Kelani: Proces i qetë zgjedhor
Policia e Kosovës njofton se procesi zgjedhor në aspektin e sigurisë, është duke kaluar qetë dhe pa ndonjë incident.
Baki Kelani, zëdhënës në këtë mekanizëm, thotë për Radion Evropa e Lirë, se “Policia e Kosovës vazhdon të jetë e angazhuar sipas planit operacional më qëllim të ruajtjes së rendit dhe sigurisë publike, që t'u ofrohet siguri të gjithë qytetarëve të Kosovës që në mënyrë të qetë dhe sigurt të ushtrojnë të drejtën e votës së lirë”, thotë Kelani.
Abrashi fton qytetarët të votojnë
Kandidati për kryetar të Prishtinës nga Lidhja Demokratike e Kosovës, Arban Abrashi, pasi ka votuar në një nga qendrat e votimit, i ka ftuar të gjithë qytetarët që ta ushtrojnë të drejtën e tyre kushtetuese dhe të votojnë.
“Sapo votova në raundin e dytë të zgjedhjeve për kryetar të Prishtinës. Votimi sot nuk ka të bëjë vetëm me preferencën për kandidatë cilido çoftë ai. Votimi ka të bëjë me pjesëmarrjen në qeverisjen. Votuesi vendos se si do të duket qyteti i tij në katër vitet e tij, pamja dhe menaxhimi i këtij qyteti, prandaj ftojë të gjithë ata që nuk kanë votuar ende të dalin dhe të votojnë”, thotë Abrashi.
DNV: Deri në ora 12, dalja në zgjedhje 10.7 për qind
Deri në orën 12:00 në raundin e dytë të zgjedhjeve lokale që po zhvillohen në 19 komuna të Kosovës, kanë votuar mbi 145 mijë qytetarë me të drejtë vote, ose 10.7 për qind e votuesve, kanë bërë të ditur përfaqësues të koalicionit të organizatave joqeveritare “Demokracia në Veprim”, që monitoron procesin zgjedhor.
Visar Muja, nga ky koalicion, në një konferencë për media, ka thënë se dalja e qytetarëve në zgjedhje, është më e ulët se sa në raundin e parë të zgjedhjeve që janë mbajtur më 22 tetor.
Ky koalicion, ndërkaq, ka identifikuar disa parregullsi që janë paraqitur gjatë procesit zgjedhor.
Parregullsitë e identifikuara janë: probleme me gjetjen e emrit në listat e votueseve, votimi familjar, fotografimi i votës, asistimi i votuesve dhe prania e personave të paautorizuar në qendrat e votimeve.
Delawie: Procesi po zhvillohet në mënyrën më të mirë të mundshme
Ambasadori i Shteteve Bashkuara të Amerikës, Greg Delawie, ka thënë se dita e zgjedhjeve në Kosovë, ka filluar në mënyrën më të mirë të mundshme. Delawie ka ftuar qytetarët e Kosovës që të dalin dhe të votojnë.
Ai, nëpërmjet rrjetit social Twitter ka bërë të ditur po ashtu se kongresistin Eliot Engel ka vizituar koalicionin e organizatave joqeveritare “Demokracia në Veprim”.
Facebook Forum