په بغلان ولايت کې تر دوه زره کيلوګرامو ډېر نشه يي مواد وسوځول شول.

په دې نشه يي موادو کې دوه زره او ۶۸۵ کيلوګرامه هيرويين، ښیښه، نشه يي ګولۍ، چرس او تارياک شامل وو. دا هغه نشه يي مواد وو چې په تېرو دوو کلونو کې په ۱۲۴عملياتو کې په بغلان ولایت کې نيول شوي وو.

د بغلان امنیه قوماندان جاوېد بشارت ازادي راډيو ته وويل چې د دې عملیاتو په بهير کې ۲۰۶ تنه نيول شوي او د عدلي او قضايي ادارو له خوا په مجازاتو محکوم شوي دي.

په زابل ولایت کې تر ۲۰ کيلوګرامو ډېر نشه‌يي مواد د قاچاقو پر مهال ونيول شول.

د زابل له نشه‌يي موادو سره د مبارزې ځانګړو پولیسو په کلات ښار کې د موټرو د تلاشۍ پر مهال په يوه موټر کې ۲۱ کيلوګرامه ښیښه، دوه کيلوګرامه هيروئين او يو کيلو نااشنا نشه‌يي مواد نيولي دي.

د زابل امنیه قوماندان ويس صميمي ازادي راډيو ته وويل چې دا نشه‌يي مواد په هرات کې په يوه بس موټر کې بار شوي او په پام کې وه چې کابل ته قاچاق کړل شي.

په کندهار او هرات ولایتونو کې څلور قاچاق کوونکي له څه د پاسه ۱۴ کیلوګرامه نشه‌يي موادو سره ونيول شول.

د کندهار ولایت پولیسو درې کسان هغه مهال ونیول چې غوښتل‌یې پنځه کیلوګرامه ښیښه او څلور کیلوګرامه هیروئین په بس موټر کې له فراه څخه کندهار او بیا له هغه ځايه کابل ولایت ته قاچاق کړي.

د هرات د امنیه قوماندانۍ ویاند عبدالاحد ولي‌زاده ازادي راډیو ته وویل، یو سړی هغه مهال له پنځو کیلو او ۸۵۰ ګرامه چرسو سره یوځای ونیول شو چې دا مواد یې د هرات ښار په ۱۵مه ناحیه کې پر پرچون خرڅوونکو باندې پلورل.

له کابل ښار څخه لسګونه معتادین راټول او د درملنې مرکزونو ته يووړل شول.

د عامې روغتیا وزارت د جوزا میاشتې پر ۲۲مه نېټه د کابل ښار له لومړۍ، دوهمې، اوومې، اتمې او ۱۲مې ناحیو څخه ۱۵۰ معتادین راټول او د درملنې لپاره د ابن سینا زر بستریز روغتون ته يووړل.

د معتادینو د درملنې زر بستریز روغتون ساحوي امر جمال عبدالناصر ناصري ازادي راډیو ته وویل، دا معتادین به د درملنې په مرکز کې د ۴۵ ورځو لپاره بستري وي.

کابل ته تر ۲۷ کيلوګرامو ډېرو هیروئینو د قاچاق مخه ونیول شوه.

۲۷ کیلو او ۷۰۰ ګرامه هیروئین هغه مهال د خیرخانې په کوتل کې ونیول شول چې په خټکو بار موټر کې له کندز ولایت څخه کابل ته قاچاق کېدل.

له نشه‌یي موادو سره د مبارزې معینیت د رسنیو دفتر ازادي راډیو ته وویل چې د دې موادو د قاچاقو په تور موټر چلوونکی هم نیول شوی دی.

په هرات ولايت کې د شرابو يوه کارخونه ويجاړه شوه.

له نشه يي موادو سره د مبارزې ځانګړو پولیسو او هرات قوماندانۍ په ګډه د شرابو جوړولو پر يوه کارخونه عمليات وکړل چې په نتيجه کې يې اته زره لېټره شراب او د شرابو جوړولو وسايل د پولیسو لاسته ورغلل چې وروسته د شرابو جوړولو کارخونه ويجاړه شوه.

د هرات د امنيې قوماندانۍ وياند عبدالاحد ولي زاده ازادي راډيو ته وويل چې د دې کارخونې او شرابو په تور دوه تنه هم نيول شوي دي.

د افغانستان په څو ولايتونو کې د نشه يي موادو څو قاچاق کوونکي او خرڅوونکي ونيول شول.

لومړي عملیات له نشه يي موادو سره ځانګړو پولیسو په ۱۴ ولايتونو کې وکړل چې په نتيجه کې يې ۳۰ قاچاق کوونکي او خرڅوونکي ونيول.

د يادونې وړ ده چې له دوی سره تر شلو کيلوګرامو ډېر بېلابېل نشه يي مواد هم نيول شوي دي.

د کابل د امنيه قوماندانۍ وياند فردوس فرامرز ازادي راډيو ته وويل چې دوهم عمليات د کابل ښار په څلورمه او اتمه ناحيه کې د درېيو کورونو تلاشي وه چې په نتيجه کې يې ۱۴۲۳ نشه يي ګولۍ، ۷۳ بوتله شراب او يو ميل وسله هم نيول شوې ده.

په ننګرهار ولايت کې شپږ تنه د ۷۲ کيلوګرامو نشه يي موادو د قاچاقو پرمهال ونيول شول.

په لومړيو عملیاتو کې يو تن چې غوښتل يې ۱۶ کيلوګرامه چرس د موټر په وسيله قاچاق کړي، د موټر د تلاشۍ پرمهال ونيول شول.

له نشه يي موادو سره د مبارزې معينيت د رسنيو دفتر ازادي راډيو ته وويل چې د دوی پولیسو دوهم عمليات په سرخ رود ولسوالۍ کې د استوګنې پر یوه کور وکړل چې په نتيجه کې يې ۵۶ کيلوګرامه چرس ونيول شول.

په کابل ښار کې تر سلو ډېر معتادین د درملنې لپاره روغتيايي مرکزونو ته يووړل شول.

د معتادينو د درملنې ابن سينا روغتيايي مرکز مشر محمد ظاهر سلطاني وايي، د عامې روغتيا وزارت د پولیسو په همکارۍ د کابل له لومړۍ، دوهمې، اتمې او ۱۲مې ناحيې څخه ۱۶۰ معتادين راټول او د درملنې لپاره د ابن سينا زر بستريز روغتيايي مرکز ته يووړل.

د يادونې وړ ده چې په مزار شريف کې څلور نور معتادين هم راټول او د معتادينو د درملنې په روغتيايي مرکز کې بستري شول.

په ننګرهار ولايت کې د درې جلا جلا عملياتو په نتيجه کې نږدې ۲۰۰ کيلو ګرامه نشه‌يي مواد ونيول شول.

لومړي عمليات چې د سرطان مياشتې پر نهمه نېټه په سرخ رود ولسوالۍ کې وشول، په نتيجه کې يې ۳۰ کيلو ګرامه چرس ونيول شول او په دوهمو عملياتو کې ۱۳ کیلو ګرامه ترياک، ۱۵ کيلو ګرامه ښیښه او ۱۹۰ کيلو ګرامه چرس ونيول شول.

درېيم عمليات هم په سرخ رود ولسوالۍ کې وشول چې په نتيجه کې يې ۶۴ کيلو ګرامه چرس ونيول شول. دا چرس په يوه موټر کې بار شوي او په پام کې وه چې يوې ګاونډۍ ولسوالۍ ته قاچاق کړل شي.

د دې درې پېښو په تړاو درې نفره هم نيول شوي دي.