Ҷанги Украина
Неҳаммер аз Путин хост, ҷангро дар Украина "бас кунад", аммо чӣ шунид?
Садри аъзами Австрия, Карл Неҳаммер, дар нишасти матбуотӣ хулосаи мулоқоташро бо президенти Русия Владимир Путин нақл кард. Мулоқот рӯзи 11-уми апрел дар Подмосковйе барпо шуд. Неҳаммер гуфт, аз суҳбат бо раҳбари Русия ҳеч бардошти мусбат надорад.
Ӯ афзуд, бо вуҷуди таҳримҳо, Путин барои "ҳалли масъалаи Донбасс қотеъона амал карданӣ аст". Ҳамзамон Путин гуфтааст, ки таҳримҳо бисёр сахт ҳастанд.
Ба қавли Карл Неҳаммер, вай ба Владимир Путин гуфтааст, "ҷанг дар Украина бояд ҳарчи зуд бас шавад" ва "то замоне ки дар Украина одамон ҷон медиҳанд", таҳримҳои зидди Русия сангинтар мешаванд. Путин гуфтааст, агар амалиёти ҷангӣ зудтар хотима ёбанд, "бад намешавад", вале зоҳиран ин ҳолатро танҳо бар асоси шартҳои Русия пешбинӣ мекунад.
Ба гуфтаи Неҳаммер, президенти Русия пурра дар доираи "мантиқи ҷанг" андешаронӣ мекунад.
Садри аъзами Австрия мулоқотро "бисёр сахт" ва "рӯйиросту ошкор" арзёбӣ кард. Вай гуфт, сафар ба Маскав "як мулоқоти дӯстона набуд", балки "як вазифааш" мебошад.
Ба қавли Неҳаммер, ду раҳбар дар заминаи арзёбии вазъи воқеӣ дар Буча ихтилофи назар доштанд. Дар ин шаҳраки канори Киев, баъди берун шудани нерӯҳои Русия, даҳҳо ҷасад ва гӯрҳои дастҷамъӣ ёфтанд. Ғарбу Аврупо артиши Русияро дар ин ваҳшоният гунаҳкор карданд, Маскав иттиҳомҳоро напазируфт.
Неҳаммер ба хабарнигорон гуфт: "Мо як раддубадали бисёр сахте доштем, чунки президент ҷомеаи ҷаҳониро дар пешдоварӣ гунаҳкор мекунад". Вай гуфт, бисёр мехост ба чашми Путин нигоҳ карда, вокуниши ӯро ба кушта шудани сокинони Буча бубинад.
Неҳаммер аввалин раҳбари аврупоӣ аст, ки баъд аз шурӯи ҷанги васеъмиқёс дар хоки Украина дар таърихи 24-уми феврали имсол ба Русия рафт ва бо президент Путин вохӯрд. Ин вохӯрӣ якуним соат давом кард.
Нашрияи Kronen Zeitung гуфт, бо дархости Неҳаммер дар мулоқот на дастфишурӣ ва на аксбардории муштарак барпо нашуд, то ки, ба гуфтаи нашрия, аз ин мавод бо ҳадафҳои таблиғотии русҳо истифода нашавад.
Дмитрий Песков, сухангӯи Путин, пеш аз мулоқот гуфт, Русия баъди нишаст ҳеч изҳороте нашр нахоҳад кард.
Ин мулоқот дар ҳоле барпо мешавад, ки идораҳои истихбороти кишварҳои ғарбӣ ва Украина мегӯянд, Русия дар рӯзҳои наздик дар шарқи Украина як ҳуҷуми азимеро ба роҳ мемонад, ки ҳадафаш ишғоли вилоятҳои Донетск ва Луҳанск аст. Ин ду қаламравро Маскав "ҷумҳуриҳои мардумӣ" ва "мустақил" эътироф кардааст.
Ин шабурӯз ҷангҳои сахте дар шаҳри Мариупол идома доранд, ки дар ҷануби вилояти Донетск ҷойгир аст. Ин шаҳр, ки аз охири моҳи феврал аз ҷониби русҳо ишғол шуд, шадидан харобу валангор шуда, беш аз 10 ҳазор сокини маҳаллиаш кушта шудаанд. Онҳое, ки аз ин шаҳр берун шуда тавонистанд, вазъро чун як фоҷеаи башарӣ арзёбӣ мекунанд.
Аъзои полки украинии "Азов", ки дар ҷангҳои Мариупол иштирок мекунанд, рӯзи 11-уми апрел гуфтанд, нерӯҳои русӣ як маводи заҳролудкунандаи ношиносеро ба кор бурданд. Дар бораи қурбониҳои эҳтимолӣ чизе маълум нест. Намояндагони ҳукумати Украина ва Ғарб гуфтанд, ин хабарҳоро месанҷанд.
"Мумкин, ҷасадҳо дар зери хонаҳо монда бошанд" ВИДЕО
Пас аз муҳосираи якмоҳаи Русия, нерӯҳои Украина шаҳри шимолии Черниговро озод карданд. Аммо баъди ҳамлаи мушакие, ки рӯзи ҷумъа, 8-уми апрел, даҳҳо нафарро кушт, сокинон бим доранд, ки дигарбора мавриди ҳамла қарор мегиранд. Нисфе аз мардуми шаҳр гурехта, садҳо нафар фавтидаанд, аз ҷумла ҷавононе, ки бо сарбозони рус меҷангиданд.
"Шиками писарам аз тири гранатомёт пора шуд, тир ҳам хӯрда буд, вале ба ҷанг идома медод," -- нақл кард Наталия Дуденок, сокини Чернигов.
Сеяки кормандони шифохонаи Чернигов ё гурехтаанд ё бенишон ҳастанд. Мутасаддиёнаш мегӯянд, барои шумурдани ҷасадҳо вақти зиёде лозим мешавад.
Ба қавли Андрей Жиденко, аз шифохонаи вилоятии Чернигов, "биноҳои истиқоматии зиёде вайрон шуданд ва харобаҳоро пок накардаанд. Ҳамчунин дар деҳоти атроф хонаҳои зиёде хароб гашт ва фикр мекунам, аз зери онҳо низ ҷасадҳои зиёде пайдо шавад. Мардум дар таҳхонаҳо зиндагӣ мекарданд."
Видеоро дар инҷо бинед:
Ҳафтаи гузашта нерӯҳои Украина чанд шаҳрак ва деҳоти вилояти Киевро озод карданд ва Русия гуфт, барои ишғоли манотиқи шарқии Украина тамаркуз мекунад.
Сарбозони русро ба қатли ғайринизомиён, таҷовузу ғоратгарӣ муттаҳам мекунанд. Украина мегӯяд, русҳо ба ҷиноятҳои ҷангӣ даст задаанд. Русия мегӯяд, ки ғайринизомиёнро ҳадаф нагирифтааст ва иддаоҳои ҷиноятҳои ҷангиро рад мекунад.
Маъмурони имдодӣ дар Чернигов мегӯянд, бисёре аз бозмондагони ҷанг ҳама молу манолашонро аз даст додаанд. Евген Корж, маъмури имдодӣ, гуфт: "Парерӯз як зан омада гуфт, ки хоҷагии калоне доштааст, сад мурғ, чаҳор хуку се гов. Сарбозони рус омада, ҳамаашонро куштаанд ва ҳеч чизе намондааст. Ӯ мегирист."
Табибон мегӯянд, илова бар фақру маргу маҷруҳӣ, муҳосира сабаби осеби доимии равонии мардум шудааст. Андрей Линик, намояндаи идораи тандурустии Чернигов, мегӯяд, “ба ақидаи ман, мардуми инҷо ҳаргиз дигар эҳсоси амният нахоҳанд кард, зеро мунтазири такрори ҳодисае хоҳанд буд. Ин ҷанг қатъан моро дигар кард.”
Рӯзи ҷумъа дар шаҳри шарқии Краматорск, мушаке ба истгоҳи роҳи оҳан бархӯрд ва даҳҳо нафарро кушт. Мардуми Чернигов мегӯянд, шиддат гирифтани вазъ тарснок аст ва мумкин аст ба онҳо дигарбора ҳамла кунанд.
Хабару гузоришҳои бештарро дар бораи ҷанги Русия дар Украина инҷо бихонед
"Мумкин зери хонаҳо ҷасадҳо монда бошанд"
Баъд аз муҳосираи якмоҳаи Русия, нерӯҳои Украина шаҳри шимолии Черниговро озод карданд. Аммо баъди ҳамлаи мушакие, ки рӯзи ҷумъа даҳҳо нафарро кушт, онҳо бим доранд, ки дигарбора мавриди ҳамла қарор мегиранд.
Эҳтимоли афзоиши ҳамлаҳои Русия. Зеленский хоҳони кумаки бештар шуд
Владимир Зеленский, раисҷумҳури Украина, гуфт, барои раҳо шудани кишвараш аз ҷанги беасоси Русия ёрии бештар лозим аст. Русия ҳуҷумҳоро дар шарқи Украина вусъат бахшидааст. Зеленский 11-уми апрел дар муроҷиати онлайн ба қонунгузорони Кореяи Ҷанубӣ гуфт, агар ҷомеаи байнулмилалӣ пеши роҳи Русияро нагирад, ин кишвар аз ҷанге, ки моҳи феврал шуруъ кард, даст намекашад.
Ӯ афзуд, Русия ҳоло даҳҳо ҳазор сарбозашро дар пешорӯи ҳуҷуми навбатӣ дар минтақаҳои шарқӣ ҷойгир кардааст. То ҳол садҳо муассисаву сохторҳо дар Украина ба замин яксон шуда, дастикам 300 беморхонаву биноҳои ёрирасон хароб гардидаанд.
Нерӯҳои Русия талоши худро барои зери назорати пурра даровардани шаҳри муҳосирашудаи Мариупол идома медиҳанд. "Мариупол хароб карда шуд, даҳҳо ҳазор нафар ҷон додаанд, вале бо ин вуҷуд русҳо аз идомаи ҳуҷумашон даст намекашанд," – гуфт Зеленский дар муроҷиат ба вакилони маҷлиси Кореяи Ҷанубӣ. Санҷидани дурустии омори қурбониҳо феълан имкон надорад.
Мулоқоти рӯбарӯ бо Путин
Дар пасманзари ин таҳаввулот, ҷомеаи байнулмилалӣ талош дорад аз роҳи созиши сулҳ пеши роҳи ҷангҳои бештарро бигирад. Нахуствазири Австрия Карл Неҳаммер рӯзи 11-уми апрел, қарор аст, бо президенти Русия Владимир Путин мулоқот карда, ӯро ба хатми ҷанг даъват кунад. Аз оғози ҷанги беасоси Русия алайҳи Украина дар 24-уми феврали имсол ин мулоқоти аввалини рӯбарӯи Путин бо як намояндаи Аврупо хоҳад буд.
Неҳаммер пеш аз сафар ба Маскав гуфт: "Ман бо Владимир Путин мулоқот мекунам... Мо (Австрия) аз назари низомӣ бетараф ҳастем, вале дар робита бо ҷанги таҷовузгари Русия алайҳи Украина мавқеи қотеъ дорем. Ӯ бояд бас кунад! Долонҳои башарӣ, оташбас ва таҳқиқи пурраи ҷиноятҳои ҷангӣ зарур аст."
Дар ҳамин ҳол, рӯзи 11-уми апрел вазирони корҳои хориҷии Иттиҳоди Аврупо дар Люксмембург, қарор аст, бо додситони Додгоҳи байнулмилалии ҷиноятҳои ҷангӣ мулоқот карда, мавзӯи ҷиноятҳои содиршуда аз ҷониби артиши Русияро баррасӣ кунанд.
Маскав гуфтааст, ба зидди сокинони мулкӣ амал намекунад, вале далелҳои зиёде дар бораи ваҳшонияти артиши Русия алайҳи ғайринизомиён вуҷуд дорад. Ҷозеп Боррелл, дипломати аршади аврупоӣ, пеш аз оғози ҷаласаи вазирон гуфт, мавзӯи таҳримҳо "ҳамеша мавриди баррасӣ аст".
Ҳаракат ба самти шарқ
Аз замони ҳамлаи Русия ба Украина аз 44 миллион аҳолии ин кишвар чоряки он маҷбур шудаанд, хонаҳояшонро тарк кунанд. Ҳазорҳо нафар куштаву захмӣ шудаанд. Бисёре аз онҳо аҳолии мулкӣ мебошанд.
Ширкати Maxar Technologies рӯзи 10-уми апрел аксҳои маҳвораие нашр кард, ки дар он дида мешавад, корвони 13-километрии низомии русҳо ба самти Донбасс ҳаракат мекунад. Таҳлилгарон мегӯянд, Русия ният дорад, иқтидори низомиашро дар шарқи Украина тақвият диҳад. Эҳтимоли дар чанд рӯзи наздик шуруъ шудани ҳуҷумҳои нав вуҷуд дорад.
Эҳтимол корвони низомӣ ба шаҳри Изюми вилояти Харков меравад, ки онҷоро низомиёни Русия назорат мекунанд. Изюм дар наздикиҳои вилоятҳои Донетску Луҳанск ҷойгир аст, ки макони муҳорибаҳои бисёр сахту сангин мебошад.
Баъд аз нокомӣ дар минтақаҳои дигари Украина, Русия ҳуҷуми низомии худро ба Донбасс равона кардааст, ки минтақаҳои шарқии Украина – вилоятҳои Луҳанск ва Донетскро дар назар мегирад.
Дворников кист?
Дар остонаи ҳуҷуми дарпешистода, Кремл ба генерали артиш Александр Дворников, ки фармондеҳи нерӯҳои русӣ дар Ҳавзаи ҷанубии низомӣ мебошад, раҳбарии ҷанг дар Украинаро вогузор кардааст.
Мақомоти амрикоӣ мегӯянд, эҳтимоли ин вуҷуд дорад, ки Путин мехоҳад назоратро бар Донбасс то оғози моҳи май ба даст оварда, дар остонаи таҷлили Иди ғалаба бар фашизм дар Ҷанги Дувуми Ҷаҳон пирӯзиашро дар ҷанги Украина эълон кунад.
Таҳлилгарон мегӯянд, таъини генерали 60-сола, Дворников, бо ҳадафи тавсеаи ҳуҷумҳои васеъмиқёс дар шарқи Украина карда мешавад. Дворников дар ҷанги Сурия маъруф шудааст, ки онҷо Русия даст ба бомбаборони маҳалҳои аҳолинишин зада буд. Путин Дворниковро барои амалиёт дар Сурия бо ҷоизаи баландтарини давлатӣ – "Қаҳрамони Русия" – қадрдонӣ кардааст.
Украина ба ҳуҷум омода мешавад, Русия фармондеҳи нав таъин кард
Нерӯҳои украинӣ дар пешорӯи ҳамлаҳои навбатӣ сангар гирифтаанд. Ҳамзамон Русия бо таъини як генерали ҷоизадор ба мақоми фармондеҳи низомӣ, ба қавли таҳлилгарон, зоҳиран ба ҳуҷуми ҳалкунандааш дар шарқи Украина омодагӣ мебинад.
Эҳтимоли дар чанд рӯзи наздик шуруъ шудани ҳуҷумҳои нав вуҷуд дорад.
Рӯзи 10-уми апрел ширкати Maxar Technologies аксҳои маҳвораие нашр кард, ки дар он корвони тахминан 13-километрии мошинҳои низомии русӣ дар ҳоли ҳаракат ба самти Донбасс сабт шудаанд. Кремл иқтидори ҷангии худро ба шарқи Украина равона кардааст.
Эҳтимол корвони низомӣ ба шаҳри Изюми вилояти Харков меравад, ки онҷоро низомиёни Русия назорат мекунанд. Изюм дар наздикиҳои вилоятҳои Донетску Луҳанск – макони муҳорибаҳои бисёр сахту сангин – ҷойгир аст.
Баъд аз нокомӣ дар минтақаҳои дигари Украина, Русия ҳуҷуми низомии худро ба Донбасс равона кардааст, ки минтақаҳои шарқии Украина – вилоятҳои Луҳанск ва Донетскро дар назар мегирад.
Дар остонаи ҳуҷуми дарпешистода, Кремл ба генерали артиш Александр Дворников, ки фармондеҳи нерӯҳои русӣ дар Ҳавзаи ҷанубии низомӣ мебошад, раҳбарии ҷанг дар Украинаро вогузор кардааст.
Ихроҷи беш аз 330 дипломати рус аз Аврупо аз оғози ҳамлаи Русия ба Украина
Кишварҳои аврупоӣ аз оғози ҳамлаи низомии Русия ба Украина дар 24-уми феврали соли ҷорӣ, беш аз 330 дипломати Русияро аз қаламравҳои худ берун кардаанд.
Хабаргузории туркии "Анадолу" рӯзи чаҳоршанбеи 6-уми апрел хабар дод, кишварҳои аврупоӣ асосан ба далели ончӣ "нақзи Конвенсияи Венна, таҳдидҳои амният ва ҷосусӣ" мехонанд, иқдом ба берун кардани дипломатҳои Русия кардаанд.
Берун кардани шумораи зиёди дипломатҳои рус пас аз нашри аксҳо аз қатли омми сокинони шаҳраки Буча воқеъ дар атрофи Киев рух додааст.
Фаронса ва Олмон рӯзи душанбе 75 дипломати русро баъд аз ошкор шудани куштори Буча берун карданд. Дар умум 182 дипломати Русия баъд аз нашри аксҳои куштори сокинони Буча аз кишварҳои аврупоӣ ихроҷ шудаанд. Литва ҳам сафири Русияро ихроҷ кард ва сафири худро фаро хонд.
Кашфи садҳо ҷасад дар Буча пас аз ақибнишинии Русия аз минтақаҳои зери ишғоли худ, вокунишҳо ва хашми байналмиларо ба миён овард.
Мақомоти Украина гуфтанд, артиши Русия сокинони осоиштаро куштааст. Вазорати мудофиаи Русия ин айбро рад мекунад. Дар изҳороти вазорати мудофиаи Русия омадааст, ки ҳамаи аксҳову наворҳо иғвогарона буда, "аз сӯи режими Киев ва расонаҳои ғарбӣ сохтакорӣ шудаанд".
Дар ин миён, Ҷозеп Боррел, масъули сиёсати хориҷии Иттиҳоди Аврупо низ рӯзи чаҳоршанбеи 6-уми апрел эълон кард, ки бархе аз дипломатҳои Русия дар Бруссел "унсури номатлуб" (персона нон грата) ҳастанд ва берун хоҳанд шуд.
То кунун Италия 30 дипломати Русия, Олмон 40, Фаронса 35, Испания 25 ва Лаҳистон 45 дипломати русро ихроҷ карда ва кишварҳои Дания, Шведсия, Булғористон, Ҳолланд, Ирландия, Чехия, Белгия, Словакия, Латвия, Литва, Эстония ва Македонияи шимолӣ низ даҳҳо дипломати русро ихроҷ кардаанд.
Мария Захарова, сухангӯи Вазорати корҳои хориҷии Русия ду рӯз қабл гуфт, ки ихроҷи 40 дипломати рус аз кишварҳои аврупоӣ бепосух нахоҳад монд. Аммо ӯ шарҳ надод, ки вокуниши Маскав чӣ хоҳад буд.
Кишварҳои ғарбӣ ба иловаи берун кардани дипломатҳои рус, ҳамчунин таҳримҳои сахти иқтисодӣ алайҳи Русия ҷорӣ карда, ба Киев кӯмакҳои низомӣ пешниҳод мекунанд.
Аз оғози ҳамлаи Русия ба Украина дар 24-уми феврали имсол то кунун садҳо нафар аз ҳар ду ҷониб кушта шудаанд. Русия амалкарди худ дар Украинаро "амалиёти вижаи низомӣ" ва "аз байн бурдани миллатгароҳо" мехонад. Аммо Киев онро "таҷовуз"-и ошкор ба истиқлолият ва тамомияти арзии худ медонад.
Куштори ғайринизомиён дар Украина. Олмон ва Фаронса 75 дипломати Русияро ихроҷ карданд
Дар пайи ифшо шудани куштори дастаҷамъии ғайринизомиён дар шаҳри Бучаи Украина аз сӯи низомиёни Русия, Вазорати корҳои хориҷии Олмон эълон кард, 40 дипломати русро аз ин кишвар берун мекунад. Вазорати корҳои хориҷии Фаронса низ рӯзи душанбеи 4-уми апрел гуфт, "шумораи зиёде аз дипломатҳои рус"-ро ихроҷ мекунад. Литва ҳам сафири Русия дар ин кишварро берун кардааст.
Ба гузориши хабаргузории "Франс-пресс", шумораи дипломатҳои берункардаи Русия аз Фаронса 35 нафар мебошанд ва ҳанӯз номи ин дипломатҳо нашр нашудааст. Вазорати корҳои хориҷии Фаронса мегӯяд, фаъолияти ин афрод "алайҳи манофеи амниятӣ"-и Фаронса аст ва беруни кардани онҳо бахше аз чораҳои муштараки Аврупо мебошад.
Шабакаи BMF аз қавли Ҷен Дриан, вазири корҳои хориҷии ин кишвар гузориш дод, ки куштори шаҳри Буча хашми ҷомеаи ҷаҳониро барангехт ва Фаронса омодаи берун кардани дипломатҳои Русия аст.
Анналена Шарлотта Алма Бербок, вазири корҳои хориҷии Олмон низ рӯзи душанбе эълон кард, ки аксҳои нашршуда аз шаҳри Буча дар Украина далели "ваҳшигарии ғайри қобили бовари раҳбарони Русия ва дунболаравҳои таблиғотии Кремл" аст.
Ӯ афзуд, ҳукумати Олмон афзуд, ки шумори зиёде аз дипломатҳои Русияро, ки ҳар рӯз алайҳи озодӣ ва якпорчагии ҷомеаи Олмон дар талош ҳастанд, ҳамчун "унсури номатлуб" муаррифӣ кард ва берун менамояд.
Ҳудуди 104 шаҳрванди Русия ҳамчуни "дипломат" дар Олмон сабт шудаанд. Ин ба он маънӣ аст, ки 40 дарсади ин дипломатҳо рӯзи душанбе ихроҷ шуданд.
Литва ҳам рӯзи душанбе эълон кард, ки сафири Русияро ихроҷ мекунад. Габриэлюс Ландсбергис, вазири корҳои хориҷии Литва ҳамчунин гуфт, ки ҳукумати ӯ консулгарии Русия дар шаҳри бандарии Клайпедеро низ хоҳад баст ва сафири худро аз Маскав фаро мехонад.
Ба гуфтаи ӯ, ҳукумати Литва ин тасмимро ба огоҳии шарикони худ дар Иттиҳоди Аврупо ва НАТО расонида ва хостааст, ки онҳо ҳам чунин кунанд. Вазири корҳои хориҷии Литва дар идома ба ҳимояти кишвараш аз Украин таъкид кард ва хостори анҷоми таҳқиқот дар бораи эҳтимоли иртикоби ҷиноятҳои ҷангӣ аз сӯи артиши Русия дар Украина шуд.
Рӯзи якшанбе аксҳое нашр шуд, ки ғайринизомиёни кушташуда дар минтақаҳои зери тасарруфи Русия дар атрофи Киевро нишон медод. Дастҳои ин кушташудаҳо аз пушт баста шуда буд. Мақомҳои украинӣ мегӯянд, ҷасади 410 ғайринизомиро дар минтақаҳое, ки қаблан тавассути русҳо ишғол шуда буданд, пайдо кардаанд.
Сергей Лавров, вазири корҳои хориҷии Русия вазъ дар атрофи шаҳри Бучаи Украинаро як ҳамлаи сохтаи навбатӣ хонд ва гуфт, ки дар он ҷо саҳнасозӣ шудааст. Вазири корҳои хориҷии Русия дар мулоқот бо муовини дабири кулли Созмони Милали Муттаҳид дар умури кӯмакҳои башардӯстона Мартин Гриффитс гуфт, дар шаҳри Бучаи вилояти Киев пас аз тарки нерӯҳои Русия аз он ҷо, тибқи нақша, як "ҳамлаи сохтакоришуда" сурат гирифт.
Анналена Шарлотта Алма Бербок, вазири корҳои хориҷи Олмон ҳамзамон мегӯяд, кишвараш ҳамроҳ бо шарикони худ таҳримҳо алайҳи Русияро бештар карда, пуштибонии низомиаш аз Украинаро афзоиш медиҳад. Ӯ ҳамчунин аз тақвияти НАТО дар кишварҳои Аврупои шарқии узви ин паймон хабар дод.
Қаблан бархе кишварҳои аврупоӣ, аз ҷумла Булғористон, Латвия, Литва, Эстония, Лаҳистон, Ирландия ва Ҳолланд даҳҳо дипломати Русияро бинобар "фаъолиятҳои ҷосусӣ ва таблиғоти Кремл" дар пайи ҳамлаи Путин ба Украина, берун карда буданд.
Русия низ дар вокуниш ба кишварҳои аврупоӣ таҳдид кард, ки берун кардани дипломатҳояшро бепосух нахоҳад гузошт.
Иттиҳоди Аврупо ва Амрико ҳамроҳ бо дигар шарикони худ монанди Ҷопон ва Австралия таҳримҳои сангин алайҳи Русия ҷорӣ кардаанд.
Аз оғози ҳамлаи низомии Русия ба Украина дар 24-уми феврали соли ҷорӣ, садҳо ғайринизомӣ дар ин кишвар кушта шуда ва беш аз чаҳор миллион украинӣ низ бар хориҷ фирор кардаанд.
Аксҳои моҳвораӣ аз "гӯри дастаҷамъӣ" дар Украина. Русия хостори баргузории нишасти Шӯрои Амният шуд
Мақомоти Украина артиши Русияро ба "наслкушӣ" дар шаҳри Буча ва дигар шаҳрҳои ин кишвар муттаҳам карданд. Аммо Вазорати дифои Русия мегӯяд, ки даст ба куштори ғайринизомиён дар ин шаҳри воқеъ дар атрофи Киев назадааст. Нашри аксҳо дар шабакаҳои иҷтимоӣ дар робита ба қатли ғайринизомиён дар Буча, вокунишҳои байналмиларо ба миён овардааст.
"Maxar" -- як ширкати хусусии амрикоӣ эълон кард, ки аксҳои моҳвораӣ чуқуриеро ба дарозии 13,7 дар ҳавлии як калисои украинӣ нишон медиҳад. Дар пайи ақибнишинии нерӯҳои рус аз шаҳри Буча, як гӯри дастаҷамъӣ кашф шудааст.
Хабарнигорони хабаргузории "Рейтерз", ки рӯзи шанбе аз шаҳраки Буча дидан карданд, ҷасадҳоеро дар кӯчаҳои он мушоҳида кардаанд. Яке аз гӯрҳои дастаҷамъӣ ҳанӯз пӯшида нашудааст ва ҷасадҳо дида мешаванд.
Украина рӯзи якшанбе нерӯҳои Русияро ба "куштори дастҷамъӣ" дар шаҳраки Буча дар 37-километрии шимол-ғарби Киев муттаҳам кард. Русия аммо ин иттиҳомро рад кард ва онро "таҳрикомез" хонд.
Ширкати хусусии "Maxar", ки аксҳои моҳвораӣ аз Украина таҳия ва нашр мекунад, гуфт, ки нахустин нишонаҳои кандани чуқурӣ барои як гӯри дастаҷамъӣ дар калисои Эндрюи Муқаддас ва Сарнахустин рӯзи 10-уми март дида шудааст. Ин ширкат дар идомаи баёнияи худ афзуд, "кашфиёти ахир дар рӯзи 31-уми март ҷойи ин гӯри дастаҷамъӣ дар бахши ҷануб-ғарби наздик ба калисоро нишон медиҳад.
"Рейтерз" менависад, ки ба таври мустақил наметавонад аксҳоро ростозмоӣ (factcheking) бикунад ва мушаххас нест аксҳои нашршуда аз сӯи ин ширкати амрикоӣ аз ҳамон калисо гирифта шуда бошад, ки гузоришгарони ин хабаргузорӣ рӯзи шанбе аз он боздид карданд.
Бархе аз сокинон наздикони худро миёни кушташудаҳо шиносоӣ карданд. Дар аксҳо кушташудаҳоеро ҳам дидан мумкин аст, ки дастҳояшон аз пушта баста шудааст. Михаил Подоляк, мушовири дафтари президенти Украина мегӯяд, эҳтимол дорад, онҳоро артиши Русия кушта бошад. Ба иттилои раиси шаҳри Буча, ҷасади наздики 300 сокин дар гӯри дастаҷамъӣ дафн шудааст.
Дар ин ҳол, Маскав хостори баргузории нишасте дар Шӯрои Амнияти СММ барои баррасии ҳодисаи Буча шуд. Мария Захарова, сухангӯи Вазорати корҳои хориҷии Русия рӯзи якшанбе гуфт, "Русия хостори баргузории як нишаст дар Шӯрои Амнияти Созмони Милали Муттаҳид дар иртибот бо таҳрикоти артиши Украина ва ифротиҳо дар шаҳри Буча шудааст".
Вай афзуд, "ҳадафи режими Киев" барои иртикоби ҷиноятҳои баъдии худ, барҳам задани гуфтугӯҳои сулҳ ва бештар кардани хушунатҳо аст".
Кашфи гӯрҳои дастаҷамъӣ дар Буча вокунишҳои ҷаҳониро дар пай дошт ва аз ҷумла, Антонио Гуттериш, дабири кулли Созмони Милали Муттаҳид онро "такондиҳанда" хонд ва хостори анҷоми таҳқиқоти мустақил дар бораи он шудааст.
Ҳамчунин Олмон таъкид кард, ки Русия бояд баҳои ҷиноятҳои ҷангии худро бипардозад. Энтони Блинкен, вазири корҳои хориҷии Амрико низ гуфт, ки аз назари ҳукумати Ҷо Байден, нерӯҳои русӣ муртакиби ҷиноятҳои ҷангӣ шудаанд.
"Аксар қурбониёнро аз пушти сар паррондаанд." Идомаи ҳамлаҳои ҳавоии Русия ба Украина
Як мансабдори Вазорати корҳои дохилии Украина гуфт, ки нерӯҳои Русия рӯзи 3-юми апрел шаҳри Одессаро дар соҳили Баҳри Сиёҳ ҳадафи ҳамлаҳои ҳавоӣ қарор додаанд.
Антон Герашенко дар Телеграм навишт, "дар баъзе минтақаҳо сӯхтор сар зад. Баъзе аз мушакҳоро тавассути системаи дифои зиддиҳавоӣ зада гардонданд." Маҷлиси шаҳри Одесса низ ҳамлаҳоро тасдиқ кард.
Дар ҳамин ҳол, Владимир Мединский, раҳбари ҳайати музокиракунандаи Русия бо Украина, дар Телеграм навишт, пешрафти кофӣ барои мулоқоти раҳбарони ду кишвар ҳосил нашудааст.
Вай ҳамзамон таъкид кард, ки "мавқеи Русия нисбат ба Қриму Донбасс бетағйир мемонад". Маскав соли 2014 нимҷазираи Қрими Украинаро тасарруф кард ва пеш аз ҳамлаи моҳи феврали имсол вилоятҳои Луҳанску Донетскро дар шарқи Украина ба ҳайси давлатҳои мустақил шинохт.
Як хабарнигори "Франс-Пресс" дар Одесса гузориш дод, ки тақрибан соати шаши субҳи якшанбе садои таркишҳо шунида шудааст. Ӯ мегӯяд, ба чашмони худ дид, ки дастикам аз се ҷой дуди сиёҳ ба ҳаво мепечид.
Одесса бо тақрибан 1 миллион аҳолӣ шаҳри бузургтарин дар соҳили Баҳри Сиёҳ аст ва то ҳол зери назорати Украина қарор дорад.
Вазорати дифои Русия рӯзи 3-юми апрел гуфт, ба корхонаи коркард ва анбори нафт дар наздикии шаҳр зарба зад. Вазорат гуфт, нерӯҳои онҳо 28 иншооти низомии Украинаро дар саросари ин кишвар нишон гирифтаанд.
Владимир Зеленский рӯзи 2-юми апрел ҳушдор дод, ки Русия дар ҷануби ин кишвар ба "зарбаҳои сахт" омода мешавад, дар ҳоле ки нерӯҳояшро аз манотиқи атрофи Киев ва Черниҳов дар шимол берун мекашад.
Дар шаҳри бандарии Мариупол ҳудуди 100 ҳазор ғайринизомӣ дар муҳосираи нерӯҳои Русия мондаанд. Таҳлилгарон бар ин боваранд, ки Русия қасд дорад, ин шаҳрро забт кунад, то аз Донбасс ба Қрим роҳи заминӣ эҷод кунад.
Ирина Верешчук, муовини сарвазири Украина, рӯзи 3-юми апрел гуфт, ҳафт мусофирбар бо намояндагони Салиби Сурх талош хоҳанд кард, ба Мариупол ворид шаванд. Ба гуфтаи вай, дар умум, 17 автобус кӯшиш доранд, мардуми осоиштаро аз Мариупол ва шаҳри бандарии Бердянск берун биоранд.
Як рӯз пеш Салиби Сурхи Байнулмиллалӣ аз кӯшиши фиристодани корвони мусофирбарҳо ба онҷо, ба далели ноором будани вазъ дар минтақа, даст кашида буд.
Владимир Зеленский, раисҷумҳури Украина, гуфт, муқовимати Мариупол ба Киев барои бозпас гирифтани қаламраваш дар шимол "фурсати бебаҳо" додааст. Зеленский айни замон нерӯҳои Русияро дар эҷоди "фалокат" дар берун аз Киев ва гузоштани минаҳо ва домҳои "тарканда" дар саросари кишвар муттаҳам кард.
Раиси шаҳри Буча дар канори Киев рӯзи 2-юми апрел гуфт, дар тӯли як моҳе, ки нерӯҳои Русия шаҳрро дар ихтиёр доштанд, ҳудуди 300 сокини маҳаллиро куштанд. Мири шаҳр Анатолий Федорук ба "Франс-Пресс" гуфтааст, ҳамаи қурбониёнро "аз пушти сар паррондаанд."
Маскав, ки рӯзи 24-уми феврали имсол ба хоки Украина таҷовуз кард, ҳанӯз ба ин иддао вокуниш нишон надодааст.
Туркия бе гандуми Украина мемонад? ВИДЕО
Вобастагии сахт аз гандуми Украина ва Русия иқтисоди Туркияро дар вазъияти бисёр бад қарор додааст. Дар пайи ҷанги Русия дар Украина содироти гандум ба Туркия ҳам кам шуд. Камбуди орд ва афзоиши босуръати таваррум ин кишварро шадидан нигарон кардааст.
Киштиҳои замоне пур аз гандум ва тухми офтобпараст аз Украина ва Русия ба Туркия ворид мешуданд. Ҳоло дар бандарҳои Истанбул холӣ мондаанд. Баъди ҷанги Русия дар Украина содироти тақрибан ҳамагуна маводи ғизоӣ аз тариқи Баҳри Сиёҳ коҳиш ёфт.
Таҳлилгар Атилла Эсилада мегӯяд: "Мо бояд 10 миллион тонна гандуми навъи босифат аз кишти зимистона ворид кунем. Бо таваҷҷӯҳ ба назорати содирот дар Русия ҳатто намедонам, ин кишвар тавони таъмини ин миқдор гандумро дорад ё на. Украина барои Туркия аз назари содироти ғалладона ва равған бозори рақами як буд. Ҳоло ин бозор аз даст рафт. Албатта, Туркия имкон дорад, ба бозорҳои дигар рӯ орад, аммо ба сабаби дурии роҳ, харҷи ҳамлу нақл зиёд нархи он гаронтар хоҳад шуд."
Вобастагии зиёд аз воридоти гандум Туркияро аз ҳоло дар ҳолати ногувор қарор додааст.
Алӣ Акбар Елдерим, хабарнигори нашрияи “Дунё”, ки дар мавзуъҳои кишоварзӣ, менависад, гуфт: "Туркия моҳи июни соли гузашта як тонна гандуми воридотиро бо маблағи 262 доллар мехарид. Ҳафтаи гузашта қимати як тонна ғалла ба 456 доллар расид, ки қариб ду баробар бештар аз нархи пешина аст. Ҳамингуна Туркия ба далели вобастагиаш аз маҳсулоти кишоварзии воридотӣ ва ҳамчунин болоравии нархи маводи ғизоӣ дар ҷаҳон, дар пайи ҷанги Украина зарари ҷиддӣ мебинад."
Қурби асъори туркӣ соли гузашта коҳиш ёфт ва ҳамоно зери фишор қарор дорад. Ба сабаби онки гандуми воридотӣ бо доллар харида мешавад, тавварум ҳамчунон идома дорад, ҳарчанд ҳанӯз қабл аз ҳамлаи Русия 50 дар сад афзоиш ёфта буд. Симит, нони арзон ва миллии туркӣ, ки бо кунҷит ва бештар барои наҳорӣ пухта мешавад, тақрибан ду баробар гарон шуд. Бо вуҷуди ёронаҳои давлат, интизор меравад, ки нарх боз боло меравад.
Ба қавли Матин Селик, соҳиби ноновойхона, "моҳҳои наздик мо шоҳиди болоравии нархи нон мешавем. Бо афзоиши нархи гази моеъ, барқ ва об, нархи нон ҳатман гаронтар мешавад. Гап фақат сари нархи орд нест, арзиши хамирмоя ҳам, ки 60 лира буд, ҳоло ба 160 лира расидааст. Ин ҷо ҳамчунин хароҷоти нерӯи кориро ҳам ба назар гирифтан даркор аст."
Коршиканиву эътирозҳо, ки қаблан хеле кам иттифоқ меафтоданд, ҳоло ба як кори маъмулӣ табдил ёфтааст. Ба далели афзоиши нархҳо, коргарон талаб доранд, ки музди корашон зиёд карда шавад.
Таҳлилгар Атилла Есилада гуфт: "Аслан нон, як маҳсулоти захиравӣ, ё иловагӣ аст ва агар шумо дигар чизе барои хӯрдан надоред, аз он истифода мекунед. Ман шунидам, ки одамон дар нонвойхона мегуфтанд, нархи як нон, ки ҳоло 4 лира аст, то тобистон имкон дорад ба 7 лира бирасад. Ин бисёр ғамангез аст. Ин вазъ бешак ба иқтисоди кишвар зарба мезанад ва ба нафъи Эрдуғон нест."
Президенти Туркия Раҷаб Тайқиб Эрдуғон соли оянда мумкин аст дигарбора дар интихобот ширкат кунад. Таҳлилгарон бар ин боваранд, ки ин вазъ ба обрӯи Эрдуғон бетаъсир намемонад. Як танқид аз сиёсати ҳукумати ӯ ин аст, ки бештар ба маҳсулоти воридотӣ такя мекунад, на тавлиди он дар дохили кишвар.
Украина: Бештари нерӯҳои русӣ аз нерӯгоҳи ҳастаии Чернобил берун шуданд
Ширкати атомии Украина рӯзи панҷшанбеи 31-уми март гуфт, бештари нерӯҳои Русия, ки дар нерӯгоҳи Чернобил ҷобаҷо шуда буданд, онро тарк карданд ва эҳтимолан сабаби ин тасмими ногаҳонӣ, радиатсия ё партовҳои ҳастаӣ будааст.
Нерӯҳои Русия дар охири моҳи феврал дар рӯзҳои аввали ҳамлаи худ ба Украина ин нерӯгоҳро тасарруф карданд, вале кормандон ва масъулонии украинии нерӯгоҳи Чернобил дар ин муддат ба фаъолиятҳои худ идома доданд. Таркиши соли 1986 дар ин нерӯгоҳ, бузургтарин ҳодисаи ҳастаӣ дар ҷаҳон буд.
Ширкати давлатии "Энергоатом" гуфт, кормандони нерӯгоҳи Чернобил субҳи панҷшанбе хабар додаанд, ки нерӯҳои Русия ният доранд, ки аз он берун шаванд. Ин ширкат дар бахше аз баёнияи худ афзуд, "ин хабар таъйид шудааст, ки нерӯҳои ишғолгар, ки Чернобил ва дигар таъсисот дар ин минтақаи ҳифозатшударо тасарруф карда буданд, ба тарафи марзи Украина ва Белорус ҳаракат кардаанд".
Дар ин баёния гуфта мешавад, ки ҳанӯз шумораи каме аз нерӯҳои Русия дар ин нерӯгоҳ ҳастанд, ҳарчанд теъдоди онҳо маълум нест. Ин баёния меафзояд, ки нерӯҳои Русия аз як шаҳр дар наздикии ин нерӯгоҳ, ки кормандони Чернобил дар он зиндагӣ мекунанд, низ берун рафтаанд.
Ширкати давлатии "Энергоатом" дар баёнияи ҷудогонае гуфт, ки русҳо ба таври расмӣ бо пас додани умури муҳофизати Чернобил ба нерӯҳои украинӣ, мувофиқат кардаанд. Ҳамроҳ бо ин баёния, нусхае аз ин тавофуқ низ нашр шудааст, ки як масъули баландпояи нерӯгоҳ ва фармондеҳи нерӯҳои русӣ дар Чернобил ва шумораи дигаре онро имзо кардаанд.
Хабаргузориҳои байналмилалӣ ҳанӯз наметавонанд ба таври мустақил эътибори ин санадро таъйид кунанд. Вазорати дифои Русия низ то кунун ба ин хабар вокунише нишон надодааст.
Ширкати атомии давлатии Украина ҳамчун гуфт, маълумоти дақиқе дар даст дорад, ки нишон медиҳад, нерӯҳои Русия дар минтақае бо номи "Ҷангали сурх", ки олудатарин қисмати атрофи нерӯгоҳи Чернобил аст, сангар гирифтаанд.
Ин ширкат дар бахши дигаре аз баёнияи худ мегӯяд, "бинобар нигаронӣ аз радиатсияҳои ҳастаӣ, бахше аз сарбозони рус дар остонаи шӯриш ва саркашӣ буданд". Аз матни баёния чунин бардошт мешавад, ки гӯё сабаби хуруҷи ғайримунтазираи нерӯҳои Русия ҳамин масъала будааст.
Ҳукумати Украина аз оғози ҳамлаи Русия борҳо дар мавриди хатари сар задани садамаи ҳастаӣ дар Чернобил ҳушдор дода, хостори хуруҷи нерӯҳои Русия шуда буд.
Коркунони нерӯгоҳ чанд руз пеш ба хабаргузории "Рейтерз" гуфта буданд, ки сарбозони рус бидуни таваҷҷуҳ ба муқаррарот, бо мошинҳо вориди минтақаи "Ҷангали сурх" мешуданд ва ин боис шуд ғубори олуда ба маводи радиоактивӣ дар сатҳи минтақа паҳн шавад.
Мудири ширкати "Энергоатом" субҳи панҷшанбе аз Оҷонси байналмилалии атомӣ хост, аз раҳбарияти Созмони энержии атомии Русия замонат бигирад, ки дар фаъолиятҳои ҷории Чернобил ва Запороже -- як нерӯгоҳи дигари Украина, ки калонтарин нерӯгоҳи ҳастаии Аврупо дар тасарруфи Русия аст, дахолат нахоҳанд кард.
Зеленский дар посух ба тасмими Маскав: "Украиниҳо зудбовар нестанд"
Кишварҳои ғарбӣ нисбат ба эълони Маскав роҷеъ ба коҳиши фаъолиятҳои низомӣ дар Украина ибрози шакку тардид кардаанд. Владимир Зеленский, раисҷумҳури Украина, низ ҳушдор дод, ки “украиниҳо содалавҳ (зудбовар) нестанд”, зеро даргириҳо дар атрофи Мариупол ва нуқтаҳои дигар идома дорад.
Истихбороти низомии Бритониё рӯзи 30-юми март эълон кард, ки нерӯҳои русӣ, ки дар майдони ҷанг бо хисороти вазнин рӯбарӯ шуданд, маҷбур шудаанд, барои созмондиҳӣ ва омодагиҳои нав ба кишвари худ ва Беларус баргарданд.
Вазорати дифои Бритониё гуфт, “чунин фаъолиятҳо нишон медиҳад, ки Русия барои ташкил кардани воҳидҳои худ дар минтақаҳои пешрафткардааш дар дохили Украина мушкилот дорад".
Як рӯз пас аз он ки Маскав ва Киев дар аввалин гуфтугӯи рӯ дар рӯ дар беш аз ду ҳафтаи охир пешрафт карданд, ин вазорат гуфт, Русия эҳтимол ҳамлаҳои заминии худро идома диҳад.
Ҳайатҳои ду ҷониб рӯзи 29-уми март дар Истанбул гуфтугӯ карданд. Русия дар Украина бо муқовимати сахт рӯ ба рӯ шуд. Нерӯҳои украинӣ муваффақ шуданд, ки баъзе минтақаҳоро дар атрофи Киев аз нерӯҳои рус бозпас бигиранд.
Александр Фомин, муовини вазири дифои Русия, дар Маскав ба хабарнигорон гуфт, тасмим барои коҳиши шадиди фаъолиятҳои низомӣ дар наздикии Киев ва шаҳри Черниҳов дар шимоли Украина ба ҳадафи эътимодсозӣ рӯи даст гирифта шуд.
Артиши Украина айни ҳол аз "ҳадафи гумроҳкунанда"-и ин чархиши Русия ҳушдор дод. Қарор аст, Владимир Зеленский рӯзи 31-уми март тариқи маҷозӣ дар порлумони Австралия суханронӣ кунад.
Поёни мулоқоти рӯ ба рӯ. Вазъият дар як шаҳри Украинаро ба "қиёмат" баробар карданд
Раисҷумҳури Украина ҳамлаҳои Маскавро ба шаҳри муҳосирашудаи Мариупол "ҷиноят алайҳи башарият" номид. Изҳороти Владимир Зеленский пас аз он садо дод, ки музокироти рӯ ба рӯи ҳайатҳои давлатии Украинаву Русия дар Истанбули Туркия поён ёфт.
Зеленский рӯзи 29-уми март дар паёме ба порлумони Дания гуфт, "чизе, ки нерӯҳои Русия ба Мариупол раво мебинанд, ҷиноят алайҳи одамият аст ва он дар пеши чашми мардуми сайёра рӯй медиҳад."
Мариупол аз моҳи феврали имсол зери тирборони нерӯҳои Русия аст. Вазъ дар ин шаҳри Украинаро, ки қабл аз ҷанг зиёда аз 400 ҳазор аҳолӣ дошт, ба "қиёмат" баробар донистаанд.
Вадим Бойченко, шаҳрдори Мариупол, гуфт, шаҳр дар остонаи фалокати башарӣ аст ва бояд пурра холӣ карда шавад. Ба қавли ӯ, тақрибан 160 ҳазор ғайринизомӣ дар шаҳр бе барқ монда, аз оғози ҳамлаи Русия ҳудуди 5 ҳазор нафар ҷони худро аз даст додаанд. Тасдиқи мустақилонаи омор ғайриимкон аст.
Вазорати дифои Украина рӯзи 29-уми март бо пахши изҳороте гуфт, нерӯҳои Русия бо тирборони шадиду пайваста ҳамлаи худро ба Мариупол идома доданд. "Бо вуҷуди ин, маркази шаҳр дар зери назорати Украина мемонад," – гуфта шудааст дар баёния.
Ирина Верешчук, муовини сарвазири Украина, гуфт, Русия ба кушодани се гузаргоҳи амн, аз ҷумла як долони башардӯстона дар Мариупол, розӣ шудааст, аммо маълум нест, ки чанд кас метавонанд аз онҷо берун шаванд.
Мулоқоте, ки чаҳор соат идома кард
Сафорати Украина дар Туркия рӯзи 29-уми март гуфт, музокироти рӯбарӯи ҳайатҳои Киеву Маскав дар Истанбул ҳудуди чаҳор соат идома кард. Ҳанӯз маълум нест, ки музокирот дар Туркия давом меёбад ё на.
Як мушовири президенти Украина гуфт, дар мулоқот таъмини оташбас ва кафолати амнияти Украина баррасӣ шудааст. Мавзуъҳое, ки асоси музокироти гузашта буд, вале ҷонибҳо ба натиҷае нарасиданд. Зеленский ҳам мегӯяд, Украина дар музокирот ба ҳифзи "соҳибихтиёрӣ ва тамомияти арзӣ" бартарӣ медиҳад.
Раҷаб Таййиб Эрдуғон, раисҷумҳури Туркия, дар суханроние пеш аз музокирот гуфт, пешрафти ҳайатҳо роҳро ба мулоқоти Зеленский ва президенти Русия Владимир Путин мекушояд. Эрдуғон хоҳони оташбаси фаврӣ шуд ва афзуд, "пешгирӣ аз ин фоҷеа дар ихтиёри ҳарду тараф аст."
Бо гузашти беш аз чаҳор ҳафта аз таҷовузи Русия ба хоки Украина, то кунун нерӯҳои Русия ба пешрафти назаррасе ноил нашуда ва ягон шаҳри бузурги Украинаро тасарруф накардаанд. Мақомоти истихбороти низомии Бритониё рӯзи 29-уми март гуфтанд, нерӯҳои Русия ҳамчунон ба Киев таҳдиди ҷиддӣ эҷод мекунанд, ҳарчанд украиниҳо дар шимолу ғарби пойтахт ба ҳамлаҳои ҷавобӣ идома медиҳанд.
Даъвоҳои ду тараф
Ситоди кулли артиши Украина рӯзи 29-уми март навишт, нерӯҳои Русия ҳамлаҳои мушакиро ба маҳалҳои истиқоматӣ дар саросари ин кишвар идома додаанд.
Президент Зеленский дар ҳамин рӯз гуфт, бар асари бархӯрди мушак ба бинои маъмурӣ дар шаҳри бандарии Николаев, дар ҷануби Украина, дастикам 7 нафар кушта ва 22 кас захмӣ шуданд. Мақомоти Украина ҳамчунин гуфтанд, нерӯҳои Русия рӯзи 28-уми март ба шаҳри Люботин дар шимолу шарқи вилояти Харков ҳамлаи мушакӣ анҷом доданд, ки чанд хонаро вайрон ва чанд касро захмӣ кард.
Вазири дифои Русия рӯзи 29-уми март дар Маскав бори дигар иддао кард, ки вазифаҳои асосии марҳилаи аввали "амалиёти низомии Русия" дар Украина анҷом шудааст. Ин ҳузури дувуми Сергей Шойгу дар телевизион пас аз ду ҳафтаи "гум шуданаш" дар маҳзари ом буд, ки суолҳоро дар бораи макони будубош ва вазъи саломатии ӯ ба бор овард.
Дар ҳамин ҳол, Кремл гуфт, Маскав ва Вашингтон дар ниҳоят бояд дар масъалаи амният гуфтугӯ кунанд, аммо ба қавли мақомоти Маскав, "таҳқирҳои шахсӣ”-и Ҷо Байден, раисҷумҳури Амрико, ба ҳамтои русаш Владимир Путин, ба равобити онҳо таъсир хоҳад гузошт.
Украина аз ҳамлаи Русия "565 миллиард доллар" зарар дидааст
Муовини нахуствазири Украина мегӯяд, ҳамлаи низомии Русия ба ин кишвар то кунун 565 миллиард доллар зиён расондааст.
Юлия Свириденко рӯзи 28-уми март дар паёме дар Фейсбук навишт,
- "112 миллирд доллар аз ин зиён марбут ба тавлиди нохолиси дохилии кишвар;
- 119 миллиард доллар ба зербиноҳо, аз ҷумла, ҳашт ҳазор километр роҳи оҳан, истгоҳҳои роҳи оҳан ва фурудгоҳҳо;
- беш аз 90 миллиард доллар зиён ба биноҳои истиқоматӣ, мошинҳо ва манбаъҳои хӯрокворӣ;
- 80 миллиард доллар хисорот ба ширкатҳо ва созмонҳо;
- 54 миллиард доллар зиён ба сармоягузориҳои мустақим ва ниҳоятан
- 47 миллиард доллар ба манбаъҳои буҷети кишвар будааст".
Ӯ изҳор дошт, мутаассифона, ҳар рӯз ҳаҷми зарарҳо афзоиш меёбад ва ба ҳамин сабаб, бо вуҷуди ҳама монеаҳо, Украина дар садади гирифтани ҷуброн аз Русия, ҳам аз роҳҳои ҳуқуқӣ ва ҳам манбаъҳои масдудшудаи ин кишвар аст.
Муовини нахуствазири Украина дар идома гуфт, "Русия пайомадҳои аъмоли ҷинояткоронаи худро дар Украина хоҳад дид".
Русия дар беш аз як моҳи ҳамлаи низомии худ, баъзе шаҳрҳои калони Украина, аз ҷумла, Мариупол ва Харковро сахт бомбаборон кард ва зербиноҳои ин кишварро то ҳадди нобудии комил расонд.
То кунун наздик ба 300 миллиард доллар аз захираҳои пулии Русия дар хориҷ масдуд шудааст. Кишварҳои ғарбӣ ҳамчунин дар садади кашф ва мусодираи дороиҳои олигархҳои руси наздик ба ҳукумати Русия ҳастанд.
Русия рӯзи 24-уми феврали имсол ба Украина ҳамла кард. Русия ин ҳамлаи худро "амалиёти вижаи низомӣ" мехонад, аммо Киевро онро "таҷовуз" ба тамомияти арзии худ медонад.
Дар ин ҷанг то кунун аз ҳар ду ҷониб садҳо нафар кушта шудаанд. Украина мегӯяд, дар миёни қурбониён даҳҳо зан, кӯдак ва пиронсолон ҳастанд. Музокироти ҷонибҳо барои қатъи ҷанг ҳанӯз бенатиҷа будааст.
"Падарамро дар пеши чашмам парронданд" ВИДЕО
Як навраси украинӣ, ки шоҳиди қатли бераҳмонаи падараш шудааст, ҳодисаро ба ёд оварда, мегӯяд, "ӯ барои харидани дору ба берун баромада буд ва аз сӯйи як сарбози рус кушта шуд". Дар ин ҳодиса наздик буд, худи Юра ҳам кушта шавад. Ҳоло ӯ бо хонаводааш аз шаҳраки ҷангзадаи Буча, канори Киев, дар як минтақаи дигари Украина паноҳ ёфтаанд.
Он рӯз чӣ рӯй дод?
Юра ҳоло кӯшиш дорад, бештар дар фикри таҳсили онлайнӣ бошад. Ҳарчанд баъди он чизе, ки аз сараш гузашт, барояш осон нест. То замони ҷанг Юра бо волидон дар Буча зиндагӣ мекард. Шаҳре, ки шоҳиди ҷангҳои шадид шуд.
"Ман он рӯз аз ӯ пурсидам, ба куҷо меравӣ?" Гуфт: "Дору даркор. Рафта, чанд чизе аз кумаки башардустона гирифта меоям." Гуфтам: "Мумкин аст, ман ҳам равам?" Гуфт: "Чаро не?" – нақл кард наврас.
Аммо дар роҳ падару писарро фалокате интизор буд. Онҳоро дар посгоҳе сарбозони рус манъ карданд: "Падарам ба онҳо гуфт, мо барои гирифтани ёрии башардӯстона меравем. Сарбоз чизе нагуфт. Мо дастонамонро ба боло бардоштем. Падарам гуфт, мо силоҳ ва ягон чизи хатарноке надорем. Падарам бо дастони боло бардошташудааш ба тарафи ман гашт ва ӯ ба дили падарам ду тир зад. Падарам фарёд кашид ва афтод."
Ба нақли Юра, сарбози рус ба ин иктифо накарда, баъдан ба дасти ин наврас ҳам паррондааст. Ин ҳам охири кор набуд: "Боз садои як тирро шунидам. Ин бор тир ба сари ман равона шуда буд. Вале кӯлоҳ доштам ва вақте ба замин меафтодам байни кӯлоҳу сарам як фазои холӣ монд ва тир ба кӯлоҳ бархӯрд. Боз як тири дигар ба падарам зад."
Баъд аз тири охирин, Юра дигар ба мурдани падараш шубҳа надошт. Интизор шуд, то сарбози рус дуртар равад ва сипас ба хона гурезад.
Ӯро куштанд ё захмӣ карданд?
Алла, модари Юра, ки тамоми ин лаҳзаҳо дар хона буд, мегӯяд, фиғони писарашро аз берун шунида, сахт тарсид. "Аз паси девори бетонӣ садои писарамро шунидам, ки мегуфт, модар, зуд дарро кушо. Ман гуфтам "падарат дар куҷо аст?" Вай гуфт, "ӯро куштанд". Ман гуфтам, "Юра, ту бовар дорӣ, ки падарат кушта шуд? Шояд ӯ захмӣ шуда бошад, ман рафта бинам?" Вай гуфт, "ба он ҷо нарав! Онҳо туро ҳам мекушанд."
Ин хонавода ҳанӯз то оғози ҷанг дар фикри фирор аз маҳалли зисташон буданд. Наздиконашон рафтанду онҳо барои гурехтан фурсат наёфтанд. Андрей, бародари марде, ки кушта шудааст, гуфт, ӯ бо оилааш дар рӯзи аввали ҷанг аз шаҳр берун шуданд ва талош дошт, бародарашро ҳам бо оилааш берун барад.
"Он рӯз Алла телефонӣ гуфт, ки "Андрей, онҳо Русланро куштанд." Ман шок шудам. Ман ҳар рӯзи Худо ба ӯ мегуфтам, ки эҳтиёт кун. Берун нарав, дар таҳхона панаҳ бар. Ман бояд онҳоро берун меовардам."
Баъди кушта шудани шавҳараш, Алла намехост, то замони ба хок супоридани ҷасади ӯ манзилашро тарк кунад. Ҷасади шавҳарашро ҳам ӯ аз посгоҳи русҳо бо ароба оварду ба хок супурд.
"Қаблан ман бо духтури оилавиамон суҳбат кардам. Вай гуфт: "Дар чунин ҳолатҳо шиноснома ва ҳуҷҷатҳои дигари ӯро дар болои ҷасад гузошта, навор ва чанд акс бигиред, то далел дошта бошед. Мо ӯро дар як қолин печонда, зери хок кардем," – нақл кард зан.
Баъд аз ин, Алла ва се фарзандаш маҳалли зисташонро тарк карданд. Ба монанди ҳазорҳо сокини дигари Буча ва умуман Украина, ки дар гирдоби ҷанг аст.
