د کرکټ د نړیوال جام په دوهمه لوبه کې ویسټ انډیز نن پاکستان ته ماته ورکړه.

د پاکستان ټول لوبغاړي په ۱۰۵ منډو اوټ شول او ویسټ انډیز په پنځلسم اوورو کې دا هدف پوره کړ.

د دې لوبې غوره لوبغاړی اوشن توماس و چې د پاکستان پر وړاندې یې څلور ویکټې واخیستې.

هغه وویل چې په نړیوال جام کې به همداسې ښې لوبې وکړي:"دا زما لپاره ډېر یو ښه پیل دی. موږ خپل پلان ډېر ښه تطبیق کړ. زه له خپل بالنګه خوند اخلم څو د ویسټ اندیز لپاره لوبې وګټم."

د ویسټ انډیز لوبغاړي کریس ګیل ان په دې کم هدف کې هم خپله پنځوسیزه پوره کړه.

پاکستان ته دا دوهمه ماته وه ځکه په تمریني لوبه کې یې له افغان لوبډلې ماته خوړلې وه.

تمه ده سبا د کرکټ په نړیوال جام کې افغانستان له اسټرالیا سره مخ شي.

د ۲۰۱۹ میلادي کال د کرکټ نړیوال جام د انګلستان او ویلز په کوربه توب پرون پنجشنبه پیل شوی او د جولای تر ۱۴مه دوام کوي.

د کرکټ د نړیوال جام په دویمه لوبه کې نن ویست اندیز د پاکستان ټول لوبغاړي په ۱۰۵ منډو اوټ کړل.

د ویسټ انډیز او پاکستان لوبه د انګلستان په ناتګهم ښار کې روانه ده.

پاکستان لومړی بیټینګ وکړ.

د ویسټ انډیز لوبغاړو اوس د هدف د پوره کولو لپاره لوبه پيل کړې ده.

د ویسټ انډیز بالر اوشان ټوماس څلور، لوبډل‌مشر جېسن هولډر درې ویکټې، اندرې راسل دوه ویکټې او شیلډن کټرول یوه ویکټه واخېسته.

پاکستان داسې وخت د نړیوال جام په رسمي خپل لوبغاړي ژر له لاسه ورکړل چې تمریني لوبه کې یې هم د افغانستان په وړاندې ماته خوړلې ده.

تمه ده د افغانستان د کرکټ ملي ټیم سبا شنبه د اسټرالیا په وړاندې لوبه وکړي.

افغانستان د ۲۰۱۵ کال په نړیوال جام کې په اسټرالیا یوه لوبه په لوی تفاوت بایللې وه.

د ۲۰۱۹ کال د کرکټ په نړیوال جام لوبو کې نن پاکستان او ویسټ انډیز سیالي کوي.

د دوی لوبه د انګلستان په ناتینګهم ښار کې په ځايي وخت په لس نیمو بجو پیلیږي.

پاکستان په تمریني لوبه کې له افغانستانه ماته خوړلې او ویسټ انډیز بیا په خپله تمریني لوبه کې نیوزیلنډ مات کړی دی.

تېره ورځ هم کوربه انګلستان د ۲۰۱۹ کال د کرکټ د نړیوال جام په پیل لوبه کې جنوبي افریقا ته ماته ورکړه.

سبا به د افغانستان د کرکټ ملي ټیم د اسټرالیا د کرکټ له ملي ټيم سره لوبه وکړي.

د یو ورځنیو لوبو په نړیوال جام کې دا د افغانستان دوهم حضور دی.

په ۲۰۱۵ میلادي کال کې افغان ټيم په اسټرالیا او نیوزلانډ کې د کرکټ نړیوال جام لوبولی و چې په ټولو لوبو کې یې یوازې سکاټلنډ مات کړی و.

د افغانستان د کرکټ ملي لوبدله به د شنبې په ورځ د کرکټ د نړیوال جام لپاره په سیالیو کې لومړۍ لوبه وکړي.

د افغانستان د کرکټ د ملي لوبډلې لومړۍ مسابقه د اسټرالیا په وړاندې ده.

د افغانستان د کرکټ بورډ مشر عزیزالله فضلي پرون د مې په دېرشمه، ازادي راډیو ته وویل: "زه ډاډ لرم چې زموږ ملي لوبډله به ښه لوبه وکړي، اسټرالیا ښه لوبډله لري او له پوره تیارۍ سره راغلې ده خو زه پر خپلو لوبغاړو باوري یم."

د پاکستان د کرکټ لوبډله به نن جمعه د ویسټ انډیز د کرکټ له لوبډلې سره مخامخ شي.

د انګلستان د کرکټ لوبډلې پرون جنوبي افریقا ته په ۱۰۴ منډو ماته ورکړه.

سبا شنبه د کرکټ د نړیوال جام لپاره بله سیالي د سریلانکا او نوي زیلانډ ترمنځ ده.

د کرکټ ۲۰۱۹ میلادي کال د نړیوال جام سیالۍ پیل شوې.

دغه سیالۍ چې په انګلستان کې پیل شوي په لومړي لوبه کې انګلستان او سویلي افریقا یو بل سره مخامخ دي.

د سیالۍ پچه سویلي افریقا ګټلې او مقابلې لوبډلې ته يې د منډو جوړولو بلنه ورکړې ده.

سبا د دې سیالیو دوهمه ورځ ده چې د پاکستان او ویسټ انډیز ترمنځ به لوبه ترسره کېږي.

دا سیالۍ د روان میلادي کال د جولای په ۱۴مه نېټه پای ته ورسېږي.

افغانستان به خپله لومړۍ لوبه د راتلونکي اوونۍ د شنبې په ورځ د دغه سیالیو اتلې لوبډلې استرالیا سره کوي.

د کرکټ اکثره شننونکي په‌دې باور دي چې ښايي انګلستان د کرکټ دا جام وګټي.

دوی وايي، انګلستان په خپل کور کې لوبېږي، لوبغاړي یې تر ټولو ښه له اب او هوا سره بلد دي او لوبډله یې هم غښتلې ده.

بل‌خوا اسټرالیا او هند هم د دغه جام دوه احتمالي ګټونکي بلل کېږي.

د اسټرالیا پخواني لوبغاړي بریټ لي د اسټرالیا د کرکټ وېب‌پاڼې ته ویلي چې استرالیا به یې ګټي.

هغه وايي" اسټرالیا پنځه ځلي نړیوال جام ګټلی او پوهېږي چې څنګه نړیوال جام وګټي."

د کرکټ بل نړیوال مبصر مارک والف وايي چې انګلستان به‌یې ګتي.

هغه وايي: "زه فکر کوم چې انګلنډ ډېره غښتلې لوبډله لري، بېټېنګ یې غښتلی دی، په خپل کور کې لوبیږي او په‌دې وروستیو کې ښه ځلیدلي دي."

د هندوستان د کرکټ لوبډلې په «ورام اپ» لوبه کې بنګله‌دېش لوبډلې ته ماتې ورکړه او په‌دې سره د کرکټ د نړیوال جام تمریناتي سیالۍ پای ته ورسېدې.

سبا پنجشنبه د نړیوال جام د رسمي سیالیو لومړۍ لوبه د انګلنډ او سوېلي افریقا ترمنځ ترسره کېږي.

افغانستان به خپله لومړۍ لوبه د جون په لومړۍ نېټه د استرالیا پر وړاندې ترسره کړي.

د افغانستان د کرکټ ملي ټیم نن دوشنبه د انګلستان د کرکټ له ملي ټيم سره تر نړیوال جام مخکې یوه تمریني لوبه کوي.

کرکټ بورډ وايي چې دا لوبه د ماسپيښين په دوو بجو د لندن په اوول نړیوال سټډیوم کې پيلیږي.

د کرکټ بورډ وياند فريد هوتک پرون د یکشنبې په ورځ ازادي راډيو ته وويل:

"د افغانستان د کرکټ ملي لوبډله د انګلستان د کرکټ له ملي لوبډلې سره خپله دوهمه د نړيوال جام تمريناتي لوبه کوي. افغانستان تردې مخکې خپله لومړۍ تمريناتي لوبه د پاکستان پر وړاندې وکړه چې له نېکه‌مرغه افغانستان وکولاى شول د پاکستان لوبډلې ته په درېيو ويکټو ماتې ورکړي."

دا لومړی وار و چې افغانستان په یو ورځنۍ لوبه کې پاکستان ته ماته ورکړه.

د افغانستان د کرکټ ملي ټيم لوبغاړي وايي چې د انګلستان پر وړاندې د لوبې لپاره پوره چمتووالی لري.

تمه ده د افغانستان د کرکټ ملي ټیم را روانه شنبه د ۲۰۱۹ میلادي کال د نړیوال جام لومړۍ رسمي لوبه د اسټرالیا په وړاندې وکړي.

د افغانستان د کرکټ ملي لوبډله سبا دوشنبه له انګلستان سره تمریناتي لوبه کوي.

دا لوبه د لندن په جَنوب کې د کینینګټن سیمې په اووال «Oval» لوبغالي کې کېږي.

د کرکټ بورډ مطبوعاتي مسؤل فريد هوتک نن ازادي راډيو ته وويل:

"ټاکل شوې سبا د افغانستان د کرکټ ملي لوبډلې له انګلستان ملي لوبډلې سره دوهمه تمریناتي لوبه وکړي. د یادونې وړ ده چې دا لوبه نړیوال جام سیالیو ته د افغانستان دویمه تمریناتي لوبه ده."

په انګلستان او ولز کې د کرکټ د نړیوال جام سیالۍ را روانه پنجشنبه پېل شي.

د سیالۍ تر رسمي پېل مخکې باید هره ګډون کوونکې لوبډله دوه تمریناتي لوبې وکړي.

د افغانستان لومړۍ تمریناتي لوبه د جمعې په ورځ د پاکستان په وړاندې وه او په درېیو وېکټونو يې له پاکستانه وګټله.

د کابل پولیسو د تېرې شپې د خپل سرو هوایي ډزو په تړاو ۴۳ تنه نیولي دي.

د کابل د امنیې قوماندانۍ د عامه اړیکو او رسنیو مسؤل سمونیار بصیر مجاهد ازادي راډیو ته وویل، دغه کسان چې د پولیسو له خبرداري سره سره یې هوایي ډزې کولې، د کابل له بېلابېلو سیمو ونیول شول.

ښاغلي مجاهد وویل:

"د کورنیو چارو وزارت رهبرۍ هدایت راکړ چې دغه کسان باید ژر تر ژره ونیول شي، زموږ پرسونل د کابل په بېلابېلو سیمو کې توظیف شول، ۴۳ کسان له وسلو سره ونیول شول او امنیې قومندانۍ ته انتقال شول، دوی به له قانون سره سم خپله سزا وویني."

د ښاغلي مجاهد په خبره، په دې هوایي ډزو کې تر اوسه د دوو کسانو د سطحي ټپي کېدو راپور ورته رسېدلی دی.

بل خوا د ننګرهار د والي له دفتره هم په یوې اعلامیې کې ویل شوي چې د خوشالۍ د هوایي ډزو له کبله درې تنه ټپیان د جلال اباد ښار حوزوي روغتون ته وړل شوي دي.

دا هوایي ډزې داسې مهال وشوې چې د افغانستان د کرکټ ملي لوبډلې پرون د پاکستان د کرکټ لوبډلي ته په دوستانه لوبه کې ماته ورکړه.

د کورنیو چارو وزارت له خلکو جدي غوښتنه کړې چې له غیر مسؤلانه کړنو څخه ډډه وکړي.