Kurti e viziton në QKUK policin e plagosur
Kryeministri i Kosovës, Albin Kurti, e ka vizituar të dielën policin e plagosur në veri të Kosovës, Alban Rashitin.
Teksa ai ka qenë duke u trajtuar në Qendrën Klinike Universitare të Kosovës, Kurti ka thënë se atij i është hequr predha nga kraharori i majtë.
Mbledhje e Këshillit të Sigurisë Kombëtare
Kryeministri Kurti ka thënë se takimi nis në orën 10:00
Mbyllet pikëkalimi kufitar në Bërnjak
Sipas faqes së Ministrisë së Punëve të Brendshme të Kosovës, pikëkalimi mes Kosovës dhe Serbisë, Bërnjak është mbyllur.
Ky pikëkalim është mbyllur disa herë edhe në të kaluarën – bashkë me pikëkalimin tjetër Jarinjë – në kohën e rritjes së tensioneve mes Kosovës dhe Serbisë.
SHBA-ja dënon ashpër sulmin ndaj Policisë së Kosovës
Ambasadori amerikan në Kosovë, Jeffrey Hovenier i ka dënuar ashpër sulmet “e dhunshme dhe të orkestruara “ndaj Policisë së Kosovës, më 24 shtator në veri.
“Policia e Kosovës ka legjitimitet të plotë për të garantuar sundimin e ligjit, në përputhje me Kushtetutën dhe ligjet e Kosovës. Ne e pranojmë dhe respektojmë rolin e saj si përgjigja e parë ndaj emergjencave dhe situatave të krizës”, ka thënë ambasadori Hovenier.
Duke e komentuar vrasjen në veri, ai ka thënë se kryesit e këtyre veprave duhet të mbahen përgjejgës dhe të përballen me drejtësinë.
Hovenier, ka thënë edhe se e vlerëson koordinimin e vazhdueshëm në mes të Policisë së Kosovës, misionit të NATO-s në Kosovë, KFOR dhe Misionit të Bashkimit Evropian për Sundim të Ligjit, EULEX.
Ai u ka shprehur ngushëllime familjarëve të policit të vdekur, ndërsa shërim të shpejtë dy të plagosurve.