Тибқи тартиб (формат)-и баргузории худ мусобиқа аз марҳилаҳои интихобӣ, гурӯҳӣ ва ниҳоӣ иборат аст. Дар маҷмуъ, дар ин мусобиқа 10 даста иштирок мекунад.
6 дастаи ғолиби мусобиқоти қаҳрамонии Афғонистон, Қирғизистон, Тоҷикистон, Туркманистон, Узбекистон ва Эрон соҳиби роҳхати мустақим ба марҳилаи гурӯҳӣ мешаванд.
Барандагони Ҷоми миллии Афғонистон, Қирғизистон, Тоҷикистон ва Туркманистон дар марҳилаи интихобӣ барои ду роҳхати дигар ба марҳилаи гурӯҳӣ талош мекунанд. Ҳар як даста дар гурӯҳ се бозӣ анҷом медиҳад.
Ғолибони гурӯҳҳо ва дастаҳои ҷойҳои дуюм ба марҳилаи ниҳоӣ роҳхат мегиранд. Дар бозӣ барои ҷойи сеюм дастаи дуюми гурӯҳи "В" бо дастаи дуюми гурӯҳи "А" рақобат мекунад. Дар финал ғолиби гурӯҳи "А" бо пешсафи гурӯҳи "В" барои унвони қаҳрамонӣ мубориза мебарад.
Бозиҳои марҳилаи интихобӣ охири моҳи март ва марҳилаи ниҳоӣ аз 26-уми апрел то 6-уми майи имсол барпо мешаванд. Макони баргузории бозиҳои марҳилаи ниҳоӣ дертар эълон мегардад. Бо эҳтимоли зиёд аз Эрону Узбекистон ба ҷойи қаҳрамонҳои ин кишварҳо дастаҳои дигар ширкат меварзанд.
Аз Тоҷикистон дар ин мусобиқа дастаи "Истиқлол"-и Душанбе ҳамчун қаҳрамони кишвар аз даври гӯруҳӣ ва тими "Регар-ТадАЗ"-и шаҳри Турсунзода ҳамчун барандаи Ҷоми миллӣ аз даври интихобӣ иштирок мекунанд.
