د افغانستان د ښځو چارو وزيره وايي، د ولسي جرګې په انتخاباتو کې د ښځو ونډه پراخه وه.

دلبر نظري نن له ازادي راډيو سره په مرکه کې وويل:

"واقعاً له پرون راهيسې مې چې خپله نظارت کړى او ځينې انتخاباتي ساحې مې کتلي، په ټاکنو کې د ښځو ګډون پراخ وو. په بېلابېلو ولايتونو کې ښځې له لوړو امنيتي ګواښونو او ستونزو سره- سره د رأيو د صندوقونو پر لوري لاړې."

د ولسي جرګې په ټاکنو کې د ګډون لپاره د ټاکنو پر شرايطو برابرو نېږدې ۹ میلیونه کسانو نومونه ثبت کړي چې ٣ میليونه، ١٨ زره او څلور اتيا تنه يې ښځې دي.

د ننګرهار ولایت په ۱۴ مرکزونو کې د ولسي جرګې دټاکنو په دوهمه ورځ رأيه اچونه روانه ده.

د ننګرهار د والي وياند عطا الله خوګياڼى وايي، دغه مرکزونه په شپږو ولسواليو کې دي چې پرون په‎کې د رأی اچونې بهیر ناوخته پیل شوی و او یا هم د نورو ستونزو له امله تړلي پاتې وو.

د والي وياند وايي، د امنیتي ځواکونو په همکارۍ له ولسوالیو مرکز ته د انتخاباتي موادو او د کارول شوو رأیو د انتقال بهيرهم پیل شوى دى.

د بلخ پوليسو د مرکز مزارشريف په يوه جومات کې د څلورو کسانو مړي پيدا کړي دي.

د بلخ د امنيه قوماندانۍ وياند شېرجان دُراني وويل، دغه کسان د وسله‎والو طالبانو له‎خوا په نهرشاهي ولسوالۍ کې وژل شوي او بيا يې مړي سيمې ته لېږدول شوي دي.

پوليسو تراوسه پورې نه‎دي ويلي چې وژل شوي کسان څوک دي؟ خو يوې سرچينې ازادي راډيو ته ويلي چې وژل شوي کسان په بلخ کې د ولسي جرګې د يوه کانديد څارونکي وو.

سرچينه وايي، دغه کسان د وسله‎والو طالبانو له‎خوا تېره شپه تښتول شوي او بيا وژل شوي دي.

د بلخ پوليسو ويلي چې د پېښې په اړه يې تحقيقات پيل کړي دي.

ذبيح الله مجاهد چې ځان د وسله والو طالبانو وياند معرفي کوي، ويلي چې په‎دې قضيه کې دوى لاس نه‎لري.

په افغانستان کې د ولسي جرګې د پرونيو انتخاباتو په دوام نن د ٢٢ ولايتونو په څه باندې ٢٥٠ مرکزونو کې رايه اچونه روانه ده.

دا هغه مرکزونه دي چې خلک نه وو توانېدلي د ولسي جرګې په پرونيو انتخاباتو کې رأيه ورکړي.

د ټاکنو خپلواک کمېسيون وياند سيد حفيظ الله هاشمي نن ازادي راډيو ته وويل:

"زه هيله مند يم چې نن تر پايه پورې هغه کسان چې پرون په ټاکنو کې له ګډونه بې برخې پاتې وو، وکړاى شي خپلې رأيې وکاروي."

د ټاکنو خپلواک کمېسيون وايي، پرون خلکو د ولسي جرګې د انتخاباتو لپاره په ٤٥٠٠ مرکزونو کې رأی ورکړي.

د ټاکنو د خپلواک کمېسیون مشر ګلاجان عبدالبدیع صیاد ازادي راډيو ته وويل، دوى اټکل کوي، ښايي تر پنځو میليونو پورې کسانو په انتخاباتو کې خپلې رأی کارولي وي.

هغه افغانان چې پرون یې د رأیو د مرکزونو د نه پرانېستل کېدو رأی استعمال نه کړای شوې، نن رأی اچوي.

په کابل کې د ازادي راډیو خبریالان وايي چې د رأی ورکولو مرکزونه په ځنډ پرانېستل شول، خو تراوسه پورې هغه ډول تخنیکي ستونزې نه ویني چې پرون یې له کبله ډېر خلک په ساعتونو منتظر پاتې شول.

د انتخاباتو خپلواک کمېسیون وايي چې نن به د رأی ورکولو ۴۰۱ مرکزونه پرانېستې وي چې ۵۰۰ اضافي کارکوونکي ورلېږل شوي دي.

د انتخاباتو د خپلواک کمېسیون مشر ګلاجان بدیع صیاد وايي، پر ټاکنیز بهیر د خلکو صفر شوی اعتماد یې لوړ کړ.

صیاد پرون شنبه د اکټوبر ۲۰مه، په کابل کې په خبري غونډه کې ومنله چې د بایومټریک سیسټم د نوي والي او د وخت د کموالي له امله تخنیکې ستونزې پېښې شوي، خو ډېر خلک وتوانېدل چې رأی ورکړي.

صیاد زیاته کړه:

"زه له خپلو وطنوالو چې د رأیو مرکزونو ته راغلل مننه کوم چې مرکزونو ته راغلل او د خلکو د روغې دعوې یې باطلې کړې. دا د دې ښکارندوي ده چې خلک له انتخاباتو سره څومره مینوال دي او د انتخاباتو کمېسیون څومره کار کړی چې هغه اعتبار چې صفر درجې ته را ټيټ شوی و، داسې مرحلې را ورسوي چې میلیونونه وګړي له ټولو ستونزو سره هم له کورونو را ووځي او خپلو کاندیدانو ته رأی ورکړي."

د انتخاباتو خپلواک کمېسیون ویلي چې په هغو مرکزونو کې به چې د تخنیکې ستونزو له امله نه و پرانېستل شوي، نن یکشنبه د اکټوبر ۲۹مه بیا انتخابات وشي.

په افغانستان کې د شفافو انتخاباتو بنیاد وايي، په انتخاباتي‌ مرکزونو کې د رأی ورکولو د بهیر ناوخته پیل سبب شو چې د دوی ناظرین له ستونزو سره مخامخ شي.

دې ادارې پرون شنبه د اکټوبر۲۰مه په یوه بیان کې وویل چې په ۲۵ ولایتونو کې یې ۱۸۵ ناظرانو د مازدیګر له څلور نیمو بجو د ماښام تر نهو بجو انتخاباتي بهیر څارلی، خو د هوا له تيارې سره د هغوی ښځینه څارونکې مجبوره شوي چې کورونو ته ولاړې شي.‌

ټیفا په خبرپاڼه کې دا چې د انتخاباتو بهیر د یکشنبې ته اوږد شو شدیده اندېښنه څرګنده کړې او ویلي یې دي‌ چې دا کار درغلیو ته لاره جوړوي.

د انتخاباتو د څارنې دې ادارې د شنبې د ورځې په ټاکنو کې تخنیکي ستونزو ته اشاره کړې او ویلي یې دي چې د ټاکنو د پایلې په اړه اندېښنه لري.

د انتخاباتي شکایتونو کمېسیون اووه کاندیدان له وروستي لېسته و ایستل.

په ایستل شوو کاندیدانو کې روحینا ولیزۍ له میدان وردګ، عبدالرکریم شفق له فراه، حبیب الله غوریاني له هرات، عبدالله ساحل له کندز، غلام نبي ساقي له غور، احمد شاه سادات حسیني له هرات او سمیرا خیرخوا له بلخ نه شامل دي.

د شکایتونو کمېسیون مسؤلینو نن د یوه مطبوعاتي کنفرانس پرمهال دغه لېست اعلان کړ.

د شکایتونو کمېسیون وايي، روحینا ولیزۍ، غلام نبي ساقي، عبدالله ساحل، له دندې نه د استعفا نه کولو، سمیرا خیرخوا د قانوني سن نه پوره کولو، عبدالکریم شفق او حبیب الله غوریاني د حبس لرلو او احمد شاه سادات حسیني د بهرني تابعیت لرلو له امله له وروستي لېسته ایستل شوي دي.

تر دا مهاله دغه لیري کړل شویو کاندیانو په دې اړه څه نه دي ویلي.

ټاکل شوې د ولسي جرګې انتخابات راتلونکې شنبه د مېران پر ۲۸ وشي.

د افغانستان د انتخاباتو خپلواک کمېسیون وايي چې د را روانو ټاکنو لپاره عملیاتي پروګرام یې بشپړ شوی او تیار دي چې د مېزان په ۲۸مه د ولسي جرګې انتخابات وشي.

د دې کمېسون مشر ګل اجان عبدالبدیع صیاد نن په کابل کې خبریالانو ته وویل، ډاډه دی چې د را روانې شنبې په ورځ به د افغانستان په ۳۳ ولایتونو کې ټاکنې وشي.

صیاد پر افغانانو غږ وکړ چې په ټاکنو کې ګډون او له خپله حقه دفاع وکړي.

د افغانستان د ټاکنو خپلواک کمېسیون ویلي چې د انتخاباتو په ورځ په ۲۱ زره حوزو کې ۵۱۰۰ د رایې ورکولو مرکزونه پرانیزي.

د افغانستان د انتخاباتو خپلواک کمېسیون وايي، د نن ورځې ترپایه به پنجشیر، پروان او کاپیسا ته حساس او غیرحساس انتخاباتي مواد ورسوي.

د انتخاباتو د خپلواک کمېسیون ویاند سید حفیظ الله هاشمي نن سهار د ازادي راډیو ته وویل چې ولسوالیو ته د حساسو او غیر حساسو انتخاباتي موادو د لېږلو بهیر د میزان په ۱۷مه پېل شوی او تر ۲۵مې بشپړ شي.

د ولسي جرګې انتخابات د میزان په ۲۸مه، له غزني پرته په نورو ټولو ولایتونو کې کېږي.

د کمېسیون په وینا، د ټاکنو په ورځ به په ۲۱۰۰۰ انتخاباتي حوزو کې لږترلږه ۵۱۰۰ مرکزه د رأی ورکولو لپاره پرانېستل شي.