Trump anulon samitin e G7-ës
Presidenti i Shteteve të Bashkuara, Donald Trump, anuloi samitin e G7-ës, apo grupit të vendeve më të industrializuara, për shkak të krizës me koronavirus.
Ishte paraparë që samiti të mbahej në qershor, në Kamp Dejvid, pranë Uashingtonit.
Zëdhënësi i Shtëpisë së Bardhë, Judd Deere, tha se udhëheqësit do të bisedojnë “në baza virtuale, në mënyrë që të gjitha ekonomitë t’i përqendrojnë burimet në trajtimin e sfidave shëndetësore dhe ekonomike, që paraqet sëmundja COVID-19”.
G7-ta përbëhet nga: Britania, Kanadaja, Franca, Gjermania, Italia, Japonia dhe Shtetet e Bashkuara.
Të gjitha këto shtete po luftojnë për frenimin e pandemisë.
SHBA-ja mban udhëheqjen e G7-ës gjatë vitit 2020.
Shkon në 67 numri i të infektuarve në Maqedoni të Veriut
Numri i të infektuarve me koronavirus në Maqedoninë e Veriut është rritur në 67.
Nga 71 testet e kryera, 19 kanë rezultuar pozitivë, ka bërë të ditur ministri i Shëndetësisë, Venko Filipçe.
Ai ka thënë se gjendja e personave të prekur me koronavirus është e qëndrueshme dhe pa shenja të përkeqësimit.
Institucionet shëndetësore, ka thënë Filipçe, janë në gjendje të përballen me rritje të numrit të të infektuarve, por kjo betejë, siç është shprehur ai, nuk do të mund të fitohet vetëm nga mjekët dhe stafi tjetër shëndetësor.
“Me rëndësi të madhe është roli i qytetarëve, ndërgjegjja dhe vetëdijesimi i tyre se të gjithë duhet të japin kontributin e tyre për kapërcimin e kësaj krize”, ka deklaruar Filipçe.
- Artikullin e plotë mund ta lexoni këtu.
Netflix ul cilësinë, për të zvogëluar ngarkesën në internet
Kanali televiziv Netflix do të zvogëlojë cilësinë e videove në shërbimet e tij në Evropë, për të reduktuar ngarkesën mbi ofruesit e internetit.
Masa do të vlejë 30 ditë.
Ngarkesa në internet është rritur pasi miliona njerëz në Evropë janë të vetizoluar në shtëpi, për shkak të shpërthimit të koronavirusit.
Zvogëlimi i cilësisë së fotografisë do ta ulë konsumin e të dhënave nga Netflix për 25%, tha kjo kompani.
Ajo, megjithatë, i siguroi shikuesit se do të kenë fotografi të cilësisë së mirë.