په ننګرهار ولايت کې تر شل ټنه ډېر نشه يي مواد وسوځول شول.

دا نشه يي مواد چې د ۱۳۹۸ شمسي کال له پيل څخه بیا د ۱۳۹۹ کال د عقرب تر مياشتې پورې د امنيتي ځواکونو له خوا د ننګرهار ولايت د مرکز او ولسوالیو په بېلابېلو عملياتو کې نيول شوي وو، وسوځول شول.

د ننګرهار امنيه قوماندان غلام سنايي ستانکزي ازادۍ راډيو ته وويل، د نشه يي موادو (۵۷۰) قاچاق کوونکي چې له دې موادو سره يو ځای نيول شوي وو، له نشه يي موادو سره د مبارزې عدلي او قضايي محکمو له خوا محکوم شوي دي.

د بدخشان پولیسو تر پنځه سوه کيلوګرامو ډېرو نشه يي موادو د قاچاقو مخه ونيوله.

د بدخشان امنيه قوماندانۍ ویاند ثناالله روحاني ازادۍ راډيو ته وويل، له نشه يي موادو سره د مبارزې ځانګړو پولیسو په خواهان ولسوالۍ کې عمليات وکړل چې په نتيجه کې يې (۵۳۳) کيلوګرامه نشه يي مواد ونيول شول.

په دې نشه يي موادو کې هيرويين، چرس او تارياک شامل وو.

د دې موادو د قاچاقو په تور دوه تنه هم نيول شوي دي.

په لوګر ولايت کې لسګونه کيلوګرامه نشه يي مواد وسوځول شول.

اته زره بنګ او چرس چې د خوشي ولسوالۍ په دوو ځایونو کې زېرمه شوي وو، له منځه یووړل شول.

د کورنيو چارو وزارت وياند طارق ارین ازادۍ راډيو ته وويل، دا مواد د هغو عملياتو په نتيجه کې له منځه يووړل شول چې له نشه يي موادو سره د مبارزې ځانګړو پولیسو او هوايي ځواکونو په ګډه وکړل، خو د دې نشه يي موادو د ساتلو او تولید په تور څوک نه دي نيول شوي.

په کابل ښار کې تر شلو کيلو ګرامو ډېر نشه يي مواد ونيول شول.

د کابل ولایت امنيه قوماندانۍ وياند فردوس فرامرز ازادي راډيو ته وويل،۲۵ کيلو ګرامه چرس چې په يوه کورولا موټر کې پټ ايښودل شوي او په پام کې وه له شمالي ولايتونو څخه کابل ته قاچاق شي، په دسپيچري سيمه کې د پولیسو له خوا ونيول شول. د دې نشه يي موادو د قاچاقو په تور موټر چلوونکی هم نيول شوی دی.

د پکتيا پولیسو تر درې سوه کيلوګرامو ډېر چرس او بنګ ونيول.

د کورنيو چارو وزارت له نشه يي موادو سره د مبارزې معينیت وياند اسدالله يادګاري ازادي راډيو ته وويل، له نشه يي موادو سره د مبارزې ځانګړو پوليسو د سيد کرم ولسوالۍ پر يوه کور عمليات وکړل چې په نتيجه کې يې ۳۰۰ کيلوګرامه بنګ او ۱۱۰ کيلوګرامه اومه چرس ونيول شول.

پولیسو په ننګرهار ولایت کې د دوو جلا جلا عملياتو په نتيجه کې نژدې سل کيلوګرامه نشه يي مواد ونيول.

لومړي عمليات چې له نشه يي موادو سره د مبارزې ځانګړو پولیسو په اچين ولسوالۍ کې وکړل، په نتيجه کې يې ۸ کيلوګرامه هيروئين او ۸۰ کيلو ګرامه چرس ونيول شول.

د کورنيو چارو وزارت وياند طارق ارين ازادي راډيو ته وويل، دوهم عمليات په غني خېلو ولسوالۍ کې د نشه يي موادو پر يوه زېرمه وشول، د دې عملياتو په نتيجه کې ۶۰ کيلوګرامه چرس، پنځه کيلوګرامه ښيښه، نژدې پنځه کيلوګرامه تارياک او څه اندازه وسلې او مهمات هم نيول شوي دي.

په هرات ولايت کې لسګونه ټنه کېمياوي او الکولي مواد وسوځول شول.

په دې اړه د هرات امنيه قوماندانۍ وياند عبدالاحد ولي زاده رسنیو ته وويل، د هرات له نشه يي موادو سره د مبارزې ځانګړو پولیسو او نورو امنيتي ځواکونو ۶۵۴ لېټره شراب او پريکرسرونه، دغه ډول ۳۶۲۴۹ کيلوګرامه سوډيم کلورايډ وسوځول.

د يادونې وړ ده چې پولیسو دا مواد په تېرو دوو وروستیو کلونو کې په هرات ښار او ولسوالیو کې د عملياتو په نتيجه کې نيولي وو.

د دې موادو د قاچاقو په تور د څلورو بهرنيانو په ګډون ۴۳۵ تنه هم نيول شوي او د عدلي او قضايي ادارو له خوا مجازات شوي دي.

په کابل ښار کې د نشه يي موادو د قاچاقو او خرڅولو په تور اووه نفره ونيول شول.

د کابل امنيه قوماندانۍ وياند فرامرز فردوس ازادۍ راډيو ته وويل: له نشه يي موادو سره د مبارزې ځانګړو پولیسو د کابل ښار په دوولسمه ناحیه کې عمليات وکړل چې په نتيجه کې يې شپږ کيلوګرامه هيرويين ونيول شول، دا هيرويين د موټر په ټايرونو کې پټ ایښودل شوي او په پام کې وه چې پر معتادينو باندې وپلورل شي.

دغه ډول پولیسو د خيرخانې په کوتل کې هم عمليات وکړل چې په نتيجه کې يې د نشه يي موادو پنځه قاچاق کوونکي ونيول شول، دې قاچاق کوونکو څلور کيلوګرامه ښيښه په يوه سفري بکس کي ايښي او غوښتل يې چې د افغانستان له شمالي ولايتونو څخه يې کابل ته قاچاق کړي.

په تورخم کې لسګونه کيلوګرامه نشه يي مواد ونيول شول.

د کورنيو چارو وزارت وياند طارق ارين ازادۍ راډيو ته وويل: (۲۷۵) کيلوګرامه نشه يي مواد چې په يوه موټر کې بار شوي او په پام کې وه له هېواد څخه دباندې قاچاق کړل شي، پولیسو ونيول.

په دې موادو کې (۵۴) کيلوګرامه هيرويين، (۸۹) کيلوګرامه تارياک او (۱۳۲) کيلوګرامه چرس شامل وو. د دې موادو د قاچاقو په تور موټر چلوونکی هم نيول شوی دی.

د هرات پولیسو دې ولایت ته تر دېرشو زرو ليټرو ډېرو الکولو د قاچاقو مخه ونيوله.

د هرات د امنيې قوماندانۍ وياند عبدالاحد وليزاده ازادۍ راډيو ته وويل: له نشه يي موادو سره د مبارزې پولیسو په ګذرې ولسوالۍ کې عمليات وکړل چې په نتيجه کې يې (۳۱) زره او (۳۱۰) لېټره ايټايل الکول په ميرداود دروازه کي ونيول شول. دا الکول په يوه موټر کې بار شوي او په پام کې وه چې هرات ښار ته قاچاق کړل شي.

د دې موادو د قاچاقو په تور درې نفره هم نيول شوي دي.