - Сингапур

Даври дуюм

25-уми октябр | ҷумъа

14:00 – Гуам - Умон

17:00 – Сингапур - Тоҷикистон

Даври сеюм

27-уми октябр | якшанбе

14:00 – Тоҷикистон - Умон

17:00 – Сингапур - Гуам

Эзоҳ: замони оғози бозиҳо бо вақти Душанбе аст.

Тибқи тавофуқи қаблӣ, роҳбарони ҳизбҳои мухолиф дар тазоҳурот баромад накарданд ва ба ҷойи онҳо чеҳраҳои шинохта суханронӣ карданд.

Ин маърака дар остонаи интихоботи порлумонии Гурҷистон баргузор мешавад, ки қарор аст 26-уми октябр баргузор шавад. Бархе фаъолони ҷамъиятӣ дар ин кишвар аз шаҳрвандон хостанд ба тарафдорӣ яке аз чор ҳизби мухолиф овоз диҳанд то ҳизби ба гуфтаи онҳо тарафдори Русия аз қудрат маҳрум шавад. Манзурашон ҳизби “Орзуи гурҷӣ” мебошад.

Даргирӣ субҳи якшанбеи 20-уми октябр рух додааст.

Ба гуфтаи манбаъ, задухурд замоне оғоз шуд, ки неруҳои маҳаллии “Толибон” мехостанд Азизӣ, як фармондеҳи “Шохаи Хуросон”-ро дастгир кунанд.

“Дар даргирӣ худи Азизӣ, як сокини мулкӣ ва як узви “Толибон” кушта шуданд,”-гуфт манбаъ.

Ба гуфтаи манбаъ дар вилояти Ғур, ҷангҷӯёни “Шохаи Хуросон” давоми ду ҳафтаи ахир се узви “Толибон”-ро куштанд.

"Вилояти Хуросон" ё шохаи "Хуросон"-и ДОИШ соли 2014, замоне пайдо шуд, ки гурӯҳи тундрави “Давлати исломӣ” бахше аз қаламравҳои Ироқ ва Сурияро тасарруф карда, “хилофат”-и худхонда эълон карда буд. Давлате, ки ба гуфтаи онҳо бар пояи шариат идора мешуд. Дертар ДОИШ аз тарафи эътилофи низомии таҳти раҳбарии Амрико саркӯб гардид.

Ин гуруҳ то ин дам масъулияти чанд ҳамлаи террористӣ дар Афғонистон ва Русияро ба уҳда гирифтааст.

Интихоботи президентӣ ва ҳамзамон назарпурсӣ (референдум) барои пайвастан ба Иттиҳоди Аврупо рӯзи 20-уми октябр баргузор шуд. Баъди ҳисоб кардани 88 дарсади баргаҳои раъй ё бюлетенҳо маълум шуд, ки 46 дарсади сокинон ба тарафдорӣ аз шомил шудан ба узвияти Иттиҳоди Аврупо ва 54 дарсад муқобили ин кор овоз додаанд.

Дар ин интихобот беш аз якуним миллион нафар ширкат кардаааст.

Барои дарёфти курсии президентӣ 11 сиёматмадор, аз ҷумла раиси ҷумҳури феълӣ Майя Санду довталаб шуданд. Сандуи 52 сола чор соли ахир роҳбари Молдова аст. Ӯ тарафдори робитаи наздик бо Ғарб ва пайвастани Молдова ба Иттиҳоди Аврупо мебошад.

Нозирон ин эҳтимолро рад намекунанд, ки интихоботи президентӣ дар Молдова ба даври дуюм меравад ва Санду ва Стояногло бори дигар миёни ҳам рақобат хоҳанд кард.

Собиқ додситони кулли Молдова Александр Стояногло аз ҳизби сотсиалистии мухолифи ҳукумат тарафдорӣ мекунад.

Президенти собиқ Игор Додон ин дафъа дар интихобот номзад нашуд, вале аз тарафдоронаш хост, ки Стояноглоро тарафдорӣ кунанд. Сотсиалистҳо натавонистанд дигар ҳизбҳоро ба тарафдории номзади худ моил кунанд.

Мисли Додон, Стояногло ҳам дар чандин ҳолат мавриди таҳқиқи ҷиноӣ қарор дорад. Президенти собиқро дар коррупсия ва хиёнат ба давлат, додситони кулли собиқро дар коррупсия ва сӯиистифода аз қудрат гумонбар медонанд. Ҳарду барои ин парвандаҳо Сандуро гунаҳгор карда иттиҳомҳои худро дорои ангезаҳои сиёсӣ меноманд. Санду инро рад мекунад.

Молдова як кишвари пасошуравӣ мебошад, ки баъзе сиёсатмадоронаш тарафдори Русия ва бархе ҷонибдори наздикӣ бо Ғарб мебошанд.

“Нахуствазир Нетаняҳу ҳарферо, ки ошкор гуфтааст, боз ҳам такрор кард: Исроил масоилеро, ки маъмурияти ИМА дар борааш мегӯяд, ба инобат мегирад, вале дар ниҳоят ҳар қарорро вобаста ба манфиатҳои миллии худаш қабул мекунад”.

Ҷузъиёти гуфтугӯҳои ду раҳбар нашр намешавад.

Трампи ҷумҳурихоҳ дар интихоботи рӯзи 5 ноябр дар муқобили Камала Ҳарриси демократ барои курсии президентии ИМА мубориза мебарад.

Конноли, ки инчунин иҷрокунандаи вазифаи президенти Маҷмаи парлумонии НАТО мебошад, дар як мусоҳибаи ихтисосиаш бо Бахши украинии Радиои Озодӣ рӯзи 19 октябр гуфт: “Шумо воқеан ҳам мехоҳед, ки артиши Кореяи Шимолӣ дар хоки Аврупо мустақар шуда дар амалиёти зидди Украина истифода шавад? Воқеан мехоҳед? Чаро ин чиз барои Русия зарур аст? Самимона бигӯем, шояд ба он хотир, ки имкониятҳои Русия да ҳоли тамом шудан аст?”

Конгрессеми демократ аз Вирҷиниа гуфт, то ҳол талафоти ҷонии Русия дар ҷанге, ки соли 2022 шурӯъ шуд, 600 ҳазор нафар кушта, захмӣ ва нопадидшуда тахмин зада мешавад. “Ин омор ба рақамҳое наздик мешавад, ки дар давраи амалиёти Барбарос дар давраи Ҷанги Дуюми Ҷаҳон баъди соли 1941 ҳисоб шуда буд”.

Рӯзи 18 октябр оҷонсии истихбороти Кореяи Ҷанубӣ гуфт, ки Кореяи Шимолӣ он рӯз 1500 узви нирӯҳои вижаашро барои тамрин ба Шарқи Дур фиристод. Онҳоро дар пойгоҳи низомии он минтақаи дури Русия барои ширкати баъдӣ дар ҷанги зидди Украина омода мекунанд, гуфтааст сохтори ҷосусии Кореяи Ҷанубӣ.

Мақомоти Украина навори видеоиеро нашр карданд, ки дар он эҳтимолан даҳҳо сарбози Кореяи Шимолӣ саф кашида муҳимоти низомии русиро дарёфт мекунанд. Кирилло Буданов, раиси истихбороти Украина дар сӯҳбат бо матбуоти маҳаллӣ иддао кард, ки ҳамин ҳоло 11 ҳазор сарбоз аз Кореяи Шимолӣ дар машқгоҳҳои низомии Русия дар Шарқи Дур тамрин мегузаранд.

Агар ин хабар тасдиқ шавад, пеш аз ҳама баёнгари равобити тавсеаёбандаи низомии миёни президенти Русия Владимир Путин ва раҳбари Кореяи Шимолӣ Ким Чен Ун хоҳад буд. Соли гузашта ду раҳбар созишномаи шарикии стартегиро имзо карданд, ки фароҳам кардани ёриҳои низомӣ ба ҳамдигарро пешбинӣ мекунад. То ҳол тасдиқ шудааст, ки силоҳҳои истеҳсоли Кореяи Шимолӣ дар ҷанги Украина истифода мешаванд.

Дар ҳамлаҳо ба шаҳри Байтулаҳё 40 кас маҷрӯҳ шуданд. Ин аввалин бор аст, ки баъди соли гузашта шурӯъ шудани ҳуҷуми Исроил ба Ғазза ин макон мавриди ҳамла қарор мегирад.

Исроил давоми ду ҳафтаи ахир як амалиёти васеъмиқёсро дар шимоли Ғазза ба роҳ монда мегӯяд, ки он зидди Ҳамос равона шудааст, чун аъзояш дар ҳамин минтақа аз нав ҷамъ мешаванд. Ҳамосро ИМА ва Иттиҳоди Аврупо созмони террористӣ эълон кардаанд.

Мақомоти фаластинӣ гуфтанд, ки садҳо нафар кушта шудаанд ва сохторҳои тандурустии маҳаллӣ дар ҳолати наздик ба шикасту нобудӣ қарор доранд.

Ин овоздиҳӣ дар шароити ихтилофҳои идомаёбанда, бесуботии иқтисодӣ ва баҳсҳои ҳалношуда бо Бағдод ҷараён дорад.

Рақибони асосӣ ду нирӯ – Ҳизби демократии Курдистон ва Иттиҳоди патриотҳои Курдистон мебошанд.

Таърихан ин ду нирӯи сиёсӣ қаламравҳои ҷудогонаи минтақаи Курдистонро назорат мекунанд: Ҳизби демократии Курдистон – Ирбил ва Доҳук ва Иттиҳоди патриотҳои Курдистон минтақаи Сулаймонияро таҳти назорат доранд.

Ин дар ҳолест, ки мақомоти Русия дар бораи як ҳамлаи бузурги бесарнишинҳои украинӣ болои парки саноатие хабар доданд, ки дар он як пудратчии сохторҳои мудофеаи Русия ҷойгир мебошад.

Бар асари партоби мушакҳои баллистикии артиши Русия болои шаҳри Кривий Роҳ дар минтақаи ҷанубии Днепропетровск 17 нафар, аз ҷумла як корманди наҷот ҷароҳат бардоштаанд. Ба гуфтаи Александр Вилкул, раиси шӯрои мудофеаи Кривий Роҳ, ҳашт нафари маҷрӯҳшудагон бистарӣ шудаанд.

Дар ин шаҳри воқеъ дар 400-километрии ҷанубу шарқи Киев 15 бинои истиқоматӣ ва чанд муассисаи таълимӣ ва маъмурӣ осеб дидаанд.

РБК-Украина бо такя ба додситонии вилоят навишт, ки Русия як ноҳияе дар ҳудуди шаҳри шарқии Харковро бо мушаки “Гром-Э1” ҳамла карданд. “Гром-Э1” як силоҳест, ки омехтаи мушак ва бомбаи ҳавопаймоии парвозкунанда мебошад. Он бар асоси мушаки замин ба ҳавои Х-38-и замони шӯравӣ сохта шуда, бино ба гузоришҳо, то 120 километр қудрати парвоз дорад.

Русия инчунин ба муассисаи энержии “Сумиоблэнерҳо”-ро дар шаҳри Сумӣ ҳамла кардааст.

"Дар натиҷа, беш аз 37 ҳазор муштарӣ дар вилояти Ромнӣ (104 маҳаллаи аҳолинишин) муваққатан аз нерӯи барқ маҳрум шудаанд", — омадааст дар хабарнома.

Киев ба сахттарин зимистон дар таърихи ин ҷанги қариб сесола омода мешавад, чун Маскав баъди осеби зиёд ба муассисаҳои энержии Украина ҳамоно ҳамла ба объектҳои энергетикиро идома медиҳад. Чунин зарбаҳо ба инфрасохтори дунявӣ ҷинояти ҷангӣ дониста мешавад.

Ба гуфтаи вазорати энержӣ, аз октябри соли 2022 ба ин тараф Русия ба иншооти энергетикии Украина беш аз 1000 зарба анҷом додааст.

Дар наздикии Киев тақрибан 10 ҳавопаймои бесарнишин нобуд карда шуданд, гуфтааст маъмурияти низомии шаҳр дар Telegram. Дар бораи талафоти ҷонӣ гузорише нарасидааст.

Дар давоми шабонарӯзи гузашта дар Киев ду маротиба ҳушдорҳои ҳавоӣ садо дод, ки дар маҷмӯъ тақрибан се соат давом кардааст. Ба гузориши хабаргузории Рейтерз, минтақаи Лвов дар наздикии сарҳади Лаҳистон низ ҳадафи ҳамлаи ҳавопаймоҳои бесарнишин қарор гирифт. Ҳанӯз хабаре дар бораи хисорот дар даст нест.

Нерӯҳои ҳавоии Украина рӯзи 20 октябр гуфтанд, ки дар ҳамлаи ахири шабонаи Русия аз 49 ҳавопаймои бесарнишин 31 ҳамларо пешгирӣ кардаанд. Бино ба хабари ин ниҳод, макони 13 ҳавопаймои бесарнишин нопайдо ва ду ададаш ба кишвари ҳамсояи Беларус парвоз кардааст.

Дар Македонияи Шимолӣ дар паи ошкор кардани навъи бисёр сахти сироятии зукоми мурғ боғи ҷонварони шаҳри Скопйе баста шуд.

Оҷонсии ғизо ва байтории Македонияи Шимолӣ рӯзи 19 октябр гуфт, хатари паҳн шудани ин навъи беморӣ дар тамоми минтақаи Балкан ба вуҷуд омадааст.

Чунин қарор баъди он қабул шуд, ки ташхиси сабаби марги як ғози сокини кӯли боғи ҷонварони шаҳри Скопйе навъи H5N1-и зукоми мурғро нишон дод.

Давоми 21 рӯз дари боғ ба рӯи тамошобинон баста мешавад ва мутахассисон дар ин ҷо таҳқиқи санитарӣ барпо мекунанд.

Ин хабар дар ҳоле нашр шуд, ки як рӯз пеш аз ин вирус дар байни мурғони хонагие дар қаламрави Булғористон ошкор гардид.

Хатари ин навъи вирус на фақат дар бемор ва нобуд кардани ҷонварон аст, балки ба инсон сироят кардани он ҳам мебошад.

Сомонаи CNN рӯзи 19 октябр навишт, мусофирону наздиконашон дар толори гусели фурдугоҳ на бештар аз се дақиқа метавонанд якдигарро ба оғӯш кашида хайрухуш намоянд. Онҳое, ки мехоҳанд дурудароз хайрухуш кунанд, метавонанд дар таваққуфгоҳи фурудгоҳ ин корро бикунанд. Чунин маҳдудият ва дастур дар як таблои бузурге дар толори фурудгоҳ ҳам навишта шудааст.

Дар сомонаи фурудгоҳ дар шарҳи чунин маҳдудият навиштаанд, ки мақсад озод гузоштани роҳҳои убури мусофирон ба самти хатти парвоз мебошад. Дэниел Де Боно, мудири иҷроияи фурудгоҳ дар мусоҳиба бо RNZ аз таҳқиқоти илмие ёдовар шуда гуфтааст, ки ҳаҷми бештарини “ҳормони ишқи окситотсин” дар 20 сонияи аввали оғӯшкашӣ ҳосил мешавад ва ҳамин чиз барои мусофирон бояд кофӣ бошад.

CNN дар мақолааш навиштааст, ки дар таваққуфгоҳи фурудгоҳи Дандин ба мусофирон фақат 15 дақиқа фурсат барои исти ройгон фароҳам шудааст. Кормандони фурудгоҳ гуфтаанд, ки дар давоми солҳои зиёд шоҳиди саҳнаҳои хеле пурэҳсоси хайрухуши мусофирон бо азизонашон шудаанд.

Нуқтаҳои овоздиҳӣ аз соати 7 субҳ боз шудаанд. Инчунин шаҳрвандони Молдова бояд назарашонро дар бораи узвияти кишвар дар Иттиҳоди Аврупо баён кунанд ва барои ин дар Конститусияи Молдова тағйирот ворид карда мешавад.

Барои мақоми президентӣ 11 нафар, аз ҷумла, президенти амалкунанда Майя Санду мубориза мебаранд. Пешгӯӣ мешавад, ки собиқ додситони кулли Молдова Александр Стояногло ба даври дуюми интихобот роҳ меёбад. Ӯро ҳизби сотсиалистии мухолифи ҳукумат тарафдорӣ мекунад.

Президенти собиқ Игор Додон ин дафъа дар интихобот номзад нашуд, вале аз тарафдоронаш хост, ки Стояноглоро тарафдорӣ кунанд. Сотсиалистҳо натавонистанд дигар ҳизбҳоро ба тарафдории номзади худ моил кунанд.

Мисли Додон, Стояногло ҳам дар чандин ҳолат мавриди таҳқиқи ҷиноӣ қарор дорад. Президенти собиқро дар коррупсия ва хиёнат ба давлат, додситони кулли собиқро дар коррупсия ва сӯиистифода аз қудрат гумонбар медонанд. Ҳарду барои ин парвандаҳо Сандуро гунаҳгор карда иттиҳомҳои худро дорои ангезаҳои сиёсӣ меноманд. Санду инро рад мекунад.

Аз ҳизби марказгарои “Ҳизби мо” собиқ шаҳрдори Белтси – Ренато Усатий номзад шудааст. Дар интихоботи соли 2020 ӯ баъди Санду ва Додон ҷои сеюмро гирифта буд.

Инчунин номзади коммунистҳо Василе Тарлев, собиқ раиси вилояти мухтори Гагауз Ирина Влах, журналист Наталя Морар номзад шудаанд. Морар, ки раҳбарияти имрӯзаро танқид карда, муҳоҷирати кории молдованҳоро ба хориҷа як фоҷеа меномад, ба раъйдиҳандагон ваъда додааст, ки як мӯъҷизаи иқтисодӣ меофарад.

Дар берун аз хоки Молдова имкони овоздиҳӣ дар 37 қароргоҳи дипломатӣ, аз ҷумла якнуқтаӣ дар Маскав, Киев, Одесса, инчунин 60 участкаи овоздиҳӣ дар Итолиё ва даҳҳо нуқтаи овоздиҳӣ дар Олмон, Фаронса, Бритониёи Кабир, Руминия ва ИМА боз шудааст.

Хабаргузории Интерфакс дар ин бора рӯзи 19 октябр бо такя ба дафтари матбуоти раёсати умури дохилии вилояти Хабаровск иттило додааст. Полис ба додгоҳ шикоят кардааст, ки се зодаи Тоҷикистон талаботи қонунро иҷро накарданд, дар ҳоле, ки баъди гирифтани шаҳрвандӣ бояд ба қайди комиссариати ҳарбӣ медаромаданд. Ҳолати мазкур дар натиҷаи як тафтиши кормандони комиссариати ҳарбии вилояти Хабаровск ва раёсати умури муҳоҷирати вилояти Хабаровск маълум шудааст. Қарори бекор кардани шаҳрвандиро раёсати умури дохилии вилояти Хабаровск содир кардааст.

Полиси Хабаровск гуфтааст, ки се шахси аз шаҳрвандии Русия маҳрумшуда дар ин бора шахсан огоҳ карда шуданд. Онҳоро полис боздошт кард, шиносномаҳоро аз дасташон гирифтанд ва онҳо бояд Русияро тарк кунанд.

Комисари ҳарбии вилояти Хабаровск Сергей Евлампиев ба хабарнигорон гуфтааст, ки баъди санҷиш 700 нафар ба қайди ҳарбӣ гузошта шуда, 17 нафари онҳо алакай ба хидмати тирамоҳӣ фиристода шуданд.

Баъди ҳуҷум ба хоки Украина дар Русия қонуни гирифтани шаҳрвандӣ таҳрир шуд ва аз мардон талаб мешаванд, ки баробари ба даст гирифтани шиносномаи русӣ ба қайди комиссариатҳои ҳарбӣ дароянд, то ки баъдан онҳо ба ҷанг сафарбар шаванд. Бисёр хосторони дарёфти шаҳрвандии Русияро ин талабот нигарон кард. Аксар тоҷикистониҳое, ки дар фикри гирифтани шаҳрвандии Русия мебошанд, инро як зарурати иқтисодӣ ва маишӣ меноманд, чун имкони кору фаъолияти қонунӣ ва бетатент дар Русия фароҳам мешавад. Бисёри онҳо барои хидмат дар артиш ё сафарбарӣ ба ҷанг, ки аз соли 2022 давом дорад, омода нестанд.

Дар ин бора рӯзи 19 октябр вазоратҳои умури дохилӣ ва ҳам кору муҳоҷирати Тоҷикистон дар як хабари фаврӣ иттило додаанд.

Дар хабари расмӣ шаҳрвандони Тоҷикистон огоҳ карда шудаанд, ки ба ин афрод ихроҷ ё депортатсия аз хоки Русия таҳдид мекунад. Шаҳрвандон метавонанд номи худро дар ба истилоҳ “рӯйхати шахсони назоратшаванда” бисанҷанд, ки онро мақомоти ҳифзи қонуни Русия тартиб додаанд.

Дар хабари расмӣ таъкид шудааст, ки ба қонунҳои федералии Русия оид ба будубоши шаҳрвандони хориҷӣ тағйиру иловаҳо ворид шудааст ва ин тағйирот аз 5 феврали соли 2025 эътибори қонунӣ пайдо мекунад.

Шаҳрвандон метавонанд ба феҳрист ворид шуда, номи худро бисанҷанд, ки оё дар ин рӯйхат ворид ҳастанд ё на.

Баъди ҳамла ба толори консертии “Крокус” дар вилояти Маскав дар моҳи март қонунҳои муҳоҷират дар Русия хеле шадид шуд ва дар давоми чанд моҳи баъди ин даҳҳо ҳазор муҳоҷирон, бахусус шаҳрвандони Тоҷикистон боздошту ихроҷ ва ронда шуданд.

Дар бисёр ҳолатҳо ин ҷараён бо поймолкунии ҳуқуқи муҳоҷирон гузаштааст. Мақомот дар Тоҷикистон чунин рафтори Русияро танқид ва ба риояи ҳуқуқи муҳоҷирон даъват намуданд, вале дар Маскав мақомот ин тадбирҳоро амри ногузир барои “ба тартиб даровардани ҷараёни муҳоҷират” дуруст мешуморанд.

Манзили Нетаняҳу дар Қайсария, шимоли Исроил, ҷойгир аст.

Ба гузориши расонаҳо, дар замони ҳодиса Нетаняҳу дар он минтақа ҳузур надошт. Дар бораи хисорот хабаре нест.

Ин ҳодиса дар ҳоле рух дод, ки “Ҳизбуллоҳ”-и Лубнон баъд аз кушта шудани Яҳё Синвор, раҳбари гурӯҳи “Ҳамос”, марҳилаи нав ва сахттари ҷангро ба зидди Исроил эълон кард.

Артиши Исроил рӯзи 17-уми октябр хабар дод, ки Синвори 62-сола дар Навори Ғазза кушта шуд.

“Ҳизбуллоҳ”-и Лубнон ва гурӯҳи фаластинии “Ҳамос” аз ҳимояти Эрон бархурдоранд. Иёлоти Муттаҳидаи Амрико ҳарду созмонро террористӣ медонад.

"Ҳамос" аз пуштибонии Ҷумҳурии Исломӣ бархурдор аст, вале аз сӯйи Амрико ва Иттиҳоди Аврупо созмони террористӣ эътироф шудааст.

Хоманаӣ рӯзи 19-уми октябр дар баёнияе гуфт, "аз даст додани Яҳё Синвор бешак барои муқовимат дарднок аст, аммо бо марги чеҳраҳои саршинос ҷабҳа аз ҳаракат нахоҳад монд."

Яҳё Синвор, тарроҳи ҳамлаи "Ҳамос" ба Исроил дар рӯзи 7-уми октябри соли 2023, ки боис ба ҷанг дар Ғазза шуд, рӯзи 17-уми октябр аз тарафи нерӯҳои исроилӣ кушта шуд.

Хабаргузории "Рёнхап" дар бораи интиқоли 12 ҳазор низомӣ навишт.

Ин иддао чанд рӯз баъди он садо дод, ки президенти Украина Владимир Зеленский Пхенянро ба интиқоли нерӯ ва аслиҳа ба Русия барои пуштибонӣ аз Кремл дар ҷанги беасосаш алайҳи Украина муттаҳам кард.

Хадамоти миллии истихбороти Куриёи Ҷанубӣ рӯзи 18-уми октябр эълон кард, ки аз 8 то 13-уми октябр аксҳое гирифт, ки нерӯҳои вижаи Пхенян дар як киштӣ ба Русия интиқол дода шудаанд

Аз соли 1990 бори аввал аст, ки як киштии русӣ ба обҳои Куриёи Шимолӣ ворид мешавад ва ин оғози ширкати низомии Куриёи Шимолиро дар ҷанг тасдиқ мекунад.

Кремл иддаои пешинаи Куриёи Ҷанубиро дар бораи он ки Пхенян ба Маскав мушаку тӯп додааст, рад карда буд.

Марвон Султон, мудири бемористон, гуфт, “тонкҳои исроилӣ бемористонро комилан муҳосира карда, нерӯи барқро буриданд ва тир холӣ карданд.”

Вазорати тандурустии Ғазза гуфтааст, Исроил ошёнаҳои болоии бемористонро ҳадаф қарор дод. Ҷое, ки ба иттилои манбаъ, “ба ҷуз аз кормандон ҳудуди 40 бемор ва захмӣ низ ҳузур доштанд”.

Исроил дар аввали моҳи октябри имсол бо ҳадафи маҳви гурӯҳи тундрави “Ҳамос” амалиёти нави низомиро дар шимоли Ғазза оғоз кард. Амрико ва Иттиҳоди Аврупо гурӯҳи “Ҳамос”-ро созмони террористӣ медонанд.

Ба гузориши вебсайти “Фарғона” аз 17-уми октябр, дар ин бора Акмал Саидов, муовини аввали раиси порлумони Узбекистон, гап задааст. “Мо ҳаргиз бачаҳои худро ба иҷрои ягон миссияи низомӣ, аз ҷумла посдори сулҳ, ба хориҷа намефиристем. Дар қаламрави кишвари мо ягон пойгоҳи ҳарбии берунӣ вуҷуд нахоҳад дошт,” – афзудааст ӯ.

Саидов дар мавриди пайвастани Узбекистон ба Иттиҳоди иқтисодии Аврупо (ЕАЭС) гуфтааст: “Мо беш аз ҳазор ҳуҷҷати гуногуни ин созмонро бодиққат омӯхта, ба хулосае омадем, ки имрӯз дар мақоми нозир мондан ба беҳтар аст.”

Вай барои исботи гуфтаҳои худ Қазоқистонро мисол овардааст, ки “аз шомил шудан ба Иттиҳоди иқтисодии АвруОсиё манфиати хеле кам ба даст овард”.

Арманистон, Беларус, Қазоқистон, Қирғизистон ва Русия аъзои Иттиҳоди иқтисодии Авруосиё ҳастанд. Узбекистону Куба ва Молдова мақоми нозирро доранд. Русия аз замони таъсиси Иттиҳоди иқтисодии АвруОсиё Тоҷикистонро барои пайвастан ба он ташвиқ мекунад.

Тарафдорони пайвастани Тоҷикистон ба ЕАЭС дар дохили кишвар кам нест. Бахусус муҳоҷирон бовар доранд, ки дар сурати узвияти Тоҷикистон дар созмон вазъи онҳо дар Русия беҳтар мешавад. Мухолифони пайвастани Тоҷикистон бовар доранд, ки шомилшавӣ ба ин созмони зери назари Русия, даромади буҷаи Тоҷикистонро аз ҳисоби боҷи гумрукӣ бамаротиб кам мекунад.

Мақомоти Тоҷикистон борҳо гуфтаанд, ки дар мавриди шомил шудан ё нашудан ба Иттиҳоди иқтисодии АвруОсиё таҷрибаи баъзе аз кишварҳои узв, бавижа Қирғизистон ва Арманистонро меомӯзанд.

Ин пул бахше аз барномаи чаҳорсолаи қарз ба Украина аст, ки моҳи марти соли гузашта тасвиб шуда буд. Маблағи умумии он 15,5 миллиард долларро ташкил медиҳад.

Як миллиард долларе, ки ҳоло IMF ҷудо кард, барои ниёзҳои буҷаи Украина сарф хоҳад шуд. Ин кишвар тақрибан се сол боз зери ҳуҷуми беасоси Русия қарор дорад.

Кристалина Георгиева, мудири иҷроияи Сандуқи Байнулмилалии Пул, рӯзи 18-уми октябр гуфт, бар асари ҳамлаҳои Русия бахшҳои иқтисоду иҷтимои Украина зиён дидаанд.

Ин ниҳоди байнулмилалии молӣ гуфт, Украина барои дарёфти қарз тамоми талабҳои ин ниҳодро иҷро кард, аз ҷумла ислоҳотро дар низоми молӣ.

Дар ин бора Халил ал-Ҳайё, муовини раҳбари “Ҳамос” ва музокиракунандаи аслии гурӯҳ, рӯзи 18-уми октябр изҳорот дод.

Мақомоти Исроил рӯзи 17-уми октябр хабар доданд, ки Яҳё Синвор дар Навори Ғазза кушта шуд. Исроил Катс, вазири корҳои хориҷии ин кишвар, марги Синворро "дастоварди низомӣ ва ахлоқӣ" барои артиши Исроил номид.

Гурӯҳи “Ҳизбуллоҳ” дар Лубнон дар вокуниш ба ин ҳодиса рӯзи 18-уми октябр аз “марҳилаи нав” дар ҷанг бо Исроил хабар дод.

Иёлоти Муттаҳида “Ҳизбуллоҳ”-ро созмони террористӣ медонад, аммо Иттиҳоди Аврупо танҳо шохаи низомии онро ба рӯйхати сиёҳ шомил кардааст.

Яҳё Синворро яке аз тарроҳони ҳамлаи маргбор ба Исроил дар рӯзи 7-уми октябри соли 2023 ном мебаранд. Ҷангҷӯён дар он рӯз дар ҷануби Исроил 1200 касро кушта ва беш аз дусад нафарро гаравгон гирифтанд.

Баъди ин ҳамла, Исроил дар Ғазза амалиёти густардаро оғоз кард, ки то ҳол идома дорад. Вазорати тандурустии Ғазза мегӯяд, дар натиҷаи ҳамлаҳои Исроил аз замину ҳаво зиёда аз 42 ҳазор фаластинӣ кушта шудаанд.

Вазорати дифои Русия дар Телеграм хабар дод, ки 95 сарбози бозгаштаи Русия дар Беларус аз муоинаи тиббӣ хоҳанд гузашт.

Мақомоти Украина дар ин бора чизе нагуфтанд.

Пеш аз ин Русия ва Украина ҷасади сарбозони кушташударо ба якдигар доданд.

Шамсаил Саралиев, вакили Думаи давлатӣ, гуфт, дар ин мубодила Русия ҷасади 501 низомиро ба Украина баргардонд ва дар иваз ҷасади 89 сарбозашро гирифт.

Ӯ пас аз интихоботи ҷанҷолии соли 2020, ки боис ба саркӯб ва боздошти мухолифон шуд, ба хориҷа рафтааст.

Мақомоти Беларус вайро дар набуданаш бо гуноҳи нақзи амнияти миллӣ ва сармоягузории терроризм ба 17 сол зиндон маҳкум ва амволашро мусодира карданд.

Хонаи Валер Тсапкала, ки ҳоло ба музояда гузоштаанд, 418,3 метри мураббаъ буда, 2,1 миллион рубли беларусӣ (641,500 доллар) арзиш дорад.

Тсапкала соҳибкор ва сафири собиқи Беларус дар Иёлоти Муттаҳида аст.

Мақомоти Беларус ҳафтае пеш манзили хонаводаи рӯзноманигор Алексей Дзикавитский, иҷрокунандаи вазифаи мудири “Белсат ТВ”-ро низ мусодира карданд.