Veseli pranon humbjen, thotë se PDK-ja do të jetë në opozitë
Kryetari i Partisë Demokratike të Kosovë, Kadri Veseli tha në një konferencë për media se “kemi punuar shumë për të fituar zgjedhjet, por nuk fituam”.
“PDK do të kalojë në opozitë. Qytetarët kanë dhënë verdiktin e tyre dhe ne e pranojmë”, tha Veseli, duke shtuar se ata do të vazhdojnë të punojnë për “kombin dhe shtetin”.
Sipas të dhënave të KQZ-së, me mbi 70 për qind të votave të numëruara, PDK-ja renditet e treta me 21,35 për qind të votave.
DnV: Incident gjatë numërimit të votave
Vëzhguesit e koalicionit të organizatave joqeveritare “Demokracia në Veprim”, të cilët po përcjellin procesin e numërimit të fletëvotimeve, kanë raportuar se në fshatin Skivjan të Gjakovës, në shkollën “Ukshin Miftari”, ka ndodhur një incident ku një vëzhgues i një subjekti politik ka sulmuar fizikisht kryesuesit e këtij vendvotimi, duke penguar të njëjtin që të kryejë detyrën zyrtare.
Policia ka marrë nën kontroll vendvotimin, duke i larguar të gjithë komisionerët dhe vëzhguesit nga vendvotimi në fjalë.
Lexo edhe këtë: Ndalohen 20 persona lidhur me procesin zgjedhor
Mbi 25 mijë fletëvotime të pavlefshme
Sipas të dhënave të Komisionit Qendror të Zgjedhjeve nga mbi 80 për qind e vendvotimeve të numëruar, numri i fletëvotimeve të pavlefshme është 25 .088.
Në zgjedhjet e fundit lokale në Kosovë, të mbajtura në vitin 2017 numri i fletëvotimeve të pavlefshme ishte rreth 80 mijë.
Numri i madh i fletëvotimeve të pavlefshme nga zgjedhjet e kaluara ishte konsideruar si pasojë e mosinformimit të saktë të qytetarëve se si duhet të votojnë
Osmani: Presim rezultatet përfundimtare
Zyrtarët e Lidhjes Demokratike të Kosovës, kanë mbajtur edhe një konferencë për media. ku ka thënë se sonte nuk mund të shpallet fituesi i zgjedhjeve, derisa nuk të numërohen të gjitha votat.
Vjosa Osamni, që ishte kandidate për postin e kryeministres, tha se pas numërimit të votave me kusht dhe votave të qytetarëve nga diaspora do të dihet rezultati dhe do të flitet për hapat e tjerë.
"Është e domosdoshme të numërohen të gjitha votat. Njëherë duhet ta presim fituesin dhe vetëm pasi të numërohet edhe vota e fundit, do të mund të flasim pastaj për koalicione. Nëse fiton Lëvizja Vetëvendosje, LDK-ja do ta urojë zotin Albin Kurti", tha Osmani.
