KFOR: Heqja e barrikadave duhet të bëhet shpejt dhe në mënyrë të sigurt
Misioni i NATO-s në Kosovë, KFOR, ka mirëpritur vendimin e mbrëmshëm për heqjen e barrikadave në veri të Kosovës. Në një njoftim për media KFOR-i tha se heqja e barrikadave duhet të bëhet shpejt dhe në mënyrë të sigurt, duke shmangur çdo lloj incidenti apo rreziku.
“Të gjitha palët duhet të shmangin çdo retorikë apo veprim që mund të shkaktojë përshkallëzim të mëtejshëm”, thuhet në njoftim.
KFOR-i ka bërë të ditur se është duke monitoruar nga afër zhvillimet në veri të Kosovës.
“Ne mbetemi jashtëzakonisht vigjilentë dhe të gatshëm për të ndërhyrë, nëse është e nevojshme, në përputhje me mandatin tonë të bazuar në Rezolutën 1244 të vitit 1999”, përfundon njoftimi.
Hiqet barrikada në Mitrovicën e Veriut
Është hequr barrikada në afërsi të Lagjes së Boshnjakëve më Mitrovicën e Veriut. Në këtë rrugë ka mbetur vetëm edhe një kamion.
Gazetarët e REL-it nga terreni raportojnë se kjo rrugë është tashmë e kalueshme.
Hiqen barrikadat në katër komunat në veri të Kosovës
Pasditen e 29 dhjetorit nisi heqja e barrikadave të ngritura në veri të Kosovës. Për gati tri javë, grupe serbësh mbajtën të bllokuara disa rrugë që çojnë drejt vendkalimeve kufitare me Serbinë, Jarinjë dhe Bërnjak. Largimi i bllokadave nisi pas një takimi që mbajti presidenti i Serbisë, Aleksandar Vuçiq, me disa përfaqësues të serbëve të Kosovës.