په ارزګان کې نن سهار په یوه چاودنه کې دوه قومي مشران ووژل شول.

د ارزګان د والي ویاند عبدالله همت ازادي راډیو ته وویل؛ چې د دولت وسله والو مخالفینو د قومي مشر او د اصلاحي شورا د غړي ډاکټر نعمت الله د کور تر څنګ د ریموټ کنټرول ماین چاودنه کړې؛ چې په پیښه کې نوموړی د یوه بل قومي مشر حاجي مجید سره وژل شوی.

د همت په وینا په پیښه کې د قومي مشر نعمت الله دوه زامن هم ټپیان شوي دي .

د دې پیښی مسوولیت تر اوسه چا په غاړه نه دی اخستی

په بادغيس کې لس تنه سيمه ييز پوليس مسموم شوي چې چارواکي وايي څلور کسان په دې تړاو نيول شوي دي.

بله خوا په جلا پېښه کې د ماين چاودنې څلور تنه پوليس وژلي دي.

د دغو پېښو نور جزئيات له شرف الدين ستانکزي اورئ

د پکتیکا ځایي چارواکي وایي، چې د يحيى خېلو ولسوالۍ بازار کې د نن ورځې په ډله ایزو حملو کې شپږ حمله کوونکي او یو پولیس وژل شوي او دوه ملکي وګړي او یو پوليس ټپيان دي.

د پکتيکا والي محب الله صمیم ازادۍ راډیو ته وویل، چې په دې پیښه کې ۶ ځان وژونکي او دوو پولیسو ته مرګ ژوبله اوښتې.

خو د دې ولایت د ولایتي شورا وکیل بیا ازادۍ راډیو ته ویلي، چې په دې پیښه کې دوه سيمه ييز پوليس او دوه ملکي وګړي ټپيان شوي دي او اوس جګړه پاى ته رسېدلې ده.

طالب وياند ذبيح الله مجاهد بيا وايي، چې جګړه اوس هم روانه ده او د دوي شپږ ځان وژونکې حمله کوونکي د ولسوالۍ انګړ ته ننوتي او ګڼ شمېر چارواکو ته يې مرګ ژوبله اړولې ده.

د پکتیکا چارواکي وایي، د وسله والو طالبانو د تیرې شپې په ځان وژونکو حملو کې یوازې څلورتنه حمله کوونکي وژل شوي دي.

د دغه ولایت والي محب الله صمیم ازادۍ راډیو ته وویل، چې حمله کوونکي د سرحدي پولیسو په جامو کې راغلي وو، چې د شپې د دو بجو په شااوخوا کې له منځه ولاړل:

"دوي د سرحدي پولیسو په یونیفورم کې راغلي وو او له ځانه سره يي انتحاري واسکټونه درلودل او همدارنګه له دوي راکټ او کلاشینکوفونه هم ول، هیڅ یو ملکي ته مو زیان نه دی رسیدلی او زموږ امنیتي ځواکونو ته هیڅ زیان نه دی اوښتی."

ښاغلي صمیم زیاته کړه، چې د وسله والو کسانو هویت تر اوسه نه دی څرګند شوی.

تیر ماښام څلور وسله وال طالبان چې د ځان وژونکو حملو واسکټونه او وسلې ورسره وې د پکتیکا په مرکز ښرنه کې یوې سوداګریزې ودانې ته ننوتل او له هغه ځایه یې په امنیتي کسانو او حکومتي ادارو ډزې پيل کړې.

د طالبانو ویاند ذبیح الله مجاهد د دې حملې مسولیت منلی او ادعا یې کړې چې امنیتي ځواکونو ته یې درنه مرګ ژوبله اړولې.

په باجوړ کې په انتحاري حمله کې ۲۰ تنه وژل شوي دي او تر څلویښت زیات زخمیان دي.

په سیمه کې د ازادۍ راډيو خبریالان د چارواکو په حواله وايي، چې انتحاري حمله نن سهار د باجوړ ایجنسۍ په مرکز خار، په يوه بازار کې شوې ده.

د سیمې یوه اوسیدونکي ازادۍ راډیو ته وویل، چې حمله په داسې وخت کې وشوه، چې د ملیشه ځواکونو یوه ډله له سیمې تیریده.

په سیمه کې تر نامعلومو وخت پورې په ګرځيدو بندیز اعلان شوی دی.

په سیمه کې د پاکستاني طالبانو یوه ویاند، احسان الله احسان د حملې مسولیت اخیستی دی.

نن په کابل کې د طالبانو د برید له امله لږ تر لږه اووه تنه ووژل شول، دا حمله لږ ځنډ وروسته تر دې وشوه، چې د امریکا ولسمشر بارک اوباما په ناڅاپي سفر افغانستان ته ورسید او هلته یې د اوږدمهاله ستراتیژيکو همکاریو سند د کابل او واشنګتن تر منځ له ولسمشر کرزي سره لاسلیک کړ.

د کابل په ننني برید کې چې د قابل بای په سیمه کې د بهرنیو پر پوځي اډې ترسره شو، دوه امنیتي ساتونکي او پنځه ملکیان ووژل شول، اوولس تنه نور ټپيان شول.

په دې پیښه کې دوه زده کوونکي وژل شوې او پنځه نور ټپيان شوې دي. د افغانستان د پوهني وزارت دا کار غوندلی او له ښکیلو خواوو یې غوښتي دي چې د بریدونو پر مهال دې زده کوونکو او ښوونکو ته پاملرنه کوي.

د کندهار ولایت چارواکي وايي، هغه دوه وسله وال چې، د کندهار ولایت ماڼۍ ته دننه شوي وو، د پولیسو له خوا ووژل شول.

د کندهار ولایت د رسنیو دفتر، په یو خبرپاڼه کې وايي، چې دغه کسان تر ۱۱ بجو وروسته د ولایت ودانۍ ته دننه شوي وو او غوښتل یې چې د ولایت چارواکو ته زیان ورسوي.

ویل کیږي، چې د حملې پر مهال والي او د نوموړي مرستیال هم په ولایت کې دننه وو.

تر اوسه پورې د پولیسو او چاراکو د مرګ ژوبلې په اړه کوم معلومات نه دي خپاره شوي.

د وسله والو طالبانو ویاند قاري یوسف احمدي په یوه ټلیفوني پيغام کې ادعا کړې، چې دغه وسله وال د دوی ملګري دي.

دهلمند ولايت په موسى كلا ولسوالۍ كې دځانمرګو بريد كوونكو يوې ډلې د امنيه قوماندانۍ دفتر په نښه كړ، چې اته پوليس يې ووژل او دهغې ولسوالۍ امنيه قوماندان كوكه يې سخت ټپي كړ.

دهلمند د والي وياند داود احمدي رسنيو ته ويلي دغه پيښه نن يوولس بجې شوې ده. اول بريد كوونكو دچاوديدونكو توكو نه ډك موټر ته د امنيه قوماندانۍ مخې ته منفجر کړى، وروسته بريد كوونكي په امنيه قوماندانۍ ننوتلي دي او اته پوليس يې وژلي دي او د ولسوالۍ امنيه قوماندان يې ټپي كړى دى، چې د بهرنيو ځواكونو په نظامي اډه ښوراب كې تر تداوۍ لاندې دى.

احمدي وويل تراوسه دپيښي ډير جزئيات نه شته خو دوه ځانمرګي بريد كوونكي چې وسلې يې په لاس كې وې وژل شوي دي او بل تن يې د خپل موټربم سره له منځه تللٰى دى.

تراوسه ددي پيښي په اړه وسلوالو طالبانو څه نه دي ويلي.

په امريکا کې پوليس وايي، لږ تر لږه اووه کسان د کلفورنيا ايالت په يوه عيسوي پوهنتون کې د ډزو په نتيجه کې وژل شوي دي. پوليس وايي درې کسان په پېښه کې ټپيان شوي دي.

د پوليسو په حواله الاميدا ته نژدې يو مشکوک کس نيول شوى دى. د يوه ټلويزيون د راپور له مخې حمله کوونکى يو محصل دى چې په ټولګي کې يې پر نورو محصلينو ډزې وکړې، ګومان کېږي بريدګر به کوريايي الاصله امريکايي وي.

د هلمند ولایت سیمه ییز چارواکي وایي، چې نن له غرمې وروسته په مارجې ولسوالۍ کې د مین په چاودنه کې اته تنه ملکي وګړي وژل شوي دي.

د مارجې ولسوال عبدالمطلب مجبور ازادي راډیوته وویل، چې د سړک غاړې دا ماین په ریګي څلورلارې سیمه کې په یو ټونس ډوله موټر چاودلی دی.

ده وویل، چې په دې پیښه کې وژل شوي ټول ملکي وګړي دي، خو څرګنده یې کړه چې لاتراوسه د وژل شویو هویت نه دی، معلوم خو ښایي، چې د یوې کورنۍ غړي وي.

لاتراوسه د دې چاودنې مسوولیت کومې ډلې نه دی منلی.