Ҷанги Украина
1314 шаҳрванди Тоҷикистон аз Украина ба Полша ва Молдова паноҳ бурдаанд. ВИДЕО
То рӯзи 4-уми март 1314 шаҳрванди Тоҷикистон хоки Украинаро тарк кардаанд. Давлаталӣ Назризода, сафири Тоҷикистон дар Киев, рӯзи 5-уми март гуфт, "1176 нафар ба Лаҳистон ва 138 кас ба Молдова интиқол дода шуданд."
Аммо мақомоти Тоҷикистон нагуфтаанд, ки шаҳрвандони худро аз Лаҳистон кай бармегардонанд. Паноҳандагон аз ҳукумати Тоҷикистон талаб доранд, ки барояшон ҳавопаймо фиристода шавад.
Дар ҳамин ҳол, тоҷикони муқими Лаҳистон мегӯянд, ба садҳо муҳоҷири тоҷик мадад карда, бо ҷойи хоб ва хӯрок таъмин намудаанд.
Саидисҳоқ Бобоев, узви Кумитаи шаҳрвандии наҷоти гаравгонҳо ва зиндониёни сиёсии Тоҷикистон, қароргоҳаш дар Лаҳистон, ба Радиои Озодӣ гуфт, "ба тақрибан 667 нафар, аз ҷумла 118 кӯдаку наврас ёрӣ расондем. Тоҷиконе, ки дар Лаҳистон таксӣ меронанд, ба корафтодаҳо ройгон хидмат мекунанд."
Дилафрӯз, шаҳрванди 35-солаи Тоҷикистон, аз шаҳри Херсонаи Украина ба Лаҳистон рафтааст. Вай мегӯяд, чанд рӯз боз дар манзили яке аз тоҷикони муқими Лаҳистон ба сар мебарад.
"Ман дар як сехи қаннодӣ дар Украина кор мекардам ва ба хонаводаамон дар Тоҷикистон кумак мекардам. Ҳоло мехоҳам, дар Полша бимонаму кор кунам," – афзуд ӯ.
Дар умум, ба иттилои расмӣ, чаҳор ҳазор шаҳрванди Тоҷикистон дар Украина сабтином шуда буданд.
Украина нерӯҳои Русияро ба нақзи оташбас гунаҳкор кард
Мақомоти Украина гуфтанд, бо вуҷуди эъломи расмии Вазорати дифоъ, нерӯҳои Русия оташбаси муваққатро дар Мариупол ва Волноваха поймол карданд. Ба ин далел, нақшаи берун бурдани аҳолии осоишта иҷро нашудааст.
Вазорати дифои Русия 5-уми март дар Мариупол ва Волновахаи Украина оташбаси муваққат эълон кард, то аҳолии осоишта онҷоро тарк кунанд. Вале ҳамлаҳои сарбозони Русия дар минтақаҳои дигари Украина идома дорад.
Ҳукумати Украина нақша дорад, тақрибан 200 ҳазор нафарро аз Мариупол ва 15 ҳазор касро аз Волноваха берун барад.
Мақомоти шаҳри Мариупол дар шабакаҳои иҷтимоӣ гуфтанд, "ба далели он ки ҷониби Русия оташбасро риоя намекунад ва ба тирпарронӣ дар Мариупол ва атрофи он идома медиҳад, берун бурдани аҳолӣ мутаваққиф шуд." Онҳо аз сокинони Мариупол хостаанд, ба паноҳгоҳҳои худ баргарданд.
Ирина Верешук, муовини нахуствазири Украина, рӯзи 5-уми март дар изҳороти видеоӣ гуфт, Русия "созишномаро нақз кард" ва бо вуҷуди миёнравии Салиби Сурх "шаҳри Волновахаро тирборон мекунад".
Верешук аз идомаи ҳамлаҳо бо "силоҳи вазнин" ёдовар шуд ва аз ҷониби Русия хост, "тирборонро бас кунад, оташбасро барқарор намояд ва ба берун рафтани занону кӯдакон ва пиронсолон имкон диҳад.”
Маълум нест, ки рӯзи 5-уми март ҳамлаҳои Русия дар ягон гӯшаи Украина бас шудааст ё не.
Як тифли тоҷик қурбонии ҷанг дар Украина шудааст
Як тифли тоҷик, ки ҳамагӣ як моҳ пеш аз шурӯи ҳамлаҳои Русия ба Украина дар вилояти Харков ба дунё омада буд, дар пайи сарсонии хонавода ва бемории варами шуш даргузаштааст.
Саҳифаи "Оперативный ЗСУ" дар Телеграм навишт, ки тифлро рӯзи 4-уми март дар Лвов дафн карданд. Мақомоти Тоҷикистон марги Амирро дар Украина тасдиқ карда, гуфтанд, "ӯ 43 рӯз дошт".
Давлаталӣ Назризода, сафири Тоҷикистон дар Украина, рӯзи 5-уми март ба Радиои Озодӣ гуфт, "падари хонавода, Саъдулло Исломов, шаҳрванди Тоҷикистон буда, ҳамсараш аз Украина аст."
"Онҳо асосан дар Харков кору зиндагӣ мекарданд. Бо оғози даргириҳо, дар таҳхонаҳо буданд ва онҷо шуши кӯдакро сармо задааст. Сипас ба Лвов рафтанд, то аз ин роҳ ба кишварҳои ҳамсоя гузаранд. Тифл аз пневмония даргузашт," -- гуфт Назризода.
Дар ҳамин ҳол, рӯзи 28-уми феврали имсол, пас аз чаҳор рӯзи ҷанг дар Украина, дар хонаводаи тоҷики муқими Киев як кӯдак ба дунё омадааст, ки номашро Амина гузоштаанд. Дар сафорати Тоҷикистон гуфтанд, ин оила ба зудӣ ба Лаҳистон интиқол хоҳанд ёфт.
Ба иттилои расмӣ, чаҳор ҳазор шаҳрванди Тоҷикистон дар Украина сабтином шуда, аз оғози ҷанг беш аз ҳазор нафари онҳо ба Лаҳистон ва кишварҳои дигар рафтаанд.
Маълум нест, мақомот онҳоро кай ва чӣ гуна ба кишвар меоранд. То ин дам Узбекистону Қазоқистон садҳо шаҳрванди худро бо ҳавопаймоҳо аз Лаҳистон баргардондаанд.
Мақомоти Тоҷикистон то ҳанӯз дар мавриди ҷанг дар Украина низ мавқеи худро ошкор накардаанд, вале дар Маҷмаи кулли Созмони Милал аз рой додан ба зидди Русия худдорӣ варзиданд. Русия яке аз шарикони стратегии Тоҷикистон аст ва дар кишвар пойгоҳи низомӣ дорад. Душанбе бо Киев низ додугирифт дорад. Чархаҳои аввалинро барои нерӯгоҳи "Роғун" ширкати "Гидротяжмаш"-и Украина сохтааст.
Рӯзи даҳуми ҳамлаи Русия ба Украина. Зеленский гуфт, “ба муқовимат идома медиҳем”
Артиши Украина ҳушдор додааст, ки нерӯҳои ишғолгари Русия барои муҳосираи пойтахт, Киев, меҷанганд ва ҳамзамон даргирии шадид дар шаҳри Харков идома дорад. Нигарониҳо аз афзоиши талафоти ғайринизомиён торафт бештар мешавад. Вазорати дифои Русия рӯзи шанбе иддао кард, ки барои хориҷ шудани аҳолӣ дар Мариупол ва Волноваха оташбаси муваққат эълон намуд.
Энтони Блинкен, вазири корҳои хориҷии Амрико, гуфт, вазъ дар Украина "эҳтимол бадтар шавад". Владимир Зеленский, раисҷумҳури Украина, субҳи 5-уми март дар наворе паём дод, ки ӯ ва мақомоти дигари баландпоя ҳанӯз дар Киев ҳастанд. Ҷое, ки ба гуфтааш, "ба муқовимат идома медиҳем. Давлати худро ҳифз ва сарзамини худро озод мекунем."
Артиши Украина дар гузорише 5-уми март, дар рӯзи даҳуми ҳамлаи Маскав гуфт, нерӯҳои Русия аз ҳаво пуштибонӣ мешаванд ва аз силоҳҳои дақиқ истифода мекунанд. Як рӯз пеш вазирони корҳои хориҷии НАТО пешниҳоди Киевро дар бораи эҷоди минтақаи мамнуъ бар фазои Украина рад карданд.
Зеленский онро нишонаи "сустӣ" ва "адами ваҳдат" донист. "Паймон бо худдорӣ аз эҷоди минтақаи мамнуъ ба бомбаборони шаҳру рустоҳои Украина розӣ шуд," -- гуфт ӯ.
Артиши Украина рӯзи 5-уми март гуфт, сарбозони Русия саъй доранд, қаламравҳои ишғолии худро то марзҳои маъмурии вилоятҳои Луҳанск ва Донбасс, ки ҷудоихоҳони таҳти ҳимояти Русия ҳашт сол боз алайҳи ҳукумати марказӣ меҷанганд, васеъ кунанд. Фармондеҳии Украина гуфтааст, Киев муборизаро ба зидди "ҳамлаи душман" идома хоҳад дод.
Даҳҳо ҳазор кас, асосан занону кӯдакон, дар истгоҳи роҳи оҳани Киев ҷамъ шудаанд, то аз бомбаборон бигурезанд. Ба гузориши телевизиони CNN, мақомоти иктишофии ғарбӣ ба ин боваранд, ки Русия омода аст барои таслим шудани Украина "шаҳрҳоро бомбаборон кунад".
CNN бо такя ба манбаъҳояш мегӯяд, зархаридони рус аллакай "дар баъзе ҷойҳо" меҷанганд. Расона аз қавли як мақоми амрикоӣ, ки номаш ифшо нашудааст, гуфт, эҳтимол Русия то 1000 нафари дигарро ҷобаҷо кунад.
Созмони Милали Муттаҳид мегӯяд, то кунун дастикам 331 ғайринизомӣ кушта шуда, беш аз 1 миллиону 200 ҳазор нафар аз Украина фирор кардаанд. Бештар аз нисфи онҳо ба Лаҳистон (Полша) паноҳ бурданд. Мақомоти Украина талафоти ғайринизомиёнро дастикам 2 ҳазор кас мегӯянд.
Дар ҳамин ҳол, коргарони украинӣ ба фаъолият дар нерӯгоҳи ҳастаии Запорожйе идома медиҳанд. Ин иншоот як рӯз пеш, дар пайи ҳамлаи нерӯҳои Русия, оташ гирифт.
Сафири Амрико дар Созмони Милал, Линда Томас-Гринфилд, гуфт, ҷаҳон аз фалокати ҳастаӣ базӯр ҷилавгирӣ кард ва зикр намуд, ки сарбозони Русия ҳоло ба як нерӯгоҳи дигари ҳастаии Украина, дар ҷануби он кишвар, наздик мешаванд.
Мақомоти Русия барои пешгирӣ аз иттилооти алтернативӣ дар бораи миқёсу баҳои ҷанг дар Украина фишорро ба расонаҳои дохилӣ ва байналмилалӣ дар кишварашон бештар кардаанд. Онҳо сомонаҳои Радиои Озодӣ, BBC, CNN, инчунин, шабакаҳои иҷтимоии Facebook, YouTube ва Twitter-ро пурра бастанд ва ё маҳдуд кардаанд.
Маскав гуфт, даври сеюми музокироти оташбас бо мақомоти Украина дар охири ҳафтаи равон дар назар аст, вале замон ва макони он тасдиқ нашудааст. Ду даври аввал дар Беларус баргузор шуд.
Раҳматилло Зоиров: Путин кори чандон дуруст накард. ВИДЕО
Раҳбари пешини Ҳизби сотсиал-демократ ва мушовири собиқи президенти Тоҷикистон пас аз чанд муддати хомӯшӣ ба ҳамлаи Русия ба Украина вокуниш кард. Раҳматилло Зоиров гуфт, тасмими Владимир Путин, раисҷумҳури Русия, барои ҳамла ба Украина "то он дараҷа кори дуруст нест".
"Мо дар инҷо сабаби аслияшро намедонем. Ҳоло маълум мешавад. Фикр мекунам, Украина бе Донбасс ҳам бошад, бояд мустақилии худро ҳифз кунад," -- афзуд ӯ рӯзи 4-уми март дар суҳбат бо Радиои Озодӣ.
Раҳбари пешини ҲСДТ дар пасманзари рӯйдодҳои охир эҳтимоли тақсим шудани Украинаро тахмин зад, вале ҳамзамон гуфт, "ҳама чиз аз иродаи мардум вобаста аст".
"Мехоҳам, Украина доимо ҳамчун давлат амал кунад. Барои Украина ва мардумаш ҳамин чиз зарур аст. Ин ҳама вақт аз таҷовузкор на, аз иродаи аҳолӣ вобаста аст,» -- илова кард ӯ.
Наворро дар инҷо бинед:
Аз ҳамлаи низомии Русия ба Украина, ки ҳазорҳо касро кушту захмӣ ва садҳо ҳазор нафарро фирорӣ кард, 10 рӯз гузашт.
Мақомоти Тоҷикистон то ҳанӯз дар мавриди ҷанг дар Украина мавқеи худро ошкор накарданд. Вале аз рой додан ба зидди Русия дар Маҷмаи кулли Созмони Милал худдорӣ варзиданд. Русия яке аз шарикони стратегии Тоҷикистон аст ва дар кишвар пойгоҳи низомӣ дорад.
Дар пайи ҳамлаи Русия, тақрибан ҳазор шаҳрванди Тоҷикистон аз Украина ба Лаҳистону Молдова фирор кардаанд. Маълум нест, мақомот онҳоро кай ва чӣ гуна ба кишвар меоранд. Узбекистону Қазоқистон садҳо шаҳрванди худро бо ҳавопаймоҳо аз Лаҳистон баргардонданд.
Матну навори пурраи суҳбатро бо Раҳматилло Зоиров рӯзи 7-уми март дар сомонаи мо ва шабакаҳои иҷтимоӣ хонеду бинед.
Гузоришҳо аз ҳалокати ду зодаи Дарвози Тоҷикистон дар ҷанги Украина. ВИДЕО
Тибқи хабарҳои расида, ду зодаи ноҳияи Дарвози Тоҷикистон дар ҷанги Украина кушта шудаанд. Ба гуфтаи мақомоти маҳаллӣ, Ҷамшед Худоиев (Холов) ва Шуҳрат Абдуллоев шаҳрванди Русия буданд ва бо шартнома дар артиши он кишвар хидмат мекарданд. Ҷониби Русия дар ин бора расман чизе нагуфтааст.
"Мегӯянд, дар даруни тонк сӯхтааст"
Саидбурҳон Абдураҳмонзода, раиси ноҳияи Дарвоз, 4-уми март ба Радиои Озодӣ гуфт, дар бораи кушта шудани ду зодаи ноҳия дар ҷангҳои Украина хабардор шуда, ба наздикони онҳо ҳамдардӣ баён карданд. Ба гуфтаи Абдураҳмонзода, Ҷамшед Худоиев ва Шуҳрат Абдуллоев шаҳрванди Тоҷикистон набуданд.
Дар бораи кай ва дар чӣ шароит кушта шудани ду зодаи ноҳияи Дарвоз маълумоти мушаххас дар даст нест. Раиси ноҳияи Дарвоз мегӯяд, хабар ёфтаанд, ки яке аз фавтидагон ронандаи тонк будааст ва "гуё дар даруни тонк сӯхтааст, ҷасадашро ҳам наёфтанд". Саидбурҳон Абдураҳмонзода афзуд, расман аз ҷониби мақомоти Русия ягон дархосте нагирифтаанд.
Сурайё Шоева, раиси ҷамоати Қалъаихумби ноҳияи Дарвоз, ба Радиои Озодӣ гуфт, синни Ҷамшед Худоиев ва Шӯҳрат Абдуллоев аз 40 боло аст ва 10-12 сол пеш ҳамроҳи оилаашон ба Русия кӯчида буданд.
Ба ҳамсараш гуфтааст, "дар ҷангале дар муҳосираанд"
Як манбаи дигар ба Радиои Озодӣ гуфт, Шӯҳрат Абдуллоев чанд рӯз пеш бо ҳамсараш телефонӣ гап зада, гуфтааст, дар ҷангале дар муҳосира мебошанд.
Дар бораи марги ин ду зодаи Тоҷикистон маълумоти бештар дар даст нест ва на ҷониби Тоҷикистон ва Русия дар ин бора маълумоти расмӣ пешниҳод накардаанд. Ин ҳам ҳанӯз маълум нест, ки онҳо ба Тоҷикистон оварда мешаванд ё дар Русия дафн карда мешаванд.
Мақомоти Русия рӯзи чаҳоршанбе эълон карданд, ки ҳудуди 500 низомии ин кишвар дар ҷанги Украина кушта шуданд. Ҷониби Украина талафоти артиши Русияро ҳудуди 6 ҳазор нафар эълон кард.
Ҷамшед Худоиев ва Шӯҳрат Абдуллоев аввалин зодаҳои Тоҷикистон ҳастанд, ки хабари маргашон дар Украина тасдиқ мешавад. Вале хабарҳое дастрас шудааст, ки бо оғози ҳамлаи Русия ба Украина, мақомоти рус афсарони эҳтиётӣ, аз ҷумла зодагони Тоҷикистонро ба артиш даъват кардаанд. Каримҷон Ёров, ҳомии ҳуқуқи муҳоҷирон дар Фейсбук, навишт, се рӯз инҷониб тоҷиконе, ки шаҳрвандии Русияро доранд, аз даъват шуданашон ба комиссариати ҳарбӣ хабар медиҳанд.
Душаҳрвандӣ миёни Тоҷикистону Русия
Аз соли 1996 ба ин тараф миёни Тоҷикистону Русия низоми душаҳрвандӣ амал мекунад. Бар асоси ин санад, шаҳрвандони Тоҷикистон метавонанд, табааи Русия бошанд ё баръакс. Солҳои ахир садҳо нафар аз тоҷикон талош карданд, шаҳрвандии Русияро соҳиб шаванд то ба гуфтаи худашон аз пардохти патент ва таъқиби пулис озод шаванд.
Тибқи омори Вазорати корҳои дохилии Русия, танҳо аз соли 2016 то 2020, 196 ҳазор шаҳрванди Тоҷикистон шиносномаи Русияро гирифтаанд. Яъне, солона ҳудуди 40 ҳазор нафар. Теъдоди умумии шаҳрвандони Тоҷикистон, ки табааи Русия шудаанд, маълум нест.
5 чизи донистанӣ дар бораи шаҳрвандии Русия:
Қонунҳои Тоҷикистон ширкати шаҳрвандони ин кишварро дар ҷангҳои хориҷӣ манъ ва барои ин то 20 сол зиндонро пешбинӣ кардааст. Қисми зиёди зодагони Тоҷикистон дар Русия ҳамчунин шаҳрвандии Тоҷикистонро низ нигоҳ доштаанд.
Санадҳо баёнгари чистанд?
Дар шабакаҳои иҷтимоӣ ин суол матраҳ аст, ки агар шаҳрванди Тоҷикистон, ки ҳамзамон шиносномаи Русиро дорад, агар дар ҷанги Украина ширкат кунад, бар асоси қонунҳои Тоҷикистон зархарид ҳисоб намешавад?
Дар шартномаи душаҳрвандӣ миёни Тоҷикистон ва Русия ин нукта мушаххас нашудааст, ки шахсе, ки шиносномаи ҳарду кишварро дорад, аз тарафи кадом ҷониб метавонад ба ҷанг даъват шавад. Дар шартнома танҳо омадааст, шахси соҳиби шиносномаи Тоҷикистон ва Русия дар кадоме аз ин кишварҳо хидмати ҳарбиро анҷом дода бошад, афсари эҳтиётии ҳамон кишвар ба ҳисоб меравад.
Ҳамлаи Русия ба Украина субҳи 24-уми феврал оғоз шуд ва то ҳол давом дорад. Маскав гуфтааст, ҳадаф аз ин “амалиёти махсус” ғайринизомӣ кардани Украина аст, аммо дар Киев инро таҷовуз ба хоки Украина меҳисобанд. Бисёре аз кишварҳои ғарбӣ ҳамлаи Русияро маҳкум карда, алайҳи Кремл таҳримҳои сахт ҷорӣ карданд.
Ҷанги Украина. Калонтарин нерӯгоҳи ҳастаии Аврупо бар асари ҳамлаи русҳо "оташ гирифт"
Хабаргузории РИА Новости ба нақл аз вазири энержии Украина гузориш дод, ки бар асари ҳамлаҳои нерӯҳои Русия, як бахши тавлиди барқ дар Нерӯгоҳи ҳастаии Запороже оташ гирифт. Тибқи ин гузориш, оташнишонҳо дар оғоз ба хотири тирандозии нерӯҳои русӣ, имкони оғози амалиёт хомуш кардани сӯхтор дар ин нерӯгоҳро надоштанд.
Запороже калонтарин нерӯгоҳи ҳастаии Аврупо ба шумор меравад ва дар шаҳри Энергодар, дар канори дарёи Днепр ҷойгир аст. Нерӯҳои Русия дар идомаи ҳамлаи худ ба Украина рӯзи панҷшанбе шаҳри Энергодарро, ки ин бузургтарин нерӯгоҳи ҳастаии Аврупо дар онҷо воқеъ аст, муҳосира карданд. Шаҳрдори Энергодар низ гузоришҳо дар бораи сӯхтор дар нергӯҳои Запорожеро таъйид кард.
Пас аз нигарониҳо аз сар задани як фоҷеаи бузург, субҳи ҷумъа расонаҳо аз қавли сарпарасти фармондори Запороже гуфтанд, ки эминии ин нерӯгоҳи ҳастаӣ таъмин шудааст. Ба иттилои Бӣ-Бӣ-Сӣ, ин масъули украинӣ дар паёме хаттӣ навишт, ки бо мудири нерӯгоҳ дар Энергодар суҳбат кард ва аз эминии он итминон ёфтааст.
Украина аз чор як ҳиссаи энержии мавриди ниёзи худро аз ин нерӯгоҳ таъмин мекунад. Нерӯҳои Русия дар садад ҳастанд, ки бо ба даст гирифтани ин шаҳр, дастрасии нерӯҳои Украинаро ба об обҳои ҷануби ин кишвар қатъ кунанд.
Владимир Зеленский, раиси ҷумҳури Украина субҳи ҷумъа пас аз нашри гузоришҳо дар бораи оташ гирифтани ин нерӯгоҳ бар асари бомбаборони русҳо, Маскавро муттаҳам кард, ки ба "террори ҳастаӣ" даст задааст ва қасд дорад фоҷеаи Чернобилро такрор кунад.
Оқои Зеленский дар як паёми видеоӣ гуфт, "Русия танҳо кишваре аст, ки қисматҳои як нерӯгоҳи ҳастаиро ба оташ мекашад. Ин аввалин бор дар таърихи мо ва дар таърихи башарият аст, ки чунин чизе рух медиҳад.
Оҷонси байналмилаии энержии атомӣ ҳам субҳи ҷумъа аз нерӯҳои Русия хост, ки ҳамла ба нерӯгоҳи ҳастаии Запороже дар ҷануби Украинро поён бахшад ва аз "хатари шадид" дар сурати тахриби реакторҳо ҳушдор дод. Ин ниҳод эълон кард, ки Рафаэл Гросси, мудири умумии Оҷонси байналмилалии энержии атомӣ бо нахуствазири Украина ва мақомоти атомии ин кишвар дар бораи шароити хатарноки нерӯгоҳи Запороже суҳбат кардаанд ва хостори қатъи даргирӣ шуда, аз хатарҳо дар сурати тахриби реакторҳо ҳушдор додааст.
Дмитрий Кулеба, вазири корҳои хориҷии Украини аз паёмадҳои оташсӯзӣ дар нерӯгоҳи ҳастаии Запороже ҳушдор дода ва таъкид кард, ки таркиш дар ин нерӯгоҳ чанд баробар фоҷеабортар аз ҳодисаи Чернобил мебошад. Оқои Кулеба дар "Твиттер" навишт, "артиши Русия аз ҳама тараф Нерӯгоҳи ҳастаии Запорожеро зери оташ гирифтааст".
Вай афзуд, "оташсӯз ҳамакнун рух додааст. Агар ин нерӯгоҳ битаркад, 10 баробар густурдатар аз Чернобил хоҳад буд. Русҳо бояд фавран ҳамларо қатъ кунанд, ба оташнишонҳо иҷозаи фаъолият диҳанд ва як минтақаи амн барқарор кунанд".
Русия рӯзи чаҳоршанбе тавонист назорати комили бандари стратегии Херсон дар шимоли нимҷазираи Кримро ба даст бигирад. Херсон аввалин шаҳри калони Украина ба шумор меравад, ки Русия тавонист дар ҷараёни ҳамлаи ба кишвари ҳамсояи худ онро тасарруф кунад.
Русия рӯзи 24-уми феврал ба ҳадафи "ғайринизомӣ" кардани Украина ба ин кишвар ҳамла кард. Мақомоти Украина ин ҳамларо "таҷовуз" ба кишвари худ медонанд. Дар даргириҳои ҳашт рӯзи ахир садҳо нафар аз ҳар ду ҷониб кушта шудаанд.
"Тифлон дар таҳхонаҳо ба дунё меоянд." Бо идомаи ҷанг дар Украина талафот ҳам зиёд мешавад. ВИДЕО
Бо гузашти ҳашт рӯз аз оғозиҷанг дар Украина, нерӯҳои Русия ба тирпаронӣ ва бомбаборони минтақаҳои аҳолинишини Киев ва шаҳрҳои дигар идома медиҳанд. Даври дувуми музокироти ҷонибҳо рӯзи 3-юми март оғоз шуд. Маҷмаи кулли Созмони Милали Муттаҳид аз Русия хост, ҷангро фавран бас кунад ва нерӯҳояшро аз қаламрави Украина берун барад.
Аз оғози ҷанг дар Украина ҳазорҳо нафар кушта ва маҷруҳ шудаанд. Дар ин рӯзҳо баъзе аз тифлон дар Киев дар таҳхонаи бемористонҳо таваллуд мешаванд. Қариб дар ҳама шаҳрҳои Украина мардум аз тарс дар паноҳгоҳҳои зери заминӣ қарор доранд.
"Дар ҳар ҷое, ки имкон доранд, паноҳ мебаранд. Аз ҷумла, атфоли гирифтори бемории саратон ҳоло дар таҳхонаи беморхонаҳои Украина қарор доранд. Духтурону парасторон бо вуҷуди таркиш дар болои сарашон, бо тамоми имкон нисбати кӯдакон ғамхорӣ мекунанд. Ин нанговар аст," -- гуфт Энтони Блинкен, вазири корҳои хориҷии Амрико.
Видеоро дар инҷо бинед:
"Хонаашонро бомбаборон кардаанд"
Мақомоти Украина аз куштаву захмӣ шудани кӯдакон дар ҷанг хабар медиҳанд. Ба беморхонаи кӯдакона дар Киев, аз замони оғози ҳамла, панҷ кӯдаки захмиро овардаанд. Як тифли дигар дар роҳ ба беморхона фавтидааст.
Пизишки ҷарроҳ, Рита Гаҷиева, мегӯяд, "як духтарро оварданд, пояш захмӣ аст. Хонаи онҳоро бомбаборон кардаанд. Модараш ба ҳалокат расидааст. Равоншиносон бо ӯ ва бародараш кор карданд. Ҳама дар ҳолати бади равонӣ қарор доранд. Ҳоло дуруст намефаҳманд, ки чӣ рух додааст."
Дар Украина дар ҳашт рӯзи охир садҳо муассиса, беморхонаву боғчаҳои кӯдакон ва роҳу биноҳои истиқоматӣ вайрону валангор шудаанд. Ҳоло тамоми талош барои наҷоти одамон равона шудааст.
Танқиди Амрико аз рафтори Русия
Ба иттилои мақомоти Амрико, корвони мошинҳои низомиёни Русия ба далели камбуди сӯзишворӣ ва хӯрокворӣ банд монда, ба муқобилияти сарбозони Украина рӯ ба рӯ шудаанд.
Линда Томас-Гринфилд, намояндаи доимии Амрико дар СММ гуфт, “бо муроҷиат ба сарбозони рус, ки дар хатти аввали ҷанги беасос ва нодаркор қарор гирифтаанд, мегӯям, “Пешвоёнатон шуморо фиреб медиҳанд. Ҷиноятҳои низомӣ содир накунед. Талош кунед аслиҳаро гузоред ва аз Украина биравед."
Энтони Блинкен, вазири корҳои хориҷаи Амрико, аз сахттар шудани таҳримҳо алайҳи Русия хабар дод ва гуфт, ин бор 22 муассисаи марбут ба соҳаи дифои ин кишвар, ки ба истеҳсолу пешниҳоди силоҳ машғуланд, мавриди таҳрим қарор мегиранд.
Вазорати дифои Амрико раисиҷумҳури Русия Владимир Путинро барои дар ҳолати омодабош қарор додани нерӯҳои ҳастаӣ танқид кард. Пентагон эълон кард, ки озмоиши мушаки дурпарвозро, ки ҳафтаи равон ба нақша гирифта шуда буд, ба нишони ин ки Амрико аз силоҳи ҳастаӣ истифода намекунад, ба таъхир андохт.
Амрико пешниҳоди ёриҳоро ба нерӯҳои Украина идома медиҳад ва ҳамзамон ҳушдор медиҳад, ки ишғолгарони рус аз нокомиҳои нахустини худ сабақ хоҳанд гирифт.
Зеленский ба муқовимати бештар алайҳи Русия даъват кард
Президент Владимир Зеленский аз ҳамватанони худ хост, сарфи назар аз бомбаборон ва муҳосираи шаҳрҳои калони Украина, ба муқовимат алайҳи нерӯҳои Русия идома бидиҳанд.
Ҳамлаи низомии Русия ба Украина вориди рӯзи ҳаштум шуд. Маҷмаи кулли Созмони Милал амалкарди Маскавро маҳкум кард ва хост, нерӯҳояшро аз Украина берун барад.
Зеленский 3-юми март, пас аз ҳамлаҳои сангин ба Киев ва шаҳрҳои стратегии Харков, Черниҳов ва Мариупол, аз муқовимати Украина ситоиш кард. Вай гуфт, Украина ҳамарӯза аз кишварҳои ҳампаймонаш дар хориҷа силоҳ дарёфт мекунад.
Ситоди кулли артиши Украина ва як мушовири Зеленский гуфтаанд, Украина қодир аст, ҳарчи бештар ҳамлаҳои ҷавобӣ бидиҳад.
Дар ҳамин ҳол, ҳайати Украина барои даври дувуми музокироти сулҳ бо Русия вориди марзи Беларус шудааст. Мушовири раисҷумҳури Украина Михайло Подоляк акси худ ва раҳбари ҳайат Давид Арахамияро дар назди чархбол ва дар роҳ ба музокирот нашр кард.
Арахамия дар Фейсбук навишт, “ҳадди ақал эҷоди долонҳои башардӯстона дар рӯзномаи музокирот хоҳад буд.”
Владимир Мединский, дастёри Владимир Путин, раисҷумҳури Русия, рӯзи 2-юми март гуфт, илова бар оташбас мавзӯи эҷоди даҳлези кумакҳои башардӯстона ба Украина низ мавриди баҳс қарор хоҳад гирифт.
Даври аввали музокирот рӯзи 28-уми феврал беш аз панҷ соат баргузор шуд, аммо натиҷае надошт.
Музокироти сулҳ дар замоне баргузор мешавад, ки таҳримҳо ба зидди Маскав бештару сахттар шудаанд. Ҳамзамон Додгоҳи Байнулмилалӣ таҳқиқотро дар бораи эҳтимоли ҷинояти ҷангии нерӯҳои Русия дар Украина оғоз кардааст.
Созмони Милал рӯзи 3-юми март гуфт, дар ҳафт рӯз як миллион нафар аз Украина фирор кардаанд.
СММ: "Шумораи паноҳҷӯёни украинӣ аз як миллион гузашт". Ҷонибҳои даргир омори қурбониёнро эълон карданд
Комиссариати олии Созмони Милали Муттаҳид дар умури паноҳандагон рӯзи 2-юми март гузориш дод, ки аз оғози ҳамлаи Русия ба Украина, дар ҳафт рӯзи гузашта, як миллион украинӣ кишварашонро тарк кардаанд.
Омори бисёр болои паноҳҷӯёни украинӣ бо таваҷҷуҳ ба як марҳилаи бисёр кӯтоҳ амри бесобиқа дар қарни бист ва бистуяк ба шумор меравад. Ин теъдод ду дарсади аҳолии Украинаро ташкил медиҳад. Тибқи омори Бонки Ҷаҳонӣ, дар соли 2020 шумораи аҳолии Украина ҳудуди 44 миллион нафар буд.
Комиссариати олии Созмони Милали Муттаҳид дар умури паноҳандагон пешбинӣ кардааст, ки шумораи паноҳҷӯёни украинӣ аз чаҳор миллион ҳам бештар мешавад. Сухангӯи созмон дар паёме навишт, "маълумоти мо нишон медиҳад, ки омор аз як миллион нафар бештар аст."
Филиппо Гранди, комиссари олии Созмони Милали Муттаҳид дар умури паноҳандагон, дар "Твиттер" навишт, "танҳо дар ҳафт рӯз шоҳиди муҳоҷирати дастҷамъии як миллион паноҳҷӯ аз Украина ба кишварҳои ҳамсоя будаем."
Вай дар идома хостори қатъи даргириҳо дар Украина шуд, то ёриҳои башардӯстона ба дасти миллионҳо украинии дигар бирасад, ки ҳанӯз дар кишвари худ мондаанд.
Дар ҳамин ҳол, рӯзи чаҳоршанбе ҷонибҳои даргир дар буҳрони Украина шумораи умумии қурбониёни ҷангро эълон кардаанд. Русия аз оғози ҳамла ба Украина бори аввал омори талафоти нерӯҳои худро ироа кард ва гуфт, ҳудуди 498 сарбози русӣ кушта ва тақрибан 1597 сарбози дигар маҷруҳ шудаанд. Ҳукумати Украина пеш аз ин гуфта буд, ки талафоти низомиёни рус наздик ба 6 ҳазор нафар аст.
Украина оморе аз талафоти нерӯҳои низомиаш нашр накард, аммо гуфт, ки дар ҳамлаҳои нерӯҳои русӣ ҳудуди 2 ҳазор ғайринизомӣ ҷон бохтаанд. Ин омор аз сӯи расонаҳои ҷаҳонӣ таъйид нашудааст.
Созмони Милали Муттаҳид гуфта буд, аз оғози ҳамлаи Русия ба Украина то 1-уми март 272 ғайринизомӣ дар Украина кушта, 525 нафари дигар маҷрӯҳ шудаанд. Аммо ин ниҳод дар айни ҳол таъкид кардааст, ки омори воқеӣ бояд беш аз ин бошад.
Херсон, Мариупол, Харков... Русия ба бомбаборони шаҳрҳои Украина идома медиҳад. ВИДЕО
Аз ҳамлаи низомии Русия ба Украина як ҳафта гузашт. Нерӯҳои Русия ба бомбаборони минтақаҳои аҳолинишин дар Украина идома медиҳанд, вале ҳеч шаҳри бузурги ин кишвар вожгун нашудааст.
Сухангӯи Вазорати дифои Русия Игор Конашенков рӯзи 2-юми март дар суханронии телевизионӣ гуфт, “нерӯҳои мусаллаҳи Русия маркази вилояти Херсонро пурра таҳти назорат гирифтанд.” Шаҳри соҳилӣ, ки тақрибан 280 ҳазор аҳолӣ дорад, минтақаи стратегӣ ба шумор меравад. Ҷониби Украина суқути шаҳрро тасдиқ намекунад ва шаҳрдори Херсон дар Фейсбук навишт, “мо ҳанӯз Украина ҳастем.”
Шаҳрдори Мариупол субҳи 2-юми март гуфт, ин шаҳри бандарӣ зери тирборони шадид қарор дорад ва мақомот наметавонанд, захмиёнро бигиранд. Ишғоли ин шаҳр як ҳадафи асосии нерӯҳои Русия ва ҷудоиталабон аз вилояти шарқии Донетски Украина маҳсуб мешавад.
Видеоро дар инҷо бинед:
Дар ду рӯзи охир ҳамлаҳои сахттарин дар Харков, дувумин шаҳри бузурги Украина, ҷараён гирифтааст. Даҳҳо сокини он ҷо кушта шуда, маркази шаҳр ҳадафи мушакборон буд. Нерӯҳои ҳавоии Русия рӯзи 2-юми март дар онҷо поин шудаанд.
Волии Харков субҳи 2-юми март гуфт, дар шабонарӯзи гузашта дастикам 21 нафар кушта ва 112 нафар захмӣ шуданд. Президенти Украина, Владимир Зеленский, бомбаборони Харковро ҳамчун ҷинояти ҷангӣ ва амали террористӣ маҳкум кард.
Вай рӯзи 1-уми март, пас аз ҳамлаи маргбор ба бинои маъмурияти шаҳр, гуфт, “баъди чунин ҳамла Русия як кишвари террористӣ аст.” Маскав рад кард, ки дар ҷараёни, ба гуфтааш, “амалиёти низомӣ дар Украина” маҳалҳои аҳолинишинро ҳадаф қарор додааст.
Байден ва Зеленский аз чӣ гуфтанд?
Нерӯҳои Русия дар канори пойтахти Украина низ ҷамъ шудаанд. Онҳо шаби 1-уми март ба бурҷ ё манораи телевизион дар Киев зарба заданд. Дар ин ҳамла дастикам панҷ кас кушта шуданд.
Баъд аз он, президент Владимир Зеленский бо раисиҷумҳури Амрико Ҷо Байден телефонӣ суҳбат кардааст. Ӯ дар Твиттер навишт, “бо раҳбарияти Амрико таҳримҳои зидди Русия ва кумаки дифоӣ ба Украина баррасӣ шуд. Мо бояд ҳарчӣ зуд монеи таҷовузкор шавем. Ташаккур барои дастгирӣ!”
Як мансабдори Кохи Сафед гуфт, ду раҳбар тақрибан ним соат суҳбат карданд. Байден рӯзи 1-уми март, ҳангоми ироаи паёми нахустинаш, дар бораи ҳамлаи президенти Русия Владимир Путин ба Украина ба таври муфассал суҳбат кард. Ӯ гуфт: "Владимир Путин, раисҷумҳури Русия, шаш рӯз пеш кӯшиш кард, ки пояҳои ҷаҳони озодро биларзонад, аммо ҳисобаш нодуруст баромад. Ӯ фикр кард, метавонад ба Украина ворид шавад ва ҷаҳон онро нодида бигирад. Ба ҷойи ин, бо девори сахту тавоное рӯбарӯ шуд, ки ҳеч гоҳ тасаввураш намекард. Вай бо мардуми Украина рӯбарӯ шуд.”
Байден эълон кард, ки ҳарими ҳавоии Амрикоро ба рӯйи ҳавопаймоҳои Русия фавран мебанданд. Ҳамзамон муттаҳид будани кишварҳои ғарбиро алайҳи амалиёти низомии Русия дар Украина таъкид кард.
“Путин фикр кард, ки Ғарб ва НАТО посух намедиҳанд. Фикр кард, ки метавонад моро дар як хона, дар як кишвар аз ҳам ҷудо кунад. Фикр кард, ки метавонад моро дар Аврупо аз ҳам ҷудо мекунад, аммо хато кард,” – афзуд Байден.
“Аввал ҳамлаҳоро бас кунад...”
Зеленский рӯзи 1-уми март дар мусоҳиба бо Reuters ва CNN гуфт, Русия бояд “аввал бомбаборони мардумро бас кунад”, то музокироти сулҳ ба ягон пешрафт ноил шавад. Интизор мерафт, даври дувуми музокирот дар бораи оташбаси эҳтимолӣ рӯзи 2-юми март баргузор шавад, аммо ба иттилои расонаҳои русӣ, ба таъхир афтод.
Даври аввали музокирот 28-уми феврал дар Беларус баргузор шуд, аммо тарафҳо ба натиҷае нарасиданд.
Канада рӯзи 1-уми март аз Додгоҳи байнулмилалӣ хост, ки ҷиноятҳои эҳтимолии ҷангӣ ва ҷиноятҳои зидди башарият аз ҷониби нерӯҳои Русияро дар Украина тафтиш кунад. Додгоҳи байнулмилалӣ рӯзи 28-уми феврал эълом карда буд, ки ба таҳқиқ мепардозад.
Русия соли 2014 нимҷазираи Қрими Украинаро ишғол кард. Ҳамлаи низомии охири Русия ба Украина 24-уми феврали имсол оғоз шуд.
Байден дар Конгресс гуфт, Путин товони ҳамла ба Украинаро хоҳад пардохт
Ҷо Байден, раисҷумҳури Амрико, рӯзи сешанбе дар суханронии солонаи худ дар Конгресси он кишвар сиёсатҳои ҳукуматашро дар баробари ҳамлаи Русия ба Украина шарҳ дод ва таъкид кард, ки президент Путин товони ин корро пас хоҳад дод.
Байден дар оғози ин суханронӣ аз аъзои Конгресс хост, ба эҳтироми мардуми Украина аз ҷо бархезанд ва гуфт, "бале, мо Иёлоти Муттаҳидаи Амрико дар паҳлӯи мардуми Украина меистем."
Вай дар ин суханронӣ хабар дод, ки Вазорати адлияи Амрико дар ҳоли ташкили гурӯҳе барои пайгарди қонунии ҷиноятҳои олигархҳои Русия аст. Байден изҳор дошт, ки Иёлоти Муттаҳида ҳамроҳи Иттиҳоди Аврупо киштиҳои тафреҳӣ, қасрҳои муҷаллал, ҳавопаймоҳои шахсӣ ва ҳар ончӣ олигархҳои рус аз роҳҳои номашруъ ба даст овардаанд, мусодира хоҳад кард.
Ӯ, ҳамчунин, аз тасмими ҳукумати худ барои бастани ҳарими ҳавоии Амрико ба рӯи ҳавопаймоҳои русӣ хабар дод.
Президенти Амрико аз Конгресс хост, 6,4 миллиард доллари дигар ёрии изтирорӣ дар моҳҳои оянда барои Украина ҷудо кунад. Бо ин ҳол, президенти Амрико бори дигар таъкид кард, ки кишвараш ба Украина нерӯ нахоҳад фиристод.
Раисҷумҳури Амрико сипас бо ишора ба Владимир Путин гуфт, "ӯ ҳарчанд, мумкин аст, дар майдони ҷанг ба комёбиҳое ноил шавад, аммо дар дарозмуддат товони сангине пардохт хоҳад кард."
Амрико ваъда додааст, ки ба Украина кумакҳои башарӣ ва низомӣ ироа мекунад ва манъи дастрасии баъзе бонкҳои Русия ба системаи молии "SWIFT"-ро суръат мебахшад.
Русия рӯзи 24-уми феврал аз замин, ҳаво ва баҳр ба Украина ҳамла кард. Аз ҳафт руз ба ин тараф ҷангҳои шадид дар минтақаҳои гуногуни Украина идома доранд. Ҷониби Украина мегӯяд, дар ин ҳамла садҳо нафар, аз ҷумла кӯдакон ҷон бохтаанд. Русия то кунун ба таври расмӣ шумораи сарбозони кушташудаи худро эълон накардааст.
Дар Киев бурҷи телевизионро нишон гирифтаанд. Зеленский аз "ҷинояти ҷангӣ" гуфт. ВИДЕО
Ҳукумати Украина гуфт, нерӯҳои Русия манора ё бурҷи телевизионро дар Киев, дар наздикии ёдгории қурбониёни Ҳолокост, ҳадаф қарор додаанд.
Расонаҳои маҳаллӣ гузориш доданд, ки дар наздикии манора чанд таркиш ба вуқуъ пайваст ва чанде нагузашта шабакаҳои телевизионии Украина пахши барномаҳоро қатъ карданд.
Президент Владимир Зеленский дар Твиттер гуфт, бар асари зарба дастикам 5 нафар кушта шуданд. Вай қаблан бомбаборони Харковро ҳамчун ҷинояти ҷангӣ маҳкум кард. "Баъд аз чунин ҳамла Русия як кишвари террористӣ аст," -- гуфт Зеленский.
РӮЙДОДҲОИ УКРАИНАРО ДАР ИНҶО ПАЙ БИГИРЕД
Ҳамлаҳо дар ҳоле сурат гирифтанд, ки корвони мошинҳои низомии Русия ва тӯпхонаҳо бо дарозии 65 километр ба шаҳри Киев, пойтахти Украина, наздик мешаванд.
Нерӯҳои мусаллаҳи Украина ин иқдоми Русияро талоше барои муҳосира ва назорати калонтарин шаҳри он кишвар медонанд.
Тасвирҳои моҳвораӣ аз корвони нерӯҳои Русия дар берун аз Киев
Корвони низомии Русия дар наздикии Иванков. 28-уми феврал
Рӯзи шашуми ҳамлаи Русия ба Украина. Дар Киев ва атрофи он чӣ мегузарад? ВИДЕО, АКС
1-уми марти соли 2022. Аз ҳамлаи низомӣ ва бесабаби Русия ба Украина шаш рӯз гузашт. Бино ба гузоришҳо, корвони низомиёни рус дар канораҳои шаҳри ҷанубии Херсон посгоҳ гузошта, корвонашон ба наздикиҳои пойтахти Украина расидааст. Иддао дар бораи нақшаи иҳота шудани шаҳри Мариупол низ мерасад.
Нерӯҳои ҳавоии Украина гуфтанд, рӯзи 28-уми феврал берун аз Киев панҷ ҳавопаймои ҷангии Русия ва як чархболро афтонданд, вале ин маълумотро феълан санҷидан имкон надорад. Фармондеҳии нерӯҳои ҳавоӣ инчунин гуфт, як мушаки русӣ нобуд карда шуд ва ҳавопаймоҳои ҷангии Украина ба корвони мошинҳои низомии русҳо дар минтақаҳои Киев ва Житомир зарба заданд.
Наворро дар инҷо бинед:
“Онҳо давлати моро шикастан мехоҳанд”
Аксҳои моҳвораӣ нишон медиҳанд, ки корвони мошинҳои низомии Русия ва тӯпхонаҳо бо дарозии 65 километр ба шаҳри Киев, пойтахти Украина, наздик мешаванд. Нерӯҳои мусаллаҳи Украина инро ҳамчун талоши муҳосираву таҳти назорат даровардани пойтахт ва калонтарин шаҳри Украина шарҳ медиҳанд.
Ин таҳаввулот дар ҳолест, ки музокироти нахустини мақомоти Украина ва Русия рӯзи 28-уми феврал бенатиҷа анҷомид, вале ҳарду тараф ба мувофиқа расиданд, ки дар рӯзҳои наздик муколамаро идома медиҳанд.
Тасвирҳои моҳвораиро дар инҷо бинед:
Тасвирҳои моҳвораӣ аз корвони нерӯҳои Русия дар берун аз Киев
Рӯзи 28-уми феврал президенти Украина Владимир Зеленский дар як муроҷиати видеоӣ аз сарбозони Русия даъват кард, ки амру фармонҳоро гӯш надиҳанд, силоҳҳоро ба замин гузоранд ва аз ҷанг худдорӣ кунанд. Зеленский дар бораи гуфтугӯи нахустин бо мақомоти рус, ки дар қаламрави Беларус гузашт, чизе нагуфт. Вале ӯ таъкид кард, ки вақте як ҷониб дигарашро мушакборон мекунад, ҷониби дигар ба гузашт розӣ намешавад.
Зеленский гуфт, Киев рӯзи 28-уми феврал се дафъа мушакборон шуд, дар шаҳр садҳо харобкори рус қарор доранд ва ишғоли пойтахт ҳадафи калидии Маскав мебошад. Зеленский гуфт, “онҳо давлати моро шикастан мехоҳанд, аз ин рӯ, пойтахт ҳамеша таҳти хатар аст”.
Партоби мушак. Куштаҳо ва захмиҳо зиёд мешаванд
Тибқи гузоришҳо, ҳавопаймоҳои ҷангии Украина ба ҷониби нерӯҳои Русия дар берун аз шаҳри Киев бомба ва мушак партоб карданд. Дар наворҳои видеоие, ки дар дуюмин шаҳри азими ин кишвар, Харков, бардошта шудаанд, дида мешавад, биноҳои истиқоматӣ мавриди тирпарониву таркишҳои пурқудрат қарор мегиранд.
Мушовири вазири корҳои дохилии Украина Антон Герашенко гуфт, дар пайи ҳамлаҳои мушакӣ дар шаҳри Харков, рӯзи 28-уми феврал, даҳҳо нафар кушта шуданд.
Раиси минтақаи Суми Дмитро Живитский рӯзи 1-уми март дар саҳифааш дар Фейсбук навишт, вақте нерӯҳои русӣ пойгоҳи низомии воқеъ дар шаҳраки Охтирка, байни Харкову Киевро мушакборон карданд, 70 низомии украинӣ кушта шуданд.
Дар шаҳри Херсон, ки дар шимолуғарби нимҷазираи ишғолшудаи Қрим ҷойгир аст, раиси шаҳр Игор Колихаев гуфт, нерӯҳои русӣ дар даромадгоҳи шаҳр посгоҳҳои худро ташкил мекунанд. Ӯ дар саҳифааш дар Фейсбук навишт, “Херсон аз они Украина буд ва мемонад”.
Павло Кириленко, раиси минтақаи Донетск, гуфт, шаҳри Мариупол дар пайи ҳамлаҳои нерӯҳои русӣ бебарқ мондааст. Вай рӯзи 1-уми март дар саҳифаи худ дар Фейсбук навишт, ки назорати соҳилҳои баҳри Азов ҳанӯз дар дасти нерӯҳои украинӣ мебошад.
Баҳси бастани ҳарими ҳавоӣ
Денис Пушилин, як раҳбари ҷудоиталабон дар шарқи Украина, гуфт, ҳадафи онҳо то поёни рӯз иҳота кардани шаҳри муҳиму стратегӣ мебошад. Дар ҳодисаи дигаре шоҳидон гуфтанд, рӯзи 28-уми феврал мушаке ба бинои воқеъ дар шаҳри шимолии Черниҳов, марзи Беларус, расид ва ин бино ба коми оташ рафт.
Дар ҳамин ҳол, президент Зеленский гуфт, дар посух ба мушакборони шаҳри Харков фурсати ҷорӣ кардани таҳрими истифода аз мушакҳо, ҳавопаймоҳо ва чархболҳои русӣ дар ҳарими ҳавоии Украина расидааст. Зеленский ҷузъиёти бештар надод. Аз ҷумла, маълум нест, ки эълон ва ҷорӣ кардани таҳрими истифодаи ҳарими ҳавоӣ аз ҷониби кӣ сурат мегирад.
Рӯзи 1-уми март муовини сарвазири Бритониё Доминик Рааб даъватҳои НАТО-ро барои бастани ҳарими ҳавоӣ рад кард ва гуфт, ин қарор метавонад хатари тавсеаи ҷангро ба миён орад ва паймони низомии ғарбиро дар ҳолати ҷанги мустақим бо нерӯҳои русӣ қарор диҳад.
Худи ҳамин рӯз вазири дифои Бритониё гуфт, русҳо натавонистанд, назорат бар ҳарими ҳавоии Украинаро ба даст оваранд, аз ин рӯ, ночор ба хотири кам кардани талафот ба амалиёти ҷангии шабона гузаштанд.