Ҳамла ба ин шаҳр, ки зодгоҳи Владимир Зеленский, раисҷумҳури Украина аст, ҳудуди соати ҳафти шоми ҷумъа (4 апрел) ба вақти маҳаллӣ, рӯй дод.
Сергей Лусак, раиси вилояти Днепропетровск, ин ҳамларо яке аз хунинтарин ҳамлаҳо алайҳи ғайринизомиён дар соли ҷорӣ хонд ва субҳи 5 апрел гуфт, ки амалиёти наҷот ҳанӯз идома дорад.
Ба гуфтаи Игор Клименко, вазири корҳои дохилии Украина, бар асари ин ҳамлаи мушакӣ беш аз 50 нафар ҳам захмӣ шудаанд ва "ин рақам дар ҳоли афзоиш аст".
Ҳамчунин ба гуфтаи Сергей Лусак, дар ин ҳамлаи мушакӣ беш аз 20 баландошёна, беш аз 30 мошин ва чандин мактаб ва тарабхона, осеб диданд.
Владимир Зеленский бархе аксҳо аз ин ҳамларо дар шабакаҳои иҷтимоӣ нашр кардааст, ки яке аз онҳо ҷасади як мардро дар канори як замин бозии кӯдакон, нишон медиҳад.
Раисҷумуҳри Украина дар паёми видеоии шабонаи худ гуфт, "ҳама ваъдаҳои Русия ба мушак, паҳбод, бомба ва тӯп хатм мешавад, дипломатия барои онҳо маъное надорад".
Дар ҳамин ҳол, Вазорати дифои Русия эълон кард, ки нишасти мақомоти низомии Украина дар ин шаҳрро ҳадафи "ҳамлаи ниҳоят дақиқ" қарор додааст ва ин нишаст "ҷаласаи фармондеҳони низомӣ ва мураббиёни ғарбӣ" дар як тарабхонаи шаҳрӣ будааст.
Ин вазорат ҳамчунин гуфт, ки дар ин ҳамла "талафоти душман дар умум беш аз 85 нафар, шомили низомиёни украинӣ ва афсарони кишварҳои хориҷӣ, ва ҳамчунин то 20 мошин будааст".
Ин иддао ба таври мустақил тасдиқ нашудааст.
Владимир Зеленский дар паёми видеӣ ҳамчунин ба ҳамлаи мушакии шаби пештари Русия ба шаҳри Харков ишора кард ва гуфт, дар он ҳамла, ки тавассути шаш паҳбоди "Шоҳид" анҷом гирифт, панҷ нафар кушта ва 34 нафар захмӣ шуданд.
Ӯ ҳамчуни гуфт, ки Русия бо як паҳбоди ба пойгоҳҳои энержӣ ва нерӯгоҳи ҳароратӣ дар Херсон ҳамла кардааст.
Моҳи гузашти Украина ва Русия дар нишастҳои алоҳида бо мақомҳои амрикоӣ ба созиш расиданд, ки ба пойгоҳҳои энержии якдигар ҳамла накунанд.
Доналд Трамп, раисҷумҳури Амрико аз оғози фаъолияти худ дар 20 январи имсол, поён додан ба ҷанг дар Украинаро аз авлавиятҳои сиёсати хориҷии худ қарор дод ва чанд рӯз пеш низ ҳушдор дода буд, ки агар Путин дар расидан ба сулҳ монеа эҷод кунад, нафти Русияро таҳрим хоҳад кард.
ҲАМЛАҲО БА ХАРКОВ ВА ДИГАР МИНТАҚАҲО
Русия бо даҳҳо ҳавопаймои бесарнишин ба шаҳри Харков, дар шимолу шарқи Украина, зарба задааст.
Мақомоти Украина гуфтанд, ки дар ҳамлаҳои шаби 3 ба 4-уми апрел панҷ кас кушта ва зиёда аз 30 тани дигар маҷрӯҳ шуданд.
Чанд бинои истиқоматӣ низ сӯхтаву вайрон гардидааст.
Додситонии кулли Украина гуфт, дар миёни кушташудагон се кӯдак ҳаст.
Игор Терехов, шаҳрдори Харков гуфт, ки Русия давоми 40 дақиқа дастикам 14 ҳамла ба ин шаҳр анҷом дод.
Ҳавопаймоҳои бесарнишини Русия дар шаҳри Днепри Украина низ се нафар ва дар вилояти Запорожйе як касро захмӣ кардаанд.
Дар ҳамин ҳол, шаҳрдори Маскав Сергей Собянин рӯзи 4-уми апрел гуфт, як ҳавопаймои бесарнишинро аз байн бурданд, ки ба самти пойтахти Русия меомад.
Хабаргузориҳои Русия аз қавли як намояндаи Оҷонси федеролии ҳамлу нақл хабар доданд, ки се фурудгоҳ муваққатан баста шудааст.
Дертар хабар расид, ки фурудгоҳи "Внуково" барои қабулу гусели ҳавопаймоҳо боз аст, аммо дар бораи аз сар гирифтани фаъолияти дуи дигар хабаре нест.
Гуфтугӯ