DnV: 19.8 është përqindja e votimit deri në orën 13:00
Koalicioni i organizatave për vëzhgimin e zgjedhjeve në Kosovë, Demokracia në Veprim (DnV), ka thënë se deri në orën 13:00 kanë votuar 19.8 për qind e qytetarëve me të drejtë vote.
Margjina e gabimit sipas këtij koalicioni është 0.52 për qind.
Sipas të dhënave të vëzhguesve të DnV-së, pjesëmarrja e qytetarëve të Prishtinës në zgjedhje është 2 për qind më e madhe në krahasim me qytetet tjera.
Qytetet si Ferizaj, Gjilan dhe Mitrovicë, është thënë se kanë regjistruar daljet më të ulëta.
“Për dallim, në komunat me shumicë serbe dalja ka tejkaluar për 10% mesataren e daljes në nivel vendi”, është thënë mes tjerash në njoftim.
Burrat vs. gratë në votime
A e keni ditur se pavarësisht pse gra ka më shumë në Kosovë, burrat votojnë më tepër nëpër zgjedhje?
Edhe atë gati për 100,000 më shumë.
Burrat votojnë më shumë se gratë në Kosovë
KQZ-ja lejon votimin me letërnjoftim të skaduar
Zëdhënësi i Komisionit Qendror të Zgjedhjeve Valmir Elezi, ka thënë se qytetarët e Kosovës, që janë në Listat Përfundimtare të Votuesve, do të mund të votojnë edhe me letërnjoftime të skaduara.
Këtë vit, KQZ-ja ka larguar nga lista e votuesve rreth 122.000 persona, të cilët kanë qenë të regjistruar vetëm me dokumente të UNMIK-ut. Në këto zgjedhje është thënë se do të votohet vetëm me dokumente të Kosovës.
Të drejtë vote në këto zgjedhje kanë 1.794.862 qytetarë.
KQZ: Mbi 32 për qind e qytetarëve votuan deri në orën 15:00
Komisioni Qendror Zgjedhor (KQZ) ka njoftuar se deri në orën 15:00 në gjithë territorin e Kosovës kanë votuar 32.32 për qind apo 567.934 qytetarë të Kosovës.
Daka ka thënë se në periudhën e njëjtë kohore, në zgjedhjet parlamentare të vitit 2019, kanë votuar 29.28 për qind e qytetarëve me të drejtë vote apo 554.750 persona.