Policia e Kosovës: Procesi zgjedhor, i qetë
Policia e Kosovës, përmes një komunikate për media, në aspektin e sigurisë procesin zgjedhor e ka vlerësuar të qetë dhe pa incidente madhore, të cilat në një mënyrë apo tjetër ndikuan në mbarëvajtjen e procesit zgjedhor.
Gjatë procesit zgjedhor, sipas Policisë së Kosovës, janë evidentuar disa raste të natyrave të ndryshme të cilat kanë rezultuar me arrestimin e 29 personave, prej tyre 23 persona janë ndaluar me vendim të prokurorëve kompetent të Prokurorisë së Shtetit.
“Policia e Kosovës mbetet e përkushtuar në garantimin e rendit kushtetues, krijimin e një ambienti të qetë dhe të sigurt për të gjithë qytetarët, duke përfshirë mbrojtjen e të drejtave njerëzore në përgjithësi deri në përfundim të gjithë procesit zgjedhor”, thuhet në komunikatën e Policisë së Kosovës.
Haradinaj: Garë e qetë dhe demokratike
Kryeministri në largim i Kosovës, Ramush Haradinaj në një postim në Facebook ka falënderuar institucionet shtetërore për përgjegjësinë e lartë të treguar përgjatë procesit të zgjedhjeve të parakohshme parlamentare.
“Gara e drejt dhe e qetë, e ngriti Kosovën dhe qytetarët e saj në një standard të ri të pjekurisë politike dhe demokratike, duke shërbyer si model shembull në rajon. Për këtë meritore janë të gjitha partitë politike, pa dallim. Uroj që me të njëjten nivel maturie, të mbyllet edhe ky cikël elektoral, duke i hapë rrugë pa vonesa, konstituimit të Kuvendit, dhe institucioneve të reja demokratike në vend”, ka shkruar Haradinaj.
Kurti: Si kryeministër, do t'ia shtrijë dorën e bashkëpunimit LDK-së
Lideri i Lëvizjes Vetëvendosje, Albin Kurti, ka shpallur fitoren e subjektit të tij politik në zgjedhjet e parakohshme parlamentare në Kosovë.
“Si kryeministër i Republikës së Kosovës, në legjislaturën e shtatë, e shpall fitoren e Lëvizjes Vetëvendosje në zgjedhjet 6 tetorit 2019”, u ka thënë Kurti medieve para selisë qendrore të Lëvizjes Vetëvendosje në Prishtinë.
“Qeveria e re duhet ta kompensojë një kohë të gjatë të humbur dhe mundësitë e shumta të çuara dëm deri më sot”, ka thënë Kurti.
Ai ka shtuar se që nesër do të fillojnë përgatitjet për formimin e Qeverisë së re të Kosovës, ndërkaq siç ka thënë ai, Lidhjes Demokratike të Kosovës “do t’ia shtrijë dorën e bashkëpunimit, si kryeministër i ri i Republikës së Kosovës.
KQZ: Prin Vetëvendosje
Këto janë rezultatet e zgjedhjeve, me mbi 90 për qind e votave të numëruara nga Komisioni Qendror i Zgjedhjeve:
Lëvizja Vetëvendosje 25.82 për qind
Lidhja Demokratike e Kosovës 24.95 për qind
Partia Demokratike të Kosovës 21.26 për qind
Aleanca për Ardhmërinë e Kosovës dhe Partia Socialdemokrate 11.55 për qind
Nisma Socialdemokrate, Aleanca Kosova e Re dhe Partia e Drejtësisë 4.94 për qind.
Lista Serbe 6.38 për qind.
Rezultatet preliminare nuk përfshijnë votat me kusht, votat me postë edhe votat e personave me nevoja te veçanta.
