Gjakderdhje në Bengazi
Ambasadori Kristofer Stivens dhe 4 zyrtarë të tjerë të Departamentit të Shtetit janë vrarë gjatë një sulmi të turmës së zemëruar mbi konsullatën amerikane në Bengazi të martën në mbrëmje.
Obama tha se aty janë vrarë edhe tre amerikanë të tjerë.
Në një deklaratë të lëshuar nga Shtëpia e Bardhë, Obama ka dënuar sulmin dhe ka urdhëruar vënien në dispozicion “të të gjitha burimeve të nevojshme për të mbështetur sigurinë e personelit amerikan në Libi dhe për të rritur sigurinë në zyrat diplomatike në tërë globin”.
Persona të armatosur kanë sulmuar konsullatën në Bengazi dhe ia kanë vënë flakën asaj.
Dëshmitarët thanë se ndërtesa diplomatike është bastisur e plaçkitur para se të digjej. Ata thanë se ajo është dëmtuar rëndë nga bombat dhe granatat e hedhura.
Banorët e Bengazit të intervistuar afër konsullatës së shkatërruar amerikane, kanë thënë se sulmi është rezultat i zemërimit në lidhje me një film të buxhetit të ulët, i cili, siç thonë ata, e ofendon profetin Muhamed.
“Libianët nuk duan që dikush të thotë diçka të keqe mbi profetin e tyre. Profeti Muhamed nuk është Osama bin Laden. Ai nuk është kushdoqoftë. Ai është profeti ynë”, ka thënë një qytetar i Bengazit.
Filmi i titulluar, “Pafajësia e myslimanëve”, raportohet se është prodhuar në mënyrë të pavarur nga një regjisor në Shtetet e Bashkuara.
Wall Street Journal raportoi se ai është bërë nga Sem Basil, një izraelito-amerikan, i cili e përshkruan islamin si një “kancer”, ndërsa e paraqet profetin Muhamed “duke fjetur me femra.“
Agjencia e lajmeve Associated Press citon Basilin të ketë përshkruar se si të krishterët koptë janë shtypur në Egjipt.
Pjesë nga filmi janë postuar në YouTube me përkthim në arabisht. Pak orë para dhunës në Bengazi, qindra protestues në Egjiptin fqinj, kanë marshuar drejt ambasadës amerikane në Kajro në shenjë proteste ndaj filmit.
Dhjetëra protestues hipën mbi muret e ambasadës në Kajro. Ata grisën flamurin amerikan, që valonte në gjysmë shtizë për të shënuar përvjetorin e sulmeve terroriste të 11 shtatorit, dhe e zëvendësuan me një flamur islamik.
Një protestues, Hosam Jusef Ismail, e ka dënuar poshtërimin e profetit islamik nën pretekstin e lirisë së shprehjes.
“Nuk është e drejtë që një njeri të ketë të drejtë të bëjë çkado. Kjo do të ishte kundër interesave të një personi tjetër. Nuk ekziston një gjë e tillë si liria e pakufizuar. Edhe liria ka kufij".
"Bindjet themelore fetare duhet të respektohen nga të gjithë në botë. Ne jemi kundër këtij filmi, ne kemi dëgjuar se e fyen profetin, paqja qoftë mbi të, edhe pse unë personalisht nuk e kam parë atë. Por, ne jemi duke u përpjekur që të dërgojmë një mesazh në tërë botën se ne, si myslimanë, i kemi vijat e kuqe, dhe se ne kemi besimet themelore. Nëse mediat përpiqen që të na bëjnë të devijojmë nga besimet tona thelbësore, ne kurrë nuk do ta bëjmë një gjë të tillë”, tha Ismail.
Ndërkohë, ambasada e SHBA-së lëshoi një deklaratë që dënon “përpjekjet e vazhdueshme nga individë të këshilluar keq, që lëndojnë ndjenjat fetare të myslimanëve”.
Në deklaratë thuhet se fuqimisht kundërshtojnë veprimet e atyre që abuzojnë me të drejtën universale të fjalës së lirë për të lënduar besimet fetare të të tjerëve.”(a.i.)
Gjakderdhje në Bengazi
Ambasadori Kristofer Stivens dhe 4 zyrtarë të tjerë të Departamentit të Shtetit janë vrarë gjatë një sulmi të turmës së zemëruar mbi konsullatën amerikane në Bengazi të martën në mbrëmje.
