د متحده ایالتونو د بهرنیو چارو وزارت [د عدالت لپاره د انعامونو] پروګرام دوشنبه په خپله پاڼه په دې اړه یوه اعلامیه خپره کړې.
په اعلامیه کې راغلي چې د طالبانو استخباراتو د ۲۰۲۲ کال په اګست کې دا امریکايي تبعه نیولی دی.
د اعلامیې په اساس: «عدالت لپاره د انعامونو پروګرام د محمود شاه حبیبي د ځای موندلو او بیرته راستنیدو په اړه معلوماتو لپاره تر ۵ ملیونو ډالرو پورې انعام وړاندیز کوي.»
اعلامیې زیاته کړې چې حبیبي د اسیا مشورتي ګروپ د ځینو نورو کارکوونکو سره یوځای د طالبانو استخباراتو ونیوه خو له ښاغلي حبیبي او یو بل کس پرته نور ټول نیول شوي کسان خوشې شوي.
د طالبانو حکومت تر اوسه هم نه ده تایید کړې چې محمود شاه حبیبي له دوی سره بندي وي.
د امریکا د حکومت په اعلامیه کې هم راغلي چې د :«طالبانو په نوم حکومت هم تر اوسه د هغه د ځای یا وضعیت په اړه هېڅ معلومات نه دي ورکړي»
محمود شاه حبیبي د افغانستان د ملکي هوایي چلند د خپلواکې ادارې پخوانی رییس وو او د جمهوریت تر سقوط وروسته یې په کابل کې یو شرکت مخته ووړ.
