د ملګرو ملتونو امنیت شورا د غزې د جګړې د پای ته رسولو لپاره د امریکا د ولسمشر ډونالډ ټرمپ پلان تصویب کړ.
روسیې او چین چې د ویټو حق درلود له رایې ورکولو ډډه وکړه او په دې ترتیب یې د دغه پریکړه لیک تصویب ته لار خلاصه کړه.
د دغه پریکړه لیک په اساس سیمې ته د نړیوالو ساتو ځواکونو د استولو اجازه ورکول کېږي.
اسراییل او د فلسطین وسله والې ډلې حماس، چې متحده ایالات او اروپايي ټولنه یې یوه ترهګره ډله ګڼي، تیره میاشت د غزې لپاره د ولسمشر ټرمپ د ۲۰ ماده ییز پلان لومړۍ مرحله ومنله، چې په دوه کلنه جګړه کې د اوربند او د بندیانو د تبادلې غوښتنه کوله.
خو د انتقالي ادارې د جوړولو او د هغو هېوادونو د ډاډمنولو لپاره چې غزې ته سوله ساتي ځواکونه لیږي د یاد پریکړه لیک تصویب اړین وو.
پریکړه لیک وايي چې د ملګرو ملتونو غړي هیوادونه کولی شي د ولسمشر ټرمپ په مشرۍ د سولې شورا سره یوځای شي. دا شورا به د غزې لپاره د بیارغونې او اقتصادي ثبات پروګرامونه وڅاري.
پریکړه لیک یو نړیوال ځواک ته هم واک ورکوي چې په غزه کې د بې وسلې کولو پروسه پلي کړي، چې پکې به د وسلو راټولول او د پوځي زیربناوو ویجاړول شامل وي.
د امریکا متحده ایالتونو ولسمشر ډونالډ ټرمپ په یوه بیان کې د ملګرو ملتونو له خوا د دغه پریکړه لیک له تصویبیدو هرکلی کړی دی.
هغه په خپله ټولنیزه شبکه تروث سوشیال کې په یوه بیان سره چې سپینې ماڼۍ هم خپور کړی ویلي: «ټولۍ نړۍ ته دې د ملګرو ملتونو د امنیت شورا له خوا د دې فوق العاده رایې ورکولو په خاطر مبارکه وي. څو شېبې مخکې یې د سولې د هغه بورډ ملاتړ وکړ چې زه یې مشري په غاړه لرم او د نړۍ تر ټولو ځواکمن او درانه رهبران به پکې وي.»
ټرمپ دا د ملګرو ملتونو په تاریخ کې تر ټولو لوی تصویب بللی چې په خبره یې ټولې نړۍ کې به د لا زیاتې سولې لامل شي.
حماس بیا په یوه بیان کې ټینګار کړی چې وسلې نه سپاري او د اسراییلو په وړاندې یې جګړه یو مشروع مقاومت دی. په دې بیان کې، حماس د نړیوال ځواک له ځای پرځای کولو سره خپل مخالفت څرګند کړ.
د پرېکړه لیک له تصویب وروسته په یوه خپره شوې اعلامیه کې، حماس زیاته کړې چې "دا پرېکړه لیک په غزه باندې د نړیوال خوندیتوب میکانیزم تحمیلوي چې زموږ خلک او زموږ ډله یې مخالفت کوي."
په ملګرو ملتونو کې د امریکا سفیر مایک والټز وویل دا پرېکړه لیک، چې د ولسمشر ټرمپ د ۲۰ ټکو پلان پکې شامل دی، "د فلسطین د خپلواکۍ لاره پرانیزي ... چیرې چې جګړه؛ سولې او د سیاسي افق امکان ته لاره هواروي."
د فلسطین ادارې د پرېکړې هرکلی وکړ او ویې ویل چې په دې پلان کې د ګډون لپاره چمتو دی.
پرېکړه لیک په اسراییل کې هم له ګډو غبرګونونو سره مخ شوی، ځکه چې اسراییل باور لري دا پرېکړه لیک د خپلواک فلسطیني دولت د جوړولو لپاره لاره هواروي، هغه مسله چې ښي اړخې ډلې او د دغه هیواد صدراعظم یې مخالفت کوي.
