Escobar takohet me Bërnabiqin
Pas takimit me presidentin serb, Aleksandar Vuçiq, i dërguari i Shteteve të Bashkuara për Ballkanin Perëndimor, Gabriel Escobar, ka takuar të mërkurën në Beograd edhe kryeministren e Serbisë, Ana Bërnabiq.
Sipas zyrës së Bërnabiqit, ajo e ka konsideruar me rëndësi "zbatimin e marrëveshjeve të nënshkruara tashmë dhe zbatimin e tyre në teren".
Sipas zyrës së saj, Bërnabiq e ka vënë theksin se formimi i Asociacionit të komunave me shumicë serbe në Kosovë.
Vetë Escobar ka thënë të martën për Radion Evropa e Lirë se punët për formim të Asociacionit duhet të nisin shpejt.
Në takimin e zhvilluar mes Escobarit, Vuçiqit dhe të dërguarit të Bashkimit Evropian për Ballkanin Perëndimor, Mirosllav Lajçak, është thënë të jetë diskutuar për situatën në veri të Kosovës dhe heqjen e barrikadave përmes rrugëve diplomatike.
Një pjesë e intervistës së Escobarit për REL-in
I dërguari i Shteteve të Bashkuara të Amerikës për Ballkanin Perëndimor, Gabriel Escobar, ka thënë se duhet të ketë besim mes komuniteteve në Kosovë, përpara se të arrihet një zgjidhje e suksesshme.
Vuçiq thotë se pati bisedë të “sinqertë dhe korrekte” me Lajçakun dhe Escobarin
Presidenti serb, Aleksandar Vuçiq, ka thënë se ka pasur bisedë të “sinqertë dhe korrekte” me zyrtarët e Bashkimit Evropian dhe Shteteve të Bashkuara për rajonin e Ballkanit Perëndimor, Mirosllav Lajçak dhe Gabriel Escobar.
Edhe vetë Lajçak ka bërë deklarata të ngjashme, pas takimit me presidentin serb, duke thënë se palët kanë diskutuar për barrikadat në veri të Kosovës.
Sipas Lajçakut, “Vuçiq e kupton seriozitetin e situatës”.