Дар ИМА ва кишварҳои Аврупо, ки зоҳиран ҳодисаҳои марги инсонҳо коҳиш ёфта суръати паҳншавии коронавирус поин омадааст, тадриҷан аз паи сабуктар кардани маҳдудиятҳо барои аз нав фаъол кардани иқтисод мешаванд. Вале мақомоти беҳдоштӣ ҳушдор медиҳанд, ки пурра аз байн бурдани маҳдудиятҳо хатарнок аст, чун хатари бозгашти дубораи вирус вуҷуд дорад. Ҳисобҳои пажӯҳишгоҳи Ҷон Ҳопкинс мегӯяд, ки то 14 апрел дар саросаи сайёра беш аз 1,9 миллион нафар ба коронавирус олуда шуда, наздики 120 ҳазор нафар ҷон додаанд. Президенти ИМА Доналд Трамп гуфт, ки рӯзи 14 апрел барои аз нав зинда кардани иқтисоди кишвар як гурӯҳи корӣ таъсис медиҳад. Дар давоми се ҳафтаи гузашта дар саросари ИМА 17 миллион нафар ҷои кори худро аз даст додаанд. Тиҷоратҳо баста шуда, маҳдудиятҳои сафар амал мекунад, дар кишвар меъёрҳои тиббӣ ҷорӣ шудааст ва ин тадбирҳо феълан имкон намедиҳад, ки фаъолиятҳои корӣ мисли пешин амал кунад.

Шоми 13 апрел шумори олудашудаҳо ба вирус 682 ҳазор нафар ва марги инсонҳо бар асари Ковид-19 беш аз 23 ҳазор нафарро ташкил дод. Маъмурияти Трамп гуфт, ки эҳтимолан баъди 1 май бархе маҳдудиятҳо сабуктар мешавад. Ӯ гуфт, ки чанд рӯз баъд дар бораи сабуктар кардани маҳдудиятҳои сафар бо Аврупо хабар медиҳад. Бо ин ки дар Аврупо суръати марги инсонҳо бар асари коронавирус коҳиш меёбад, ҳамоно ҳамарӯза садҳо нафари нав ба коронавирус гирифтор шуда ваё дар паи Ковид-19 ҷон медиҳанд.

Полиси Маскав, ки акнун ҳақи бидуни додгоҳ ихроҷ кардани шаҳрвандони хориҷиро дорад, қарори аз Русия берун кардани 1,4 ҳазор муҳоҷири кориро содир намуд. Сеяки онҳо ё 450 нафарашон аз оғози имсол бо гуноҳи муҳоҷирати ғайриқонунӣ аз кишвар ронда шудаанд.

Дар ин бора бо такя ба полиси шаҳри Маскав хабаргузории Интерфакс иттило дода навишт, ки ин шумори хориҷиҳои ғайриқонунӣ дар паи 7632 рейд дар маконҳои ҷамъиятиву тиҷоратӣ ва хобгоҳҳои Маскав ошкор шудаанд.

Полис гуфтааст, ки соли ҷорӣ дар шаҳри Маскав беш аз 240 нафар ошкор шуд, ки барои содир кардани ҷиноятҳои мухталиф дар ҷустуҷӯ буданд. Ба гузориши полис, дар соли ҷорӣ шаҳрвандии Русия дар нисбати 32 нафар қатъ карда шуд. Дар бист ҳолат сабаби бекор шудани шаҳрвандии ин нафарон ба содир кардани ҷиноятҳои махсусан сангини мисли куштор, одамрабоӣ ё таҷовуз ба номус рабт доштааст.

Дар идома полиси Маскав гуфтааст, ки дар соҳаи муҳоҷират соли ҷорӣ 58 ҳазор ҳолати вайрон шудани қонун ошкор шудааст.

Дар Русия баъди ҳамла ба толори консертии «Крокус сити ҳол» дар моҳи марти соли 2024, даҳҳо қонуни маҳдудкунандаи кору ҳузури муҳоҷирони корӣ қабул шуд. Инчунин, салоҳиятҳои полис дар ихроҷи муҳоҷирон бештар гардид.

Бархе ҳомиёни ҳуқуқ мегӯянд, ки дар асл дурустии ҳамаи иттиҳомҳои зидди муҳоҷирон содиршуда бояд санҷида шавад, чун полис ва дигар мақомоти Русия бо истифода аз мақоми худ метавонанд осон қарорҳои нодуруст содир ва ҳуқуқи муҳоҷиронро поймол кунанд.

Як мояи интиқод аз полиси Русия ин аст, ки бо шеваи бисёр бераҳмонау дағалона ва таҳқиромез ба макони зисту таҷаммӯи муҳоҷирон юриш карда, бебандубор ба санҷиши санадҳо мепардозад. Чунин шеваи бархӯрд бо муҳоҷирон, бахусус зодагони Тоҷикистон ва дигар кишварҳои Осиёи Марказӣ одат шудааст.

Дар Тоҷикистон беш 415 нафари синнашон аз 100-сола боло зиндагӣ мекардаанд. Дар ин бора рӯзи 6 октябр хабаргузории расмии Ховар бо такя ба Оҷонсии суғуртаи иҷтимоӣ ва нафақаи назди ҳукумати Тоҷикистон хабар додааст. Кӯҳансолтарин сокини Тоҷикистон Марзиямоҳ Ибодоваи 120-сола будааст, ки соли 1905 ба дунё омада дар ноҳияи Дарвоз ба сар мебарад. Баъди ӯ Гулракат Назароваи 117-сола, сокини Данғара мебошад, ки соли 1908 ба дунё омадааст. Ин маълумот то моҳи июли соли 2025-ро дар назар мегирад, навиштааст хабаргузорӣ.

Омори расмӣ мегӯяд, то аввали соли ҷорӣ дар саросари Тоҷикистон 306 шаҳрванди аз 100-сола боло ба қайд гирифта шудаанд, ки 169 нафари онҳо марду 137 нафарашон зан мебошанд. Тӯли ҳаёти сокинони Тоҷикистон ба ҳисоби миёна ба 76,6-солагӣ расидааст.

Дар идомаи хабар иддао мешавад, ки синни миёнаи зисти сокинони Тоҷикистон дар қиёс бо даҳсолаҳои гузашта афзудааст ва сабабаш ҳам “беҳбуди шароити зиндагӣ, таъминоти иҷтимоӣ ва хадамоти тиббӣ барои кӯҳансолон” гуфта шудааст.

Ин ҳам дар ҳолест, ки нафақахӯрҳои Тоҷикистон дар асл аз камии ҳаҷми нафақа интиқод мекунанд ва дар аксар хонаводаҳо даст ёфтани пиронсолон ба зиндагии таъмину шоиста бидуни ёрии фарзанду набераҳо имкон надорад.

Як интиқоди ахир аз бисёр нокофӣ будани нафақа аз забони коргардони маъруфи театр Барзу Абдураззоқов садо дод, ки рӯзи 25 август дар саҳифааш дар Фейсбук навишт, баъди 40 соли кор ба ӯ дар Тоҷикистон “Пули нафақа - 551 сомонӣ (тақрибан $59) дар як моҳ» ҳисоб кардаанд. Мақомот ба ин интиқоди ӯ ҳеҷ вокунише накарданд.

Мақомоти амрикоӣ мегӯянд, то 5 ҳазор шаҳрванди Куба аз тарафи Русия алайҳи Украина меҷанганд. Дипломатҳои ИМА бо расондани ин омор ба намояндагони кишварҳо дар Созмони милал талош карданд, ки онҳоро мутақоид кунанд то аз қатънома барои лағви таҳримҳо алайҳи Куба пуштибонӣ накунанд. Қарор аст овоздиҳӣ барои бекор кардани таҳримҳои молӣ алайҳи Куба 8-уми октябр дар Созмони Милал баргузор шавад.

Хабаргузории “Ройтерс” бо такя ба маълумоти Вазорати корҳои хориҷии Амрико навиштааст, ҳузури шаҳрвандони Куба дар ҷанги Русия алайҳи Украина далели асосии Вашингтон барои рад кардани қатънома аст.

“Баъди Кореяи Шимолӣ, Куба дуюмин кишваре аст, ки зархаридонро ба ҷанги Русия алайҳи Украина фиристодааст”, - омадааст дар санад.

Кореяи Шимолӣ, ки сарбозони худро расман ба тарафдории Русия фиристод ва онҳо дар вилояти Курск алайҳи неруҳои Украина ҷангиданд. Аммо ба гуфтаи мақомоти амрикоӣ, Куба пинҳонӣ зархаридонро ба Русия фиристод то муқобили Украина биҷанганд.

Пештар Андрей Юсов, роҳбари бахши истихборотии артиши Украина гуфта буд, эҳтимол то 20 ҳазор кубоӣ аз тарафи Русия меҷанганданд. Кушта шудани 39 шаҳрванди Куба дар ҷанг тасдиқ шудааст.

Раъйдиҳӣ барои бекор кардани таҳримҳо алайҳи Куба аз соли 1992 баргузор мешавад ва иҷро кардани он ҳатмӣ нест. Соли гузашта ба тарафдорӣ аз ин қатънома 187 кишвар овоз доданд ва танҳо Амрико ва Исроил ба он мухолифат карданд.

Дар Сурия аввалин интихоботи порлумонӣ баъди сарнагун шудани ҳукумати Башор Асад баргузор шуд.

Овоздиҳии кумитаҳои маҳаллӣ барои интихоботи аъзои порлумони интиқолии Сурия рӯзи 5-уми октябр анҷом шуд. Вале мунтақидон аз ин раванд танқид карданд, чун ба гуфтаи онҳо интихобот бидуни риояи усулҳои демократӣ анҷом шудааст.

Аъзои кумитаҳои маҳаллӣ дар китобхонаи миллии Сурия овоз доданд. Комиссияи интихобот гуфт, "овоздиҳӣ тамом шуда, баргаҳои раъйро ҳисоб доранд". Қарор аст натиҷаҳои интихобот 6-уми октябр эълон шавад.

Тибқи эълони комиссияи интихобот, беш аз 1500 номзад дар рақобат ҳузур доранд, ки танҳо 14 дарсади онҳо занон ҳастанд. Давраи кори порлумони нави Сурия 35 моҳ муқаррар шудааст ва ин ин муҳлат метавонад тамдид шавад.

Интизор меравад, ки ташкили порлумони нав қудрати Аҳмад Шаръ, раиси ҷумҳури мувақатро мустаҳкам кунад. Неруҳои ҷиҳодии таҳти роҳбарии ӯ моҳи декабри соли гузашта эътилоферо роҳбарӣ карданд, ки ҳукумати Башор Асадро сарнагун карданд.

Аҳмад Шаръ аз 210 узви порлумон 75 намояндаро шахсан таъйин мекунад. Боқимондаи вакилон аз сӯи кумитаҳои маҳаллӣ интихоб мешаванд. Узви ин кумитаҳои низ аз сӯи комиссияи интихобот таъйин шудаанд.

Дар Навори Ғазза оташбас ҷорӣ нашудааст, аммо низомиёни Исроил зарбаҳои ҳавоиро муваққатан қатъ карданд. Дар ин бора як намояндаи ҳукумати Исроил рӯзи 5-уми октябр хабар дод. Ба гуфтаи ин нафар, неруҳои исроилӣ бо ҳадафҳои дифоӣ метавонанд ҳамчунон аз силоҳ истифода баранд.

Баъди эълони омодагии гуруҳи "Ҳамос" барои озодии ҳама гаравгонҳои исроилӣ ва баррасии тарҳи пешниҳодии Доналд Трамп, раиси ҷумҳури Амрико хостори қатъи ҳамла ба Ғазза шуд.

Марко Рубио, котиби давлатии Амрико 5-уми октябр дар суҳбат бо шабакаи CBS гуфт, барои озодии гаравгонҳо зарур аст, ки бомборони Навори Ғазза қатъ шавад. Рубио гуфт, музокирот барои озодии гаравгонҳо идома дорад.

Расонаҳои исроилӣ гузориш доданд, ки ҳайати ин кишвар 5-уми октябр барои музокирот ба Миср рафтааст.

Миср рӯзи 6-уми октябр мизбони музокирот миёни Исроил ва гуруҳи “Ҳамос” хоҳад буд. Дар ин гуфтугӯҳо намояндагони баландмақоми амрикоӣ низ ширкат хоҳанд кард. Дар ҳамин ҳол даҳҳо ҳазор исроилӣ бо ширкат дар таҷаммуъи ҳомиёни хонаводаҳои гаравгонҳо хостори амалӣ шудани тарҳи сулҳи Доналд Трамп шуданд.

Вазорати хориҷаи Миср дар баёнияе навишт, дар ин музокирот “шарту шароити табодули гаравгонҳои исроилӣ ва зиндониёни фаластинӣ мутобиқ бо пешниҳоди раиси ҷумҳур Трамп” баррасӣ мешавад.

Як узви ҳукумати Тоҷикистон пайомадҳои тағйирёбии иқлимро ба иқтисоди кишвар нигаронкунанда хондааст.

Далер Ҷумъа, вазири энергетика ва захираҳои об 3-юми октябр зимни ҳамоише дар шаҳри Остона гуфтааст, "хавфи афзояндаи тағйирёбии иқлим ва таъсири он ба иқтисодиёти Тоҷикистон нигаронкунанда аст".

Ба гуфтаи вазир, саҳми Тоҷикистон дар партоби газҳои гулхонаӣ хеле ночиз аст, аммо кишвар "ба панҷгонаи давлатҳои бештар осебпазир аз оқибатҳои тағйирёбии иқлим дохил мегардад".

Як нигаронии асосии Далер Ҷумъа ин будааст, ки пиряхҳои Тоҷикистон "бо суръати шадид об мешаванд". Тибқи омори вазири энергетика, дар асри 20 тақрибан 30 дарсади пиряхҳои Тоҷикистон об шудаанд.

Мақомоти Тоҷикистон солҳои ахир аз гармшавии ҳаво ва обшавии босуръати пиряхҳо нигаронӣ мекунанд.

Пиряхҳои Тоҷикистон манбаи асосии оби тоза дар Осиёи Марказӣ гуфта мешавад. Вале бо вуҷуди ин аксари сокинон дар дохили Тоҷикистон бо оби тоза таъмин нестанд.

Артиши Русия шаби 4 ба 5-уми октябр ба чанд минтақаи Русия ҳамла кардааст.

Ба гуфтаи волии вилояти Запороже, дар пайи ҳамлаи неруҳои рус ба ин минтақа як нафар ба ҳалокат расида, даҳҳо нафар захм бардоштанд. Ба гуфтаи манбаъ, чанд бино осеб дида, як мошин сӯхтааст. Ҳамчунин зиёда аз 73 ҳазор кас бе нерӯи барқ мондаанд.

Мақомоти вилояти Лвов гуфтанд, шаби 5-уми октябр дар ҳамлаи неруҳои Русия ба ин минтақа ду нафар ба ҳалокат расида, ду каси дигар захмӣ шуданд.

Хадамоти ҳолатҳои фавқулодаи Украина аз ҳалокати чор нафар хабар додааст.

Андрей Садовий, волии Лвов гуфтааст, як қисмати маркази вилоят бебарқ мондааст.

Дар пайи интихоботи мақомоти маҳаллӣ дар Гурҷистон, муътаризон талош карданд қасри президентро дар шаҳри Тифлис ғасб кунанд. Ба гузориши сомонаи "Эхо Кавказ", ба гуруҳе аз эътирозгарон муяссар шуд, ки вориди ҳавлии қасри президент шаванд.

Неруҳои вижаи пулис барои дифоъ аз қасри президент ва пароканда кардани эътирозгарон аз гази ашковар ва мошини обпош истифода карданд. Гузориш шудааст, ки пулис барои юриш ё ҳамлаи аввали эътирозгарон омода набуд ва неруҳои иловагӣ талаб кард. Ба гузориши расонаҳо, 16 афсари пулис ҷароҳат бардоштаанд.

Саломе Зурабишвилӣ, раиси ҷумҳури пешини Гурҷистон, ки дар сафи мухолифин аст, талоши тасарруфи қасри президентро иғво номид.

Рӯзи 4-уми октябр дар Гурҷистон интихоботи мақомоти маҳаллӣ баргузор шуд. Аҳзоби мухолиф, аз ҷумла ҳизби президенти собиқ Михаил Саакашвили овоздиҳиро бойкот карданд. Баъзе ҳизбҳои сиёсӣ аз баргузории тазоҳуроти осоишта дар маркази Тифлис хабар доданд.

Паат Бурчуладзе, овозхони опера ва аз созмондиҳандагони намоиши эътирозӣ ҳукуматро ғайриқонунӣ хонд ва аз интиқоли ҳокимият "ба дасти мардум" хабар дод.

Дар Қирғизистон барои баргардондани ҳукми қатл ба Кодекси ҷиноӣ раъйпурсӣ баргузор мешавад. Дар ин бора президент Содир Ҷабборов дар мусоҳиба бо сомонаи давлатии "Кабар" хабар додааст.

Ҳафтаи гузашта Ҷабборов дастур дода буд, ки тарҳи ислоҳи қонун дар бораи баргардонидани ҳукми қатл таҳия шавад. Ба гуфтаи сухангӯи президенти Қирғизистон, гап асосан сари онҳое меравад, ки ба ҷинояти озори ҷинсии кӯдакон ва ё куштори занон даст мезананд.

Ин тасмими раисҷумҳури Қирғизистон дар пасманзари қатли як духтари 17-сола гирифта шуд. Ҳодиса дар вилояти Иссикул рух дода, дар ин кишвар сару садои зиёде ба по кардааст.

Айсуулу рӯзи 27-уми сентябр нопадид шуд ва пас аз чанд рӯз ҷасади ӯро аз дараи Бум пайдо карданд. Бо гумони куштори ӯ як сокини 41-солаи Бишкек боздошт шудааст.

Бархеҳо кормандони милисаро ба иҷро накардани вазифаашон муттаҳам карданд. Содир Ҷабборов гуфт, ки таҳқиқи ҳодисаро шахсан назорат мекунад.

Қирғизистон соли 2007 ҳукми эъдомро манъ кард. Пешниҳодҳо дар бораи дубора баргардонидани он дар ин кишвар чанд сол боз садо медиҳанд. Бори ахир соли 1998 ҳукми қатл дар Қирғизистон иҷро шуда буд.

Ҳизби ҳокими Ҷопон бо интихоби Санаэ Такаити ба унвони раҳбари худ, ӯро дар масир қарор гирифтан дар ҷойгоҳи нахустин сарвазири зан дар ин кишвар қарор дод.

Ҳизби либерал демократи Ҷопон, ки тақрибан пас аз поёни Ҷанги Дувуми Ҷаҳонӣ Ҷопонро идора кардааст, Санаэ Такаитии 64-соларо бо ҳадафи бозгардондани боварии умумӣ мардум, ки аз боло рафтани нархҳо хашмгинанд, рӯзи 4 октябр раҳбари худ интихоб карданд.

Сарнавишти ниҳоии мақоми сарвазирии Ҷопон дар раъйгирӣ дар порлумон рӯзи 15 октябр, маълум хоҳад шуд.

Раҳбари ҳизби ҳокими кунунии Ҷопон танҳо дар сурате мумкин аст ба нахуствазирӣ нарасад, ки ҳизбҳои мухолиф муттаҳид шаванд ва бар рӯи як номзади дигар ба созиш бирасанд. Иттиҳоде, ки расонаҳои ҷараёни аслӣ шакли гирифтани онро номумкин медонанд.

Санаэ Такаити, ки пештар вазири амнияти иқтисодӣ ва умури дохилӣ будааст ва барномаи молии тавсеаталабонае барои чаҳорумин иқтисоди бузурги ҷаҳон дорад, раҳбарии ин ҳизбро дар шароити буҳронӣ ба дӯш мегирад.

Доналд Трамп, раисҷумҳури Амрико аз Исроил хостааст, ки ба таври фаврӣ ба бомбаборони Ғазза поин диҳад.

Трамп шаби гузашта дар паёме дар шабакаи Social Truth навишт, "Исроил бояд фавран бомбаборони Ғазза бас кунад, то битавонем афродеро, ки назди "Ҳамос" гаравгон ҳастанд, раҳо кунем".

Гурӯҳи "Ҳамос" дервақти ҷумъа бахшҳое аз тарҳи пешниҳодшудаи сулҳ аз сӯи Амрикоро пазируфт, аммо дар бораи ин, ки силоҳҳои худро ба замин бигузорад, чизе нагуфт.

Трамп дар идомаи паёми худ навиштааст, ки дар бораи ҷузъиёти ин тарҳ баҳс мешавад, аммо ин тарҳ фақат хос ба Ғазза нест, балки барномаи фарогир барои сулҳ дар Ховари Миёна аст, ки "муддати тӯлонӣ дар талоши расидан ба он будем".

Нуқтаҳои асосии ин тарҳи пешниҳодшуда аз сӯи Амрико, ин раҳоии ҳамаи гаравгонҳо аз сӯи "Ҳамос", аслиҳаи худро ба замин гузоштани ин гурӯҳ, вогузории қудрат дар Ғазза ба технократҳо мебошад.

Дар иваз, Исроил бояд ҳамлаҳои худро ба Ғазза қатъ кунад, нерӯҳои низомиашро аз Ғазза берун созад ва талош барои бозсозии Ғаззаро оғоз кунад.

Чанд соат қабл аз ин, раисҷумҳури Амрико ҳушдор дода буд, ки агар "Ҳамос" то бегоҳи якшанбе ба ин тарҳ посух надиҳад, бо паёмадҳои ногувор рӯбарӯ хоҳад шуд.

Трамп ҳафтаи гузашта дар Кохи Сафед бо нахуствазири Исроил Бенямин Нетаняҳу мулоқот кард ва тарҳи пешниҳодии сулҳ низ пас аз ҳамин дидор матраҳ шуд.

Аз сӯи дигар, хабаргузории "Рейтерз" гузориш додааст, ки пас аз нашри паёми нави Трамп, ҳанӯз Исроил ба ҳамлаҳояш дар Ғазза идома додааст. Бар асоси гузоришҳо, дастикам 70 тан рӯзи ҷумъа дар ҳамлаҳои Исроил кушта шуданд.

Ҷанги навбатӣ миёни фаластиниҳо ва Исроил рӯзи 7-уми октябри соли 2023 бо ҳамлаи гурӯҳи "Ҳамос" ба Исроил оғоз шуд. Дар ин рӯз "Ҳамос" 1200 исроилиро кушт ва беш аз 250 тани дигарро ба гарав бурд.

Дар пайи ҳамлаҳои наздик ба ду соли Исроил ба Ғазза беш аз 66 ҳазор фаластинӣ кушта шудаанд, ки аксари онҳо занон ва кӯдакон мебошанд.

Дар шаҳри Душанбе як марди хориҷиро ба иттиҳоми ташкили фоҳишахона дастгир ва нисбаташ парвандаи ҷиноӣ боз кардаанд.

Раёсати Вазорати корҳои дохилӣ дар шаҳри Душанбе рӯзи 3 октябр бо нашри як навори видеоӣ гуфт, ки ин фард дар охирҳои моҳи апрели соли равон бо ҳадафи соҳибкорӣ ба пойтахти Тоҷикистон омада, зери ниқоби тарабхона дар асл фоҳишахона ташкил кардааст.

Пулис дар шарҳи мавзуъ гуфтааст, ки гумонбар дар дохили як таҳхона, ки ба иҷора гирифта буд, 14 ҳуҷра бо шароитҳои махсус омода намуда, 15 ҷавондухтарро аз кишварҳои хориҷӣ барои хизматрасониҳои ҷинсӣ, ҷалб намудааст.

Бо вуҷуди он, ки дар видео чеҳраи ин мард нишон дода мешавад, аммо гуфта нашудааст, ки ӯ шаҳрванди кадом кишвар аст. Ҳамчунин маълум нест, ки ин ҷавондухтарони боздоштшуда, шаҳрвандони кадом кишвар(ҳо) ҳастанд.

Айни замон пулис фаъолияти ин марказро қатъ карда, нисбати боздоштшуда бо моддаи 239-и Кодекси ҷиноятии Тоҷикистон, парванда оғоз гардидааст. Ин банди Кодекс барои "ташкил ё нигаҳдошти фоҳишахона", ҷарима ва ё маҳрум намудан аз озодиро пешбинӣ мекунад.

Ҳамзамон, ба гуфтаи пулис, нисбати ин занони хориҷӣ бо моддаи 130-и Кодекси ҳуқуқвайронкунии Тоҷикистон протоколҳо тартиб дода шуда, аз қаламрави кишвар ихроҷ карда мешаванд.

Маълум нест, ки оё фарди дастгиршуда ва занони муттаҳам ба сабукпойӣ, бо вакили дифоъ таъмин ҳастанд ва ба ин иттиҳом чӣ назар доранд.

Ин барои бори аввал нест, ки дар Тоҷикистон хориҷиҳо ба иттиҳоми ташкили фоҳишахона боздошт мешаванд.

Дар моҳи феврали соли 2019 кормандони Раёсати мубориза зидди ҷиноятҳои муташаккили Вазорати корҳои дохилии Тоҷикистон як шаҳрванди Чин ва як табааи Ветнамро бо иттиҳоми ташкили фоҳишахона бо ҷалби хориҷиён боздошт карда буданд.

Он замон пулис гуфт, ки як зани ветнамӣ бо як шаҳрванди Чин машварат карда, бо баҳонаи таъмини кор дар тарабхонае дар Русия се зани ветнамиро аз тариқи Қазоқистон ба Тоҷикистон оварданд.

"Муштариён ин се зан бештар шаҳрвандони Чин будаанд, ки дар Тоҷикистон кор мекунанд",-омада буд он замон дар хабари ВКД.

Ҳукумати Украина ва президенти Фаронса Эммануэл Макрон рӯзи 3 октябр эълон карданд, ки дар ҳамлаи паҳбодии Русия дар наздики хатти пеши ҷанг, як рӯзноманигори фаронсавӣ кушта ва як наворбардори украинӣ захмӣ шуд.

Макрон дар сафҳаи худ дар шабакаи Х навишт, "ҳамватани мо, хабарнигори аксбардор Антони Лалликон, артиши Украинаро дар ҷабҳаи муқовимат ҳамроҳӣ мекард. Бо камоли таассуф аз марги ӯ дар асари ҳамали паҳбодии Русия хабардор шудам".

Вай афзуд, "ҳамдардии самимии худро ба хонавода, азизон ва ҳама ҳамкоронаш, ки бо ба хатар андохтани ҷони худ барои мо хабаррасонӣ мекунанд ва воқеияти ҷангро бозгӯ мекунанд, иброз мекунам".

Артиши Украини ҳам дар "Фейсбук" навишт, ки хабарнигори аксбардор Григорий Иванченко дар ҳамон ҳамла захмӣ шуда, вазъаш муътадил аст.

Ин баёния мегӯяд, "ҳар ду рӯзноманигор таҷҳизоти ҳифозати шахсӣ пӯшида буданд ва дар васкатҳои зидигулӯлаи онҳо навишта шуда буд: PRESS.

"Душман бори дигар ба шеваи бадбинона принсипҳои ҳуқуқи байналмилалии башардӯстонаро нақз кард. Ин воқеият бори дигар бераҳмии артиши душманро тасдиқ мекунад",-омадааст дар ин баёния.

Мақомоти украинӣ эълон карданд, ки Лалликани 37-сола дар наздикии хатти пеши ҷанг дар минтақаи Донетск дар канори нерӯҳои Украина буд, ки кушта шуд.

Федератсияҳои Аврупо ва байналмилалии рӯзноманигорон ин кушторро "ҷинояти ҷангӣ" хонданд.

Ин гурӯҳҳо эълон карданд, ки Лалликон аввалин рӯзноманигоре буд, ки тавассути паҳбод дар ҷанги Украина кушта шуд, ҳарчанд ЮНЕСКО эълон кардааст, ки аз замони ҳамлаи Маскав дар феврали соли 2022, 21 рӯзноманигор ба шеваҳои дигар дар ҷанги Украина кушта шудаанд.

Гузоришгарони бидуни марз (RFS), созмони байналмилалии рӯзноманигорӣ хостори таҳқиқи сареъ шуд.

Рӯзи 4-уми октябр дар Қасри теннис ва маҷмааи варзишҳои обии Душанбе бозӣ барои Суперҷоми Тоҷикистон-2025 дар риштаи футзал баргузор мегардад.

Ба иттилои Лигаи футзали Тоҷикистон, бозӣ барои Суперҷом шоми шанбе миёни ду дастаи пойтахт - «Соро Компания» (сармураббиаш Пайрав Воҳидов) ва «Истиқлол» (сармураббиаш Владимир Чурляев) доир шуда, соати 19:00 оғоз меёбад.

Ёдовар мешавем, соли гузашта дастаи футзали “Истиқлол”-и Душанбе бори аввал барандаи Суперҷом ё Ҷоми олии Тоҷикистон гардида буд. Барои Суперҷом "Истиқлол", қаҳрамони Суперлигаи кишвар, бо "Соро Компания", барандаи ҷоизаи нуқраи мусобиқот, мубориза бурд.

Бозӣ миёни дастаҳои “Истиқлол” ва “Соро Компания”, ки 12-уми октябри соли 2024 дар шаҳри Душанбе, дар маҷмааи варзишии Кумитаи андози Тоҷикистон, доир гардид, бо пирӯзии “Истиқлол” бо ҳисоби 4:3 хотима ёфт.

Голҳои “Истиқлол”-ро Рустам Ҳамидов, Муҳаммад Шарипов, Абдуқаюм Умаров ва Шавкат Ҳалимов ба самар расонданд. Дар ҳайати “Соро Компания” Самандар Ризомов ду гол ва Файзалӣ Сардоров як гол заданд.

Дар мавсими нави Лигаи касбии футзали Тоҷикистон, ки 2-юми август шуруъ шуд, ҳашт даста иштирок дорад. Панҷ даста – «Соро Компания», «Истиқлол», КМВА (Клуби марказии варзишии артиш), «Амонатбонк» ва «Сомон» - аз шаҳри Душанбе, инчунин «Сипар»-и шаҳри Хуҷанд, «Регар»-и шаҳри Турсунзода ва «Равшан»-и шаҳри Кӯлоб мебошанд.

Бояд зикр намуд, КМВА (Клуби марказии варзишии артиш)-и Душанбе ва «Равшан»-и Кӯлоб дастаҳои нави Суперлигаи футзали Тоҷикистон ба шумор мераванд.

Мусобиқоти имсолаи Суперлигаи футзали Тоҷикистон дар ду марҳила баргузор мешавад. Дар марҳилаи аввал дастаҳо бо системи "хона – сафар" бо ҳамдигар рақобат мекунанд. Аз рӯи натиҷагирии ин марҳила дастаҳои беҳтарин ба қисми ниҳоии мусобиқот роҳ ёфта, барои унвони қаҳрамонӣ ва медалҳои мусобиқот мубориза хоҳанд бурд.

Марҳилаи аввали мусобиқот ба поён расид. Баъди натиҷагирии бозиҳои ҳафт даври мусобиқот дастаи “Сипар”, ки дар ҳамаи бозиҳояш пирӯз шуд, дар ҷадвали бозиҳо бо 21 имтиёз дар ҷойи аввал аст.

Дастаҳои “Соро Компания” ва “Истиқлол” бо 16-имтиёзӣ мутаносибан дар ҷойҳои дуюму сеюм қарор доранд. Се даста – “Сомон”, “Амонатбонк” ва КМВА – 9-имтиёзӣ гирифтаанд. “Равшан” се имтиёз дорад, аммо “Регар” ҳанӯз имтиёз ба даст наовардааст.

Дар шаҳри Маскав рӯзи 7 октябр ҷаласаи навбатии муколама оид ба Афғонистон барпо мешавад ва дар кори он мақомоти Тоҷикистон ҳам иштирок хоҳанд кард. Интерфакс бо такя ба Мария Захарова, сухангӯи ВКХ Русия рӯзи 2 октябр навишт, дар ҷаласаи «Чаҳорчӯби Маскав» қарор аст инчунин намояндагони ҳукумати Толибони Афғонистон, Ҳинд, Қазоқистон, Қирғизистон, Покистон, Русия, Узбекистон ва Туркманистон иштирок кунанд.

Ҷаласаи пӯшида аз чашми матбуот қарор аст таҳти раёсати вазири корҳои хориҷии Русия Сергей Лавров ҷараён гирад. “Таваҷҷӯҳ ба мушкили оштии миллӣ дар Афғонистон ва тавсеаи ҳамкорҳои миёни кишварҳои минтақа бо Кобул дар соҳаҳои сиёсӣ, иқтисодӣ, зиддитеррористӣ ва мубориза бо маводи мухаддир равона мешавад”, гуфт Захарова.

Толибонро дар ин ҷаласа Амирхон Муттақӣ, вазири корҳои хориҷии Толибон намояндагӣ мекунад ва як гуфтугӯи ҷудогонаи ӯ бо Лавров ҳам дар назар гирифта шудааст.

Ҳукумати Толибон, ки августи соли 2021 дар Афғонистон сари қудрат баргаштааст, то ҳол ба ҷуз Русия дигар аз ҷониби ҳеҷ давлате ба расмият шинохта нашудааст. Ҳукумат дар Тоҷикистон бо ин ки ҳамкориҳои иқтисодиро бо Толибон идома медиҳад, гуфтааст, то замони таъсиси як ҳукумати фарогир аз гурӯҳу қавмиятҳои мухталифи сиёсию миллӣ, ин ҳукуматро эътироф намекунад.

Дар сатҳи байналмилалӣ як мояи аслии интиқод аз Толибон эҷоди ҳукумати ифротгарои исломӣ ва ба шиддат маҳдуд ва поймол шудани ҳуқуқи занону духтарон барои кору таҳсил мебошад.