نن د افغانستان او نیپال د نولس کلنو د کرکټ ملي لوبدلې د پنځوس اووریزو سیالیو په لومړی لوبه کې سره مخامخ کیږي.

دا لوبه د نیپال په کوربتوب د کابل پرمهال د سهار ۸:۴۵ دقیقې پیلږي.

د کرکټ نړیوال شورا پر خپلې رسمي ویب پاڼې ویلي، د افغانستان او نیپال د کرکټ د نولس کلنو لوبډلو ترمنځ د دریو پنځوس اووریزو سیالیو دویمه لوبه به د اپریل به ۶مه او وروستۍ یا دریمه لوبه به يې د اپریل په ۹ ترسره شي.

افغان لوبډله به له دې سیالیو وروسته د نولس کلنو نړیوال جام ته د لار موندنې په سیالیو کې چې د نپیال په میلپاني ښار کې ترسره کیږي ګډون وکړي.

په دغو سیالیو کې به افغان لوبډله د عمان، هانګ کانګ، متحده عربي امارات او نپیال پر وړاندې ولوبیږي.

د دې سیالیو غوره لوبډله به د ۲۰۲۶ کال د نولس کلنو کرکټ نړیوال جام ته لار ومومي چې د د زیمبابوي او نامیبیا په کوربتوب به ترسره شي.

د امریکا ولسمشر ډونالډ ټرمپ پرون چهارشنبې د (اپریل ۲مه) پر خپلو سوداګریزو شریکانو "متقابلې تعرفې" وضعه کړي دي.

هغه چې په سپینه ماڼې کې وینا کوله، د اروپايي ټولنې په ګډون يې پر ډیر شمیر هېوادونو تر دیرش سلنه پورته تعرفې ولګولې.

ټرمپ وویل، دا ورځ د "ازادۍ ورځ" ده او تل به د امریکا په تاریخ کې د صعنت د بیا زیږیدو د ورځې په توګه یادیږي.

د ټرمپ په ټکو، اورپايي ټولنې به ۲۰ سلنه، چین به ۳۰سلنه او جاپان به ۲۴سلنه مالیات پرې کوي.

هغه په خپلو خبرو کې وړاندې وویل، دا چې ایران پر امریکايي توکو لس سلنه مالیه لګولې په ورته کچه به امریکا ته تعرفه ورکوي.

له دې هېوادونو سربیره، ویتنام له۴۶ سلنه، هند له۲۶سلنه، اندونیزیا له ۳۲ سلنه، کامبودیا له ۴۹سلنه، مالیزیا له ۲۴سلنه، جنوبي کوریا له ۲۵ سلنه، ټایلنډ له ۳۶سلنه، تایوان له ۳۲ سلنه، سویس له ۳۱سلنه، اوکرایین او بریټانیا بیا هر یو له لس سلنه تعرفې سره مخ شوي دي.

ټرمپ پر مکسیکو او کاناډا هم ۲۵ سلنه تعرفه وضعه کړې ده.

ټرمپ د دې لوړو مالیاتو یا تعرفو وضعه کولو موخه د امریکايي کارګرانو دفاع یاده کړې ده.

د نوو تعرفو لګول د امریکا د تولیداتو د پیاوړتیا او د هغو هېوادونو د مجازاتو لپاره هڅه بلل شوې چې د ټرمپ په وینا "له کلونو راهیسې یې پر امریکا غیرعادلانه سوداګریزې تګلارې تحمیل کړې دي."

د امریکا ولسمشر ډونالډ ټرمپ له وینا څو شېبې وروسته، د نویو تعرفو یو اجرايي فرمان هم لاسلیک کړ.

د طالبانو د حکومت ویاند هغه راپورونه رد کړي چې ګواکې د دوی حکومت یوازې د امریکا پر وړاندې د جګړې هغو قربانیانو ته پيسې ورکړي چې د دوی په پلوۍ جنګیدلي دي.

ذبیح الله مجاهد پرون ناوخته پر خپلې ایکس پاڼې/ پخواني ټویټر ادعا کړې، " په هغوو یتیمانو، کونډو او معلولینو کې چې د حکومت له لورې ورته کلنۍ پیسې ورکول کیږي، د تیرې ادارې د عسکرو او پولیسو یتیمان، کونډې او معلولین هم شامل دي".

مجاهد وړاندې ویلي، دغو کسانو ته دولس نیم میلیارده افغانۍ بودیجه ځانګړې او پرې ویشل شوې ده.

یو شمیر رسنیو د چهارشنبې په ورځ د مجاهد په حواله ویلي و، "د طالبانو حکومت د هغوو کسانو کورنیو ته ځانګړې پاملرنه کوي چې د امریکا پرضد جګړه کې يې له دوی سره مرسته کړې ده."

مجاهد وړاندې په افغانستان کې د یتیمانو، کونډو او معلولینو شمیر شاوخوا شپږنیم لکه یاد کړی او ویلي دي، دغو کسانو ته چې د طالبانو، تیر جمهوریت او طبعي معلولین په کې شامل دي په کلني ډول پیسې ورکول کیږي.

د طالبانو د حکومت له پيله یوشمېر دولتي ماموران په معاشونو کې له ځنډه شکایت لري او متقاعدان بیا وایي چې تراوسه یې خپل دا حق نه دی ترلاسه کړی.

د ازبکستان ولسمشر شوکت میرضیایف وایي، په افغانستان کې ثبات د منځنۍ اسیا او اروپا په ګټه دی.

میرضیایف دغه څرګندونې له یورو نیوز سره په مرکه کې چې پرون سه شنبه ( د حمل په ۱۲مه) خپره شوې، کړې دي.

هغه زیاته کړې چې د افغانستان په وړاندې یې د هېواد سیاست تل پر عمل او اوږدمهاله ستراتیژۍ ولاړ دی.

د ازبکستان ولسمشر زیاته کړې چې منځنۍ اسیا د نړیوال سوداګریز لېږد رالېږد په مهمې کړۍ بدلېدونکې ده او هېواد یې هڅه کوي چې له افغانستان سره ترانس افغان او اروپا سره ترانس کسپین دهلیزونه پراخ کړي.

هغه زیاته کړې چې دغه اقدام کولای شي د نړۍ کلیدي بازارونو ته د منځنۍ اسیا لاسرسی اسانه کړي.

که څه هم د طالبانو حکومت تراوسه د هیڅ هېواد له خوا په رسمیت نه دی پیژندل شوی، خو ازبکستان د سیمې له هغو هېوادونو دی چې طالبانو سره تعامل لري او د طالبانو ډيپلوماتان یې منلي دي.

پاکستان به د اپریل په نهمه د پنځو هېوادونو د ښځینه کریکټ ټیمونو د لوبو کوربه توب وکړي.
دغه لوبې چې د کوربه پاکستان او ویسټ انډیز، بنګله دیش، ایرلنډ، سکاټلنډ او تایلند ښځینه کریکټ لوبډلې په کې برخه اخلي، د ۲۰۲۵ کال د ښځو کریکټ جام ته د دوو لوبډلو د غوراوي په هدف ترسره کیږي.

د کریکټ نړیوالې شورا " آی.سي.سي" نن د اپریل په دویمه نیټه ویلي، جام ته له مخکې شپږ لوبډلې مشخصې شوي، خو دوه نورې لوبډلې به پاکستان کې له لوبو وروسته مشخصیږي.

د ښځینه و کریکټ جام ته مشخصې لوبډلې د هند، استرالیا، انګلستان، نیوزلنډ، جنوبي افریقا او سریلانکا دي.

د ښځینه و د کریکټ د یو ورځنیو لوبو نړیوال جام د ۲۰۲۵ کال د سپټمبر له ۲۹مې د اکتوبر تر ۲۶مې په هند کې ترسره کیږي.

د امریکا پوځ وايي، د سیمه ییزو ګواښونو د مخینوي په موخه منځني ختیځ کې الوتکې وړونکې جنګي بیړۍ ځای پرځای کوي.

د ازادي راډیو د خبر مرکزي څانګه لیکي، د امریکا پوځ دا پریکړه داسې مهال کوي چې د ایران له ملاتړه برخمنه د یمن حوثي ډله په سره سنمدرګي کې پر امریکايي بیړیو بریدونه کوي.

د امریکا د دفاع وزارت ویاند شان پارنل د سه شنبې په ورځ په یو بیان کې ویلي، د کارل وینسون الوتکې وړونکې بیړۍ به ډیر ژر په منځني خیتځ کې د هری اس ترومن له بیړۍ سره یو ځای شي.

پارنل د دې کار موخه په سیمه کې امنیت، ثبات، د تیري مخنیوی او د سوداګرۍ وده یاده کړې ده.

د بدخشان مرکز فیض اباد د ریښتر په کچه ۴اعشاریه ۶ درجې زلزلې لړزولی دی.

د ولکینو دیسکوري په نوم ویب پاڼې ویلي، دا زلزله نن سهار ۳ او ۵۳ دقیقې د فیض اباد په ۶۵کیلو مټرۍ کې شوې ده.

تراوسه د زلزلې له کبله د احتمالي مالي زیانونو په اړه څه ویل شوي نه دي.

طالب سیمه ییزو چارواکو هم تراوسه په دې اړه څه نه دي ویلي.

بریټانیا ته ټول ورتلونکې اروپايی وګړي باید سر له نن چهارشنبې د (اپریل۲مه) دې هېواد ته د سفر پرمهال برېښنايي اجازه وپیري.

د رویترز خبري اژانس د راپور له مخې، دا پالیسي د بریټانیا حکومت له خوا د هغوو اقداماتو یوه برخه ده چې غواړي د خپلو پولو دننه د خلکو له داخلیدو مخکې د نورو هېوادونو په څیر د کډوالۍ پر ضد امنیتي تدابیر پیاوړي کړي.

د سفر دا برېښنايي اجازه یا (ETA) درلودل د ټولو هغو کسانو له لپاره لازمي ده چې بریټانیا ته د تګ لپاره ویزې ته اړتیا نه لري.

د دغې بريښنايي اجازې بیه لس پونډه چې ۱۲ یورو کیږي ده، او د اپریل له ۹مې وراخو به يې بیه ۱۶ پونډه ته پورته شي.

د ایرلنډ وګړي له دې امره مستثنی دي.

دا پالیسي د لومړی ځل لپاره تیرکال د غیراروپايي مسافرو لکه د امریکا، کاناډا او اسټرالیايي وګړو لپاره پلي شوې وه.

د رسمي شمېرو له مخې، په ۲۰۲۳ کال کې ۲۲ نیم میلیونه اروپايي سیلانیان بریتانیا ته تللي وو، پداسې حال کې چې دا شمېر په ۲۰۲۲ کال کې ۱۹ میلیونه و.

د ملګرو ملتونو د ماشومانو د ملاتړ اداره "یونیسف" وايي، په تیرو لسو ورځو کې د اسراییلو د هوايي بریدونو له کبله په غزه کې ۳۲۰ ماشومان وژل شوي او له ۶۰۰ ډیر نور ټپیان دي.

د یونیسف په هغه بیان کې چې د روانې اونۍ د دوشنبې په ورځ خپور شوی راغلي، په وژل شویو او ټپیان کې هغه ماشومان هم شامل دي چې د مارچ په ۲۳مه د الناصر په نوم روغتون کې د برید پرمهال وژل شوي وو.

د یونیسف په ټکو، ډیر شمیر وژل شويو ماشومانو د بې ځایه شویو په کمپونو، خیمو او یا هم د کورونو په کنډوالو کې پناه اخیستې وه.

اسراییلو له حماس وسله والې ډلې سره له نژدې دوه میاشتې اوربند وروسته د مارچ میاشتې په ۱۸ پر غزې یو ځل بیا هوايي بریدونه پیل کړل او ورپسې خپل عملیات ځمکنیو بریدونه ته هم وغځول.

امریکا او اروپايي ټولنه حماس ترهګره ډله ګني.

د امریکا د خزاني او عدلیې وزارتونونو د ایران پر قدس هوايي ځواک د بې پیلوټه الوتکو د پرزو د خرڅون له کبله پر یوې شبکې چې له شپږو بنسټونو جوړه وه، او دوو نورو کسانو بندیزونه لګولي دي.

دې وزارتونو د بندیزونو اعلان پرون سه شنبې د اپریل په لومړی نیټه کړی دی.

د ازادي راډیو د فردا څانګې د راپور له مخې، دې شبکې په ایران کې د "هسا" او "شهید باقري" په نوم هوايي شرکتونو ته د تجهیزاتو په برابرولو کې مرسته کوله.

دغه شبکه چې شپږ بنسټونه په کې شامل دي په ایران، متحده عربي امارت او چین کې فعاله ده.

د امریکا د خزانې وزیر سکاټ بسنټ ویلي، د ایران د بې‌پیلوټه الوتکو او توغندیو پراخېدل نه یوازې امریکايي ملکي او پوځي وګړو، بلکې د امریکا شریکان او متحدانو ته ګواښ پېښوي.

د هغه په ټکو، دا تجهیزات ډیر وخت د بې ثباته کوونکو ډلو په ځانګړې ډول د ترهګرو او نیابتي ځواکونو لاس ته ورځي.

د امریکا د ملي امنیت په اړه د "ولسمشرۍ ماڼۍ د دویم نمبر یاد داشت" له مخې چې د ۲۰۲۵ کال په فبرورۍ میاشت کې صادر شو پر ایران د اعظمي فشار سیاست لا هم دوام لري.

د دغه یادداشت له صادرېدو راهیسې دا د ایران د وسلوالو شبکو پر ضد دوهم پړاو بندیزونه بلل کېږي.