Ahmeti fton qytetarët të votojnë
Kandidati për kryetar të Prishtinës nga Lëvizja Vetëvendosje, Shpend Ahmeti, pasi ka votuar në një nga qendrat e votimit, ka ftuar qytetarët me të drejtë vote të shfrytëzojnë të drejtën e tyre për të votuar.
“Shfrytëzoj rastin t'i ftoj të gjithë ata që kanë të drejtë vote, të vijnë sa më herët të votojnë në një numër sa më të madh. Kjo është dita kur të gjithë e kanë të drejtën ta vendosin fatin e tyre, për shkak se komuna e prek jetën e qytetarëve në më shumë mënyra”, ka thënë Ahmeti.
Peterle: Proces i mirë zgjedhor
Shefi i Misionit Vëzhgues të Bashkimit Evropian, Alojz Peterle ka vizituar disa qendra të votimit dhe e ka vlerësuar procesin e deritashëm zgjedhor në Kosovë, të qetë e demokratik.
“Me disa probleme të vogla, nëse e jap një vlerësim të përgjithshëm, mund të them se procesi është duke shkuar mirë, apo thënë ndryshe shumë mirë”, ka thënë Peterle.
Deri në këto momente, ai tha se nuk po sheh dalje shumë të madhe të votuesve, por ka shfaqur shpresën se pjesëmarrja do të ndryshojë gjatë ditës.
Misioni Vëzhgues i Bashkimit Evropian ka rreth 70 vëzhgues të cilët janë shpërndarë nëpër komuna të ndryshme të Kosovës.
KQZ: Deri në orën 11:00 kanë votuar 6.90 për qind e votuesve
Komisioni Qendror i Zgjedhjeve ka njoftuar se deri në orën 11:00, nga 96 për qind e vendvotimeve, me më shumë se 1 milion e 350 mijë votues, kanë votuar rreth 90 mijë prej tyre, ose 6.90 për qind e votueseve.
Valmir Elezi, zëdhënës në KQZ-së, ka thënë se në raundin e parë, më 22 tetor në këto 19 komuna, në të njëjtën kohë patën votuar 8.78 për qind.
Në një konferencë për media, Elezi ka thënë se “duke u mbështetur në informacionet e deritashme nga qendrat e votimit, procesi zgjedhor është duke vijuar normalisht".
Pritjet e qytetarëve nga kryetari i ardhshëm i Prishtinës
Qytetarët e anketuar për Radion Evropa e Lirë japin mendimet e tyre rreth asaj se çfarë presin nga kryetari i ri i Prishtinës.
Norik Krasniqi, 20-vjeçar, qytetar i Prishtinës, ankohet për mungesë perspektive për të rinjtë. Ai thotë se e vetmja mundësi që të rinjtë mund të gjejnë punë pavarësisht kualifikimit, është puna e kamerierit:
“Unë pres që kryetari i ri të iniciojë çështjen e punësimit të të rinjve”.
Art Morina, 18-vjeçar, thotë se pret më shumë cilësi në arsim, e po ashtu edhe rregullim të kryeqytetit, duke përfshirë më shumë parqe, salla sportive e të ngjashme:
“Unë do të doja të ketë më shumë cilësi në arsim, pasi sapo kam përfunduar shkollën e mesme, dhe aty shumë gjëra kanë qenë nën nivel. Gjithashtu, pres më shumë rregullim të qytetit, e që qytetarit të Prishtinës t’i përmirësohet mirëqenia”.
Mentor Veseli thotë se kushdo që të jetë kryetar i Prishtinës, e ka një lutje për të - që ai të merret me problemet reale të qytetarëve.
“Pres nga kryetari i ri, kushdo që të jetë ai, që të mos merret me probleme të nivelit qendror, por në fokus të jetë mirëqenia e qytetarit të Prishtinës, duke përfshirë shërbimet shëndetësore, cilësinë e arsimit etj”, shprehet ai.
Por, Shkëlzen Bejta thotë se kushdo që të fitojë garën për kryetar të Prishtinës, do të duhej ta kishte përkrahjen edhe të Qeverisë, në mënyrë që të përfitojë dhe të shohë ndryshime edhe vetë qytetari:
“Mendoj se duhet bashkëpunim edhe me Qeverinë e Kosovës, në mënyrë që kryetarin e Prishtinës ta përkrahin e të përfitojë qytetari në gjëra të prekshme”.
Derisa Vjollca Fazliu, 30 vjeçe, qytetare nga Prishtina, ka një kërkesë më ndryshe nga qytetarët e anketuar. Ajo kërkon që punëtorët e sektorit privat të jenë më në fokus të të gjithë udhëheqësve, përfshirë edhe kryetarin e ri të Komunës së Prishtinës:
“Gjithmonë flitet për sektorin publik, për sektorin privat nuk ka asnjë përkujdesje, ndonëse punëtorët e sektorit publik i kanë kushtet më të mira se ata që punojnë në sektorin privat. Rritje të pagave ka për sektorin publik asnjëherë për ne. Unë do doja që të iniciohet kjo çështje, qoftë edhe nga kryetari i Prishtinës”.
Facebook Forum