Рақобат ҳамаи се раунд идома кард ва размикори тоҷик бо қарори якдилонаи доварон пирӯз шуд (30-27, 30-27, 30-27). Ҳамин тариқ, Муин Ғафуров ғалабаи 20-уми худро дар муҳорибаҳои омехта ба даст овард. Барои Риня Накамура бошад, ин аввалин бохт дар корномааш ба шумор меравад.
Муин Ғафурови 28-сола дар ММА ҳамагӣ 26 қувваозмоӣ анҷом дода, дар 20-тоаш пирӯз шуда, дар 6-тоаш шикаст хӯрдааст, аз он ҷумла дар UFC (Ultimate Fighting Championship) аз чаҳор рақобат дар дутоаш ғолиб омада, дутоашро бохтааст. Вазнаш 61 килограмм ва қадаш 1 метру 70 сантиметр мебошад.
Риня Накамураи 29-сола бошад, дар муҳорибаҳои ММА ҳамагӣ 10 қувваозмоӣ карда, дар яктоаш шикаст хӯрдааст, аз он ҷумла дар UFC ду пирӯзӣ ва як бохт дорад. Қадаш 1метру 70 сантиметр, вазнаш 61 килограмм аст.
Ёдовар мешавем, Муин Ғафуров 7-уми сентябри соли 2021 дар финали силсилаи номзадҳои Дана Уайт бо Чад Анҷелигери канадагӣ рӯбарӯ шуда буд. Дар сурати пирӯзӣ размикори тоҷик метавонист дар таърих ҳамчун нахустин варзишгар аз Тоҷикистон бо UFC шартнома бандад, вале ӯ дар набарди ниҳоӣ бо тасмими тақсимшудаи доварон шикаст хӯрд.
Муин Ғафуров танҳо баъди қариб ду сол вориди UFC шуд. Вай моҳи июни соли 2023 дар аввалин рақобаташ дар ин ташкилот аз Ҷон Кастанеда (ИМА) бо қарори якдилонаи доварон шикаст хӯрд. Дар моҳи октябри ҳамон сол Ғафуров бори дигар дар UFC ба нокомӣ дучор гашт. Муин аз Саид Нурмагомедови русиягӣ мағлуб шуд.
Размикори тоҷик моҳи июни соли 2024 аввалин ғалабаи худро дар UFC ба даст овард. Ӯ Куюнг Ҳо Канги кореягиро шикаст дод. Ҳамин тариқ, Муин Ғафуров чаҳорумин размикор аз Тоҷикистон аст, ки ба UFC дохил шудааст.
Бояд зикр намуд, Муин Ғафуров соли 2013 дар мусобиқоти қаҳрамонии ҷаҳон дар риштаи самбои размӣ дар Маскави Русия дар рақобатҳо дар вазни то 62 кило бар ҳамаи рақибонаш пирӯз шуда, ба финал роҳ ёфта буд. Вай дар қувваозмоии ниҳоӣ бар Абзал Абилдашев аз Қазоқистон ғолиб омада, бо медали тилло мукофотонида шуд.
Ёдовар мешавем, Нурулло Алиев, размикори тоҷик дар муҳорибаҳои омехта (ММА), дар мусобиқоти UFC Fight Night 249, ки шаби 12-уми январ дар шаҳри Лас-Вегаси Иёлоти Муттаҳидаи Амрико баргузор шуд, дар вазни сабук Ҷо Солекии амрикоиро мағлуб кард. Аз рӯи натиҷаҳои се раунд бо қарори якдилонаи доварон размикори 25-солаи тоҷик Нурулло Алиев пирӯз дониста шуд (30-27, 30-27, 29-28).
Нурулло Алиев аввалин варзишгар аз Тоҷикистон аст, ки ба созмони UFC (Ultimate Fighting Championship - Қаҳрамонии мутлақи якҳарба) дохил шуд ва то ҳоло шикастнопазир мебошад. Ӯ дар ҳамаи даҳ қувваозмоӣ, аз он ҷумла дутоаш дар UFC, дастболо шудааст. Қадаш 1,78 метр, вазнаш сабук (70 кг) аст.
Боз як размикори тоҷик - Муҳаммад Наимов (UFC 3-1, 11-3) - ба наздикӣ рақобати худро баргузор менамояд. Вай 1-уми феврал дар мусобиқоти UFC Fight Night 250 дар шаҳри Риёзи Арабистони Саудӣ бо намояндаи Австралия Каан Офли (UFC 0-1, 13-3-1) қувваозмоӣ мекунад.
Гуфтугӯ