Бозӣ шаби якуми феврал дар шаҳри Риёзи Арабистони Саудӣ гузашт. Размикори тоҷик дар ҳарсе раунд бартарӣ дошт ва бо қарори якдилонаи доварон пирӯз шуд (30-27, 30-27, 30-27).
Наимови 30-сола аз соли 2018 дар муҳорибаҳои омехта 12 ғалаба ва 3 бохт дорад, аз он ҷумла дар UFC аз панҷ рақобат дар чаҳортоаш ғолиб омада, яктоашро бохтааст. Ӯ пеш аз рақобати панҷум дар UFC 22-юми июни соли 2024 аз Фелипе Лимаи бразилӣ мағлуб шуда буд.
Каан Офлии 31-сола дар муҳорибаҳои ММА аз соли 2014 ҳамагӣ 16 қувваозмоӣ карда, дар 11-тоаш ғолиб омадаву дар чаҳортоаш шикаст хӯрдааст. Як рақобатро мусовӣ анҷом додааст. Дар UFC Офли дуюмин рақобаташро баргузор кард. Вай моҳи августи соли гузашта дар UFC ESPN 62 аз Майрон Сантоси бразилӣ дар раунди дуюм бо нокаут шикаст хӯрда буд.
Дар умум чаҳор размикор аз Тоҷикистон ба UFC дохиланд.
Нурулло Алиеви 25-сола, размикори тоҷик дар муҳорибаҳои омехта (ММА), дар мусобиқоти UFC Fight Night 249, ки шаби 12-уми январи имсол дар шаҳри Лас-Вегаси Иёлоти Муттаҳидаи Амрико баргузор шуд, дар вазни сабук Ҷо Солекии амрикоиро мағлуб кард. Аз рӯи натиҷаҳои се раунд бо қарори якдилонаи доварон размикори тоҷик пирӯз дониста шуд (30-27, 30-27, 29-28).
Нурулло Алиев аввалин варзишгар аз Тоҷикистон аст, ки ба созмони UFC (Ultimate Fighting Championship - Қаҳрамонии мутлақи якҳарба) дохил шуд ва то ҳоло шикастнопазир мебошад. Ӯ дар ҳамаи даҳ қувваозмоӣ, аз он ҷумла дутоаш дар UFC, дастболо шудааст.
Муин Ғафуров, размикори 28-солаи тоҷик дар муҳорибаҳои омехта (ММА), дар мусобиқоти UFC 311 шаби 19-уми январ дар шаҳраки Инглвуд, ки дар наздикии Лос-Анҷелеси Иёлати Калифорнияи Амрико мебошад, дар вазни сабуктарин Риня Накамураи ҷопониро шикаст дод.
Рақобат ҳамаи се раунд идома кард ва размикори тоҷик бо қарори якдилонаи доварон пирӯз шуд (30-27, 30-27, 30-27). Ҳамин тариқ, Муин Ғафуров дар ММА ҳамагӣ 26 қувваозмоӣ анҷом дода, дар 20-тоаш пирӯз шуда, дар шаштоаш шикаст хӯрдааст, аз он ҷумла дар UFC аз чаҳор рақобат дар дутоаш ғолиб омада, дутоашро бохтааст.
Аммо Лоиқ Раҷабов, варзишгари тоҷик, дар муҳорибаи UFC Vegas 94 шаби 20-уми июли соли гузашта дар шаҳри Лас-Вегаси Иёлоти Муттаҳидаи Амрико дар вазни сабук (70 кг) аз Трей Огдени амрикоӣ шикаст хӯрд. Мубориза ҳар се раунд давом кард ва бо қарори якдилонаи доварон бо пирӯзии размикори амрикоӣ анҷом ёфт.
Размикори 33-солаи тоҷик дар чаҳор муҳорибааш дар UFC бори дувум ноком шуд. Моҳи июни соли 2023 ӯ дар мусобиқаи UFC on ABC 5 дар Ҷексонвилл (ИМА) аз размикори Лаҳистон (Полша) Матеуш Ребетски дар раунди дувум бо нокаути фаннӣ ё техникӣ шикаст хӯрда буд.
Лоиқ Раҷабов дар муҳорибаҳои омехта (ММА) аз соли 2012 ширкат мекунад, аз 25 рақобат дар 18-тоаш пирӯз шуда, шаштоашро бохтааст ва яктоашро мусовӣ кардааст. Аз ҷумла, дар UFC вай дар ду рақобати худ дастболо шуда, дар дутоаш шикаст хӯрдааст.
