Sulmi në veri: Një polic e tre sulmues të vrarë

Një pjesëtar i Policisë së Kosovës, i cili është plagosur gjatë aksionit në fshatin Banjskë të Zveçanit, është duke u trajtuar në Spitalin e Përgjithshëm të Mitrovicës së Jugut.

Drejtoresha e këtij spitali, Luljeta Buçinca Zhubi, tha për Radion Evropa e Lirë se polici i plagosur është duke qëndruar në spital, pasi nesër do t’i nënshtrohet një operacioni.

“E kemi një pjesëtar të policisë, i cili është i plagosur nga copat e predhave. Në konsultim me kirurgun, është konstatuar se ai duhet t’i nënshtrohet një intervenimi”, tha Zhubi.

Ajo tha se që nga orët e para të mëngjesit, në Spitalin e Përgjithshëm në Mitrovicë të Jugut janë trajtuar gjashtë pjesëtarë të Policisë së Kosovës.

“Disa nga të plagosurit/lënduarit janë transferuar në Prishtinë e të tjerët janë liruar në shtëpi”, tha Zhubi.

Presidentja e Kosovës, Vjosa Osmani, e shpalli 25 shtatorin ditë zie, në nderim të policit të vrarë në veri, Afrim Bunjaku.

Rreshteri policor mbeti i vrarë më 24 shtator, pas një sulmi të armatosur në fshatin Banjskë në Zveçan, të banuar me shumicë serbe.

Shefi i politikës së jashtme të Bashkimit Evropian, Josep Borrell, tha se ka biseduar me kryeministrin e Kosovës, Albin Kurti, dhe me presidentin e Serbisë, Aleksandar Vuçiq, në lidhje me zhvillimet e së dielës në veri të Kosovës.

Në komunikatën e postuar në ueb-faqen e BE-së thuhet se Borrell “e dënon agresionin e sotëm në termat më të fuqishëm”.

“Përfaqësuesi i lartë, Borrell, përsëriti thirrjen e tij për sulmuesit që të dorëzohen menjëherë, si dhe për lirimin e pelegrinëve në manastirin e Banjskës. Ai bëri thirrje për rivendosjen e qetësisë dhe stabilitetit”, thuhet në komunikatë.

Presidenti i Serbisë, Aleksandar Vuçiq, tha se sulmi në Banjskë ndodhi pasi “disa serbë të Kosovës” u rebeluan duke ngritur barrikada dhe duke nxitur më pas reagimin e policisë së Kosovës.

Në një adresim të drejtpërdrejtë televiziv, mbrëmjen e së dielës, ai tha se “tre serbë nga Kosova u vranë - dy nga snajperët - dy u plagosën rëndë dhe ka frikë për vrasjen edhe të personit të katërt”.

“Rreth orës 02:46 të natës së sotme, një grup serbësh nga ‘Kosova dhe Metohia’ vendosi dy kamionë si barrikada në Banjskë - në veri të Kosovës. Më pas shkoi policia e Kosovës dhe tentoi t’i largojë ato barrikada. Kishte një konflikt me serbët që vendosën barrikada dhe në atë konflikt mbeti i vrarë polici Afrim Bunjaku dhe një person tjetër u plagos”, tha Vuçiq.

“Serbët dhe jo njerëzit nga Serbia qendrore - siç gënjyen në mediat e Prishtinës - por nga Kosova u rebeluan, duke mos dashur të vuajnë më terrorin e [kryeministrit të Kosovës, Albin] Kurti”.

“Unë, në asnjë mënyrë, nuk dua ta justifikoj vrasjen e një polici shqiptar dhe as nuk mund ta justifikoj. Është një akt i dënueshëm dhe është diçka që nuk i duhej askujt”, tha presidenti serb.

Sipas tij, i vetmi fajtor për atë që po ndodh në veri, “është Albin Kurti”.

I pyetur nga gazetarët se nga i siguruan serbët lokalë uniformat me të cilat shihen në fotografi, Vuçiq tha se ato “nuk janë uniforma të ushtrisë serbe apo të policisë serbe”. Uniformat blihen kudo në treg, sipas tij.

“Nuk kemi mundur të flasim më herët, sepse nuk kemi kontroll efektiv në Kosovë që nga viti 1999. Na është dashur shumë kohë që ta hetojmë vetë atë që ka ndodhur”, tha Vuçiq.

Ai i bëri thirrje komunitetit ndërkombëtar që ta formojë Asociacionin e komunave me shumicë serbe dhe tha se në veri të Kosovës, policët duhet të jenë serbë.

Vuçiq tha se në ditët në vazhdim do të marrë vendime, që do t'ua komunikojë “qytetarëve dhe popullit tonë në Kosovë”, por nuk specifikoi se me çfarë kanë të bëjnë ato vendime.

Ai tha se Serbia nuk do ta njohë kurrë Kosovën “as formalisht, as joformalisht”, por shtoi se është i gatshëm të bisedojë.