Вазири корҳои хориҷии Амрико ҳангоми мулоқот бо ҳамтоёнаш аз чаҳор кишвари Осиёи Марказӣ, аз ҷумла Тоҷикистон, ҳамлаи Русияро ба Украина ба шиддат маҳкум карда, "қаблан тарҳрезишуда ва беасос" номидааст.

Мулоқоти онлайн рӯзи 28-уми феврал баргузор шуд. Департаменти давлатии Амрико гуфт, Энтони Блинкен ҳамзамон пуштибонии Иёлоти Муттаҳидаро аз истиқлол ва тамомияти арзии кишварҳои минтақа баён дошт.

Мақомоти Тоҷикистон рӯзи 28-уми феврал баргузории мулоқотро тасдиқ карда, аммо дар мавриди рӯйдодҳои Украина чизе нагуфтанд. Вазорати корҳои хориҷӣ дар эъломияи расмӣ хабар дод, ки дар мулоқот "масъалаҳои марбут ба густариши ҳамкориҳои шарикӣ баррасӣ гардиданд. Ҷонибҳо ба мавзӯи амнияти минтақавӣ низ таваҷҷуҳи хос зоҳир карданд."

Ин дар ҳолест, ки Вазорати корҳои хориҷии Қирғизистон баҳси Украина ва таъсири таҳримҳои зидди Русия ба иқтисоди кишварҳои дигарро дар мулоқот тасдиқ намудааст.

Ба иттилои манбаъ, Руслан Казакбоев, вазири умури хориҷии Қирғизистон, гуфтааст, кишвараш авзоъро дар Украина "бо нигаронӣ" пайгирӣ дорад ва таъкид кардааст, ки "мардуми Қирғизистон бо русҳо ва украиниҳо муносибати дӯстонаву таърихӣ доранд".

"Ҷумҳурии Қирғизистон бо дареғи зиёд баён медорад, ки имрӯз ҷаҳон ба ҷойи муттаҳид шудан, роҳи тақсимшавӣ ба дурусту нодурустро пеш гирифтааст. Казакбоев аз оғози музокироти Русия ва Украина истиқбол карда, аз ҷонибҳо хост, роҳҳои нави муколамаро биёбанд," -- гуфта шудааст дар иттилоияи Вазорати корҳои хориҷии Қирғизистон.

Дар мулоқот намояндагони Узбекистону Қазоқистон ҳам иштирок доштанд.

Русия рӯзи 24-уми феврали имсол ба Украина ҳамлаи низомӣ кард. Амрико, Иттиҳоди Аврупо, Бритониё ва бисёре аз кишварҳои дигари ҷаҳон алайҳи Маскав таҳримҳои иқтисодии нав ҷорӣ карданд. Ба далели таҳримҳои байнулмилалӣ қурби рубли русӣ башиддат поин рафт.

Ҳайатҳои Украина ва Русия рӯзи 28-уми ферал дар минтақаи Гомели Беларус гуфтушунид карданд. Киев хоҳони оташбаси фаврӣ ва хуруҷи нерӯҳои Русия аз хоки Украина аст. Ҷонибҳо гуфтаанд, пеш аз даври дувуми мулоқот барои машварат ба пойтахтҳои худ баргаштанд.

Кишварҳои Осиёи Марказӣ ба эълон кардани мавқеи худ дар баробари рӯйдодҳои Украина шитоб надоранд. Коршиносон чунин мавқеъгириро талоши нигоҳдории сиёсати хориҷии чандсамтӣ мешуморанд.

Ҳамлаи Русия ба Украина дар кишварҳои пасошӯравӣ, аз ҷумла Осиёи Марказӣ, вокунишҳои гуногун ба миён овард. Дар баъзе аз онҳо сатҳи ин вокуниш танҳо дар шабакаҳои иҷтимоӣ дида мешавад. Дар бархеи дигар то марзи эътироз ва тазоҳуроти зидди амалкарди Маскав мерасад. Дар ин миён ҳомиёни Владимир Путин ва ҳамлаи нерӯҳои мусаллаҳи Русия ба хоки ҳамсояаш низ зиёданд. Бо ин ҳол, вижагии муштараки ҳамаи кишварҳои минтақа то охир нигоҳ доштани мавқеи норӯшан аст.

Хомӯшӣ тилост?

Як рӯз пас аз ҳамлаи Русия ба Украина Валентина Матвиенко, раиси Шӯрои Федератсия, бо ҳадафи иштирок дар форуми байнипорлумонӣ ба Тоҷикистон омад. Ӯ дар дидор бо Рустами Эмомалӣ, раиси Маҷлиси Миллӣ ва писари президенти Тоҷикистон, гуфт, ки роҳбари кишварро аз қазияи Украина огоҳ кардааст. “Ҳамкорон, дӯстони тоҷики мо аз наздик назорат мекунанд ва ҳамаро медонанд...”, -гуфтааст Матвиенко.

Дастгоҳи раисиҷумҳури Тоҷикистон дар мавриди дидори Эмомалӣ Раҳмон ва Валентина Матвиенко бе зикри Украина навиштааст, “ҷонибҳо дар ҷараёни мулоқот дар мавриди тағйири босуръати вазъияти сиёсии дар ҷаҳон, ташдиди даргириҳо дар бархе аз манотиқ, авзои сиёсӣ дар Афғонистон ва мубориза бо таҳдид ва чолишҳои ҷаҳони муосир табодули афкор карданд”.

Аз ҷониби дастгоҳи раисиҷумҳур, сиёсатмадорон ва намояндагони порлумон баёнияҳои расмӣ пахш нашуданд. Хабаргузории расмии “Ховар” 24-уми феврал баёнияи Антонио Гутерриш, дабири кулли СММ-ро нашр кард, ки дар он гуфта шудааст, амалиёти низомии Русия дар Донбасс усули СММ-ро нақз мекунад. Аммо ин хабар чанде баъд аз сомонаи хабаргузории давлатӣ нопадид шуд.

Парвиз Муллоҷонов, сиёсатшиноси тоҷик, бар ин аст, ки кишварҳои минтақа ба монанди муноқишаи соли 2008 бо Гурҷистон ва соли 2014 ҳангоми ғасби Қрим, ки кишварҳои дигар онро эътироф накарданд, сиёсати бетарафиро пеш мегиранд.

“Мавқеи умумии кишварҳо чунин аст, ки бо Русия робитаи худ дошта бошанд ва ҳамзамон дар пасманзари таҳримҳои шадид робитаашон бо Ғарб халалдор нашавад,” - мегӯяд Муллоҷонов. Бо вуҷуди ин, ба гуфтаи коршинос, буҳрони феълӣ аз пештараҳо дида печидатар аст. Аз ин рӯ, шояд Маскав аз ҳампаймонҳояш мавқеи рӯшантареро талаб кунад.

Номувофиқатӣ дар паёмҳо

Шояд аз ин сабаб байни сухангӯёни Кремл аз як сӯ ва Қирғизистону Узбекистон аз сӯйи дигар номувофиқатии ҷиддӣ ба чашм мерасад. Кремл 26-уми феврал аз суҳбати Содир Ҷабборов, раиси ҷумҳури Қирғизстон ва Владимир Путин хабар дод. Дастгоҳи Путин гуфт, ки роҳбари Қирғизистон аз амалиёти Русия дар Украина ҳимоят кард. Аммо дафтари матбуотии раиси ҷумҳури Қирғизистон танҳо хабари кӯтоҳе аз суҳбати телефонӣ нашр кард.

“Роҳбарони кишварҳо дар мавриди масъалаҳои мубрами ҳамкориҳои Русия ва Қирғизистон гуфтугӯ карданд. Содир Ҷабборов ва Владимир Путин ҳамчунин дар масъалаҳои байналмилалӣ ва минтақаӣ, аз ҷумла дар бораи вазъияти Украини табодули назар намуданд”, -- гуфта шуд дар паём.

Як рӯз пеш аз ин дафтари матбуотии Русия хабар дод, ки 25-уми феврал зимни суҳбати телефонӣ бо Владимир Путин роҳбари Узбекистон гуфтааст, амалкарди ҷониби Русияро дарк мекунад. Аммо Шерзод Асадов, сухангӯи раисиҷумҳури Узбекистон, дар шарҳи суҳбати телефонии ду раҳбар гуфт, “Узбекистон дар масъалаи амалиёти низомии Русия дар Украина сиёсати одилона ва бетарафона дорад”.

“Ба далели амниятӣ”

Қосимҷомарт Тоқаев, раиси ҷумҳури Қазоқистон, то ҳол дар бораи ҷанги Украина мавқеи рӯшане иброз накардааст. Аммо расонаҳои украинӣ менависанд, ки Қазоқистон ба дархости Русия барои фиристодани нерӯ ба Украина ва эътироф кардани ҷумҳуриҳои Донетск ва Луҳанск ҷавоби рад додааст.

Тоқаев ва Путин 22-юми феврал суҳбати телефонӣ доштаанд, ки дар рафти он президенти Русия “ба раиси ҷумҳури Қазоқистон аз мавқеи роҳбарияти Русия дар мавриди авзои Украина иттилоъ додааст”. Аммо хабарҳо дар сомонаи раиси ҷумҳури Қазоқистон дар ин муддат танҳо роҷеъ ба коҳиш додани таъсири манфии қазияи Украина ба иқтисоди Қазоқистон нашр мешуданд ва аз равобити ду кишвар ва ё роҳбарон чизе пахш намекард.

Бо ин ҳол, Маулен Ашимбоев, намояндаи Сенати Қазоқистон гуфт, Русия барои кумак ба Қазоқистон муроҷиат накардааст. Ин сиёсатмадори қазоқ зикр кард, ки нерӯҳои сулҳхоҳи СПАД танҳо метавонанд, дар ҳудуди кишварҳои узв вориди амал шаванд. Минтақаи даргир (Украина) узви СПАД нест.

Ишқобод мисли ҳамеша сукут ихтиёр кардааст.

“Вокуниши кишварҳои минтақа дар мавриди Украина қобили интизор аст ва нишон медиҳад, ки масъала хеле ҳассос ва баҳсбарангез аст. Ҳамаи кишварҳо медонанд, ки дар воқеъ онҳо заминаҳои оғози амалиёти низомӣ дар Украинаро намепазиранд. Дар айни ҳол ҳамаи онҳо амиқан ба ҳам пайвастанд ва аз Русия вобастагӣ доранд ва барои ибрози назари манфӣ дар мавриди қазияи Украина нестанд,” -- мегӯяд Эмил Ҷӯраев, сиёсатшиноси мустақил аз Қирғизистон.

Дар ҳоле ки мақомот аз ибрози мавқеи рӯшан дар бораи Украина худдорӣ мекунанд, шаҳрвандон дар кишварҳои минтақа фаъолтар ба назар мерасанд. Хусусан баҳси тарафдорони тамомияти арзии Украина ва ҳимоятгарони Путин дар саҳифаҳои иҷтимоӣ доғтар мешавад.

Дар шаҳрҳои Алмато ва Бишкек даҳҳо ҷавони фаъол бо нишони эътироз дар назди намояндагиҳои дипломатии Русия алайҳи ҷанг дар Украина шиор доданд.

Шаби 24-уми феврали Владимир Путин дар мавриди шурӯи “амалиёти вижаи низомӣ” бо ҳадафи “нозизудоӣ ва ғайринизомисозии” Украинаро эълон кард. Чанд лаҳза баъди ин эълон дар шаҳрҳои Киев, Харков, Одесса, Краматорск ва Бердянск инфиҷор ва партоби мушак шунида шуд. Нерӯҳои Русия дар панҷ вилояти Украина аз марз гузаштанд.

Дар вилоятҳои Чернигов, Харков ва Киев, Днепр, Николаев ва Черкас рафтуомад манъ шуд.

Амрико, Иттиҳоди Аврупо, Бритониё ва кишварҳои дигар Маскавро зери таҳримҳои нав ва шадиди иқтисодӣ мегиранд. Кишварҳои Иттиҳоди Аврупо ба Украина силоҳ медиҳанд. Владимир Путин мушакҳои атомии худро ба ҳолати омодабош овардааст.

Намояндаи Русия дар Созмони Милали Муттаҳид эълон кард, ки Амрико ба 12 узви ин ҳайат дастур додааст, то рӯзи 7-уми март хоки Амрикоро тарк кунанд. Василий Небензя рӯзи душанбе ба хабарнигорон гуфт, "ин хабар ҷиддӣ аст".

Дар ҳамин ҳол, намояндагии Амрико дар Созмони Милали Муттаҳид эълон кард, ки ихроҷи ин афрод бинобар нигарониҳои вобаста ба амнияти миллӣ будааст ва онҳо "кормандони истихборот" ҳастанд. Сухангӯи ҳайати намояндагии Амрико гуфт, шахсони ихроҷшуда "машғули фаъолиятҳои ҷосусӣ буданд, ки хилофи амнияти миллии мо аст".

Ихроҷи ин афрод нахуст аз сӯи муовини сафири Амрико дар СММ Ричард Миллс тасдиқ шуд. "Он дипломатҳое, ки дастури ихроҷи онҳо аз Амрико дода шуд, ба корҳое машғул буданд, ки ба вазоиф ва масъулиятҳои онҳо ҳамчун дипломат мутобиқ набуд," -- афзуд Миллс дар Шӯрои Амнияти СММ.

Муовини сафири Амрико дар Созмони Милал дар идома гуфт, "аз онҳо хоста шуда буд, то ба амнияти миллии кишвари мизбон осеб нарасонанд" ва афзуд, ин тасмим комилан мутобиқ бо тавофуқномаҳои Созмони Милали Муттаҳид гирифта шудааст.

Василий Небензя, сафири Русия дар СММ, ин тасмимро "нақзи ошкор"-и созишномаи Созмони Милали Муттаҳид ба унвони кишвари мизбон ва нақзи Конвенсияи Вена доир ба робитаҳои дипломатӣ хонд.

Сафири Русия дар Амрико ҳам ин тасмимро "амали хасмона" хонд ва гуфт, Маскав иддаои Вашингтонро ба таври куллӣ рад мекунад. "Иқдомоти Вашингтон на барои субот дар саҳнаи байнулмилалӣ аст ва на ҳифзи робитаҳои дуҷониба байни ду қудрати бузург дар сатҳе, ки барои сулҳ ва амнияти байналмиалӣ зарурӣ аст," -- гуфт Анатолий Антонов, сафири Русия дар Амрико.

Ба гузориши хабаргузории "Франс Пресс", ҳайати намояндагии Русия дар Созмони Милали Муттаҳид 100 узв дорад.

Ин тасмими Амрико дар рӯзе эълон шуд, ки Маҷмаи умумии СММ баҳси фавқулодаро дар бораи қатъномае дар бораи "таҷовуз"-и Маскав ба Украина оғоз кард. Антонио Гуттериш, дабири кулли СММ, пас аз оғози нишаст бо як дақиқа хомӯшӣ барои қурбониёни даргирӣ, ҳушдор дод, ки "ҷанг дар Украина бояд поён дода шавад".

"Бас аст, сарбозон бояд ба қисмҳои ҳарбии худ баргарданд, раҳбарон бояд ба тарафи сулҳ ҳаракат кунанд, ғайринизомиён бояд муҳофизат шаванд," -- афзуд ӯ.

Интизор меравад, намояндагони беш аз 100 кишвар қатъномаеро, ки бояд аз Русия бихоҳад, нерӯҳояшоро аз Украина берун кунад, баррасӣ намоянд. Намояндаи Украина дар СММ аз кишварҳо хост, аз ин қатънома ҳимоят кунанд. Аммо ин бовар вуҷуд дорад, ки кишварҳое чун Сурия, Чин, Куба ва Ҳинд ё аз Русия ҳимоят намоянд ва ё аз раъй додан худдорӣ варзанд.

Гуфтушуниди як ҳайати Украина бо намояндагони Русия, ки ба сабаби таҷовузаш ба Украина зери таҳримҳои сахти иқтисодии кишварҳои ғарбӣ қарор гирифт, шоми 28-уми феврал ба поён расид. Намояндагони ду тараф пеш аз даври дувуми музокирот барои машварат ба пойтахтҳои худ рафтаанд. Мулоқот бо гузашти панҷ рӯз аз ҳамла дар марзи Ҷумҳурии Беларус баргузор шуд.

Дар бораи ҷамъбасти мулоқот хабаргузории давлатии РИА Новости бо такя ба мушовири раисиҷумҳури Украина Михайло Подоляк ва раиси ҳайати Русия Владимир Мединский хабар дод. Мединский гуфтааст, "розӣ шудем, ки музокиротро идома бидиҳем" ва афзудааст, "даври нави мулоқот рӯзҳои наздик дар сарҳади Лаҳистону Беларус баргузор хоҳад шуд."

Дафтари матбуоти президенти Украина гуфт, ҷонибҳо дар мулоқоти рӯзи 28-уми феврал "як қатор масъалаҳои калидиро ба таври муфассал баррасӣ карданд".

Раёсати ҷумҳури Украина пеш аз музокирот гуфта буд, ки Киев барои оташбаси фаврӣ ва хуруҷи нерӯҳои Русия аз Украина фишор хоҳад овард.

Дар Аврупо ва Украина чӣ гуфтанд?

Мулоқот дар ҳоле баргузор шуд, ки ба гуфтаи Ҷозеп Боррел, масъули сиёсати хориҷии Иттиҳоди Аврупо, ҳамлаи Русия "рӯз ба рӯз золимонатар мешавад". Боррел 28-уми феврал дар нишасти матбуотӣ дар Брюссел гуфт, нерӯҳои мусаллаҳи Украина ҷасурона дар муқобили нерӯҳои Русия меҷанганд, аммо афзуд, талафот дар байни ғайринизомиён зиёд шудааст ва "мавҷи одамон дар ҷустуҷӯйи паноҳгоҳ ва фирор аз ҷанг низ афзоиш меёбад."

Бино ба гузоришҳо, рӯзи 28-уми феврал шаҳрҳои Харков ва Чернишёв зери бомбаборони сахти нерӯҳои Русия мондаанд. Антон Герашенко, мушовири вазири умури дохилии Украина, рӯзи 28-уми феврал гуфт, дар натиҷаи ҳамлаҳои мушакии Русия дар Харков даҳҳо нафар кушта шудаанд.

Маскав гуфт, шаҳрҳои Бердянск ва Энергодар дар вилояти Запорожйе дар ҷанубушарқи Украина ва манотиқи атрофи нерӯгоҳи атомии Запорожйеро гирифтанд.

Дар як муроҷиатномаи нав дар рӯзи 28-уми феврал, Владимир Зеленский, раиси ҷумҳури Украина аз сарбозони рус хост, силоҳҳояшонро ба замин бигзоранд ва кишвари ӯро тарк кунанд. Ӯ дар ин муроҷиаташ мегӯяд: “Силоҳҳоятонро гузореду аз инҷо биравед. Ба фармондеҳонатон бовар накунед. Ба таблиғотгаронатон бовар накунед. Ҷони худро ҳифз кунед.”

Ӯ иддао кард, ки дар ҷанг то кунун 4500 сарбози рус кушта шудаанд, вале то ҳол иттилои тасдиқшудае дар ин бора дар даст нест. Русия эътироф кард, ки теъдоде аз сарбозони кишвар куштаву маҷруҳ шудаанд, вале шумораи дақиқеро нагуфтаанд.

Наворро дар инҷо бинед:

Embed ба дигарон фиристед

Идомаи ҷанг дар Украина. Таҳримҳои зидди Русия сахттар мешаванд

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:38 0:00

Таҳримҳое, ки "Русияро бо Эрон дар як мавқеъ қарор медиҳад"

Дар ҳамин ҳол, Иёлоти Муттаҳида ва ҳампаймонҳояш таҳримҳоро алайҳи муассисаҳои молии Русия бештар кардаанд. Ҷен Псаки, сухангӯи Кохи Сафед, гуфт, “таҳримҳое, ки эълон кардем, Русияро бо Эрон дар як мавқеъ қарор медиҳад. Онҳо аз низоми байнулмилалии бонкӣ берун карда шуданд. Мо ҳамчунин нисбати 80 дарсади бонку муассисаҳои молии Русия таҳрим эъмол кардем. Ин на танҳо тиҷоратро барои президент Путин ва ҳукумати Русия мушкил мекунад, балки кумак ва маблағгузорӣ ба бахши низомӣ дар ин кишварро душвору номумкин месозад.”

Президенти Русия, Владимир Путин, ки рӯзи панҷшанбе амри ҳамла ба Украинаро содир кард, ин таҳримҳои кишварҳои ғарбиро “хасмона” номид ва ба нерӯҳои боздорандаи ҳастаии кишвараш дастур дод, ки дар ҳолати омодабош қарор гиранд.

Оксана Маркарова, сафири Украина дар Амрико, гуфт, “ин як ҷанги саросарӣ ва ноодилона аст ва фурсати он аст, тоҷирони амрикоӣ сараш андеша кунанд. Ман медонам, ин чӣ қадар мушкил аст, ҳамчун вазири собиқи молия медонам, манофеи тиҷоратӣ чист ва онро дарк мекунам. Аммо фикр мекунам, фурсати он аст, ки обрӯи худро ҳифз кунанд ва бо режиме кор накунанд, ки барои ончӣ ки бо Украина карданду мекунанд, дар Додгоҳи Гаага нишинанд.”

Ҳимоятҳо аз Украина дар гӯшаҳои ҷаҳон

Ҳафтаи гузашта нерӯҳои Украина, ки ғайринизомиён ҳам дар канорашон ҳастанд, ба талошҳои нерӯҳои Русия барои пешравӣ ва шикаст додани шаҳрҳои бузург муқовимат карданд. Вазорати дифои Украина як видеои собитнашудаеро нашр кард, ки нишон медиҳад, ҳавопаймои бидуни сарнишин корвони артиши Русияро нобуд мекунад. Вале айни замон даъват ба тақвияти нерӯҳои Украина идома дорад.

Том Коттон, вакил аз Ҳизби Ҷумҳурихоҳи Амрико мегӯяд, “фурсати он расидааст, ки тамоми муассисаҳои молии Русияро аз тамоми ниҳодҳои байнулмилалии муомилоти пулӣ берун кунем. Вақти он расидааст, ки ба зидди содироти нафту гази Путин, манбаи асосии даромадаш таҳрим ҷорӣ кунем. Бояд бошитоб ба ҷабҳа аслиҳа фиристем. Аслиҳаи зиддитанкӣ, зидди ҳавопаймоҳо, снайпер, маводи сӯхт. Ин корро бояд як ҳафта пеш мекарданд, украиниҳо дигар вақт надоранд.”

Дар саросари ҷаҳон тарафдорони Украина бо талаби қатъи ҷанг раҳпаймоӣ карданд. Аз ҷумла, дар Вашингтон, ки қарор аст, онҷо, Ҷо Байден рӯзи сешанбе паёми солонаашро ба Конгресс ироа кунад.

Дар ҳоле ки Русия дар бораи теъдоди сарбозони захмӣ ё кушташудааш дар ҷараёни ҳамла ба Украина сукут меварзад, Киев ба хонаводаҳои сарбозони рус муроҷиат кардааст, ки шахсияти хешовандони асирафтода ва кушташудаи худро шиносоӣ кунанд.

ҶАНГ ДАР УКРАИНА. ХАБАРУ ГУЗОРИШҲОИ БЕШТАРРО ДАР ИНҶО ХОНЕД

Вазорати корҳои дохилии Украина 27-уми феврал гуфт, дар пойгоҳи интернетии 200rf.com аксу навори сарбозони асирафтода ё кушташудаи Русияро гузоштаанд. Дар яке аз наворҳо ба сарбози асирафтодаи Русия иҷозат дода шудааст, ба хешовандонаш дар бораи макони будубоши худ хабар диҳад.

Дар наворе дигар аз сарбоз пурсидаанд, оё барои модару падараш паёме дорад? Ӯ гуфтааст: "Ба ин ҷо омадан намехостам, маҷбур карданд." Радиои Озодӣ натавонист, мушаххас кунад, ки онҳо зери фишор қарор гирифтаанд ё не.

Вадим Денисенко, мушовири вазири корҳои дохилии Украина, рӯзи 27-уми феврал дар муроҷиати худ ба хонаводаҳои сарбозони рус иддао кард, ки Украина бо асирони ҷангӣ рафтори "хеле инсондӯстона" дорад.

"Ҳеч кас ба онҳо бадрафторӣ намекунад. Агар лозим шавад, ёрии тиббӣ мерасонем. Аммо ҳукумати Шумо телефонҳои наздиконатонро гирифтааст. Онҳо имкони тамос гирифтан бо Шуморо надоранд," -- гуфт Денисенко.

Ба назар мерасад, ин иқдом қисман зарба задан ба рӯҳия ва пуштибонӣ аз ҳамлаи Русия ба Украина нигаронида шудааст. Мушовири вазири корҳои дохилии Украина гуфт, ҳукумати Русия дар масъалаи баргардондани ҷасади сарбозонаш бетаваҷҷуҳ аст.

"Аз ин рӯ, маҷбур шудем, ба Шумо, шаҳрвандони Русия, муроҷиат кунем. Онҳоеро пайдо кунед, ки ба сабаби ғайриқонунӣ гузаштани сарҳади мо ва бар асоси дастури ғайриқонунӣ ва нафратовари президенти Шумо кушта шудаанд," -- гуфтааст Денисенко дар муроҷиати видеоӣ.

Вазорати дифои Русия аз замони оғози ҳамла ба Украина то ҳол дар бораи шумори сарбозони кушташуда, захмӣ ё асирафтодааш иттилое нашр накардааст. Артиши Украина рӯзи 27-уми феврал гуфт, Русия ҳудуди 4300 низомии худро аз даст дод.

Як рӯз пеш артиши Украина гуфта буд, беш аз 3500 сарбози рус кушта шудаанд. Тасдиқи мустақилонаи ин иддао имконнопазир аст.

Руслан Левиев, муассиси гурӯҳи ғайридавлатии Conflict Intelligence Team (CIT), мегӯяд, ба ҳисоби онҳо то ин дам дар даргириҳо дастикам 500 сарбози рус кушта шудаанд.

Вазорати дифои Русия рӯзи 27-уми феврал бори аввал талафотро дар байни сарбозонаш эътироф кард, аммо ҳеч шумораеро наовард. Хабаргузории давлатии РИА Новости аз қавли Вазорати дифоъ навишт, "мутаассифона, дар байни ҳамразмони мо куштаҳо ва захмиҳо ҳастанд."

Аз оғози ҷанг танҳо хабари расмии марги як сарбози рус тасдиқ шудааст. Вале онро на Вазорати дифои Русия, балки раиси вилояти Доғистон гуфт.

Сергей Меликов дар паёме дар Instagram навишт, Нурмуҳаммад Ҳоҷимуҳаммадов (Нурмагомед Гаҷимагомедов), зодаи Доғистон, ки дар сафи нерӯҳои ҳавоии Русия хидмат мекард, дар ҷанг "ҳалок шуд". Вай ошкор накардааст, ки Ҳоҷимуҳаммадов дар чӣ вазъияте ба ҳалокат расид.

Ҳайати Украина барои гуфтугӯ бо намояндагони Русия ба марзи Беларус рафтааст. Маскав ба далели ҳамлаи беасосаш ба Украина бо таҳримҳои сахти иқтисодии Ғарб рӯбарӯст.

Дафтари президент Зеленский рӯзи 28-уми феврал гуфт, ба ҳайати Украина вазири дифоъ Алексей Резников ва мушовири президент Михайло Подоляк шомиланд.

Мулоқот чанд соат пас аз шунидани садои таркишҳо дар пойтахти Украина ва шаҳри Харков баргузор мешавад. Мақомоти Украина гуфтанд, раисиҷумҳур Владимир Зеленский ҳушдор додааст, ки 24 соати оянда барои Украина муҳим хоҳад буд.

Зеленский дар як паёми нав рӯзи 28-уми феврал аз сарбозони рус даъват кард, силоҳҳои худро бигузоранду бираванд. "Ба фармондеҳону таблиғгарони худ бовар накунед. Фақат ҷони худро наҷот диҳед," -- гуфт Зеленский.

Вай афзуд, дар ҷараёни ҳамлаи Маскав ба Украина беш аз 4500 сарбози рус ҷони худро аз даст додаанд. Тасдиқи мустақилони ин рақам имконнопазир аст. Артиши Русия 27-уми феврал бори аввал иқрор шуд, ки баъзе аз сарбозонаш "кушта" ва ё "захмӣ" шудаанд, вале тафсилот надод.

Дафтари президент Владимир Зеленский хабар дод, ки мақомоти Киеву Маскав дар як маконе дар марзи Беларус бо Украина мулоқот хоҳанд кард, аммо сана ва вақти онро нагуфтаанд.

Манбаъ дар баёнияе рӯзи 27-уми феврал гуфт, музокирот ҳосили гуфтугӯи телефонии Зеленский ва раҳбари худкомаи Беларус, Александр Лукашенко, аст ва бидуни ҳеч шарте сурат хоҳад гирифт.

"Мо ба мувофиқа расидем, ки ҳайати Украина бо ҳайати Русия бидуни ягон шарт дар марзи Украинаву Беларус, дар наздикии рӯдхонаи Припят, мулоқот кунад," -- омадааст дар изҳорот.

Аз ин пеш раисиҷумҳури Украина гуфта буд, кишвараш барои гуфтушуниди сулҳ бо Русия омода аст, аммо на дар Беларус. Владимир Зеленский Варшава, Братислава, Истанбул, Будапешт ё Бокуро ҳамчун макони алтернативии музокирот бо Русия пешниҳод кард.

Кремлин 27-уми феврал хабар дод, ки ҳайати Русия барои гуфтугӯ бо мақомоти Украина ба шаҳри Гомели Беларус рафтааст. Ба қавли Дмитрий Песков, сухангӯйи Кремлин, ба ин ҳайат низомиёну дипломатҳо шомиланд.

Эъломия дар бораи гуфтушуниди сулҳ дар рӯзи чаҳоруми ҳамлаи Русия ба Украина садо дод. Кишварҳои ғарбӣ ба зидди Русия таҳримҳои сахт ҷорӣ карда, ба ҳимояти низомӣ аз Украина силоҳу муҳиммот фиристодаанд.

Дар ҳоле ки мақомоти Тоҷикистон дар бораи сарнавишти шаҳрвандони кишвар дар Украина хабаре надодаанд, яке аз онҳо мегӯяд, мавриди ҳамла қарор гирифт. Чандеи дигар шаби гузашта ба минтақаи наздик ба марзи Лаҳистон фирор кардаанд. Шумори расмии шаҳрвандони Тоҷикистон дар Украина маълум нест. Теъдоди тахминии онҳо 8 ҳазор нафар гуфта мешавад.

"Ба кӯча набароед"

Як муҳоҷири тоҷик дар Украина рӯзи 27-уми феврал ба Радиои Озодӣ хабар дод, ки дар Киев ба мошинаш чанд тир задаанд, аммо маълум нест аз тарафи кӣ. Исматулло Сафаров мегӯяд, тир ба чанд ҷойи мошинаш бархӯрд, худаш сиҳату саломат аст.

"Шаби гузашта аз ҳама шаби вазнинтарин барои мардуми Украина буд. Барои гирифтани чанд чиз аз дорухона ба берун баромадам. Ба мошинаам чор-панҷ тир заданд. Аз паҳлӯ, аз пеш, аз болои мошин. Худо нигоҳ дошт. Худро эҳтиёт кунед, ба кӯча набароед," – гуфт ӯ дар паёми видеоӣ, ки ба Радиои Озодӣ фиристод.

Аз Днепр то Лвов

Дар ҳамин ҳол, ба иттилои дарёфтӣ, беш аз 30 донишҷӯ ва муҳоҷири тоҷик шаби гузашта аз Днепр ба вилояти Лвови Украина, ҳаммарз ба Лаҳистон (Полша), расидаанд.

Дастикам се донишҷӯ рӯзи 27-уми феврал ба Радиои Озодӣ гуфтанд, ки ҳоло мунтазири даромадан ба Полша ҳастанд. Мақомоти Тоҷикистон, аз ҷумла Вазорати корҳои хориҷӣ ё сафорати кишвар дар Киев дар ин бора изҳори назаре накардаанд. Пештар сафорат гуфта буд, он шаҳрвандони Тоҷикистонро, ки мехоҳанд, аз Украина берун раванд, номнавис мекунад.

Саидҷон, як донишҷӯйи тоҷик, рӯзи якшанбе нақл кард, ки шаби гузашта аз Днепр бо ҳазорон украинӣ ба самти Лвов ҳаракат карданд. “Дар роҳ чанд тир ба поезд расид. Чароғҳояшро хомӯш карданд. Аз мо низ хостанд, ки телефонҳоро хомӯш кунем. Пурра дар торикӣ ҳаракат кардем,” – нақл кард ӯ.

Нақли муҳоҷирони тоҷикро дар Украина дар инҷо бинед:

Embed ба дигарон фиристед

Муҳоҷирони тоҷик дар Украина гуфтанд, ки чӣ ҳол доранд

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:33 0:00

Дилшод, донишҷӯйи дигар мегӯяд, маблағи онҳо тамом шудааст ва аз ҳеч банкомат пул гирифта наметавонанд. “Пулҳои мо тамом шуд, дар корт дорем, вале банкоматҳо фаъол нестанд,” -- гуфт ӯ.

Ба қавли донишҷӯён, ҳоло мусофирбарҳо ба интиқоли фирориён ба Лаҳистон машғуланд, аммо “дар навбати аввал украиниҳоро мебаранд”. “Гуфтанд, ки хориҷиҳоро дар навбати дуюм мебарорем,” – афзуд Дилшод.

Лаҳистон ва чанд кишвари дигари аврупоӣ гуфтаанд, ба қабули паноҳҷӯён аз Украина омодаанд. Идораи умури паноҳандагони Созмони Милал 26-уми феврал гуфт, аз оғози ҳамлаи Русия ба Украина беш аз 120 ҳазор кас ин кишварро тарк карда, асосан ба Лаҳистон, Руминия, Молдова ва Маҷористон паноҳ бурданд. Оё дар миёни онҳо шаҳрвандони Тоҷикистон низ ҳастанд ё не, чизе гуфта нашудааст.

Раисиҷумҳури Украина гуфт, кишвараш барои гуфтушуниди сулҳ бо Русия омода аст, аммо на дар Беларус.

Владимир Зеленский 27-уми феврал дар паёми видеоӣ Варшава, Братислава, Истанбул, Будапешт ё Бокуро ҳамчун макони алтернативии музокирот бо Русия пешниҳод кард.

"Агар аз ҳудуди Шумо ягон амалиёти таҷовузкоронае намешуд, мо метавонистем дар Минск суҳбат кунем," – афзуд ӯ.

Пештар Кремлин гуфта буд, ки як ҳайати Русия барои гуфтугӯ бо мақомоти Украина ба шаҳри Гомели Беларус рафтааст.

Дмитрий Песков, сухангӯйи Кремлин, 27-уми феврал гуфт, ба ин ҳайат низомиёну дипломатҳо шомиланд. "Ҳайати Русия ба музокирот омода аст ва мо ҳоло мунтазири украиниҳо ҳастем," – гуфт ӯ.

Эъломия дар рӯзи чаҳоруми ҳамлаи Русия ба Украина садо дод. Бино ба гузоришҳо, нерӯҳои Русия ба Харков, дувумин шаҳри бузурги Украина, ворид шудаанд, вале Киев мегӯяд, ба муқобила омода аст.

Кишварҳои ғарбӣ ба зидди Русия таҳримҳои сахттар ҷорӣ карда, ба ҳимояти низомӣ аз Украина силоҳу муҳиммот мефиристанд.

Ду намояндаи Думаи Давлатӣ ё порлумони Русия дар мавриди тасмими Владимир Путин, раисиҷумҳури ин кишвар, дар робита ба ишғоли Украина изҳори нигаронӣ карданд.

Михаил Матвеев, намояндаи минтақаи Самара аз ҳизби коммунист, аввалин мақом дар ин кишвар аст, ки хоҳони таваққуф ё боздоштани ҷанг дар Украина шуд.

Ҳамчунон узви дигари ҳизби коммунист, Олег Смолин, намояндаи Омск дар Думаи Давлатӣ, дар эъломияе дар шабакаҳои иҷтимоӣ навишт, шак дорад, ки амалиёти Русия дар Украина зарурӣ бошад.

Пас аз ҳуҷуми Русия бар Украина дар 24-уми феврал 750 ҳазор нафар ба як дархости онлайни хатми ҷанг дар Украина имзо гузоштанд.

Нерӯҳои Русия ба Харков, дувумин шаҳри бузурги Украина, даромадаанд. Сокинони Киев субҳи 27-уми феврал аз таркишҳо дар пойтахти Украина хабар доданд. Дар ҳоле ки Ғарб Маскавро барои таҷовуз ба хоки ҳамсояаш ҷазои сахттар медиҳад, ҷанги Русия бо Украина шиддат гирифтааст.

Ҳамла ба Харков, таркишҳо дар Киев

Олег Синегубов, раиси вилояти Харков, гуфт, аз мардуми осоишта хостаанд, ки хонаҳои худро тарк накунанд. Дар наворҳое, ки тавассути мақомоти Украина дар интернет гузошта шуд, мошинҳои Русия дар Харков дида мешаванд. Як мошини сабукрав дар онҷо сӯхтааст.

Дар ҳамин ҳол, пас аз нисфи шаб дар ҷанубу шарқи Киев таркиш рӯй дод. Ба иттилои расонаҳо, эҳтимол як анбори сӯзишворӣ оташ гирифтааст. Дар бораи хисорот ё осебдидагон хабаре нест.

Мақомоти Украина гуфтанд, ҳамлаи Русия ба анбори нафт дар Василков, воқеъ дар ҷануби Киев, зарба зад. “Душман ҳама чизро нест кардан мехоҳад,” -- гуфт раиси шаҳри Василков Наталя Баласинович.

Бино ба гузоришҳо, дар ғарби Киев низ садои таркиш шунида шудааст. Дар пасманзари гузоришҳо дар мавриди задухӯрдҳо дар наздикии Харков, дафтари раисиҷумҳур Владимир Зеленский гуфт, нерӯҳои Русия лӯлаи газро дар ин шаҳр тарконданд ва ҳукумат аз мардум хостааст, тирезаҳои худро бо матои тар ё дока пӯшонанд.

Ба иттилои дафтари Зеленский, таркиши дигар дар фурудгоҳи Жуляни рух дод. Артиши Украина гуфт, дар муқобили ҳамла ба пойтахт хатти худро нигоҳ доштааст. Президент Зеленский дар паёми видеоӣ гуфт, “то замоне кишварамонро озод накунем, мубориза хоҳем бурд.”

Вай афзуд, Маскав асосан минтақаҳои аҳолинишинро бомбаборон мекунад. “Шаби гузашта дар Украина ваҳшатнок буд, боз тирпарронӣ, боз бомбаборони маҳаллаҳои истиқоматӣ ва зербунёдҳои ғайринизомӣ,” – гуфт Зеленский рӯзи 27-уми феврал.

Ду тараф ба музокирот омодаанд, аммо...

Раисиҷумҳури Украина ҳамзамон гуфт, кишвараш барои гуфтушуниди сулҳ бо Русия омода аст, аммо на дар Беларус. Владимир Зеленский Варшава, Братислава, Истанбул, Будапешт ё Бокуро ҳамчун макони алтернативии музокирот бо Русия пешниҳод кард. "Агар аз ҳудуди Шумо ягон амалиёти таҷовузкоронае намешуд, мо метавонистем дар Минск суҳбат кунем," – афзуд ӯ.

Пештар Кремлин гуфта буд, ки як ҳайати Русия барои гуфтугӯ бо мақомоти Украина ба шаҳри Гомели Беларус рафтааст. Дмитрий Песков, сухангӯйи Кремлин, 27-уми феврал гуфт, ба ин ҳайат низомиёну дипломатҳо шомиланд.

Дастрасии баъзе бонкҳои Русия ба SWIFT масдуд шуд

Дар ҳамин ҳол, раҳбарони Иттиҳоди Аврупо, Фаронса, Олмон, Итолиё, Бритониё, Канада ва Амрико ба мувофиқа расиданд, ки дастрасии як қатор бонкҳои Русияро ба низоми SWIFT қатъ мекунанд. Онҳо дар рӯзи 26-уми феврал дар изҳороти муштарак гуфтанд, ин тадбир захираҳои байнулмилалии Бонки Марказии Русияро маҳдуд карда, ба ин васила ба тавоноии он барои пуштибонӣ аз рубл монеъ мешавад.

Коршиносон гуфтаанд, масдуд кардани дастрасӣ ба SWIFT як қадами умдаи Ғарб алайҳи Маскав хоҳад буд. Иқдомҳои ахир дар ҳоле сурат гирифтанд, ки коршиносони ғарбӣ мегӯянд, нерӯҳои Украина дар се рӯзи ҷанг муқовимати шадидтар аз интизорӣ нишон додаанд.

Вазири дифои Украина, Алексей Ресников, дар паёме дар Фейсбук, аз сарбозони худ ситоиш кард. Вай гуфт, Русия ба тасарруфи Киев, тавре ки тарҳрезӣ мекарданд, муваффақ нашуд ва афзуд, Украина ҳоло аз кишварҳои дигар ёрӣ интизор аст.

Виктор Ляшко, вазири тандурустии Украина, рӯзи 26-уми феврал гуфт, дар ҳамлаи Русия 198 нафар кушта ва беш аз 1000 каси дигар захмӣ шудаанд. Русия теъдоди қурбониёнро нашр накардааст.

Созмони Милал рӯзи 26-уми феврал гуфт, ки аз замони оғози ҳамлаи Русия ба Украина беш аз 120 000 нафар ин кишварро тарк карда, асосан ба Лаҳистон, Руминия, Молдова ва Маҷористон паноҳ бурдаанд.

Ҳукумати Олмон гуфт, дар муқобили ҳамлаи беасоси нерӯҳои Русия, ба Украина 1000 мушаки зиддитонкӣ ва 500 мушаки зидди ҳавоии "Стингер" мефиристад. Ин тасмим дар сиёсати Берлин дигаргунии қобили мулоҳиза аст.

Олмон рӯзи 26-уми феврал ҳамчунин гуфт, ба Ҳолланд иҷоза медиҳад, ки садҳо мушаки зиддитонкии сохти ин кишварро ба Украина интиқол диҳад. Олаф Шолтс, садри аъзами Олмон, дар баёнияе гуфт, "вазифаи мост, ки тамоми талошро бикунем, то Украина аз артиши таҷовузгари Путин эмин бимонад."

Раисиҷумҳури Украина, Владимир Зеленский, аз тасмими Олмон ситоиш кард. Вай дар Твиттер навишт, "Олмон ба тозагӣ эълон кард, ки ба Украина силоҳҳои зиддитонкӣ ва мушакҳои "Стрингер" медиҳад. Ин корро давом диҳед."

Аз он пеш, Матеуш Мораветcкий, нахуствазири Лаҳистон, баъзе аз кишварҳои ғарбӣ ва бахусус Олмонро гунаҳкор кард, ки ба зидди Русия таҳримҳои сахту шикананда ҷорӣ накардаанд. Вай рӯзи 26-уми феврал, қабл еш аз мулоқот, бо Шолтс ба хабарнигорон гуфт, "аз ин рӯ, ба ин ҷо омадам... то виҷдони Олмонро такон диҳам. То онҳо дар ниҳоят дар бораи таҳримҳое, ки воқеан шикананда ҳастанд, тасмим бигиранд."

Дар ҳамин ҳол, Ҳолланд гуфт, дар пайи дархости Киев ба Украина мушакҳои дифои ҳавоӣ ва системаҳои зиддитонкӣ хоҳад дод. Ҳукумати Ҳолланд ба порлумон гуфт, ба зудӣ ба Украина 200 мушаки "Stinger" ва 50 силоҳи зиддитонкии "Panzerfaust 3" бо 400 мушак мефиристад.

Нерӯҳои Русия субҳи 24-уми феврал ба Украина ҳамла карданд. Маскав онро амалиёти вижа барои ғайринизомӣ кардани Украина медонад, вале Киев ва кишварҳои ғарбӣ таҷовуз меҳисобанд. Аксар кишварҳои ғарбӣ алайҳи Русия таҳримҳои молӣ ҷорӣ карда, интиқоли таҷҳизоти низомиро ба Украина афзоиш додаанд.

Ҳаводиси имрӯзаи Украинаро азимтарин ҷанги заминӣ баъди хатми Ҷанги дуюми ҷаҳон меноманд. Паноҳҷӯён савори қатор, мошин, автобус ва ё пиёда то наздиктарин сарҳади Аврупо мерасанд. Мақомот гуфтанд, ки паноҳҷӯёни украиниро ҳоло мешавад дар Полша, Словакия, Руминия, Венгрия ва Молдова мушоҳида кард.

Аксари онҳоро дар сарҳад хешовадону дӯстон ваё мақомоти маҳаллӣ пешвоз гирифтанд. Олмон, ки бо Украина марзи муштарак надорад, инчунин хабар дод, ки аввалин паноҳҷӯёни украинӣ ба хоки ин кишвар ҳам ворид шуданд, ҳарчанд шуморашон ҳоло кам аст. Мақомоти олмонӣ гуфтанд, ки шумори ками муҳоҷирон сарҳади Украинаро гузашта ба шаҳри Гёрлитси Полша расиданд ва аз он ҷо ба марказҳои қабули паноҳҷӯён дар шаҳри олмонии Айзенхюттенштадт ворид шудаанд.

Интихоби кишвари Полша барои фирор аз оташи ҷанг тааҷҷубовар нест, чунки дар солҳои охир тахминан 2 миллион шаҳрванди Украина барои кор Иттиҳоди Аврупоро интихоб кардаанд. Бисёри онҳо ҳанӯз фирории ҷанги аввали соли 2014 ҳастанд, вақте Русия нимҷазираи Қрими Украинаро ишғол карда, аз ҷудоиталабони рӯ ба Русия дар шарқи Украина ҳимоят кард.

Дар гузаргоҳи марзии Медика, ки дар деҳаи ҳамноми он дар сарҳади Полша ҷойгир аст, корвони мошинҳо аз Украина дар масофаи то 15 километр саф кашидаанд. Оҷонсии марзбонии Полша дар изҳороте гуфт: “Мо ба ҳар як нафарашон кӯмак мекунем”, “мо ҳеҷ касро беёрӣ намегузорем”.

Аксари онҳое, ки барои убур ба марзи Аврупо омадаанд, занону кӯдакон ва пиронсолон мебошанд. Президенти Украина Владимир Зеленский ба мардони 18 то 60-сола тарк кардани кишварро иҷоза надод.

Комиссариати олии СММ оид ба паноҳандагон дар як изҳороташ дирӯз гуфт, ки пешбинӣ мешавад то 4 миллион сокини Украина паноҳанда шаванд. Келли Клементс, раиси ин ниҳод дар сӯҳбат бо CNN гуфт, “мо ҳоло шоҳиди паноҳҷӯии 120 ҳазор нафар ҳастем”. Ӯ гуфт: “Ин мардумро ҷомеаву ҳукуматҳои маҳаллӣ ба дараҷаи олӣ қабул мекунанд. Вале ҳодисаҳо босуръат тағйир меёбад”.

Молдова рӯзи 25 феврал гуфт, ки аз замони шурӯи ҳуҷуми Русия тахминан 15 ҳазор паноҳандаи украиниро қабул кардааст. Ба гуфтаи вазири корҳои дохилии Молдова Анна Ревенко, дар 24 соати аввали баъди шурӯи ҳуҷум 15 ҳазору 800 украинӣ аз сарҳад гузаштанд. Ӯ гуфт, ки аксари онҳо роҳро ба сӯи Аврупо идома доданд ва тахминан 100 нафарашон аз Молдова дархост карданд, ки барояшон дар гирифтани ҳақи паноҳандагӣ мусоидат кунанд.

Ин дар ҳоле буд, ки Молдова дар робита бо ҳуҷуми Русия ба Украина дар қаламрави худ 60 рӯзи ҳолати изтирорӣ ҷорӣ кард. Мақомоти ин кишвар дар гузаргоҳҳои марзии ҳамсарҳад бо Украина – Окнитса ва Паланка марказҳои қабули 72-соатаи паноҳҷӯёнро таъсис доданд. Дар ин нуқтаи марзӣ ҳам корвони мошинҳо аз Украина саф кашидаанд. Молдова бо Украина 1222 км марз дорад.

Ҳамсояи дигари Украинаву Молдова – Руминия ҳам шоҳиди афзоиши паноҳҷӯён шудааст. Руминияу Украина 650 км марзи муштарак доранд. Аксари украиниҳо ба гузаргоҳи марзии Сигет-Мармаросский мерасанд ва аз он ҷо талош мекунанд ба Полша ё Ҷумҳурии Чех бираванд. Ба иттилои вазорати умури дохилии Руминия, рӯзи 25 феврал дар ин нуқтаи марзӣ 10 ҳазор шаҳрванди Украина ба қайд гирифта шуд, вале фақат 11 нафари онҳо аризаи паноҳандагиро дар Руминия пур карданд. Дафтари президенти Молдова хабар дод, ки Майя Санду дар сӯҳбат бо ҳамтои руминиаш Клаус Йоҳаннис ба зарурати тадбирҳои муштараки ҳамоҳангшуда ба хотири расонидани ёрии зарурии башарӣ ба паноҳҷӯёни украинӣ таъкид кардааст.

“Роскомнадзор” – идораи нозири матбуоти Русия амр додааст, ки расонаҳо гузоришҳоеро, ки дар тасвири ҳамлаи низомии Русия ба хоки Украина аз вожаҳои “ҳуҷум”, “ишғол” ва “эълони ҷанг” истифода кардаанд, пок кунанд. Рӯзи 26 феврал ин идора хабар дод, ки нисбати расонаҳои мисли “Новая газета”, “Эхо Москвы”, ИноСМИ, “Медиазона”, “New Times”, “Дождь”тафтише ба роҳ мондааст, ки ба шеваи пӯшиши ҷанг дар Украина рабт мегирад.

Дар ин феҳрист инчунин исми як бахши Радиои Аврупои Озод/Радиои Озодӣ (РАО/РО) Крым.Реалии ҳам ёд мешавад. Ин расонаҳо дар нашри “иттилои носаҳҳеҳ дар бораи мушакандозии артиши Русия дар шаҳрҳои Украина ва талафоти ҷонӣ” муттаҳам мешаванд.

Президенти РАО/РО Ҷейми Флай гуфт, “РАО/РО талаботи "Роскомнадзор"-ро иҷро намекунад”.

"Таҳдидҳои Кремл як кӯшиши ошкоро барои сафед кардани далелҳои ваҳшиёнаи талафоти инсонӣ дар ҷанги ғайриқонунии Владимир Путин алайҳи Украина аст."

"Русҳо дар ин лаҳзаи муҳим беш аз ҳарвақта ба мо муроҷиат мекунанд, то суханони мақомоти Украина ва мардумиро ғайриммулкиро бишнаванд ва тасвирҳои марг ва харобиҳоеро бубинанд, ки аз ҷониби Владимир Путин ва ҳукуматаш пинҳон дошта мешаванд" гуфт ӯ. "Мо ба ин фишор дода намешавем, то онҳоро аз ҳақиқат маҳрум кунем."

“Роскомнадзор” гуфтааст, ки расонаҳое, ки амри пок кардани ин гузоришҳоро иҷро намекунанд, масдуд мешаванд. Иловатан ҳар яки онҳо дар ҳаҷми 5 миллион рубл ё 60 ҳазор доллар ҷаримабандӣ мешаванд.

Дар як номаи бозе тахминан 100 журналист, аз ҷумла чанд корманди расонаҳои давлатии мисли ТАСС ва RT “амалиёти низомии Русияро, ки алайҳи Украина шурӯъ шудааст”, маҳкум кардаанд.