Serbia ia dërgon kërkesën KFOR-it për trupat në Kosovë
Qeveria e Serbisë ka miratuar të enjten kërkesën ndaj misionit të NATO-s në Kosovë, KFOR, për dërgimin e një numri të forcave të sigurisë në Kosovë.
Ky vendim është marrë pas mbledhjes që ka mbajtur Qeveria e Serbisë, në të cilën ka marrë pjesë presidenti serb, Aleksandar Vuçiq.
Vuçiq ka thënë se kërkesa do të dërgohet në mbrëmjen e së enjtes në formë elektronike.
Ai ka bërë të ditur se ajo do t'i dorëzohet komandantit të KFOR-it të premten në pikën kufitare ndërmjet Serbisë dhe Kosovës.
Vuçiq ka sqaruar se Serbia është duke kërkuar kthimin e 100 deri në 1.000 trupave, “sipas Rezolutës 1244”.
Rezoluta 1244
Rezoluta 1244, e miratuar në vitin 1999, ofroi një kornizë për zgjidhjen e konfliktit në Kosovë, duke autorizuar vendosjen e një pranie ndërkombëtare, civile dhe ushtarake. Ajo themeloi një administratë ndërkombëtare tranzitore dhe mbikëqyri tërheqjen e forcave ushtarake serbe nga Kosova.
Neni 4 vërteton se pas tërheqjes, një numri të personelit ushtarak dhe policor, jugosllav dhe serb, do t’i lejohet kthimi në Kosovë, për t’i ushtruar funksionet në përputhje me aneksin 2.
Neni 6 i aneksit 2 përmend funksionet e mëposhtme:
Ndërlidhja me misionin civil ndërkombëtar dhe me praninë ndërkombëtare të sigurisë; shënjimi/pastrimi i fushave të minuara; mbajtja e një pranie pranë objekteve të trashëgimisë serbe; mbajtja e një pranie në vendkalimet kryesore kufitare.
“Është në përputhje me ligjin ndërkombëtar”, ka thënë ai.
Në një intervistë për Radiotelevizionin e Serbisë, Vuçiq ka thënë se e ka të qartë që kërkesa do të refuzohet.
KFOR-i nuk i është përgjigjur kërkesës së Radios Evropa e Lirë për të komentuar hapin e Serbisë.
I dërguari i Shteteve të Bashkuara për Ballkanin Perëndimor, Gabriel Escobar ka thënë për Radion Evropa e Lirë se Kosova ka garanci shumë të forta të sigurisë nga Shtetet e Bashkuara.
Ai ka deklaruar po ashtu se SHBA-ja e kundërshton dhe e refuzon në mënyrë kategorike kërkesën e Serbisë për kthimin e forcave të saj në Kosovë.
Hovenier: Kërcënimet dhe frikësimet për shkak të qëndrimeve politike janë të papranueshme
Ambasadori amerikan në Prishtinë, Jeffrey Hovenier, ka thënë të enjten se kërcënimet dhe frikësimet për shkak të qëndrimeve politike, janë të papranueshme në shoqëritë e lira dhe demokratike.
Ai i ka bërë këto komente pas takimit me Rada Trajkoviqin, këshilltaren e ministrit për Komunitete dhe Kthim në Kosovë, Nenad Rashiq.
Vetë Trajkoviq ka thënë më herët gjatë ditës se i është pamundësuar për disa orë kalimi nga Serbia në Kosovë, përkatësisht në pikëkalimin kufitar Merdare.
Trakoviq ka thënë se autoritetet i kanë kontrolluar makinën në kufi.
Ditë më parë, Trajkoviq ka thënë se përveç kërcënimeve ndaj saj për përfshirjen politike në Qeverinë e Kosovës, kërcënime kanë nisur të kenë edhe fëmijët e saj.
Përndryshe Rashiq është emëruar ministër pasi përfaqësuesit e Listës Serbe – partisë më të madhe të serbëve në Kosovë – janë larguar nga institucionet e Kosovës, për shkak të vendimit të Qeverisë së Kosovës për riregjistrim të makinave serbe në RKS – Republika e Kosovës.
Emërimi i Rashiqit dhe Trajkoviqit është kritikuar nga Beogradi zyrtar.
Hill: Nuk shoh mundësi për zgjidhje ushtarake të çështjes së Kosovës
Ambasadori amerikan në Serbi, Christopher Hill, ka thënë të enjten nga Nishi se Qeveria e Serbisë ka të drejtë t’i kërkojë misionit të NATO-s në Kosovë, KFOR, që forcat serbe të sigurisë të kthehen në Kosovë, mirëpo kjo çështje është politike, prandaj edhe kërkon zgjidhje politike.
Ai ka theksuar se nuk sheh mundësi të zgjidhjes ushtarake.
“Ne duhet të qetësojmë situatën, të krijojmë paqe dhe stabilitet në këtë zonë, ashtu që njerëzit që jetojnë aty, të kenë pritshmëri të qarta se si do të duket jeta e tyre në të ardhmen. Kjo gjë mund të arrihet përmes krijimit të Asociacionit të komunave me shumicë serbe”, ka thënë Hill.
I dërguari amerikan për Ballkanin Perëndimor, Gabriel Escobar ka thënë për Radion Evropa e Lirë se Kosova ka garanci shumë të forta të sigurisë nga Shtetet e Bashkuara.
Ai ka deklaruar po ashtu se SHBA-ja kundërshton dhe e refuzon në mënyrë kategorike kërkesën e Serbisë për kthimin e forcave të saj në Kosovë.
Borrell informon liderët e BE-së për tensionet Kosovë-Serbi
Përfaqësuesi i lartë i Bashkimit Evropian për Politikë të Jashtme dhe Siguri, Josep Borrell, do të informojë liderët e 27 shteteve anëtare të bllokut, për tensionet e fundit mes Kosovës dhe Serbisë, në samitin që do të mbahet më 15 dhjetor në Bruksel.
Paraprakisht, situata në Kosovë nuk kishte qenë e paralajmëruar të ishte në agjendë.
“E dini se ditëve të fundit jemi përballur me probleme të mëdha në veri të Kosovës. E kam nisur të dërguarin e posaçëm [të BE-së për dialogun Kosovë Serbi] Mirosllav Lajçak në rajon, në Prishtinë dhe Beograd, menjëherë pas takimit të ministrave të Jashtëm të BE-së. Do t’iu raportoj liderëve për situatën dhe do të kërkoj uljen e tensioneve dhe që ata t’i kthehen dialogut, rrugës së vetme për të siguruar perspektivë evropiane për Kosovën dhe Serbinë”, tha Borrell.
Më 13 dhe 14 dhjetor, Lajçak ka qëndruar në Kosovë dhe Serbi, dhe së bashku me të dërguarin e Shteteve të Bashkuara për Ballkanin Perëndimor, Gabriel Escobar, kanë kërkuar heqjen e barrikadave.
