Vuçeviq: Të gatshëm “për të mbrojtur qytetarët tanë”
Ministri serb i Mbrojtjes, Millosh Vuçeviq, tha se “ushtria serbe është e gatshme të kryejë çdo detyrë për të mbrojtur integritetin dhe sovranitetin e Republikës së Serbisë dhe të të gjithë qytetarëve të saj”.
Me këtë deklaratë, ai aludoi në territorin e Republikës së Kosovës – shtet i pavarur qysh në vitin 2008, por të cilin Serbia nuk e njeh.
Vuçeviq i bëri këto deklarata pas vizitës që realizoi në Rashkë, ku janë të stacionuar disa ushtarë serbë.
Rashka është qytet në Serbi që gjendet afër Jarinjës - pikë kufitare që ndan Kosovën me Serbinë.
Beogradi zyrtar, qysh më 8 dhjetor, ka paralajmëruar se është duke shqyrtuar dërgimin e forcave të tij në Kosovë, në bazë të Rezolutës 1244 të Kombeve të Bashkuara.
Paralajmërimi është bërë pasi Policia e Kosovës ka rritur praninë në veri të vendit, ku ditëve të fundit ka pasur tensione dhe incidente me armë zjarri.
Presidenti i Serbisë, Aleksandar Vuçiq, tha të hënën se Qeveria e tij, më 15 dhjetor, do të dërgojë kërkesë te misioni i NATO-s në Kosovë, KFOR, për vendosjen e forcave serbe në Kosovë.
KFOR-i nuk iu përgjigj kërkesës së REL-it për koment në lidhje me këto paralajmërime.
Barrikadat “duhet të hiqen, çfarë na duhen”
Me gjithë përpjekjet e Radios Evropa e Lirë, pak qytetarë në Mitrovicë të Veriut deshën të flasin publikisht për barrikadat e ngritura në pjesën veriore të Kosovës nga disa grupe serbësh. Ata që folën në mënyrë anonime, thanë se u duhet lëvizje e lirë.
Von Cramon bën thirrje për largimin e barrikadave në veri
Raportuesja për Kosovën në Parlamentin Evropian, Viola von Cramon, ka thënë se rikthimi i paqes dhe stabilitetit në veri të Kosovës, duhet të jenë prioritet.
“Sidomos, sulmet ndaj misionit të Bashkimit Evropian në Kosovë, EULEX, janë plotësisht të papranueshme”, ka thënë ajo përmes një postimi në Twitter.
Policia e Kosovës ka bërë të ditur më 11 dhjetor se misioni i BE-së në Kosovë, ka raportuar që është sulmuar me shok bombë në fshatin Rudarë të Zveçanit.
Ajo i ka quajtur të papranueshme edhe njoftimet e autoriteteve të Serbisë se do të bëjnë kërkesë te misioni i NATO-s në Kosovë, KFOR, për angazhim të trupave në Kosovë.
Von Cramon ka thënë se pret që të largohen barrikadat e krijuara nga serbët lokalë të Kosovës, si shenjë e uljes së tensioneve.
“Mbështes plotësisht dialogun e përkrahur nga Bashkimi Evropian”, ka thënë mes tjerash ajo.