Presidenti i zgjedhur amerikan, Joe Biden ka prezantuar të martën ekipin e tij për siguri kombëtare, i cili ka konsideruar se do të rikthejë udhëheqësinë amerikane në botë, pas largimit të presidentit aktual, Donald Trump.
“Është një ekip që do të mbajë të sigurt shtetin dhe njerëzit tanë”, ka thënë Biden, teksa ka prezantuar emrat kryesorë për pozitat si: Sekretar Shteti, Këshilltar për Siguri Kombëtare, Shefe të Inteligjencës dhe emërime tjera kyçe në kabinetin e tij.
“Ky është ekip që reflekton faktin se Amerika është kthyer sërish. Gati për të udhëhequr botën, jo duke u tërhequr nga ajo”, ka thënë Biden, transmeton AFP.
Biden ka thënë se i zgjedhuri i tij për pozitën e Sekretarit të Shtetit, Antony Blinken, do të rindërtojë moralin dhe besimin në Departamentin amerikan të Shtetit, që është përgjegjës për marrëdhëniet diplomatike të Shteteve të Bashkuara.
Presidenti i zgjedhur ka thënë se ekipi i tij mishëron besimin se “Amerika është më e fuqishmja kur punon me aleatët e saj”.
Biden ka thënë se ka pasur shumë biseda telefonike me liderët botërorë “që i kanë treguar se si mezi janë duke pritur që SHBA-ja t’i kthehet rolit të saj historik si lidere globale mbi Paqësor dhe Atlantik, në gjithë botën”.
Përveç Blinkenit, ekipi i Bidenit përbëhet nga Jake Sullivan si Këshilltar për Siguri Kombëtare, Linda Thomas-Greenfield si ambasadore e SHBA-së në Kombet e Bashkuara, John Kerry si i dërguar për çështje klimatike.
Nëse konfirmohen nga Senati, Avril Haines do të kthehet në gruan e parë që do të marrë pozitën e Drejtores së Inteligjencës Kombëtare dhe Alejandro Mayorkas do të jetë shefi i parë latin i sigurisë kombëtare.
Kë ka zgjedhur Biden?
Shumë nga zgjedhjet që ka bërë Biden janë kolegë nga administratat e ish-presidentit Barack Obama, ku presidenti, tashmë i zgjedhur, ka shërbyer si nën-president.
Teksa ka prezantuar të nominuarit e tij, Biden ka thënë se ekipi i tij “do të na bëjë krenarë që jemi amerikanë”.
Gjashtë përzgjedhjet kyçe të së martës janë:
- Antony Blinken është nominuar si Sekretar Shteti – pozita më e rëndësishme në politikën e jashtme. Ai pritet të menaxhojë politikën e jashtëm të Bidenit që ka të bëjë me kthimin e lidhjeve me aleatët perëndimorë.
- Ish-Sekretari i Shtetit, John Kerry do të drejtojë përpjekjet e administratës së ardhshme për të luftuar ndryshimet klimatike. Ai ka qenë nga një arkitektët e Marrëveshjes së Parisit për Klimën, nga e cila është tërhequr presidenti Trump
- Avril Haines, ish zëvendës-drejtore e Agjencisë Qendrore të Inteligjencës (CIA), është nominuar si drejtorja e parë për Inteligjencë Kombëtare.
- Alejandro Mayorkas është burri i parë latin që është nominuar për të shërbyer si Sekretar për Siguri Kombëtare.
- Jake Sullivan është nominuar si Këshilltar për Siguri Kombëtare në Shtëpinë e Bardhë. Ai ka shërbyer si Këshilltar për Siguri Kombëtare i Bidenit, gjatë mandatit të dytë presidencial të Obamas.
- Diplomatja Linda Thomas-Greenfield është nominuar si ambasadore e SHBA-së në Kombet e Bashkuara. Ajo ka shërbyer gjatë presidencës Obama, duke përfshirë pozitën si sekretare për çështjet afrikane gjatë periudhës 2013-2017.
- Një zgjedhje e pritshme, por që është nuk është përmendur është ajo e pozitës së Sekretarit të Thesarit, që pritet ta zë Janet Yellen, e cila ka shërbyer si udhëheqëse e Rezervave Federale.
Tranzicioni i pushtetit presidencial
Prezantimi i ekipit të Bidenit ka ardhur teksa presidenti aktual amerikan, Donald Trump është pajtuar që të fillojë procesi i tranzicionit të pushtetit.
Administrata për Shërbime të Përgjithshme, agjenci federale që mbikëqyr dorëzimin e detyrës, ka thënë se pranon që Biden “është fitues” i zgjedhjeve të 3 nëntorit.
Ky vendim u garanton demokratëve qasje në miliona dollarë fonde, si dhe qasje në informacionet për siguri dhe zyrtarët qeveritarë, ashtu që administrata e re të nisë punën më 20 janar.
Trump ka thënë se Administrata për Shërbime të Përgjithshme duhet “të bëjë atë që duhet të bëhet”, ndonëse ka refuzuar që të pranojë humbjen, duke përsëritur pretendimet e paargumentuara për “mashtrime zgjedhore”.
Në një konferencë tejet të shkurtër për media në Shtëpinë e Bardhë, Trump ka falënderuar të martën punën që ka bërë administrata e tij dhe është larguar pa pranuar pyetje.
Sipas parashikimeve Biden ka fituar 306 vota elektorale për dallim nga Trump që ka fituar 232.
Kolegji Elektoral do të mblidhet më 14 dhjetor për të caktuar fituesin.
Për të fituar pozitën e presidentit, një kandidat duhet të fitojë 270 vota të Kolegjit Elektorale.
Të martën, guvernatori Tom Wof ka thënë se ka certifikuar fitoren e Bidenit në Pensilvani, një nga shtetet kyçe për të siguruar fitoren.
Një tjetër shtet, Miçigen, ka certifikuar rezultatin e njëjtë ditën e hënë.
