Рубрики

Новость часа

МахIмудова ПатIимат

Автор МахIмудова ПатIимат

Август 03, 2015
Хадусев щив?

2 августалда хIилла-рекIкI гьабун гIемер гIарац бикъиялъул щаклъи букIун, къуваталъул идарабаз ккун вуго Буйнакск мухъалъул бетIер Даниял ШихсагIидов. Официалиял гурел баяназда рекъон, хасал идарабазул гьединго щаклъи буго гьес террористазе кумек гьабулеб букIиналдаги. Экспертаз гьеб лъугьа-бахъин сентябралъ Дагъистаналда рукIине ругел муниципалиял рищиязда базабулеб буго. Гьезул пикруялда рекъон республикаялъул бетIерас гьел рищиязда жиндирго чагIазде дандечIей гьабун бажарулел чагIи тIагIинарулел руго.
Август 01, 2015
Экспертал: «Дагъистаналъул жеги чанги цевехъан вачун ине вуго тирелоялъ»

Дагъистаналда халат рахъунел руго республикаялъул пенсиязул фондалъул бетIер Сайгид МуртазгIалиевасда ва Гъизляр мухъалъул нухмалъулев Андрей Виноградовасда хурхун гьарулел хасал тадбирал.
Июль 29, 2015
Гъизляралда МуртазгIалиевасул ва Виноградовасул рахъккун 2000 чи данделъана

29 июлалъ Гъизляр мухъалъул Аверьяновка росулъ гьеб мухъалъул бетIер Андрей Виноградов ва Дагъистаналъул пенсиязул фондалъул нухмалъулев Сайгид МуртазгIалиевасул рахъ ккураб данделъи тIобитIана. Гьев кIиясдего чанго чи чIваялъул, террористияб къокъа гIуцIиялъул, экстремистазе кумек гьабиялъул ва изнугьечIого ярагъгуна наркотикал цIуниялъул гIайиб гIунтIизабулеб буго. Гьелда бан такъсирияб ишги рагьун буго.
Июль 28, 2015
Гьанже хIаралъухъги «чIегIераб» сияхIалде росулел руго Дагъистаналда

Гьал къоязда иргадулаб нухалда МахIачхъалаялда низам цIунулез полициялъул бутIаялдеги рачун экстремистазулгун хурхен гьабиялда щаклъи бугезул сияхIалде восун вуго 20 гIан чи. Щай гьел гьеб сияхIалде росаралалиги лъицаниги бичIчIизабун гьечIо. Жал гьеб сияхIалде росиялъе щибниги кьучI букIинчIин, гьеб иш жидер ихтиярал хвезаби бугин, гьелъие гIайибиял тамихIалде цIайилан абун республикаялъул прокуратураялде гIарзаги хъван буго гьел «чIегIераб сияхIалде» ккарал гIолилаз.
Июль 27, 2015
ФСБ-ялъ Гъизляр мухъалъул бетIер ккун вуго

26 июлалда къуваталъул идарабаз ккун вуго Гъизляр мухъалъул бетIер Андрей Виноградов. Гьев кквеялъе гIилла щибали официалияб къагIидаялъ къуваталъул идарабаз лъазабулеб гьечIо. «Экренлъи» радиоялъухъе щварал баяназда рекъон Виноградов ккун вуго такъсирчагIазул къокъаялъул бетIер хIисабалда.
Июль 24, 2015
Дербенталда рагьана Петр I-сул музей

24 июлалда Дербенталда рагьана Петр I-сесул музей. Гьеб базе Дагъистаналдаса олигарх Зиявудин МухIамадовасул «Сумма» компаниялъ хвезабун буго 200 гIан миллион гъурущ. Жеги гьеб музей шагьаралъухъеги кьун гьечIо компаниялъ, гьаб сагIат цадахъ хIалтIизабизе ракIалда бугин жидеда гьеб музейилан лъазабулеб буго «Суммаялъул» вакилзабаз. Гьеб тадбиралде Россиялдаса ва къватIисел пачалихъаздаса рачIарал гIалимзабаз лъазабуна, Петр I Дербенталде вачIун вукIараблъи гьеб хIакъикъияб тарихияб хIужа бугила, гьев вачIун вукIиналда щаклъулелги мекъал ругилан.
Июль 24, 2015
Дербент: некIсияб къедалъе гьабураб зарал 10 сонидаса гурони ракIалде щун гьечIо

Гьал къоязда Дербенталдаса жамагIатчагIаз Россиялъул тIалъиялдеги ЮНЕСКоялдеги гIарзал хъван руго, хасал чагIаз жидерго санагIалъабазе гIоло, шагьар бакьулъ букIараб некIсияб къед биххизабун бугин абун. Гьел гIадамал тIамихIалде цIайилан тIалаб гьабулеб буго гьез. Гьеб гурониги Дербенталда некIсиял, тарихиял бакIазде букIине кколеб кIвар кьолеб гьечIин, шагьаралъул 2000 сон тIубаялде къачIалелин абун чанги гьединал бакIал хвезарун ругинги лъазабулеб буго дербенталъулаз.
Июль 24, 2015
Флэш-моб Нарын-Хъалаялда

24 июлалда Дербенталда тIобитIана Петр I-ясул музей рагьиялда хурхараб байрам. Гьалбадерие экскурсия гьабулеб мехалда Нарын-хъалаялда ракIалдаги гьечIого кьурдизе байбихьана. Кьурдул флеш-моб гIуцIана "Лезгинкаялъ", хадур сверухъ рукIараздаги эхетун чIезе бажаричIо.
Июль 23, 2015
Тахшагьаралъул боцIул жидерго "мучIдул" руго

Гьал къоязда МахIачхъалаялда хIалтIизе лъугьун буго шагьаралда сверулеб боцIцIуе гьабураб хасаб штрафстоянка. Тахшагьаралъул нухмалъиялъ лъазабулеб буго хважаин гьечIого сверулеб батараб боцIи ккун гьенибе щвезабизе бугин ва гьелъул бетIергьабаз гьезда тIад лъураб гIакIа кьечIого гьеб нахъе бачинеги биччазе гьечIилан. Жакъа къоялда боцIи МахIачхъалаялъул бокьараб бакIалда батула, хIатта аслияб майданалдагун шагьар бакьулъ ругел ахакьги камуларо гьел.
Июль 22, 2015
Банкротлъиялдаса пайдаги букIине бегьула... лъиеялиго

Каспийскалъул цIергьабулеб заводалъ жибго банкротлъун рикIкIейилан лъазаби, гьеб къазехъин бугин абулеб жо кколарилан абулеб буго экспертаз. Ургъунго, заводалъул багьаги гIодобе ккезабун, гьелъул налъабиги тIаса инарун цо хасал чагIазе гьелъул приватизация гьабизе къваригIун батилин абулеб буго гьез. Заводалъул хIалтIухъабазул рагIабазда рекъон гьезул хIалтIуе щибниги квалквал гьечIо гьаб сагIат, букIарабго хIалалъ хIалтIулеб буго гьеб.
Июль 21, 2015
ГьоцIалъ ГЭС хIалтIизе биччачIо талат къоялъги

Дагъистаналда иргадулаб нухалда нахъбахъун буго ГьоцIдерил ГЭС рагьи. ТIалъиялъ гьеб рагьунгутIиялъе гIиллаби рицунел гьечIо, ГЭСалъул хIалтIухъабаз лъазабулеб буго гьеб биччазе хIадурун гьечIин жегийилан, гьеб балаго риччарал гъалатIал гьаже тIатунел ругилан.
Июль 20, 2015
"Информациялъулаб рагъ" Дербенталда

«Дербент» сайталда экстермистиял ва халкъаздагьоркьоб кьал багъаризабулел макъалаби хъван ругин абун чанго чияс гIарза хъван буго ФСБялде. Гьеб сайталъ Дербенталдаса азербайджаналъулаздеги, жибго Азербайджаналдеги данде жал хъвалел ругила, гIарацги кьун хасгьабун гьелъие тIамурал чагIи ругила гьеб сайт гIуцIаралин лъазабулеб буго гIарзачагIаз.
Июль 18, 2015
Лъимер хвеялъе гIайибиял тохтурзабазе тамихI гьабизехъин буго

Исана марталда Каспийскалъул азарханаялда лъабго сон бараб лъимер хвеялда бан такъсиргьабиялъул иш рагьун буго цIех-рехчагIаз. Тохтурзабаз заманалда букIине кколеб кумек гьабичIолъиялъ хванин гьеб лъимер, гьеб лъугьа-бахъиналъе гIайибиязе тамихI гьабизабичIого тезе гьечIин жидецайилан лъазабулеб буго хвараб лъимадул эбел-инсуца.
Июль 18, 2015
Ришват тIалаб гьабиялда щаклъи бугев 4 полициялъулав ккун вуго

Дагъистаналда кIиго къоялда жанив ришват тIалаб гьабиялда щаклъи букIун ункъго полициялъул хIалтIухъан ккун вуго. Гьез жидерго хъулухъалдаса пайдаги босун, гIадамал хIинкъизарун тIалаб гьабулеб букIун буго гIарацги автомобилалги. Дагъистаналъул цIех-рехалъул идараялъ гьеб киналдаго хурхун такъсиргьабиялъул иш рагьун буго. Гьел низам цIунулезда гьеб гIайиб тIадчIезабуни гьел 8 соналде щвезегIан туснахъ гьаризе бегьулел руго.
Июль 16, 2015
Краснодаралъул полициялъ дагъистаниял рухана

Гьал къоязда Краснодаралъул полициялъ цIогь гьабиялда щаклъи букIун ккурав дагъистанияв Муса Таиров вухун азарханаялде ккун вуго. Гьенисаги вачун низам цIунулез гьев къанунги хвезабун кквезехъин вукIиналъ, гьезда гьоркьое лъугьарай лъимер гьабизе йигей Таировасул эбелги юхун йиго полициялъулаз. Гьеб лъугьа-бахъиналда хурхун гьаб сагIат цIех-рех унеб буго.
Июль 16, 2015
Бащадаб лъагIалида жаниб дагъистаниязул харжал 3% дагьлъун руго

Гъоркьисалалде дандеккун Россиялда гIемерисел регионазда харжал гIодоре ккун ругин лъазабулеб буго финансазул аналитиказ. Гьел регионазда гьоркьоб буго Дагъистанги. Гьелъие аслияб гIиллалъун улкаялдаго бугеб кризис бугин рикIкIунеб буго гьез. Амма экономист Маир Пашаевас «Эркенлъи» радиоялъе бицана харжал гIодоре ккеялъе багьаналъун кризис гурони бакIалъул тIалъиялъул лъавукъаб сиясатги, нахъе ккараб экономикаги бугилан.
Июль 14, 2015
Муса Мусаевас хIалтIи шагьаралда гIадлу гьабиялдасан байбихьана

Гьал къоязда МахIачхъалаялъул мэрасул ишал тIуралевлъун тарав Муса Мусаевасе Дагъистаналъул тIалъиялъе санагIалъи бугев, малъа-малъараб гьабулев чи вукIиналъ кьунин гьеб хъулухъилан рикIкIунеб буго гIемерисел экспертаз. Хас гьабун тахшагьарлда бугеб бакIал раялъул системаялъе гIадлу гьабизелъун тарав чи ватизеги бегьулин гьевилан абураб пикруги буго гьезул. МахIачхъалаялъул нухмалъуде вачIинегIан Мусаев вукIана Дагъистаналъул бакIал раялъул, архитектураялъул ва коммуналиял хъулухъазул министрлъун.
Июль 13, 2015
Адвокат: «БетIерсверарав чи нугIлъун вукIине рес гьечIо»

Жиндирго мадугьал чIваялъул гIайибги гIунтIизабун низам цIунулез ккун йигей МахIачхъалаялдаса 60 сон барай Зейнаб Миркиевалъе туснахъалда гIазаб кьолеб бугин лъазабулеб буго гьелъул адвокатас. ЦIех-рехчагIаз жидерго хIалтIи букIине кколедухъ гьабулеб гьечIин, щибго гIайиб гьечIей гьей, гIадаллъарав чиясул баяназул кьучIалда чIвадарухъан яхъинаюлей йигин лъазабулеб буго гьелъул гIагарлъиялъги. Гьезул щаклъи буго Миркиевалъухъа буголъи бахъиялъе гIоло гьабулеб бугин къуваталъул идарабаз гьеб ишилан.
Июль 10, 2015
РахIму-цIобалъул гIуцIиял гIемер руго Дагъистаналда ...кагътида

Ахирал саназда Дагъистаналда хIалтIизе лъугьун буго гIолилаз гьабураб чанго рахIму-цIобалъул гIуцIи. Лъиениги цIар гьабичIого, жидерго бажариялдалъун гIарацги бакIарун рескъотIаразе, унтарал лъималазе кумек гьабулеб буго гьел гIолилаз. Цере киданиги рукIинчIел рахIму-цIобалъул аукционги, базаралгицин тIоритIизе лъугьун руго республикаялда.
Июль 10, 2015
МВДялъул цинтIаго интерес баккана РГВК "Дагъистан" телекомпаниялде... Щай?

Гьал къоязда Дагъистаналъул жанисел ишазул министерлъиялъ РГВК каналалда халгьаби байбихьун буго. Гьез лъазабулеб буго жидехъе баянал щун ругила каналалъул нухмалъиялъ къанун хвезабулеб бугин абун, гьеб бугила цIех-рех гьабиялъе гIиллайилан. Амма РГВКялъул хIалтIухъабазу л пикруялда рекъон низам цIунулезул ццин бахъун буго полициялъулаз къанун хвезабиялъул, гIадамазе гIакъуба кьеялъул хIакъалъулъ бицараб передача жидеца бихьизабиялъ, гьелдаса хадуб байбихьанила халгьабиялилан абулеб буго гьез.

Загрузить еще

XS

SM

MD

LG