Osmani: Veriu mbetet sfidë për shkak të Serbisë
Presidentja e Kosovës, Vjosa Osmani, gjatë fjalimit vjetor të mbajtur para deputetëve të Kuvendit të Kosovës, tha se veriu i Kosovës mbetet sfidë për shkak të, siç tha ajo, pretendimeve territoriale të Serbisë ndaj Kosovës.
“Veriu i Kosovës vazhdon të jetë sfidë për shkak të pretendimeve territoriale që Serbia ka ndaj Kosovës, e të cilat i shpreh përmes financimit dhe përkrahjes së strukturave ilegale-kriminale. Por, ne jemi të vendosur si asnjëherë më parë që të krijojmë siguri e sundim të ligjit në çdo cep të territorit tonë”, tha Osmani.
Presidentja e Kosovës e cilësoi si "ide hegjemoniste" paralajmërimin e Serbisë se do të kërkojë nga KFOR-i që t'i kthejë trupat serbe në Kosovë.
“Jemi të gjithë dëshmitarë të kërcënimit të vazhdueshëm të Serbisë ndaj Kosovës. Ky kërcënim, me përmasa agresioni, së fundi është shpërfaqur nëpërmjet idesë hegjemoniste të vendosjes së trupave ushtarake të Serbisë në Kosovë. Por, Serbia dhe udhëheqësi i saj [Aleksandar] Vuçiq, e dinë fare mirë se prezenca e ushtrisë serbe në territorin e Kosovës mori fund një herë e përgjithmonë më 12 qershor 1999", tha Osmani.
Lajmin e plotë mund ta lexoni KËTU
Dita e gjashtë e barrikadave
Për të gjashtën ditë me radhë, disa serbë në veri të Kosovës po vazhdojnë të bllokojnë rrugët që çojnë drejt pikave kufitare me Serbinë: Jarinjë dhe Bërnjak.
Vendosja e barrikadave nga disa serbë lokalë u nxit nga arrestimi i ish-pjesëtarit serb të Policisë së Kosovës, Dejan Pantiq. Kosova thotë se ai dyshohet për “sulm terrorist” ndaj zyrave të Komisionit Qendror të Zgjedhjeve në veri, më 6 dhjetor.
Situata në barrikada është e qetë.
Shkollat fillore dhe të mesme, në veriun e banuar me shumicë serbe, e që funksionojnë sipas sistemit serb, janë të mbyllura që nga e hëna, sikurse edhe objektet e hotelerisë.
Shumica e qytetarëve që gjenden në barrikada, janë punonjës të institucioneve serbe në Kosovë, nga sektori i shëndetësisë dhe arsimit. Siç mëson REL-i, ata dalin në barrikada me ndërrime.
Policia e Kosovës është vendosur në vendbanimet shumetnike në Mitrovicë të Veriut: Lagjen e Boshnjakëve, Tre Rrokaqiejt dhe në Kodrën e Minatorëve.
KFOR-i dhe EULEX-i po patrullojnë në Mitrovicë të Veriut, ndërkaq pjesëtarët e kontingjentit polak të KFOR-it gjenden në afërsi të barrikadës së ngritur në fshatin Rudarë të Zveçanit. Kjo barrikadë gjendet në rrugën magjistrale Prishtinë-Leposaviq.
Pas vendosjes së barrikadave, serbët kanë formuar Shtabin e Krizave. Sipas nënkryetarit të Listës Serbe, Igor Simiq, në këtë shtab bëjnë pjesë “përfaqësuesit politikë të popullit serb, figura të shquara, profesorë, mjekë dhe biznesmenë”.
Po ashtu, situata në Mitrovicën e Veriut është e qetë.
Të nderuar lexues, këtu po e përmbyllim raportimin e drejtpërdrejtë për zhvillimet në veri të Kosovës.
Rikthehemi sërish më 15 dhjetor.
Faleminderit që ishit me ne!
Daçiq diskuton me Escobarin për marrëveshjet e Brukselit
Ministri i Jashtëm i Serbisë, Ivica Daçiq, ka diskutuar të mërkurën me të dërguarin e Shteteve të Bashkuara për Ballkanin Perëndimor, Gabriel Escobar rreth shqetësimeve që ka për “dështimin e Prishtinës që të zbatojë marrëveshjet e Brukselit”.
Sipas Ministrisë së Jashtme serbe, Daçiq ka thënë se “Serbia është e përkushtuar për thellim të bashkëpunimit me Shtetet e Bashkuara, me qëllim të stabilizimit të rajonit të Ballkanit Perëndimor”.
Më herët gjatë ditës, Escobar është takuar edhe me presidentin e Serbisë, Aleksandar Vuçiq dhe kryeministren e këtij shteti, Ana Bërnabiq.
Sipas institucioneve serbe, palët kanë diskutuar për barrikadat në veri të Kosovës dhe Asociacionin e komunave me shumicë serbe.