Osmani takon partitë politike për zgjedhjet në veri
Presidentja e Republikës së Kosovës, Vjosa Osmani, pritet t’i takojë partitë politike për konsultim për zgjedhjet në katër komunat në veri të Kosovës - Mitrovicë të Veriut, Leposaviq, Zubin Potok dhe Zveçan.
Në njoftimin e presidencës thuhet se takimi do të mbahet të shtunën në orën 14:30, por nuk jepen detaje se kush do të marrë pjesë.
Tajani: Tensionet në veri rrezikojnë stabilitetin në rajon
Ministri i Jashtëm italian, Antonio Tajani, tha se tensionet në veri të Kosovës rrezikojnë stabilitetin në rajon.
Përmes një postimi në Twitter, ai tha se ka folur me kryeministrin e Kosovës, Albin Kurti, dhe presidentin e Serbisë, Aleksandar Vuçiq, dhe u ka kërkuar atyre që të “shmangin veprimet e njëanshme”.
Tajani tha se Italia dëshiron të jetë protagoniste e paqes në Ballkan.
“Le të nxisim dialogun mes Beogradit dhe Prishtinës”, shkroi ai.
KQZ "nuk ka kompetencë" të rekomandojë shtyrjen e zgjedhjeve
Në mbledhjen e Komisionit Qendror të Zgjedhjeve u tha se ky organ vazhdon me përgatitjet për mbajtjen e zgjedhjeve në veri të Kosovës.
Sipas tyre, nuk është në kompetencën e KQZ-së që të rekomandojë shtyrjen e zgjedhjeve.
Ndërsa sa i përket raportit të dërguar tek presidentja Vjosa Osmani, KQZ tha se vetëm e ka informuar atë për mbarëvajtjen e procesit zgjedhor, por nuk ka dhënë rekomandime.
Në këtë mbledhje, e cila u mbajt më 10 dhjetor, u vendos që të shtyhet afati për nominimin e anëtarëve të Këshillave të Vendvotimeve.
Me 11 vota për dhe asnjë kundër u vendos që ky afat të shtyhet deri më 13 dhjetor. Sipas tyre, kjo shtyrje nuk ndikon në procesin zgjedhor.
Për më shumë lexoni lajmin e plotë në këtë link.
Mirëmëngjesi të nderuar lexues. Po e rinisim mbulimin e drejtpërdrejtë të ngjarjeve në veri të Kosovës.
Gjatë natës nuk janë raportuar incidente në veri të vendit dhe aktualisht gjendja është e qetë.
Kështu i tha Radios Evropa e Lirë - drejtori i Policisë së Kosovës për rajonin e Mitrovicës së Veriut, Besim Hoti.
Në këtë komunë - e banuar me shumicë serbe - mbrëmjen e 9 dhjetorit, tek lagjja Tri Rrokaqiejt, janë dëgjuar shpërthime.
Hoti tha se kjo ka ndodhur me mjet shpërthyes piroteknik, dhe se nuk ka pasur dëme.