له نشه‎يي موادو سره د مبارزې ځانګړو پولیسو ۴۷ کسان د لسګونه کېلو ګرامه نشه‎يي موادو په تور نیولي دي.

د کورنیو چارو وزارت له نشه‎يي موادو سره د مبارزې معینیت ویاند اسدالله یادګاري د چهارشنبې په ورځ ازادي راډیو ته وویل چې له نشه‎يي موادو سره د مبارزې ځانګړو پولیسو په تېره یوه اوونۍ کې په کابل او نورو ولایتونو کې ۳۳ عملیاتونه کړي چې په نتيجه کې یې ۴۷ کسان تر ۶۵۲ کېلو ګرامو زیاتو نشه‎يي موادو سره نیولي او بيا يې له نشه‎يي موادو سره د مبارزې عدلي او قضايي مرکز ته سپارلي دي.

له نیول شویو کسانو څخه تر دوو کېلو او ۸۳۲ ګرامو ډېر هیروئین او ۳۵۴ کېلو ګرامه تریاک نیول شوي چې په هېواد کې دننه او بهر ته‎یې قاچاق کول.

د یادونې وړ ده چې له نشه‎يي موادو سره د مبارزې پولیسو د بدخشان ولایت په ارګو ولسوالۍ کې ۱۵۰ جریبه ځمکه د کوکنارو له بوټو څخه پاکه کړې ده.

د هرات ولایت د هوايي ډګر پولیسو دوه کسان هغه مهال ونیول چې غوښتل‌یې نشه‎يي مواد هند ته قاچاق کړي.

د هرات د هوايي ډګر د سرحدي پولیسو قوماندان محمد ناصر نېک‎نام ازادي راډیو ته وویل چې دا کسان د هرات ولايت اوسېدونکي دي.

دوی د هیروئینو ۱۸۳ کپسولونه په خپلو خېټو کې ځای پر ځای کړي وو او غوښتل‎یې په مستقیم پرواز کې يې د هندوستان ډېلي ته قاچاق کړي.

د یادونې وړ ده چې په تېرو ۴۵ ورځو کې د هرات ولايت سرحدي پولیسو ۲۳ کسان نیولي چې غوښتل‎یې ۱۲ کېلو ګرامه نشه‎يي مواد په خپلو خېټو کې هند ته قاچاق کړي.

د امریکا متحده ایالاتو فډرال محکمې یو پاکستانی د نشه‎يي موادو د شبکې د رهبرۍ په تور په عمري بند محکوم کړ.

د امریکا متحده ایالاتو د عدلیې وزارت په خبرپاڼه کې راغلي چې د شهباز خان په نوم پاکستانی په ۲۰۱۶ میلادي کال په لیبریا کې نیول شوی او بیا د امریکا متحده ایالاتو ته سپارل شوی دی.

دا پاکستانی په افغانستان او پاکستان کې د نشه‎يي موادو د یوې قاچاقي شبکې په رهبرۍ تورن شوی چې په زرګونه کېلو ګرامه هیروئین‌یې د هوا او سمندر له لارې امریکا ته قاچاقول.

د نیویارک فډرال محکمې قاضي د قضائيه غونډې په پای کې اعلان وکړ چې شهباز خان به لومړی نشه‎يي مواد له افغانستان او پاکستانه امریکا ته قاچاق کول او بيا به‎يې له‎دې لارې لاسته راغلې پیسې هغو جنګي ډلو ته ورکولې چې له افغان او بهرنیو ځواکونو سره جګړه کوي.

پر شهباز خان د محکمې وروستۍ پرېکړه به د روان میلادي کال په اکټوبر میاشت کې وشي.

په تېره یوه اوونۍ کې تر ۱۰ زیات قاچاق کوونکي له نشه‎يي موادو سره د مبارزې عدلي او قضايي مرکز له‎خوا په بند محکوم شوي دي.

له نشه‎يي موادو سره د مبارزې عدلي او قضايي مرکز ویاند خالد مؤحد د چهارشنبې په ورځ ازادي راډیو ته وویل، ۱۴ کسان چې د نشه‎يي موادو د قاچاقو په ۱۴ قضیو کې نیول شوي، د ابتدائیه او استېناف محکمو له‎خوا له ۶ میاشتو څخه نيولې تر ۲۰ کالو پورې پر بند محکوم شول.

ښاغلی مؤحد وايي، په تېره اوونۍ کې ۳۳ کسان چې د افغان ځواکونو له‎خوا په ۲۲ عملیاتو کې نیول شوي، له نشه‎يي موادو سره د مبارزې عدلي او قضايي مرکز ته د نورو څېړنو لپاره لېږل شوي دي.

دی وايي:

"نهه کسان د هیروئینو د قاچاق په بېلابېلو قضیو کې نيول شوي چې غوښتل‎یې د حامد کرزي له تړیوال هوايي ډګره هیروئین قاچاق کړي، دوی د نورو څېړنو لپاره عدلي او قضايي مرکز ته سپارل شوي دي. دې کسانو په خپلو خېټو او سفري بکسونو کې نشه‎يي مواد ځای پر ځای کړي او غوښتل‎یې چې هند ته‌یې قاچاق کړي."

له دې کسانو سره ۳۹ کېلو ګرامه هیروئین، ۲۵۴۰ کېلو ګرامه مورفین، ۵۶۹۰ کېلو ګرامه تریاک، ۵۴ ګرامه شیشه یا کرسټال او ۵۲۵۸ ټابلېټ «K» ګولۍ هم نیول شوي دي.

له نشه‌يي موادو سره د مبارزې پولیسو په تېره یوه اوونۍ کې ۱۶ کسان په هېواد کې دننه او بهر د ۵۶۲ کېلو ګرامه نشه‌يي موادو د قاچاق په تور نیولي دي.

له نشه‌يي موادو سره د مبارزې عدلي او قضایي مرکز ویاند خالد موحِد د چهارشنبې په ورځ ازادي راډیو ته وویل چې دا ۱۶ کسان‌یې په څلورو ولایتونو کې د قاچاق په پېښو کې نیولي او له دوی سره‌یې ۱۶ کېلو ګرامه هیروئين، ۱۰۱ کېلو ګرامه تریاک، ۴۴۴ کېلو ګرامه چرس او تر یوې کېلو ډېره شیشه یا کرسټال او کيمیاوي مواد هم نیولي دي.

له نیول شویو کسانو څخه دوو تنو یې غوښتل چې په خپلو خېټو او سفري بکسونو کې ځای پر ځای کړي هیروئين د حامد کرزي له هوايي ډګر څخه هند ته قاچاق کړي.

ځایي چارواکي وایي چې د هرات پولیسو ۱۳ کسان د نشه‌يي موادو د قاچاق په تور ونیول.

د هرات ولایت امنیه قوماندان امین‌الله امرخېل رسنیو ته وویل، دا ۱۳ کسان د هرات د هوايي ډګر پولیسو او نشه‌يي موادو سره د مبارزې مدیریت په ګډو عملیاتو کې نیولي چې غوښتل‌يې د هیروئينو ۷۳۸ کپسولونه په خپلو خېټو کې هند ته قاچاق کړي.

نوموړي وویل:

"د پولیسو له عملیاتو سره قاچاق کوونکي هم د قاچاق لارو چارو ته بدلون ورکوي، د قاچاق کوونکو وروستۍ طریقه په خېټو کې د نشه‌يي موادو انتقال دی، په بېلابېلو وسايلو، بکسونو، کامرو او ان د مربا او رُبو په سر پټو قطیو کې نیول شوي دي."

له دې ۱۳ کسانو سره ۸ کېلو ګرامه نشه‌يي مواد نیول شوي دي.

د هرات پولیسو د روان لمریز کال له پیل څخه بيا تر اوسه ۴۸ کسان نیولي او عدلي او قضايي مرکز ته‌يې سپارلي دي.

په دې موادو کې تر ۳۷۵ کېلو ګرامو ډېر نشه‌يي مواد یې په هېواد کې دننه او بهر قاچاق کول.

په فراه ولایت کې یو ایرانی د ۲۹ کېلو ګرامو نشه‌يي موادو د قاچاق پر مهال ونیول شو.

د فراه د امنیه قوماندانۍ په خبرپاڼه کې راغلي، یو ایرانی چې غوښتل‌یې ۲۹ کېلو ګرامه نشه‌يي مواد ایران ته قاچاق کړي، د ابو نصر فراهي له سیمې څخه تېرېده چې پولیسو د تلاشۍ پر مهال ونيو.

په نیول شویو موادو کې ۲۸ کېلو ګرامه کرسټال او ۹۴۰ ګرامه تریاک شامل دي چې د اوبو په بوتلونو کې ځای پر ځای شوي او غوښتل‌يې چې د ټانکر په وسيله‌يې انتقال کړي.

د یادونې وړ ده چې ایرانی ټانکر چلوونکی نیول شوی او له نشه‌يي موادو سره د مبارزې عدلي او قضايي مرکز ته سپارل شوی دی.

دوه کسان چې غوښتل‌یې په خپلو خېټو کې ځای پر ځای کړي هیروئين له هېواده بهر قاچاق کړي، د کندهار د ملي امنیت کارکوونکو ونیول.

په هغه خبرپاڼه کې چې د کندهار د ملي امنیت ریاست له‌خوا خپره شوې راغلي چې دې دوو کسانو د هیرويينو ۳۵ کپسولونه په خپلو خېټو کې ځای پر ځای کړي او غوښتل‌یې د کندهار د هوايي ډګر له لارې یې هند ته قاچاق کړي چې هوايي ډګر ته تر رسېدو مخکې د ملي امنیت کارکوونکو ونیول.

په تېرو دوو اوونیو کې دا دوهم ځل دی چې د کندهار د هوايي ډګر له لارې بهر ته د هیروئينو قاچاق کوونکي نیول کېږي.

د ننګرهار پولیسو د لسګونه کېلو ګرامو نشه‌يي موادو د قاچاقو مخه ونیوله.

د ننګرهار د امنیه قوماندانۍ ویاند حضرت حسین مشرقیوال د سې شنبې په ورځ ازادي راډیو ته وویل، یو تن چې غوښتل‌یې ۴۴۰ کېلو ګرامه چرس، ۹ کېلو ګرامه هیروئین د یو موټر په واسطه د ننګرهار له بټي کوټ ولسوالۍ څخه اچین ولسوالۍ ته انتقال کړي، له نشه‌يي موادو سره د مبارزې پولیسو د لارې په اوږدو کې ونیول.

د یادونې وړ ده چې تېره اوونۍ هم د ننګرهار پولیسو په دوو بېلا بېلو پېښو کې ۵۶۱ کېلو ګرامه نشه‌يي مواد نیولي او قاچاق کوونکي یې عدلي او قضايي مرکز ته سپارلي دي.

په هرات ولایت کې درې تنه د نشه‌يي موادو د قاچاق په تور ونیول شول.

د هرات ولایت د هوايي ډګر د سرحدي پولیسو قوماندان محمد ناصر نیک نام رسنیو ته وویل چې د هرات د هوايي ډګر پولیسو هغه دوه کسان نیولي چې غوښتل‌یې تر یوه کېلو زیات نشه‌يي مواد هند ته قاچاق کړي.

نوموړي زیاته کړه:

"دې قاچاق کوونکو هر یوه د هیروئینو ۵۰ کپسولونه په خپلو خېټو کې ځای پر ځای کړي او د دې قاچاق په بدل کې درې زره امریکايي ډالر ورکړل شوي و."

په یوه بله پېښه کې یو تن د پوليسو د تلاشۍ پر مهال نيول شوی چې غوښتل‌یې ۶ کېلو ګرامه تریاک د هرات ښار ته انتقال کړي، دی عدلي او قضايي مرکز ته سپارل شوی دی.

د يادونې وړ ده چې په دې وروستیو اوونیو کې د نشه‌يي موادو قاچاق زیات شوی او د قاچاق کوونکو د نیولو کچه هم ورسره لوړه شوې ده.