اوکراییني چارواکي وايي ډرونونه په لرګینو صندقونو کې ځای پر ځای شوي وو او د روسیې له خاورې دننه توغول شوي.
د اوکراین د استخباراتو چارواکو د نوم نه ښودلو په شرط د ازادې اروپا راډیو اوکراییني سرویس ته ویلي چې ممکن تر ۴۰ پورې بم غورځونکې الوتکې ویشتل شوي وي.
اس بي یو روسته په یوه بیان کې هم وویل چې بریدونو "د روسیې فدراسیون په اصلي اډو کې د ستراتیژیکو کروز توغندیو ۳۴ سلنه لېږدوونکي" په نښه کړل او جمعاً شاوخوا ۷ ملیارد ډالر زیان یې ورساوه.
د ډرون په وسیله دا عملیات د روسیې په خاوره کې دننه د اوکرایین جسورانه بریدونه او د روسیې استخباراتي او پوځي ادارو ته یو لوی شرم ګڼل کېږي.
د اوکراین ولسمشر ولودومیر زیلینسکي په ټیلیګرام کې لیکلي چې د دغو عملیاتو لپاره یو نیم کال چمتووالی روان وو.
هغه زیاته کړې: «یوه واقعاً ښه پایله. او یوه لاسته راوړنه چې اوکراین په خپلواکه توګه رامینځته کړې.». «دا زموږ ترټولو لرې عملیات وو»
روسي چارواکو تر اوسه د دې ادعاوو په اړه غبرګون نه دی ښودلی، خو د دغه هېواد د دفاع وزارت په یوه بیان کې ویلي چې په پنځو سیمو - مرمانسک، ایرکوتسک، ایوانوو، ریازان او امور - کې هوايي اډې په نښه شوې، چې په دوو کې یې "څو الوتکو اور اخیستی".
وزارت ادعا کړې چې په ایوانوو، ریازان او امور سیمو کې بریدونه شنډ شوي دي.
په ورته وخت کې، د روسیې ټیلیګرام چینلونو ګڼ شمېر عکسونه او ویډیوګانې خپرې کړې چې ډرونونه له کانټینرونو الوځي او په څو ځایونو تر لګېدو وروسته چاودنې او اور رامنځته کوي.
د اوکراین د استخباراتو ادارې یوه ویډیو خپره کړه چې ډرونونه پکې د پارک شویو توپولف بم غورځونکو الوتکو سره لګېږي او څو ویډیوګانې ښیي چې لوګي د څو اډو څخه پورته پورته کیږي.
د روسیې اوږد واټن ستراتیژیک بم غورځوونکو، چې د اوکراین په وړاندې د هیواد په جګړه کې کلیدي رول لوبولی، د اوږد واټن کروز توغندي ویشتل چې د اوکراین د هوايي دفاع له حد څخه ډیر لوړ وو.
د روسیې د څو سیمو واليانو د اوکراین د بې پیلوټه الوتکو لیدل تایید کړي، که څه هم دوی په دې اړه تبصره نه ده کړې چې ایا کومه الوتکه لګېدلې که څنګه.
د راپورونو له مخې، په شمال کې د مرمانسک او په مرکزي روسیه کې د ریازان په هوايي اډو او همدارنګه د سایبریا د ایرکوتسک په سیمه کې یوه اډه په نښه شوې، چې د اوکراین له پولې څخه ۵۲۰۰ کیلومتره لرې ده.
د ایرکوتسک والي ایګور کوبزووا ویلي دا لومړی ځل و چې په سیمه کې د اوکراین ډرون لیدل شوی.
د اوکراین استخباراتي خدماتو هغه عکسونه هم خپاره کړل چې د یوه ګودام دننه په لرګینو صندقونو کې ډرونونه ښکاروي.
د اوکراین د استخباراتو یوه چارواکي، چې د نوم نه ښودلو په شرط یې خبرې کولې، وویل ډرونونه د دوی ادارې روسیې ته وړي دي. د لرګینو صندقونو دړې له لرې لارې په اتومات ډول خلاص شوي او بیا ډرونونه د برید په هدف ترې الوتلي دي.
دې ادارې وویل د ډرون دا عملیات چې د غڼي جال نومېده د توپولوف تو-۲۲ او توپولف تو-۹۵ جنګي جیټ الوتکې، او همدارنګه د برایوف A-۵۰ د لومړني خبرتیا الوتکې ویجاړې کړي.
د روسیې بریدونه
اخوا بیا روسیې وړمه شپه په یوه روزنیز مرکز په برید سره د اوکرایین ۱۲ سرتیري وژلي دي.
د اوکرایین د پياده قواوو قومندان میخایلو ډراپټي چې له پيژندل شویو جنګي قومندانانو دی د دې برید په غبرګون استعفی ورکړې. معلومه نه ده چې ولسمشر زیلینسکي به د هغه استعفی ومني که نه.
د استانبول خبرې
اوکرایین له روسیې سره د استانبول تر خبرو یوه ورځ دمخه ډرون عملیات کړي.
تمه ده د دوشنبې په ورځ د روسیې او اوکرایین استازي د ترکیې په استانبول ښار کې د دویم دور خبرو لپاره سره کښیني.
د تیرې میاشتې خبرو لږ محسوس پرمختګ وکړ، خو دواړو خواوو موافقه وکړه چې سلګونه جنګي بندیان تبادله کړي.
د روسیې بریدونه په وروستیو اونیو کې ګړندي شوي، او اوکرایني چارواکو خبرداری ورکړی چې مسکو ممکن د نوي برید لپاره چمتووالی ونیسي.
زیلینسکي تیره اونۍ وویل چې روسیې د اوکراین په شمال ختیځ کې سومي ته نږدې شاوخوا ۵۰،۰۰۰ سرتیري ځای پر ځای کړي دي. اوکرایني چارواکو د سیمې د لسګونو ښارونو د تخلیې امر کړی دی.
