Udhëheqësit botërorë kanë dënuar ashpër shpërthimet vdekjeprurëse, që kanë goditur të hënën vijën e finishit në Maratonën e Bostonit, në Masaçusets.
Sulmet kanë vrarë tre njerëz, në mesin e tyre një djalë 8 vjeç, dhe kanë plagosur mbi 100 të tjerë.
Sekretari i përgjithshëm i Kombeve të Bashkuara, Ban Ki-moon, i ka cilësuar ato si “të tmerrshme”.
Presidenti rus, Vladimir Putin, ka thënë se “ky është një krim barbar” dhe ka ofruar ndihmën e Rusisë.
Presidenti i Afganistanit, Hamid Karzai, ka thënë se vendi i tij ndjen “dhimbjet dhe vuajtjet që shkaktojnë incidentet e tilla”.
Shpërthimet janë dënuar fuqishëm edhe nga presidenti i Komisionit Evropian, Jose Manuel Barroso.
“Më lejoni që në emër të Komisionit Evropian të shpreh ngushëllimet tona të thella për viktimat dhe familjet e tyre. Ne dënojmë çdo akt të dhunës dhe shprehim solidaritetin me miqtë tanë amerikanë në këtë ditë të trishtuar”, ka thënë Barroso.
Solidaritet me SHBA-në ka shprehur edhe presidentja e Kosovës, Atifete Jahjaga.
Në telegramin e ngushëllimit drejtuar presidentit amerikan, Barack Obama, Jahjaga ka dënuar “aktet e dhunshme, që kanë marrë jetët e qytetarëve të pafajshëm”.
Hetuesit e Byrosë Federale të Inteligjencës (FBI) janë duke ekzaminuar video-pamjet, të marra nga spektatorët në kohën e shpërthimeve.
Presidenti Obama nuk i ka cilësuar sulmet si terroriste, duke thënë se hetimet janë në vazhdim e sipër.
Në adresimin e shkurtër për gazetarë, Obama është zotuar se do të gjejë keqbërësit dhe se do të sjellë “peshën e plotë të drejtësisë” mbi ta.
“Jemi ende në fazën e hetimeve, por dua të përsëris: do të gjejmë se kush e ka bërë këtë dhe do ta mbajmë përgjegjës”, ka theksuar Obama.
Ai ka urdhëruar që burimet e plota të qeverisë federale të vihen në dispozicion për të ndihmuar viktimat dhe për të ndihmuar hetimet.
“Bostoni është një qytet i fortë, ashtu si edhe njerëzit e tij. Jam tejet i bindur se qytetarët e Bostonit do të bashkohen, do të kujdesen për njëri-tjetrin dhe do të lëvizin përpara si një qytet krenar. Populli amerikan do të jetë me ta në çdo hap”, ka thënë Obama.
Administrata Federale e Aviacionit ka vendosur zonë të ndalim-fluturimit mbi vendin e ngjarjes, ndërsa siguria është rritur në Nju Jork, Uashington, Llos Angjelles, San Francisko dhe qytete të tjera.
Disa raporte thonë se së paku një pajisje e pashpërthyer është gjetur në Boston dhe se është çmontuar nga ekspertët.
Rreth 23,000 vrapues nga dhjetëra vende kanë marrë pjesë në garën 42-kilometërshe, e cila konsiderohet si maratona më e vjetër në botë që ndodh vit për vit.
Edicioni i sivjetmë është mbajtur për nder të 26 njerëzve që kanë humbur jetën në masakrën me armë, në Njutaun të Konektikatit, dhjetorin e kaluar.
Gara mbahet të Ditën e Patriorit – një festë shtetërore në Masaçusets, e cila kujton betejat e luftës amerikane për pavarësi.(v.tela)
Fotogaleri
Shpërthimet në Boston
Tre persona janë vrarë dhe dhjetëra të tjerë janë plagosur nga dy shpërthime që kanë goditur të hënën vijën e finishit në Maratonën e Bostonit. Mediat amerikane raportojnë për së paku 144 të plagosur, 25 nga të cilët në gjendje kritike për jetën.
Përdorimi i përmbajtjes sonë
⚠️ Përmbajtja e ueb-faqes dhe/apo platformave të tjera digjitale të Radios Evropa e Lirë mbrohet nga ligjet amerikane dhe ndërkombëtare për të drejtën e autorit.
Mirëpresim ripërdorimin, ripublikimin dhe rishpërndarjen e përmbajtjes sonë, të publikuar në platformat tona digjitale, me kusht që të na citoni drejt si "Radio Evropa e Lirë", bashkë me linkun që çon te përmbajtja jonë origjinale.
