Forca të shtuara të Policisë së Kosovës janë vendosur përreth ndërtesës së Kuvendit të Kosovës, në kohën kur organizatat e dala nga lufta po protestojnë aty.
Veteranët e Ushtrisë Çlirimtare të Kosovës, janë duke protestuar para Kuvendi të Kosovës, duke kundërshtuar votimin e Gjykatës Speciale.
Kjo protestë është përkahur edhe nga tri partitë opozitare, Lëvizja Vetëvendosje, Aleanca për Ardhmërinë e Kosovës dhe Nisma për Kosovën.
Subjekti më i madh opozitar, Vetëvendosje, përmes një komunikate për media një ditë më parë tha se "në Kuvendin e Kosovës do të synohet ndryshimi i Kushtetutës, në dëm të Republikës. Kosovës po i imponohet një sistem paralel i drejtësisë, një gjykatë diferencuese në baza etnike që synon ndryshimin e të vërtetës mbi luftën çlirimtare të popullit të Kosovës”.
Kuvendi i Kosovës pritet të nxjerrë sot për miratim amandamentet kushtetuese të propozuara nga qeveria, me të cilat i hapet rruga ligjore themelimit të Gjykatës Speciale për Krime Lufte.
Kjo do të jetë hera e dytë që Kuvendi procedon me këto ndryshime, pasi që më 29 maj, me kërkesë të Partisë Demokratike të Kosovës kishte vendosur që të shtyjë votimin për një seancë tjetër