Festohet në heshtje Viti i Ri në Iran
Lideri Suprem i Iranit, Ayatollah Ali Khamenei, ka thënë se qytetarët e këtij shteti kanë bërë sakrifica “shembullore” në betejën kundër pandemisë me koronavirus, që ka lënë të vdekur të paktën 1,284 persona në këtë vend.
Përmes një adresimi televiziv më 20 mars, për të shënuar Vitin e Ri Persian, Khamenei ka thënë se “sa i përket sëmundjes së fundit – përhapjes së koronavirusit – sakrificat kanë qenë aq shembullore, saqë edhe të huajt janë ndjerë të obliguar për t’i admiruar”.
Numri i të infektuarve dhe të vdekurve nga koronavirusi në Iran vazhdon të rritet, andaj edhe festimet e Vitit të Ri atje kanë kaluar në heshtje.
- Artikullin e plotë mund ta lexoni këtu.
Përse koronavirusi i “kursen” fëmijët?
Nga të dhënat e bëra publike duket se ata që kanë më shumë simptome dhe komplikime nga koronavirusi janë njerëz më të vjetër. Përse ky virus duket se i kursen fëmijët? Për Zërin e Amerikës përgjigjet Steven Zeichner, drejtues i Divizionit të Sëmundjeve Infektive Pediatrike, pranë Universitetit të Virxhinias:
Thaçi: Kosova po e menaxhon situatën me COVID-19
Presidenti i Kosovës, Hashim Thaçi, tha se institucionet në vend janë duke e menaxhuar gjendjen që ka krijuar koronavirusi, ndërsa u bëri thirrje qytetarëve që t’i zbatojnë masat e rekomanduara.
Në një postim në Facebook, Thaçi tha se Instituti Kombëtar i Shëndetësisë Publike është duke e kufizuar përhapjen e virusit COVID-19 dhe se Policia e Kosovës është duke e ruajtur rendin dhe qetësinë publike.
Për Forcën e Sigurisë së Kosovës, Thaçi tha se ajo është në gjendje gatishmërie me të gjitha kapacitetet e veta mjekësore dhe logjistike për të ndihmuar në tejkalimin e rrethanave të krijuara.
“Rolin kryesor tani e kanë qytetarët. Të kujdesemi për higjienën tonë. Ta ruajmë distancën fizike mes nesh. Të dalim nga shtëpitë vetëm kur kjo është e domosdoshme. Këto ditë janë kritike për ta kufizuar përhapjen e COVID-19 dhe për t’i lejuar kapacitetet ekzistuese që të përballen me rastet që paraqiten”, tha Thaçi.
Në Kosovë aktualisht janë 21 persona të infektuar me koronavirus.
Numri i viktimave në Spanjë kalon 1,000
Numri i njerëzve të vdekur nga koronavirusi në Spanjë ka arritur në 1,002, thanë të premten autoritetet.
Me këtë shifër, Spanja bëhet vendi i katërt në botë – pas Italisë, Kinës dhe Iranit – me më shumë se 1,000 njerëz të vdekur.
Autoritetet spanjolle thanë se në këtë vend, afro 20,000 njerëz janë të infektuar me koronavirus, ndërsa 1,588 janë shëruar.
