Муҳаммад Наимови 30-сола рақобати панҷумашро дар ташкилоти UFC (Ultimate Fighting Championship) доир менамояд. Вай сар аз соли 2018 дар муҳорибаҳои омехта 11 ғалаба ва 3 бохт дорад, аз он ҷумла дар UFC аз чаҳор рақобат дар сетоаш ғолиб омада, яктоашро бохтааст. Муҳаммад охирин рақобати худро дар UFC 22-юми июни соли 2024 анҷом дода, аз Фелипе Лимаи бразилӣ мағлуб шудааст.
Каан Офлии 31-сола бошад, дар муҳорибаҳои ММА шуруъ аз соли 2014 ҳамагӣ 15 қувваозмоӣ карда, дар 11-тоаш ғолиб омада, дар сетоаш шикаст хӯрдааст ва як рақобатро мусовӣ анҷом додааст. Дар UFC Офли дуюмин рақобаташро баргузор мекунад. Вай моҳи августи соли гузашта дар UFC ESPN 62 аз Майрон Сантоси бразилӣ дар раунди дуюм бо нокаут шикаст хӯрда буд.
Ба назари коршиносон, маҳорати Муҳаммад Наимов нисбат ба рақибаш баландтар аст, аз ин рӯ бисёриҳо ба пирӯзии ӯ бовар доранд.
Дар ҳамин ҳол чаҳор размикор аз Тоҷикистон ба UFC дохиланд. Ёдовар мешавем, Нурулло Алиеви 25-сола, размикори тоҷик дар муҳорибаҳои омехта (ММА), дар мусобиқоти UFC Fight Night 249, ки шаби 12-уми январи
имсол дар шаҳри Лас-Вегаси Иёлоти Муттаҳидаи Амрико баргузор шуд, дар вазни сабук Ҷо Солекии амрикоиро мағлуб кард. Аз рӯи натиҷаҳои се раунд бо қарори якдилонаи доварон размикори тоҷик пирӯз дониста шуд (30-27, 30-27, 29-28).
Нурулло Алиев аввалин варзишгар аз Тоҷикистон аст, ки ба созмони UFC (Ultimate Fighting Championship - Қаҳрамонии мутлақи якҳарба) дохил шуд ва то ҳоло шикастнопазир мебошад. Ӯ дар ҳамаи даҳ қувваозмоӣ, аз он ҷумла дутоаш дар UFC, дастболо шудааст.
Муин Ғафуров, размикори 28-солаи тоҷик дар муҳорибаҳои омехта (ММА), дар мусобиқоти UFC 311 шаби 19-уми январ дар шаҳраки Инглвуд, ки дар наздикии Лос-Анҷелеси Иёлати Калифорнияи Амрико мебошад, дар вазни сабуктарин Риня Накамураи ҷопониро шикаст дод.
Рақобат ҳамаи се раунд идома кард ва размикори тоҷик бо қарори якдилонаи доварон пирӯз шуд (30-27, 30-27, 30-27). Ҳамин тариқ, Муин Ғафуров дар ММА ҳамагӣ 26 қувваозмоӣ анҷом дода, дар 20-тоаш пирӯз шуда, дар шаштоаш шикаст хӯрдааст, аз он ҷумла дар UFC аз чаҳор рақобат дар дутоаш ғолиб омада, дутоашро бохтааст.
Гуфтугӯ