Kurti për largimin e barrikadave: Vetë i vunë, vetë i hoqën

Kryetari i Kuvendit të Kosovës, Glauk Konjufca, ka thënë të hënën se rajoni i Ballkanit nuk është imun nga ndikimet e Rusisë, dhe kjo vërehet në veprimet e Serbisë gjatë ditëve të fundit në Kosovë.

Ai i ka bërë këto deklarata pasi takimit që ka zhvilluar me homologun e tij në Shkup, Talat Xhaferi.

“Veprimet e Serbisë janë të papranueshme, ato kanë për qëllim destabilizimin dhe ndarjen de-facto të shtetit të Kosovës. Ne, si popull, qëndrojmë shumë të bashkuar që t’i luftojmë këto veprime, të cilat kanë si prapavijë gjeopolitike ndikimin rus dhe fuqishëm do të ecim në shtetin demokratik të Kosovës për sundim të ligjit dhe për demokraci në tërë territorin e Republikës së Kosovës. Kosova është e përcaktuar për zgjidhjen e problemeve përmes dialogut”, ka theksuar në Shkup, Konjufca, duke komentuar zhvillimet në Kosovë.

Materialin e plotë e gjeni këtu.

Si pasojë e shqetësimeve për sigurinë, procesi mësimor është mbajtur pjesërisht të hënën në shkollën fillore “Aziz Sylejmani” në lagjen Kodra e Minatorëve në veri, ka thënë drejtori i këtij institucioni, Flamur Gacaferri, në një përgjigje për Radion Evropa e Lirë.

Më herët gjatë ditës së hënë, drejtori i shkollës fillore “Sveti Sava” në Mitrovicën e Veriut, Miodrag Jovanoviq, ka thënë për Radion Evropa e Lirë, se shkollat fillore dhe të mesme në veri të Kosovës nuk do të punojnë deri në njoftimin e radhës.

"Sot mësimi është mbajtur vetëm me ciklin e ulët, nga klasa e parë deri të pestën, kurse me nxënësit më të rritur, nga klasa gjashtë deri të nëntën nuk është mbajtur. Prindërit i kanë tërhequr fëmijët e rritur nga Kodra në pjesën jugore të Mitrovicës,” ka thënë Gacaferri.

Në shkollën "Aziz Sylejmani" procesin mësimor e vijojnë 17 nxënës shqiptarë.

Ndërkohë, nënkryetari i Mitrovicës së Jugut, Arian Tahiri, ka thënë se mësimi është duke u zhvilluar normalisht në fshatrat e kësaj komune të banuara me shumicë shqiptare.

Ai ka thënë se është duke u koordinuar me autoritetet e sigurisë lidhur me mbarëvajtjen e procesit mësimor.

“Nëse rekomandohet nga organet e sigurisë se mësimi duhet të ndërpritet, ne do marrim një vendim të tillë. Natyrisht që qytetarët janë më të shqetësuar për sigurinë e tyre, por që mësimi është duke vazhduar”, ka thënë mes tjerash ai.

Ministri serb i Mbrojtjes, Millosh Vuçeviq, ka arritur të hënën në Rashkë, ku do të vizitojë pjesëtarët e ushtrisë serbe që janë të stacionuar në atë zonë.

Rashka është qytet në Serbi që gjendet afër Jarinjës - pikë kufitare që ndan Kosovën me Serbinë.

Zëvendës-shefi i Shtabit të Përgjithshëm të ushtrisë serbe, Petar Cvetkoviq, është thënë të ketë informuar ministrin për situatën aktuale në terren.

Goran Rakiq, kryetar i Listës Serbe - partisë më të madhe të serbëve në Kosovë - kërkoi lirimin e, siç tha, serbëve të arrestuar “padrejtësisht” në veri të Kosovës.

Arrestimi i një ish-polici serb të shtunën u bë edhe shkas i barrikadave që ngritën disa qytetarë serbë në pjesën veriore të Kosovës, përkatësisht në rrugët që çojnë drejt vendkalimeve kufitare me Serbinë, Jarinjë dhe Bërnjak.

Duke folur nga barrikadat në fshatin Rudarë, Komuna e Zveçanit, Rakiq tha se populli serb “do paqe”.

“Ne kërkojmë që qytetarët tanë të arrestuar padrejtësisht, të lirohen, dhe që [kryeministri i Kosovës] Albin Kurti t’i tërheqë njësitet që i dërgoi në veri, të ndalojë keqtrajtimin e fëmijëve tanë dhe të ndalojë ndjekjen e serbëve”, tha Rakiq, duke mos sjellë asnjë provë për këto pretendime.

Një ditë më herët, ai po ashtu tha se kryeministri i Kosovës, Albin Kurti, po përgatit dërgimin e forcave të tij speciale “për të përndjekur” serbë nga pjesa veriore e vendit.

Këto pretendime u hodhën poshtë nga zëdhënësi i Qeverisë së Kosovës, Përparim Kryeziu.

“Absolutisht e pavërtetë”, tha ai për Radion Evropa e Lirë