Protesta e veteranëve
Ka filluar seanca plenare e Kuvendit të Kosovës me të vetmen pikë të rendit të ditës – miratimin e amendamentit kushtetues për themelimin e Gjykatës Speciale. Miratimi i këtij amendamenti është i mundur vetëm me anë të dy të tretave të votave të deputetëve të Kuvendit.
Kryeministri i Kosovës Isa Mustafa ka prezantuar para Kuvendit amendamentin kushtetues për themelimin e Gjykatës Speciale.
Ai ka thënë se ky amendament bazohet në letërkëmbimin mes presidentes së Kosovës, Atifete Jahjaga dhe ish-shefes së diplomacisë evropiane, Catherine Ashton, që më pas ishte miratuar nga Kuvendi i Kosovës si marrëveshje ndërkombëtare.
Mustafa ka thënë se ky amendament nuk cenon sovranitetin dhe kushtetutën e Kosovës, andaj edhe ka ftuar të gjithë deputetët që ta miratojnë.
Bazuar në procedurat parlamentare, amendamenti është pritur të prezantohet edhe nga kryetarja e Komisionit për Legjislacion, Albulena Haxhiu, deputete e Lëvizjes Vetëvendosje. Por, ajo ka refuzuar ta bëjë këtë, duke e quajtur të turpshëm këtë amendament.